Amṛtasiddhi

Text as edited by James Mallinson and Péter-Dániel Szántó in The Amṛtasiddhi and
Amṛtasiddhimūla: The Earliest Texts of the Haṭhayoga Tradition, Collection Indologie 150, Haṭha
Yoga Series 2, Institut Français de Pondichéry/École française d’Extrême-Orient, Pondicherry
2021), extracted from publication input file by James Mallinson November 2021.

nābhau śubhrāravindaṃ tadupari vimalaṃ maṇḍalaṃ caṇḍaraśmeḥ

saṃsārasyaikasārā tribhuvanajananī dharmavartmodayā yā |
tasmin madhye trimārge tritayatanudharāṃ chinnamastāpraśastāṃ
tāṃ vande jñānarūpāṃ maraṇabhayaharāṃ yoginīṃ yogamudrām ||0.1||

1. śarīravivekaḥ

śrīmadvirūpanāthāya namaḥ saṃtānadhāriṇe |

gurave sārthavāhāya siddhavartmānugacchatām ||1.1||

ajñānaviṣanidrā me jñānapīyūṣadhārayā |
nihatā yena vaidyena tasmai śrīgurave namaḥ ||1.2||

susabhyānāṃ prabodhāyāmṛtasiddhir ihocyate |

protsāhāyātmanaḥ śāntyāsabhyānāṃ madaśāntaye ||1.3||

ślāghyaṃ jñānavatāṃ sarvaṃ proktaṃ hi yad idaṃ mayā |

jñānino yat parānandair nandante vītarāgiṇaḥ ||1.4||

ajñāne naiva vaktavyaṃ dūṣaṇaṃ mama bhāṣaṇe |

ajñānam ātmanaś caiva vaktavyaṃ satyabhāṣaṇe ||1.5||

kṣīrasāraṃ yathā kṣīrān mathanāt sāram uddhṛtam |

idaṃ guruprasādena tathā tantrāntarānmayā ||1.6||

jñānam ekaṃ suvistārair uktaṃ siddhaiḥ pṛthak pṛthak |

avartmasaṃsthitair mūḍhaiḥ sarvaṃ tad vyākulīkṛtam ||1.7||

jñātvā ca sarvaśāstrāṇi bhrāntvā pṛthvīṃ sasāgarām |

muhyanti jñānamārgeṣu sūryaraśmau mṛgā yathā ||1.8||

siddhagurumukhāl labdhvā sopāyaṃ tattvam uttamam |

tantrāṇāṃ tena guhyārthaṃ samāsena vadāmy aham ||1.9||

śarīre yāni sārāṇi sādhyāni vividhāni ca |

kathayāmi samāsena paripāṭyānupūrvaśaḥ ||1.10||

śarīraṃ madhyamārūpaṃ candraṃ sūryaṃ tathānalam |

vāyutattvaṃ tathā binduṃ cittaṃ ca prakṛtiṃ guṇam ||1.11||

mahāmudrāṃ mahābandhaṃ vedham abhyāsasādhakau |

avasthām amṛtaṃ kālam ānandaṃ dhyānam advayam ||1.12||

mahodayaṃ mahāsiddhiṃ mahābhūtaparikṣayam |

mahāmudrābhilāpaṃ ca mahānirvāṇagocaram ||1.13||
vistareṇa samākhyātuṃ jhaṭity atra na śakyate |
saṃkṣepataḥ śarīrasya māhātmyam ucyate mayā ||1.14||

