LITURGI KEBAKTIAN

NATAL MORIA

GBKP KLASIS PANCUR BATU 2018

Tema : Tangkas Me Perukuren Si Terbuni (Lukas 2 : 35)

Sub Tema : Ketubuhen Tuhan Jesus ku doni enda mabai Moria

nalangi pusuh perukuren ngaloken Jesus sebab
ketubuhenNa e mpetangkas kerina perukuren si terbuni,
subuk perukuren si ngaloken ntah si nulak Ia
PERSIKAPEN :
1. Kata Pengalo-ngalo Ibas MC (Protokol) bagepe penjelasen ras
pengaturen kerna Liturgi Natal enda
2. Rende KEE No. 313 : 1-2 “Pulung Mriah Kal Kami Kerina”

1. Pulung mriah kal kami kerina

Jumpa I bas rumah si badia
Reh min Kam o Bapa si Mulia
Glah kerina badia jadina
Reff Salsali pusuh kami, layasi ukur kami
Pengarapen reh teguhna, kiniteken reh paguhna
2. Wari ras berngi nggo ibentasi
Keleng ateNdu tetap nemani
I bas mberat Kam lalap nampati
I bas susah Kam si ngelayasi Reff Salsali…

3. Kata Penaruh Kubas Kebaktin Natal

Kekelengen ni Dibata, wari enda bengket me kita kubas Natal Moria i

bas tahun enda. Arah Natal enda siinget me kerna kekelengen Dibata Bapa si
mbelin si nggo mereken AnakNa si Tonggal man gunanta, enda me pemere si la
tertukur dingen la terusahaken manusia. Kerehen AnakNa e me tanda man
banta maka Dibata la erngadi-ngadi ngukurken si mehuli man gunanta. Kita me
anak-anak Dibata siikelengi dingen siipilihNa jadi sikerajangenNa, emaka
aruslah kita kerina pe ngasup nggeluhken perukuren bagi perukuren Dibata.
Nggeluh ngukurken si mehuli nandangi isi jabu, gereja bagepe sekelewetta.
Dame si ibaba Kristus e lah min singajari kita ibas nggeluhken perukuren si
sentudu ras sura-suraNa. Emaka mari dage sipesikap ukurta ibas kita
nggejabken kekelengen Dibata e arah kebaktin Natal Moria enda, si banci
mabai kita tetap ngukurken kekelengen ras dame siibabaNa man banta gelahna
kita pe tetap ngasup nggeluh ibas perukuren si bali ras perukuren Kristus.

4. Rende KEE No. 114 : 1-3 “Sendah Jumpa Kita Wari Raya E”
1. Sendah jumpa kita wari raya
Peringeten tubuh Tuhan Yesus e
 Nusur ndahi kita manusia e, keriahen kap e
Ermulia me Tuhanta, e si puji me gelarNa
Perdamen ibre Dibata, Tuhan Yesus kap e

2. Mari kita ku kuta Betlehem e

Muji nembah man Tuhanta Yesus e
E tinenges Tuhan si perkuah e, Dibata Bapa e
Ermulia me Tuhanta, e si puji me gelarNa
Perdamen ibre Dibata, Tuhan Yesus kap e

3. Sembah kami man baNdu si tubuh e

Kam si maba dame ku pertibi e
Bengket min ku tendi ukur kami e, dameNdu o Yesus
Ermulia me Tuhanta, e si puji me gelarNa
Perdamen ibre Dibata, Tuhan Yesus kap e

KEBAKTIN

1. Votum, Salam, Invocatio

L : Kebaktin Natal Moria enda ibenaken ibas gelar Dibata Bapa, si

enggo mereken AnakNa si Tonggal man banta manusia, ibas gelar
AnakNa Yesus Kristus si mpelimbarui perukuren manusia ras ibas
gelar Kesah si Badia, si mpegegehi manusia nggeluh i bas
kegeluhen si mbaru.

