ACARA PARPUNGUAN KELUARGA

PARNINGOTAN ARI HAMAMATE NI TUHAN JESUS

HKBP DISTRIK XIII ASAHAN LABUHAN BATU
TOPIK:
“PANGHOPHOPON NI JESUS NA PALUAHON”
Jumat , 10 April 2020
I. Pangaradeon:
a. Marpungu ma di sada inganan na tipak laho patupahon parmingguan.
b. Disagima angka naboi manguluhon acara.
c. Ia so marhite amplop dipasahat pelean, diparade ma pelean dohot inganan ni
pelean.
II. PARMINGGUON (U = Uluan ; R = Ruas )
(Molo Parhalado manguluhon, dipungka ma marhite votum : Marhitehite goar ni
Debata Aman, dohot goar ni anakNa Tuhan Jesus Krits, dohot goar ni Tondi
Pobadia, amen).
U : Taparade ma rohanta, huhut dibagasan roha na mandok mauliate tu Debata na
mangaloas hita mamestahon Ari Parningotan di Hamamate ni Tuhanta Jesus
Kristus alani tapungka ma Parmingguanta di tinngki on sinondangan ni topik
minggu PANGHOPHOPON NI JESUS NA PALUAHON. Antong marende ma
hita sian BE. No. 581:1-2 “Sangap di Jahowal”
1. Marende BE. No. 581:1-2 “Sangap di Jahowa”
1. Sangap di jahowa na sun timbul i, Balga ni holongNa ndang tarasam i
Dilehon AnakNa na sasada i, Manobus hita jolma pardosa i
Puji ma Debata ale manisia, Las roham las roham somba ma Debata
Dapothon Jahowa na sun timbul i, Marhite AnakNa Tuhan Jesus i
2. Tung so hasuhatan do basaNa i, Marhite AnakNa ni lehonna i.
MudarNa durus do di hau silang i, Rara pe dosanta ias dibaen i.
Puji ma Debata ………

2. VOTUM – INTROITUS – TANGIANG: B.1-24

U : Na gabe pangoloi do Kristus i paima mate, pola tung mate tarsilang. Didia
angka soropmi , ale hamatean? Didia pangagoonmu ale banua toru?
Haleluya
R : (Mangendehon): HALELUYA.....HALELUYA....HALELUYA.

1
 U : Martangiang ma hita: Ale Tuhan Jesus, na mate tarsilang do Ho humophop
hami halak pardosa, ala ni holong ni rohaM na godang I di hami. Ajari hami
paingot-ingot Ho na targantung di hau pinorsilang humophop hami, ai Ho do
haporusannami maradophon rimas ni Debata dohot panoruion ni patik dohot
panolsolion ni roha. Sai sesa jala urasi ma dosa sian rohanami marhitehite
TondM na badia I, jala pargogoi ma hami maralohon roha sibuk dohot
hisap-hisap dohot sangkap-sangkap ni rohanami laho mangihuthon Ho, na
mangolu jala namanggomgomi rap dohot Amai dohot Tondi Porbadia ro di
saleleng ni lelengna. Amen

3. Marende BE. No. 82:1- 2 “O Jesushu tu bugangMu”

1. O Jesushu tu bungangMu, ro marsomba rohangkon
Sai tarpuji sai tarpuji, na pamalum tondingkon
2. Tung dipatMu o Jesushu, solsolangku rohangko
Tangisanghu na tinaonMu, ala jat ni rohangkon

4. PATIK NI DEBATA:
U : Patik ni Tuhanta di hita di Minggu Parningotan ari hamamate ni Tuhan Jesus
sadari on, ima Konfessi HKBP Bindu 1B.2,songononma didok disi: Debata
do namanompa , marmudumudu dohot manggomgomi na sa na tarida dohot
na so tarida , sian mula ni mulana sahat ro di saleleng ni lelengna.
R : Dipapatar Debata amado diriNa marhite jesus Kristus Anakna na sasasda I,
Sipalua hajolmaon, jla disahaphon Ibana do haluaon I marhite TondiNa
Tondi Porbadia I, umbaen na dipatau hita mandok “amang” tu Ibana.
U : Marhite I taondolhon do balga ni holong ni roha ni Debata Ama I, na
manarihon na sa na ringkot di ngolu ni jolma, marhite dalan na niantusan ni
jolma i.
R : Alani tatulak do poda na mansoadahon panompaon ni Debata di nasa na
adong songoni nang fatalisme (takdir, sibaran, bagian) na mamboan jolma I
tu sikap na passip sambing, dohot namanjaha parpeak ni bintang
nangmanjaha gurat-gurat ni tangan
U : Antong rap mangido gogo ma hita tu adopan ni Tuhanta
S : Ale Tuhan Debata, sai pargogoi ma hami mangulahon na hombar tu
patikMi. Amen