asti meruḥ śarīre ca saptadvīpasamanvitaḥ |

lokatrayasamāyuktaḥ sacaturdaśabhūmikaḥ ||1.15||

sāgarāḥ saritas tatra kṣetrāṇi kṣetrapālakāḥ |

chandohāḥ puṇyatīrthāni pīṭhāni pīṭhadevatāḥ ||1.16||

nakṣatrāṇi grahāḥ sarve ṛṣayo munayas tathā |

sṛṣṭisaṃhārakartārau bhramantau śaśibhāskarau ||1.17||

nabho vāyuś ca vahniś ca jalaṃ vasumatī tathā |

sakalo niṣkalo viṣṇur bhūtanāthaḥ prajāpatiḥ ||1.18||

trailokye yāni tattvāni tāni sarvāṇi dehataḥ |

śarīre yāni tattvāni na santy anyatra tāni vai ||1.19||

mahāpuṇyānubhāgena mānuṣyaṃ labhyate khalu |

pratiṣṭhito guror vākye gatim ekāṃ na gacchati ||1.20||

parīkṣya sadguroḥ pāde śarīraṃ praṇataṃ kuru |

yena saṃsāraduḥkhāni vilīyante mahānti ca ||1.21||

ity amṛtasiddhau śarīravivekaḥ ||

2 madhyamāyāḥ sāmānyavivekaḥ

meruṃ saṃveṣṭya sarvatra vyavahāraḥ pravartate |

madhyety anupamo mārgo meruṃ saṃvedhya tiṣṭhati ||2.1||

tatra dvāradvayaṃ puṇyam uparyadhovibhāgataḥ |

adhodvārasya saṃbhedaḥ sṛṣṭimṛtyvoḥ svayaṃ bhavet ||2.2||

ye dhanyā jñānino martye vīryavanto mahābalāḥ |

sṛṣṭidvāreṇa saṃviśya muktidvāraṃ vrajanti te ||2.3||

eṣā devī mahāvidyā devānām api durlabhā |

sarveṣāṃ jananī proktā ajñānasya kṣayaṃkarī ||2.4||

sṛṣṭidvāre sthitāś cāsyāḥ sarvā devyo mahābalāḥ |

sakalo niṣkalo nātho muktidvāre vyavasthitaḥ ||2.5||

avadhūtīpadaṃ ke cic chmaśānaṃ ca mahāpatham |

ke cid vadanti ādhārāṃ suṣumnāṃ ca sarasvatīm ||2.6||

nāmni matāntare bhedo nityaikā jñānacakṣuṣām |

enām āśritya tattvāni vasanti nṛkalevare ||2.7||

gaṅgāyamunayor madhye vahaty ekā sukhānvitā |

āsāṃ tu saṃgame snātvā dhanyā yānti parāṃ gatim ||2.8||
ity amṛtasiddhau madhyamāyāḥ sāmānyavivekaḥ ||

3. candravivekaḥ

meruśṛṅge sthitaś candro dviraṣṭakalayā yutaḥ |

aharniśaṃ tuṣārābhāṃ sudhāṃ varṣaty adhomukhaḥ ||3.1||

tato 'mṛtaṃ dvidhābhūtaṃ jñātavyaṃ tāttvikair naraiḥ |

iḍāmārgeṇa puṣṭyartham eti mandākinījalam ||3.2||

puṣṇāti sakalaṃ dehaṃ sūkṣmanāḍīpathāgatam |

eṣa candrasvarūpo hi vāmamārge vyavasthitaḥ ||3.3||

aparaḥ kundavṛndābho harṣākarṣitamaṇḍalaḥ |

madhyamāmadhyamārgeṇa sṛṣṭyarthaṃ yāti candramāḥ ||3.4||

ity amṛtasiddhau candravivekaḥ ||

4. sūryavivekaḥ

madhyamāmūlasaṃsthāne tiṣṭhati sūryamaṇḍalaḥ |

kalādvādaśasaṃpūrṇo dīpyamānaḥ svaraśmibhiḥ ||4.1||

ūrdhvaṃ vahati dakṣeṇa tīkṣṇamūrtiḥ prajāpatiḥ |

vyāpnoti sakalaṃ dehaṃ nāḍyākāśapathāśritaḥ ||4.2||

grasati candraniryāsaṃ bhramati vāyumaṇḍalaiḥ |

dahati sapta dhātūṃś ca sūryaḥ sarvaśarīrake ||4.3||

eṣa sūryaḥ paro mūrtir narāṇāṃ dakṣiṇe pathi |

vahati lagnayogena sṛṣṭisaṃhārakārakaḥ ||4.4||

dakṣottaragatiṃ tyaktvā yadā merusamo raviḥ |

viṣuvaṃ tadvijānīyāt puṇyakālaṃ kalevare ||4.5||

jñātvā ca viṣuvaṃ dehe sābhyāsavīryaśālinaḥ |

utkrāntiṃ kālayogena sukhāt kurvanti yoginaḥ ||4.6||

ṛtuḥ sandhyā divārātrikalākāṣṭhākṣaṇādayaḥ |

ādānaṃ ca visargaś ca sarvaṃ ca sūryato bhavet ||4.7||

sūryasomābhisaṃbandho yadā bhavati yogataḥ |

bāhye sṛṣṭis tadā jñeyā yogo 'bhyantarato bhavet ||4.8||

grahaṇaṃ tad vijānīyād bāhyābhyantarato dhruvam |

bāhye puṇyatamaḥ kālo muktiś cābhyantare bhavet ||4.9||

candrabimbaṃ yadā sūryo gṛhṇāti cābhramaṇḍalāt |

anyonyaṃ jāyate yogas tasmād yogo hi bhaṇyate ||4.10||

sūryo vahnir yadā rāhur ūrdhvaṃ vrajati dehataḥ |

adhaś candrāmṛtaṃ yāti tadā mṛtyur nṛṇāṃ bhavet ||4.11||
sarvāṇy eva hi tattvāni vrajanty ūrdhvaṃ kalevare |
etau muktipradau khyātau sūryācandramasau tadā ||4.12||

