LITURGI KEBAKTIAN

MALAM PASSION II
HKI RESORT BENGKULU
Selasa, 7 April 2020 Pkl 19.00 – Selesai

1. Votum
Kep. Keluarga : "Marhitehite Goar ni Debata Ama, dohot Goarni Anak Na Tuhan Jesus Kristus,
dohot Goar ni Tondi Parbadia, na manompa langit dohot tano on, dipasaor
ma dame-Na tu tondinta be! Amen".
Rap mandok ma hita di tangiangta i:
Keluarga : Ale Jesus Tuhannami, bereng hami na dison. Pinarmahan-Mi do hami, saluhutna
na dison. Sai asi rohaM di hami sai pangolu hami on, Amen.
2. Marende BE. No. 212: 1-3 “Haholongon Na Badia”
1. Haholongon na badia, Sian Tuhan Jesus i
Sai songgopi sai bongoti, Roha dohot tondingki
2. Las ni roha ni na sonang, Di banua ginjang i
Sai pasonang sai pasabam, Sihol na di rohangki
3. Hasonangan hadameon, Na ro sian Jesus i
Sai pahosa au na loja, Asa bulus rohangki
3. Ayat dohot Tangiang
Kep. Keluarga: Tongon do angka sahitta diusung ibana, jala angka pardangolanta diporsan;
alai anggo rohanta mandok: Debata do maminsang, mamungkul dohot
pasipal ibana. Hape ala ni pangalaosinta ibana tartullang, binahen ni
hajahatonta ibana mabugang. Ampe tu ibana pinsangpinsang parhitean ni
hasonanganta, jala binahen ni bugangna malum itahilala (Jesaya 53:4-5)
Martangiang ma hita:
Ale Debatanami na di banua ginjang, Debata parholong dohot parasi ni roha.
Manongtong do holongmu manghaholongi dohot mampargogoihon hami jolma pardosa
jala na lea on. Disuru ho do AnakMu na sasada i, ima Tuhan Jesus Kristus tu portibion,
pola manaon haberniton holan asa malua hami sian dosa dohot hamatean. Buhai ma
roha dohot pingkirannami, asa dibagasan unduk ni roha hami manjalo anakMu Jesus
Kristus gabe habonaran nami. Togu ma hami dibagasan hatigoranMu asa manongtong
haporseaon nami dibagasan Jesus Kristus Tuhannami. Amin.
4. Marende BE. No. 212: 4-6 “Haholongon Na Badia”
4. Sai palambas ma rohangku, Dompak angka dongan i
Asa tung ringgas rohangku, Lao manesa dosa ni i
5. Habasaron hadameon, Na ro sian Tuhanki
Gohi roha dohot tondi, Unang munsat sian i
6. Haholongon sian Jesus, Sai paias rohangkon
Sai pabali nasa tihas, Asa ias tondingkon
1
5. Manjaha Bibel 1:
Bapak: Dungi, onom ari nari asa dapot ari pesta Paska i, sahat ma Jesus tu huta Betania, na
niinganan ni si Lazarus, na sinunggul ni Jesus sian na mate. Jadi dipauli nasida ma
disi panganon ujuan di Ibana; si Marta do manghobasi , si Lazarus ma sada dongan
na mangan disi. Digoari do panganon i panganon ujuan, i ma sada panganon na
dipatupa laho manyambut tamu na sangap situtu. Ditingki i ma dibuat si Maria sahati
miak Nardus na arga na marsaor, dimiahi ma pat ni Jesus, obukna ma dibahen
mangalapu. Jadi digoki uap ni miak I ma bagas i.
Ibu : Dipatupa pe songon i sada partanda do i dalan tu panghobasion tu sada raja, jala
pangaradeon tu sada Raja na mangadop hamatean. Jadi sian angka sisean-Na, si
Judas Iskariot na naeng manjeheon Ibana, mandok: "Boasa so ginadis miak i arga
toluratus hupang, bahen silehonlehon nian di angka na pogos?". Alai ndada na pogos
sinarihonna umbahen na didok songoni, panangko do Ibana tahe, diusung do asiasi
ni halak, ai tu ibana dipasahat puro i. Dung i ninna Jesus ma mangalusi: "Pasombu ma
ibana, ai di parade doi hira tu ari hatatanom-Ki. Ai tongtong do adong na pogos di
tongatongamuna, alai anggo Ahu ndang tongtong di lambungmuna.
Anak: Intap na tarbahensa do na niulana i; na manjoloani do ibana mamiahi pamatangku
songon di na mananom. Situtu do hatangkon tu hamu; manang didia di liat portibion
dijamitahon muse barita na Uli on, hatahononna do nang binahenna i gabe baritana".
Dung i diboto torop sian halak Jahudi ma naung disi Ibana, jadi ro ma tusi ndada
alani Jesus sambing; naeng idaonna nasida do huhut si Lazarus naung pinahehe-Na i
sian na mate. Alai nunga ditahi angka Sintua ni Malim i naeng bunuonnasida nang si
Lazarus. Ai ala ibana do umbahen torop Jahudi laho tusi jala porsea tu Jesus. Dung i
laho mandapothon huta Jerusalem, sahat ma nasida tu sosor Betpage, mandonokhon
dolok Jetun. Sian i ma disuru Jesus sisean-Na dua halak. Ninna ma: "Lahoma hamu tu
sosor na di jolomuna an, mamintor jumpang hamu ma disi tambat halode sada rap
dohot anakna; harhari jala togu hamu ma i tu Ahu. Jadi molo tung adong na mandok
hatana tu hamu. alusi hamu ma: Na ringkot do i di Tuhan i. Dung i pintor loasonna