5. Marende BE. No. 79:1 -2 “Di na ponjot rohangku”

1. Di na ponjot rohangku binaen ni dosangki
Paingot ahu Tuhanku , di hamamateMi
Di hau na pinarsilang I digarar Ho utanghu
Marhite mudarMi
2
 2. Tama longang rohangku mamingkir hata on
PanghophopMi Tuhanku di au pardosa on
Ai hosa ni AnakNa I, dilehon Debatangku
Tumobus tondingki

6. TANGIANG MANOPOTI DOSA: (B3-C11)

U : Tatopoti ma dosanta tu adopan ni Debata, martangiang ma hita: Ale Tuhan
Debata, Ama ni Tuhan Jesus Kristus , Ho do Debata pargogo na so hatudosan
sitompa na sa na adong , paruhum na tigor, na manguhumi jolma manisiaa!
R : Na ro do hami tu joloM manopoti dosanami, angka na huula hami marhite
sian pangalaosionnami di patikMu , ima marhitehite sian tubutubu ni
rohanami na roa i, nag sian panghataionnami na so ture, ro di
pangalaosionnami di hisap-hisap ni rohanami.
U : Na tama situtu do hona uhum hami ala ni dosanami i, alai na tarsolsol bagi do
hami nuaeng ala ni i. Asima rohaM di hami ale debatanami. Pardenggan basa
jala parasi roha do Ho alani Anak haholongan ni rohaM, Than Jesus Kristus
Tuhannami.
R : Sai sesa ma dosanami saluhutna , jala suru ma Tondi Porbadia tu rohanami be ,
asa tarbahen hami mangoloi Ho dibagasan hatigoran dohot habadiaon, gabe
sahat hami tu hangoluan na so ra suda, na pinarbagabagaM di angka na
porsea di anakMu Tuhan Jesus Kristus Tuhannami Amen
R :(mangendehon):BE. No. 86: 1 “Silang na badia i”
♪
Silang na badiai, ho do lombu-lombungki
Maralohon dosa I, dohot pandelean i
Di sude sitaonon I Ho do lombu-lombungki

U : Bagabaga ni Debata taringot tu hasesaan ni dosanta: Alani pangalaosionta do

umbahen na tartullang Kristus, jala binahen ni hajahatonta do Ibana
mabugang, ampe tu Ibana pingsangpinsang parhitean ni hasonaganta, jala
binahen ni bugangNa malum itahilala. Hasangapon ma di Debata na di
ginjang!
S : Amen.
7. Marende No. 85: 1 - 2 “Sai ingoton ni rohangku”
1. Saingoton ni rohangku, hansit na tinaon ni Tuhanku
Uju I di Golgata
2. Na so dung adong salaNa, gabe ampe tu Ibana
dosa ni portibion

3
8. E P I S T E L:
U : Tajaha ma Hata ni Debata turpuk epistel di Minggu sadari on, tarsurat di
Heber 10: 19-29.: Lehetna i di atas ni angka dolok angka pat ni parbarita na
uli, na patubegehon hadameon, na mamaritahon barita na uli, na
patubegehon hatuaon, na mandok tu Sion: Debatam do bangkit Raja.
R : Soara ni jolma parhalmu, angka dipangiar be soarana rap marolopolop, ai
adop bohi be diida nasida, molo mulak Jahowa tu Sion.
U : Pangiar ma soaramuna rap marolopolop ma hamu, ale angka pasipasi ni
Jerusalem, ai nunga marpangulahi roha ni Jahowa mida bangsona, nunga
dipalua Jerusalem.
R : Nunga pola dipatoltol Jahowa tanganna na badia i di adopan ni saluhut
bangso parbegu, jadi saluhut ujung ni tano on marnida hatuaon ni
Debatanta.
U : Ruar, ruar, borhat ma hamu sian i, unang jama hamu na ramun! Ruar ma
hamu sian tongatonganasida! Manguras ma hamu, ale angka na mangusung
ulaula ni Jahowa.
R : Ai ndang pola humalaput hamu laho ruar, manang marlojong songon halak
na maporus, ai Jahowa do manguluhon hamu, jala Debata ni Israel
mangiringiring hamu sian pudi.
U : Ima sahatna. Martua do namanangihon hata ni Debata jala naumpeopsa
R : Amen
9. Marende BE. No.622: 1“Mansai nalnal di angka partingkian”
1. Mansai nalnal diangka partingkian, sinondang ni silangMu Tuhanki
Sian hatiuron na marsinondang, holongNa na so halompoan i
Sude bangso do marpanghirimon, tu sondang asini rohaNa i
Songon parluga na manghalungunhon, par binsar ni mata ni ari i

10. MANGHATINDANGHON HAPORSEAON:

U : Ta hatindanghon ma haporseaonta i, songon na hinatindanghon ni donganta
sahaporseaon di sandok portibi on, rap ma hita mandok
S : Ahu porsea ................