ity amṛtasiddhau sūryavivekaḥ ||

5. vahnivivekaḥ

kalābhir daśabhir yuktaḥ sūryamaṇḍalamadhyataḥ |

vasati vastideśe ca vahnir annavipācakaḥ ||5.1||

yo vai vahniḥ sa vai sūryo yaḥ sūryaḥ sa hutāśanaḥ |

etāv ekatarau dṛṣṭau sūkṣmabhedena bheditau ||5.2||

yāvat sūryasya madhyasthaḥ kālānalaḥ kalevare |

tāvad bindupravāho 'yam avicchinnaḥ sudhāmayaḥ ||5.3||

vahnir balaprado loke vahnir āyuḥpradāyakaḥ |

svastho yāvad ayaṃ vahnir naras tāvan nirāmayaḥ ||5.4||

ity amṛtasiddhau vahnivivekaḥ ||

6. sāmānyavāyuvivekaḥ

jagatāṃ prāṇabhūtāya jñānarūpāya dehinām |

tattvānāṃ sārabhūtāya namo nāthāya vāyave ||6.1||

yasyaikasya prasādena vyavahāraḥ pravartate |

pṛthivyādīni catvāri vidhṛtāni pṛthakpṛthak ||6.2||

lokāś ca sāgarāḥ sarve sarvāṇi bhuvanāni ca |

tāni sarvāṇi tiṣṭhanti sarvataś ca samīraṇaiḥ ||6.3||

bhrāmyanti cakramadhyasthā grahādyā munisattamāḥ |

bhuvanaṃ kroḍataḥ kṛtvā mahataikena vāyunā ||6.4||

bāhyamaṇḍalacakreṣu yathā vāyuḥ praśasyate |

tathā śarīramadhyeṣu vāyur ekaḥ paro vibhuḥ ||6.5||

nānāsthānagato vāyurnānākāryaprasādhakaḥ |
dehe kim api tattvaṃ ca vāyor anyan na vidyate ||6.6||

hṛdi prāṇo vasen nityam apāno gudamaṇḍale |

samāno nābhideśe tu sadodānaś ca kaṇṭhake ||6.7||

vyāno vyāpī śarīre ca pradhānāḥ pañca vāyavaḥ |

eṣāṃ vistarato bhedaḥ kathituṃ naiva śakyate ||6.8||

nāgādivāyavaḥ pañca tathā pañcendriye gatāḥ |

kurvanti jñānasaṃbhāraṃ preritāś ca svakarmabhiḥ ||6.9||

asaṃkhyā vāyavo dehe santi yady apy udāhṛtāḥ |

tad api śreṣṭhakartārau prāṇāpānau kṛtāv ubhau ||6.10||
prāṇaś candramayo jñeyo 'pānaḥ sūryamayas tathā |
ubhau śarīranetārau yātāyātaṃ prakurvataḥ ||6.11||

sṛṣṭisaṃhārakartārau sukhaduḥkhapradāyinau |
etābhyāṃ bhūtavṛddhiś ca bhūtānāṃ ca tathā kṣayaḥ ||6.12||