ma". Alai masa pe songoni, asa jumpang na hinatahon ni panurirang i: "Paboa hamu
ma tu boru Sion: Ida ma, na ro ma Rajam manopot ho, na lambok do rahana, halode
do hundulanNa dohot anak ni halode boban".
Bapak: Dungi laho ma angka Sisean i patupahon na nidokkon nasida. Alai laho mangharhari
anak ni halode i nasida,
didok angka nampunasa ma tu nasida: "Boasa harharanmuna anak i?" Jadi didok
nasida ma: "Na ringkot doi di Tuhani". Diboan nasida ma halode i dohot anakna,
diampehon ma uanakna, diampehon ma ulosnasida tu ginjangna, laos dipahundul ma
Jesus tu atas na i.
Ibu : Dipahembangkon ma ulos nasida tu dalani, na deba nari manallihi angka ranting ni
hau jadi dipanserakhon tusi. Alai sude natorop i, angka na di jolo na mangihut sia
mangolopolophon: "Hosianna di Anak ni Raja Daud. Pinasupas ma na ro marhitehite
Goar ni Tuhan i. Hosianna malab Jadi di na bongot Ibana tu huta lerusalem, gaor ma
2
 nasahuta i, angka ninna ma: "Ise do halak i?" Jadi dipandok natoropa. "Jesus
Panurirang i do, na sian huta Nasaret, na di luat Gamed. Alai ndang diantusi sisean-
Na i hian angka na masa i, dung pe marsangap Jesus, asa diingot nasida naung
marhahonaan tu Ibana do hape natarsurat i ro di pambahenan nasida tu Ibana.
Anak : Laos dihatindangkon natorop angka na mandongani Ibana do paboa naung jinou-Na
isi Lazarus sian tanoman laho manungguli ibana sian na mate. Jadi ala naung dibege
natorop i barita tanda na binahen-Na i, umbahen na ditomu nasida Ibana. Jadi didok
angka Parise ma sama nasida: "Diida hamu do na so marniula na binahenmu, ai liat
portibion do paihutihut Ibana.
6. Marende BE No. 88 : 1 - 2 “Jesusku Naung Manobus Ahu”
1. Jesusku naung manobus ahu sai naeng haholonganku Ho
Tu dolok Golgata Ho laho Nionjar ni holongMu do
Hupuji nasa asiMi Alai gumodang holongMi
2. Tarsolsol bagi do rohangku Paidaida dangolMi
Marningot sasude dosangku Ai i do na tinaonMi
Hupuji nasa asiMi Alai gumodang holongMi
7. Manjaha Bibel 2:
Bapak: Alai adong ma deba halak Junani, dongan ni angka na nangkok i, laho martangiang di
ari raya i.Jadi didapothon nasida ma si Pilippus na sian Betsaida na di Galilea,
mangelehelek ibana, ninna ma: Tuannami, naeng do idaonnami Jesus!
Dung i ro ma si Pilippus, dipaboa ma i tu si Andreas; dung i ro ma si Andreas rap
dohot si Pilippus paboahonsa tu Jesus.
Gabe didok Jesus ma mangalusi nasida: Naung dapot ma tingkina, asa marsangap
Anak ni jolma i!
Ibu : Na tutu situtu do na hudok on tu hamu: Ndang na ganda eme i, molo so madabu tu
tano jala mate; dung pe mate, asa godang parbuena. Agoan hosa ma na
marhamaolhon hosana; alai na mangkasogohon hosana di portibi on, i do na
mangaramotisa sahat tu hangoluan salelenglelengna. Ahu ma diihuthon ganup na olo
mangoloi Ahu; jala ia disi Ahu, disi ma dohot anak somangku. Pasangapon ni Ama i
do ganup na mangoloi Ahu.
Anak : Na bonsa do rohangku nuaeng; aha ma dohononku? Palua ma Ahu, Amang, sian tingki
on? Alai tahe, ala ni i do umbahen na sahat tingki on tu Ahu. Pasangap ma Goarmi,
Amang! Dung i ro ma soara sian banua ginjang, mandok: Nunga hupasangap, laos
pasangaponku do muse! Jadi dung dibege, natorop i na jongjong disi, ninna nasida
ma: Ronggur do i. Angka na asing mandok: Adong do surusuruan ni Debata na
mangkatai dohot Ibana.
Bapak: Dung i ninna Jesus ma mangalusi nasida: Ndada ala ni Ahu, umbahen na ro soara
ondeng; ala ni hamu do! Nuaeng ma jumpang tingkina, asa diuhum portibi on;
sipabalion ma nuaeng raja ni portibi on. Anggo Ahu, dung dipatimbo Ahu sian tano
on, taitonku do saluhut nasida tu Ahu!
3
Ibu : Pangalaho ni parmatena do dipatuduhon marhitehite hatana ondeng. Asa dialusi
natorop i ma Ibana: Hubege hami di surat ni patik i, na mian do Kristus i ro di
salelenglelengna; boasa dohononmu: Ingkon sipatimboon do Anak ni jolma i? Ise do
Anak ni jolma i, na nidokmi?
Anak : Dung i didok Jesus ma tu nasida: Satongkin nari nama Panondang i di hamu. Mardalan
ma hamu, binsan di hamu dope Panondang i, asa unang ditahopi na holom i hamu.
Ianggo na mardalan di na holom, ndang diboto i, manang dompak dia ibana laho.
Binsan di hamu dope Panondang i, porsea ma hamu disi, asa gabe anak ni Panondang
i hamu! I ma dihatahon Jesus; dung i ditadingkon ma nasida. (Johannes 12:20-36)