11. TINGTING DOHOT TANGIANG:(diparade ganup huria ma tingtingna)

12. Marende No. 88 :1- 2 “Jesus naung manobus au” ( Pel. Ia + Ib)
1. Jesus naung manobus ahu, sai naeng haholongangku Ho

4
 Tu dolok Golgata Ho laho ni onjar ni holongMu do
Hupuji na sa asiMi, alai gumodang holongMi
2. Tarsolsol bagi do rohangku, paidaida dangolMi
Marningot sasude dosangku, ai ido na tinaonMi
Hupuji na sa asi Mi alai gumodang holongMi

13. J A M I T A: Mateus 27: 45-56

Huria na hinaholongan ni Tuhanta Jesus Kristus. Di bagasan ari

sadari on, marningot do hita di ari hamamate ni Tuhan Jesus, na tangkas
tahatindangkon marhite haporseaonta ia hamamateNa ima laho patupahon
haluaonta. Ia turpuk jamita on ima taringot tu barita hamamate ni Jesus
dung gantung di hau pinarsilang i, lumobi di tingki parpudi andorang so tos
hosaNa. Nunga tangkas tapaihutihut songon dia partinaonan ni Tuhan Jesus
marhite parpunguan Passion, jala nuaeng di turpuk jamita on ma barita
hamamate ni Tuhan Jesus.
Tar di pukul tolu botari mangangguk ma Tuhan Jesus.
Mangangguk (berseru dengan nyaring), ima sada cara (ekspresi) ni
sasahalak ala manaon na hansit situtu. Saleleng pardalanan ni Tuhan Jesus
mamungka sian na ditangkup Ibana, sahat tu na diparsilangkon, hira sahali
on do dibaritahon na mangangguk Tuhan Jesus. Hape tangkas do taboto
ndang na hapalang godang ni ni angka na mambaen hansitan Ibana, isara ni
linsinglinsing, pastappastap dohot lan na asing. Di anggukanggukNai,
dijouhon Jesus ma : Ale Debatangku, Debatangku, boasa tung
tadinghononMu Ahu (Eli, Eli, lama sabachtani). Tutu, nunga ampe tu
Ibana dosa ni sandok portibi on. Ndang so borat jala hansit situtu i, ampe tu
sahalakSa dosa ni sandok jolma, nda patut do tutu mangangguk Ibana ?
Ndang na mandele Tuhan Jesus dipandohan on, alai marhite
anggukangguk on, dipatuduhon Jesus do na jolma situtu do Ibana, manaon
sude na hansit, jala dihilala Ibana do i songon panghilalaan ni jolma na
somal. Na dienet do anggukangguk on songon angguk ni jolma na gale
situtu sian Psalm 22 : 2. Pola do digombarhon disi hagaleon dohot haleaon
ni parPsalmen i songon gea. Pangkilalaan na songon i ma nuaeng diae
Tuhan Jesus, marlea situtu, pola sude mangarehei, jala gale situtu soada na
mangurupi. Asa molo manggangguk Jesus di silang i, ndang soara