Perkuah ate ras dame ibas Dibata Bapa, ras ibas Tuhan Yesus
Kristus nari, ibas kerembaken Kesah si Badia ras kita kerina gelah.
Amin

P : Amin… Amin… Amin…

L. : "Aku kap TUHAN, si mperdiateken perukuren manusia, si nguji

pusuh manusia si ersimulih kempak kalak rikutken lagu langkahna, sue ras kai si
ibahanna" (Jeremia 17:10)
2. Rende KEE No. 193 : 1 3 “Bas Sinasa TinepaNa”

Bas sinasa tinepaNa, Tetap krina rende trus

Nden-enden pujin Badia, Muji gelar Penebus

Reff: Glo…………ria , muliaken Tuhan!

Glo…………ria, muliaken Tuhan
Bas ingan si meganjangna, Bala Tuhan i Surga

Rende mriah ia krina, Man Tuhan Penebusta Reff

Krina ginenggem Dibata, Pehaga si Tubuh e

Surga doni rende ia, Krina alokenNa pe Reff
3. Puji-Pujin Man Dibata (Perp. Kundul)

L : Ersuraklah man Dibata alu meriah, o doni kerina.

P : Rendelah dingen permuliaken gelarNa. Pehagalah Ia alu puji-pujin.

Kerina doni nembah man baNa, rendelah muji gelarNa.

L : Alu keleng ateNa iperdiatekenNa bangsa-bangsa sabab Ia me

pemerentah si erkuasa seh rasa lalap. Kursi kinirajanNa la terundu.

P : Ia sinjaga kita maka tetap nggeluh, dingen la ipelepasNa kita

ndabuh.

L : Begikenlah o kam kerina si erkemalangen man Dibata, sebab keleng

ateNa seh rasa lalap.

L+P : Amin.

Rende KEE No. 163 : 1, 4, 5 “Badia, Badia”

 1. Badia, badia! Tuhan sierkuasa,

Dem me doni enda salu kemulianNa

Badia, badia! Tuhan bala surga

Kam me kap Bapa si ermulia

4. Badia, badia! Tuhan si ni surga,

Kam si njadikenca, krina si lit enda

Badia, badia! Rende bala surga,

Terpuji Ia Raja nu surga

5. Badia, badia! Tetap perkelengNa,

Nehken pendiloNa man jelma perdosa

Badia, badia! Tuhan penebusta,

Sembahlah Ia, Yesus Tuhanta

6. Koor/VG/Solo

7. Kerna Kinilangsupen Manusia Ngergaken Kekelengen Dibata

 L : Adi siinget kerna perdalanen kegeluhenta i doni enda, megati kel
kita ikuasai peraten doni enda si petundal ras sura-sura Dibata.
Ngaku me kita maka kita enda manusia si lemah si dem
keterbatasen, teridah arah perbahanen, pengerana ras perukurenta
encedai hubungenta ras Dibata bagepe sapih-sapih kita manusia ras
tinepa sideban. Dage mari arah pertotonta sekalak-sekalak ngadap
man Dibata ngakuken dosa-dosanta.

Kerina : Ngendeken bagin KEE No. 304 “O Tuhanku O

Dibatangku”

O Tuhanku O Dibatangku, rusur aku nimbak pedahNdu

Nggo meluat krina geluhku, labo dame banNa pusuhku

L : Yesus reh ku doni enda guna maba dame si mpelimbarui kerina

perukurenta, tapi la iadiatendu pe dame si isehkenNa man bandu e.

P : Ngaku kami o Tuhan maka megati kal la iergaken kami dame si

iberekenNdu e, nggeluh kami bagi kalak si la nandai Dibata. E me
erbahansa la erguna perukuren kami dingen gelap pengertin kami.
Emaka lanai ieteh kami mela aminna pe la kami siangkan ras teman
kami, megah iakap kami aminna pe kami nggeluh erserap-serap ras
teman kami, kiniersadaan si iarapkenNdu nggo ndauh ibas kami
nari.

Kerina : Ngendeken bagin KEE No. 304 “O Tuhanku O

Dibatangku”

O Tuhanku O Dibatangku, rusur aku nimbak pedahNdu

Nggo meluat krina geluhku, labo dame banNa pusuhku

 L : Me kin kam nge ajar-ajar Dibata e? Kam ipilih ibas kekelengen
guna ndalanken si mehuli. Me nggo kin kam erlajar kerna si mehuli
ibas Ia nari?