8. Marende Buku Ende No. 173:1-3 “Sai Mulak” (P.Pelean:Dipamasuk tu Amplop)

1. Sai mulak, sai mulak, Ho naung lao jalang i
Ai na dao ho nuaeng, Holang sian tuam
O parjalang ho, Mulak, mulak ma ho
Mulak, mulak ma ho
2. Sai mulak, sai mulak, Na sininta leleng
Sai magopu roham, Ai godang do dosam
O parjalang ho, Mulak, mulak ma ho
Mulak, mulak ma ho
3. Sai mulak, sai mulak, Sian tano na dao
Sidangolon sambaing, Do turpukmu disi
O parjalang ho, Mulak, mulak ma ho
Mulak, mulak ma ho

9. Tangiang Panutup
Kep. Keluarga : Rap ma hita mandok di tangiang hatopanta i:
Sude : Ale Amanami nadi banua ginjang, Sai pinarbadia ma goarMu, Sai ro ma harajaonMu.
Sai saut ma lomo ni rohaM, Di banua tonga on songon nadi banua ginjang.
Lehon ma tu hami sadari on hangoluan siapari, Sesa ma dosanami, songon
panesanami di dosa ni dongan namardosa tu hami. Unang hami togihon tu
pangunjunan, Palua ma hami sian pangago.Ai Ho do nampuna harajaon dohot
hagogoon rodi hasangapon saleleng ni lelengna. Amen.

Kep. Keluarga :Singkop ma di hamu asi ni roha dohot dame, marhitehite

panandaonmuna di Debata dohot di Jesus, Tuhanta i!
Sude : Amen. (3x diendehon)