anayor yatnato yogaḥ sadābhyasyo mumukṣubhiḥ |

etaddvāreṇa dhīrāṇāṃ sarvasiddhiḥ prajāyate ||6.13||

vāyutattvāt paraṃ nāsti śarīre ca sadā vibhuḥ |

karoti sarvakāryāṇi yato vāyuś cidā vinā ||6.14||

vahniṃ prajvālya yatnena pacaty annādikaṃ yataḥ |

karoti rasasaṃvṛddhim eko vāyuś citiṃ vinā ||6.15||

dṛśyante ye śarīre ca vyādhayo vividhā budhaiḥ |

acintyād eva jāyante sarve te vāyusaṃbhavāḥ ||6.16||

mṛtyudo mokṣado vāyuḥ sṛṣṭidaḥ sthitidas tathā |

cetanā vāyuyogena budhyate ca kalevare ||6.17||

yadi brahmādayo devās tiṣṭhanti triguṇānvitāḥ |

na kurvanti svakāryāṇi yadā vāyuvivarjitāḥ ||6.18||

tāvat sarvāṇi dṛśyante tattvāni vividhāni ca |

vāyusiṃho yadā pāti jantūnāṃ hṛdi saṃsthitaḥ ||6.19||

gṛhītvā vāyukhaḍgaṃ ca chittvā vāyor gamāgamam |

bhittvā brahmādimārgaṃ ca bhuṅkṣvānandamayaṃ sukham ||6.20||

vāyuyogaṃ parityajya yo 'nyayogaṃ samācaret |

sa mūḍhaḥ parvatāgrāc ca patati jīvitāśayā ||6.21||

ity amṛtasiddhau sāmānyavāyuvivekaḥ ||

7. bindutattvavivekaḥ

bījamekaṃ śarīreṣu mūlasāraṃ prakīrtitam |

yadatra dṛśyate loke tatsarvaṃ bījasaṃbhavam ||7.1||

dhātutattvaṃ samārabdhaṃ bījamasti sadā śivam |

tanmadhye devatāḥ sarvāstiṣṭhanti sūkṣmarūpataḥ ||7.2||

idaṃ binduridaṃ candra-m-idaṃ bījamidaṃ madaḥ |

idaṃ tattvamidaṃ jīvaḥ sarvasāramayaṃ tvidam ||7.3||

ānandā ye prakathyante viramāntāḥ śarīrataḥ |

te 'pi bindūdbhavāḥ sarve jyotsnā candrabhavā yathā ||7.4||

mārgadaḥ svargado bindurmokṣadaḥ sukhadastathā |

dharmado 'dharmadaḥ so 'pi sarvadaḥ sarvadā vibhuḥ ||7.5||
vāyunā sādhyate bindurna cānyadbindusādhanam |
yāmavasthāṃ vrajedvāyurbindustām eva gacchati ||7.6||

mūrcchito harate vyādhiṃ baddhaḥ khecaratāṃ nayet |

sarvasiddhikaro līno niścalo muktidāyakaḥ ||7.7||

sa bindurdvividho jñeyaḥ pauruṣo vanitābhavaḥ |

bījaṃ ca pauruṣaṃ proktaṃ rajaś ca strīsamudbhavaḥ ||7.8||

anayorbāhyayogena sṛṣṭiḥ saṃjāyate nṛṇām |

yadābhyantarato yogastadā yogīti gīyate ||7.9||

kāmarūpe vasedbinduḥ kūṭāgārasya koṭare |

pūrṇagirimudāsparśādvrajati madhyamāpathā ||7.10||

yonimadhye mahākṣetre javāsindūrasaṃnibham |

rajo vasati jantūnāṃ devītattvasamādhṛtam ||7.11||

binduścandramayo jñeyo rajaḥ sūryamayastathā |

anayoḥ saṃgamaḥ sādhyaḥ kūṭāgāre 'tidurghaṭe ||7.12||

eṣa tattvaṃ paro dharma eṣa yogaḥ paro mataḥ |

eṣa muktiprado mārga eṣa guhyatamaḥ paraḥ ||7.13||

binduyogaṃ parityajya yo mohādanyamicchati |

sa śākhoṭakavṛkṣeṣu mūḍho jāgarti niṣphalam ||7.14||

bindurbuddhaḥ śivo bindurbindurviṣṇuḥ prajāpatiḥ |

binduḥ sarvagato devo bindustrailokyadarpaṇaḥ ||7.15||

yathā hi sādhyate vāyustathā binduprasādhanam |

yathāvasthā bhavedbindościttāvasthā tathā tathā ||7.16||

calatyayaṃ yadā vāyustadā binduścalaḥ smṛtaḥ |

binduścalati yasyāyaṃ cittaṃ tasyaiva cañcalam ||7.17||

sarvatattvādhipo devo bhavarūpī nirañjanaḥ |

ayaṃ ca bindurūpeṇa vasati sarvajantuṣu ||7.18||

yāvadeva calo vāyustāvadbinduś ca cañcalaḥ |

yāvadbinduścalo dehe tāvaccittaṃ ca cañcalam ||7.19||

cale bindau cale citte cale vāyau ca sarvadā |

jāyate mriyate lokaḥ satyaṃ satyam idaṃ vacaḥ ||7.20||

yo vai nādaḥ sa vai bindustadvai cittaṃ prakīrtitam |

nādo binduś ca cittaṃ ca tribhiraikyaṃ prasādhane ||7.21||

yadyapyekatayā hyete śarīre saṃvyavasthitāḥ |

tadapi sādhite vāyau sarve sidhyanti niścitam ||7.22||

yadāsau mriyate vāyurmadhyamāmadhyayogataḥ |

tadā binduś ca cittaṃ ca mriyate vāyunā saha ||7.23||
vyaṅgāni sarvatattvāni śarīre nivasanti ca |
caranti vāyusaṃcāre mriyante vāyumāraṇāt ||7.24||