P : Ieteh kami maka kami enda ajar-ajarNdu tapi peraten kami min ate
kami si jadi ibas kegeluhen kami. Mesera dingen mesui kel
ngikutken pengajarenNdu e o Tuhan. Emaka daging kami ngenca
teridah ngikutken Kam tapi perukuren kami bagi manusia si male
denga. Itamburi denga alu cian ate, perampus, pernembeh, erelem-
elem. Tuhu kote dingen la kami ngasup o Tuhan, sampatilah kami.

Kerina : Ngendeken bagin KEE No. 304 “O Tuhanku O

Dibatangku”

O Tuhanku O Dibatangku, rusur aku nimbak pedahNdu

Nggo meluat krina geluhku, labo dame banNa pusuhku

L : Kam kap anak-anak kekelengen Dibata, erkiteken kekelengenNa

kempak kam maka Ia reh ku doni enda. Alokenlah Ia janah usihlah
kerina perbahanenNa si mehuli. Pergunakenlah kesempaten si lit
ibas kam alu mehuli, sabab wari-wari enda la kap mehuli.

Rende : KEE No. 292 : 1, 2 “Manusia Nggo Erdosa”

1. Manusia nggo erdosa meluat mekelesa

Pusuh labo lit damena di sirang ras Dibata

Beginkenlah pendiloNa ikutkenlah kataNa

Geluh pelimbarui Na, rembak kita ras Ia

2. Megati meganjang ukur nogan nimbak kataNa

Piah dungna latih rukur di sirang ras Dibata

Beginkenlah pendiloNa, Malang erlajar baNa

Di mberat pe bas geluhta, Menahang di ras Ia

8. Berita Pengalemi Dosa Arah Ketubuhen Yesus Kristus (Perp. Tedis)

L : “Sabab bage pengkelengi Dibata doni enda, emaka iberekenNa

AnakNa si Tonggal, gelah ola bene ise pe si tek man Bana, tapi
gelah dat kegeluhen si tuhu-tuhu si la erkeri-kerin” (Yoh 3 : 16)

Rende KEE No. 123 : 1 3 “Ketuahen Me”

1. Ketuahen Me, riah ukur me,

Ketubuhen ni Yesus e.

Sangap me jelam, reh me Tuhanta,

Mari surak, aleplah : Haleluya!

2. Ketuahen me, riah ukur me,

Ketubuhen ni Yesus e.

Malem me ateta, rdame ras Dibata,

 Mari surak, aleplah : Haleluya!

3. Ketuahen me, riah ukur me,

Ketubuhen ni Yesus e.

Yesus penawarta tubuh man gunanta,

Mari surak, aleplah : Haleluya!

9. Koor/VG/Solo
10. Nagani Lilin Natal

L : “Bangsa si nggeluh i bas kegelapen enggo ngidah sinalsal si erkinar.

Kalak si ringan i bas awih-awih kematen engggo isalsali terang si
harhar. Enggo iberekenNdu keriahen si mbelin o Tuhan, malem
ateNa ibahanNdu” (Jes 9:2-3a)

Marilah dage sisagani lilin Natal sebage tanda maka terang e nggo
reh ku tengah-tengah geluhta, ersinalsal terang Tuhan i bas pusuhta
dingen nggit kita maba terang Tuhan i bas geluhta.

Rende KEE No. 135 : 1- 3 “Berngi E” (Perpulungen kerina nagani lilin)

1. Berngi e nggo kepe, Yesus reh ku doni e

Nusurlah ngangkut dosanta me kin

 Jadi kap musillah sangap pagin

Asa si tek Tuhan e, asa si tek Tuhan e

2. Anak e bujur pe, Singena me aku pe

KiniulinNdu tadingken Kam kap

Bengket ku doni lah trang si gelap

Aku daramenNdu, aku daramenndu e

3. Berngi e, nggo kepe Tuhan reh ku doni.

Padan Dibata teridah tetap

KinikelengenNa banta me kap.

