"I SUAN MÁNALAKSAN"

(Suán = John, Irû = Peter, Mánalaksan = woodcutter)

Kéning balén ning Aráyat, ating métung a makuáltang makuáltang pamilya, yá pin ing pamilyá nang Irû.
I tátang na métung yang makuáltang dátû at ya balámu prinsipi ya king karélang kabalénan. Kaibat i Irû,
métung kareng paburítu nang gagáwan yá pin ing mángásu. Maralas, mámanik lang bunduk kayábe ne i tátang
na búlus dó reng ásu da, managal lang usa, sáka ro tandusan, panáan, barilan, nánu man gamítan da.
Mísan a aldo, mángásu ya i Irû kayábe ne i tátang na at mékárakap lang usa. Kétang karakap da, tambing
da neng kinátat at saka de dinérang, nilútú karin. Kábang mámangan la, mébaknal ya i Irû, ikit neng ménamutlâ
ampong ménuling. Métakútan ya i tátang na mamamate né ing anak na.
Ginaléwung ne ing tátang na "O anak ko, ninánu ka? Ninánu ka?"
Saktu kanian, i Suan, mánalaksan ya atiu ya búsal ning bunduk dindam neng gágaléwung ing matua. Tébílí ne
ing kayang palakul, mémulayí ya pénintun né itang gagaléwung. Disnan nó kanian, i tátang makasiklód ya
árapan ning anak na, at ing anak na mabié ya pa naman óneng matuling ne. Lépítan neng Suan, ábagut ne itang
bútul ning usa a mítárak king akmúlan na. Mékapangisnáwa ya i Irû, mípasnó ya ing tátang, mékalmá ya.
"O makó náku, mánalaksan ku pa."
"Kapámû", anang Irû. "Kuldas ka búkas king kabalénan na ning Aráyat, makatuknang ku king palásyu. Ing
tátang ku, ya pin ing dátû, panáyan da ka karin, Maragul ku útang a lub kéka úlí mu kinabié ku. Ing burí ku, é
ku bísang mikaka útang a lub, kailángan kung pasalámat kéka. Puntalan mu keng palásyu at éganaganang burí
mu, bié ku kéka. Sabyan mú mû, é ka maríne, panáyan da ka búkas ne".
"Sige pû, umé náku". Méko ne pára mánalaksan ne.
Kabukásan ábak a maránun, makaslag ya ing aldo miggayak ne pára típa né keng bunduk at munta keng
Aráyat. Atin yang ásaganan matua.
"O tung, nú ka ume?"
"Munta ku pú king palásyu. Sinábi na pung Irû, itang prinsipi.." Sélése ne itang na'ng miliári kang Irû.
"Sinábi na pu nánu mang kailángan ku kuanan ku, nánu mang burí ku, anyaran ku."
"Métung mú ing bié kung kausúkan kéka nak".
"Nánu pú ita?"
"E ka mányad kuálta o gabun o pibandian."
"Nánu pung anyaran ku?"
"Bálú mu yan, ing anak ayan, atin yang búbug a sasalikut, sisipítan ne lálam ning kilikíli na. Yápin ing kabal na
ita."
"Nánan ke pú ita?"
"Ay, mawága ya ita tung. Nung ákit mé ita, búbug ya, kasindagul yang pésus atin yang busbus libútad, sulutan
meng dútung ita tung."
"Nánu pung maliári?"
"Luntó la reng tigbálang, kularyut, siklod la árapan mu at gáwan da ngan ing burí mung pagawa karéla."
"A makanta po?".
"Wa, é ku bálú nung bálú nang Irû ita, péro ing Ingkung na kayá ya ibat yan, inyang mébait ya pépasípit dé king
kilikíli na, yan ing anyaran mu ita. Bálú ku é néman gagamítan ita."
Minta né karin, atiu ya keng árapan na, séganan neng tambing Irû.
“Ay, karagul ku pásalámat kéka, nung e kéka méte ná ku. Dakal a dakal a salámat. Kéni, túkí ka kanáku munta
kata keng budéga.” Tikian dé reng dakal a káwal.
“Buklat yé ing budéga.” Biklat da ne ing budéga. Nang karakal klásing kayamánan karin, ating gintû, ating
pílak, ating kuálta kaban-kaban la.
“Angga kapilan, angga magkánu, ita ngang áyákut mu, akútan mu kéka né yan. Nung bisá kang kasáwup, sige
agyang adwang taúwan, bié ko kéka, akútan mu ing éganaganang akútan mu, kéka na ngan.”
“Budning Irû.”
“O nánu ita? É mo burí ren?”
“Nung maliári pu sána, é kuálta ing burí kung anyaran kéka.”
“O nánu ing burí mung anyaran?”
“Ita pung búbug a sisipítan yu king kilikíli yu nung abié yé pu sána káku.”