5
pandelean i, alai parsitutuon dohot parsihohoton di bagasan hagaleon ni
pamatang manjou Debata Amai, di na nidokNa : Debatangku.
Mambege anggukanggukNa i, ditahi sahalak na jongjong disi ma
mangalehon siinumon na asom tu Ibana marhite limut naung binutongan.
Siinumon na asom i diantusi nasida boi mangorui hansit ni sitaonon ni
angka na mabugang. Dungi mangulahi ma muse Jesus marsoara na gogo,
dungi tos ma hosaNa. Anggukangguk ni Jesus manang soaraNa na gogo
ima patuduhon hinahansit dohot hinabernit ni na tinaonNa di hau na
pinarsilang i. Songon jolma na tutu Ibana, sintong di ditaon Ibana
partinaonan ni sahalak jolma songon jolma na asing.
Laos di na sangombas i, maribak ma hirehire di bagas joro i sian
ginjang tu toru. Hirehire na mamolati angka inganan di bagas joro, gabe
ndang adong be parholangan ni jolma manisia manopot Debata, ai nunga
dipasahat Jesus be diriNa gabe pelean, pelean pardengganan ni jolma na
mardosa dohot Debata na badia. I do mambahen angka na porsea talup
mandompakhon Debata, jala talup pasahat peleanna tu Debata so pola
adong be parhitean, alai holan di bagasan Jesus Kristus.
Marnida na masa i gabe dohot do induk ni soldadui
manghatindanghon : tutu do on Anak ni Debata. Songoni do angka
boruboru na holan manatapnatap sian na dao, ala sai digohi biar do nasida,
alai sai tong satia paihutihut Jesus sahat tu hau na pinarsilang i. Nasida
sandiri pe singkop do manaksihon angka na masa tu Jesus sahat tu
hamamateNa.
Huria na hinaholongan ni Tuhanta Jesus Kristus.
Adong ma manang na piga tona na mansai arga siingotonta marhite
hamamate ni Tuhan Jesus mdi bagasan turpuk jamita on :
1. Jolma na gale jala na lea do hita, songon gea na so margellok. Jesus
pe hea do ditaon na songoni, jala pola mangangguk Ibana. Tontu jotjot
do dibagasan hagaleon ni pamatangta on tahilala godang angka boban
na mansai borat, na sipata ndang tartea hita ala ni dokdokna, umbahen
sipata olo hita mangangguhi tu Debata. Alai boban na dumokdok ima
dosanta, ai i do boban na boi mambahen hita sahat tu hamatean na
manongtong. Sajagojago ni jolma, tung so boi do ibana sandiri
paluahon ibana sian upa ni dosana. Asa anggo taringot tu uhum ala dosa
i, dos do na gale dohot na gogo, na mora dohot na pogos, na sangap
dohot na lea, gabe songon gea do sude. Alai marhite hapapajal ni Jesus
6
 di hau piarsilang i, nunga di tea Ibana saluhutna, jala dianggukhon
dibagasan angguk na mansai gogo tu Ama i, gabe neang ma tahilala, ala
nunga ampe tu Jesus saluhutna, jala malua ma hita sian hamatean na
manongtong, jala tolhas tu hangoluan na manongtong.
2. Maribak hirehire, patuduhon, ndang adong be pamolati di hita molo
naeng pajumpang dohot Debata. Nunga tung diungkap Debata dalan
laho pajumpa dohot Ibana, laho manjou goarNa, martangiang tu Ibana,
songoni laho pasahathon peleanta, termasuk pasahat dirinta gabe pelean
na mangolu tu Debata.
3. Dohot ma hita manaksihon na binahen ni Tuhan Jesus i tu hita, ima na
pinorsanNa i dosanta, jala dilehon hangoluan tu hita. Haru induk ni
soldadu i, dohot do mandok : Tutu do On Anak ni Debata. Hita pe nda
patut ma dohot manghatindanghon Jesus Anak ni Debata di bagasan
ngolunta ? panindangionta i ma na gabe patau halak manghaporseai
Ibana asa dohot nasida taruli di haluaon na pinatupa ni Jesus.
4. Satia mangihuthon Jesus. Songon angka boruboru i, ndang hea
ditadinghonnasida Jesus atik pe sai dibagasan biar, alai dipaihutihut do
na masa tu Jesus i sahat ro hamamateNa. Patut do patuduhononta
hasatiaonta mangihuthon Jesus, ndada holan tingki sonang, manang uju
dapotan angka parsaulian dohot las ni roha hita, alai songoni ma nang
uju dibagasan hamaolon.

Tuhanta i ma na mandongani hita, dilehon ma roha na marsihhohot

manghaporseai jala mangihuthon Ibana. Tutu taadopi do nuaeng sahit bolon
na posa covid-19 di sandok portibi on, sude ma hita manggogo martangiang tu
Debata asa Debata na paontokhon, jala songon tanda na parsidohot do hita
mangula paontokhonsa, taihuthon ma angka hatontuan na pinamasa ni
panggomgomi, songoni na angka uluan ni Hurianta. Dipasupasu Tuhanta ma
hita. Amen.

14. Marende No. 86;1- 2 “Silang na badia i”(Pel. II)

1. Silang na badiai, ho do lombu-lombungki
Maralohon dosa I, dohot pandelean i

7
 Di sude sitaonon I Ho do lombu-lombungki
2. Na sana huulai dang tau hasonaganhi,
Na ringkot pe rohangki, pola ro nang ilungki
Holan asi ni rohaM, pangurupi o Tuhan
3. Ro do au nuaeng tu Ho, sai palambas ma rohaM
Nunga pola pola mate Ho, ala asi ni rohaM
Jangkon au na dangolon, sai ulosi tondingkon
15. Tangiang Panutup: Tangiang Ale Amanami – Amen, Amen, Amen:
(Molo Parhalado do na manguluhon, dipadohot ma pasahat pasupasu).