Tuhan si puji gelah, Tuhan sipuji gelah

11. Renungen Natal

12. Pengakun Kiniteken (Perp. Tedis)

13. Koor/VG/Solo

14. Nehken Persembahen Pengataken Bujur (Perp. Kundul)

L : Seh paksana man banta nehken persembahen pengataken bujurta

man Tuhan, kata Dibata si jadi palas man banta ibas nehken
persembahen pengataken bujurta emekap: “Emaka bengket ia
kubas idahna Anak ndai ras Maria nandeNa. Jenari erjimpuh ia
 nembah Anak e, ibuatna erta-erta siibabana e, jenari
ipersembahkenna eme : Emas, Kumenen ras Mur.“ (Matius 2:11)

Rende KEE No. 420 : 1 3 “Asa Gegeh Ras Kengasupen”

1. Asa gegeh ras kengasupen, kami nehken persembahen

Endesken kami baNdu Tuhan, alu dem keriahen

Reff Ajari kami ngergagaken, talenta ras kiniliten

Arah ukur ras perbahanen, Tuhan ipermuliaken

2. Mbue tuhu kami aloken, pasu-pasuNdu o Tuhan

KelengNdu I gejabken kami, Kam kap si negu kami
Reff Ajari kami …

3. Arak-arak tetap o Tuhan, kegeluhen anakNdu e

Gelah ngasup tetap o Tuhan, makeken si tading e
Reff Ajari kami …

Pertoton kerna Persembahen + Pertoton Syafaat.

15. Tekad ras Pengutusen (Perp. Tedis)

L : O kam sikukelengi, kam anak-anak Dibata kap. Kam ikelengi

dingen ipilih Dibata jadi sikerajangenNa. Ia me Penampatndu si
mereken dame man bandu, uga dage nindu?

P : Malem ate kami o Bapa erkiteken nggo iidah kami Penampat e alu
mata kami jine. Ialoken kami me Penampat e, nggeluh me kami
bagi kai si ituduhken Penampat e. ngasup kami jadi terang si
ersinalsal si ncidahken kemulian Tuhan man isi jabu, gereja bagepe
kerina sekelewet kami.
 L : Gegeh i bas Dibata nari iberekenNa man bandu gelah tetap
jingkangndu erdalin i bas dalinNa.

P. : Erpadan kami o Tuhan makeken gegeh e guna erbahan si mehuli bas

kegeluhen kami. Icidahken kami kegeluhen sekalak Moria si
terpenalem dingen terteki.

16. Rende KEE No. 381 : 1, 3, 4 “Sura-Sura Yesus Bangku“

1. Sura-sura Yesus bangku, ersinalsal tetap

Nggeluh bujur ras mehuli, si ngena ateNa

Reff Ersinalsal terang, em sinisuraken Yesus

Ersinalsal terang, ku tetap ersinalsal

3. Kupindo Yesus nampati, njaga pusuhku e

Gelah ngasup ersinalsal, ngikutken Tuhan e

Reff Ersinalsal terang …

4. E me kesikel tedehku, ngelai Tuhanku

Seh ku I rumah Bapangku, senang geluhku je
Reff Ersinalsal terang …

17. Pertoton Tuhan (Ngendeken KEE No. 252)

Bapa kami si ni surga, glarNdu pe badia min
Rehlah min kinirajanNdu, sehlah min bagi pratenNdu
I doni enda bagi ni surga
 Breken kami nakan cukup, bas wari si sendah enda
AlemiNdu salah kami, bagi nialemi kami
Salah kalak si lit man kami
Ola min kami, ibaba Kam ku bas percuban
Tapi olangilah kami, idur si ilat nari
Kam kap si mada Kinirajan bagepe Kuasa
Ras kemulian si ndekha-ndekahna
Amin

18. Pemasu-masun

L : Aku kap Dibatandu si seri nderbih, genduari, pagi ras seh rasa
lalap. Erkiteken sie, tetaplah kinitekendu, dalankenlah kegeluhendu
ibas doni enda, dingen alokenlah pasu-pasu idur Dibatanta nari : “
Ipasu-pasu janah ikawali Dibata kita (kam), siang ayo Dibata
ersinalsal ibabonta (ndu) janah melias ateNa ngenehen kita
(kam). Itatap Dibata ku kita (kam), janah malem ateta (ndu)
ibahanNa.” AMIN.

P : Amin… Amin… Amin…