maraṇaṃ bindupātena jīvanaṃ bindudhāraṇāt |

siddhe bindau mahāratne sarvasiddhiḥ prajāyate ||7.25||

adhaś candrāmṛtaṃ yāti maraṇaṃ sarvadehinām |

yasyābhedya-m-ayaṃ binduḥ sa siddho vajrapañjare ||7.26||

iti bindutattvavivekaḥ ||

8. cittavivekaḥ

adhiṣṭhātā śarīrasya bhoktā ca sukhaduḥkhayoḥ |

cittaṃ nāma hi lokānāṃ hṛdi tiṣṭhati nirmalam ||8.1||

śūnyam ākārataś cittaṃ pratyakṣaṃ kāryalakṣaṇāt |

durlakṣyaṃ lakṣaṇātītam asti māyopamaṃ tv idam ||8.2||

avimardyam adāhyaṃ ca chedabhedādivarjitam |

cañcalaṃ vikalaṃ krūraṃ śāntaṃ dharmadhuraṃdharam ||8.3||

hasaty ullasati prītyā krīḍate modate mudā |

tanoty ājīvanaṃ buddhyā bibheti bhayato dhiyā ||8.4||

roditi bandhuśokena muhyati dhanasaṃpadā |

krudhyati śatrukāryeṣu kāmena ramate 'balām ||8.5||

caritaṃ cittaratnasya bhāṣituṃ naiva śakyate |

cakraṃ sāṃsārikaṃ citraṃ cittād eva prajāyate ||8.6||

dharmaś cārthaś ca kāmaś ca mokṣo yad gīyate budhaiḥ |

tat sarvaṃ cetaso rūpaṃ cittād anyan na dṛśyate ||8.7||

sādhyam ekaṃ ca cittattvaṃ sarveṣām eva darśane |

ity avalokya tantrāṇi śūnye pataty apaṇḍitaḥ ||8.8||

svādhiṣṭhānena yogena yas tu cittaṃ prasādhyati |

śilāṃ carvati mohena tṛṣitaḥ khaṃ pibaty api ||8.9||

asiddhapadam ārūḍho guruprasādavarjitaḥ |

agotraḥ pāpasaṃpūrṇaś cittaṃ śūnyaṃ pravartayet ||8.10||

nāgninā jīyate vahnir vātena pavanaṃ yathā |

pānīyena ca pānīyaṃ tathā cittena mānasam ||8.11||

khaḍgaś chinatti nātmānaṃ yadi tīkṣṇataro bhavet |

sudāntacittasaṃtāna ātmanā naiva sādhyate ||8.12||

nirālambe sadā citte yaḥ karoty avalambanam |

sa svapiti samudrānte nabhasi vā sukhāśayā ||8.13||

svayaṃ sarvagataṃ cittaṃ buddhyāvalokyate yadi |

tadā bāhyagatenaiva smartavyaṃ bāhyacittataḥ ||8.14||
ye buddhyā tantraniryāsaṃ kurvate cittanigraham |
anivartakamārgeṣu matsyopamāḥ patanti te ||8.15||

uktaṃ sarvajñapādaiś ca lokānugrahahetunā |

śrūyatāṃ satyabhāvena mṛṣājñānavivarjitāḥ ||8.16||

prāṇārūḍhaṃ sadā cittaṃ vijānīyāt kalevare |

yatra deśe vased vāyus tatra cittaṃ vased dhruvam ||8.17||

sarpādidaṣṭadeśe tu daivād vāyuvivarjite |

na vetti cittasaṃtānaṃ tatra māṃsavidāraṇāt ||8.18||

yāvad vāyupracāro 'yaṃ dṛśyate savyavāmataḥ |

cittam eva tadā jantor bhuṅkte prakṛtijaṃ guṇam ||8.19||

ubhayor gatibhaṅgena vāyur madhyagato yadā |

gṛhītvā sarvatattvāni cittaṃ sarvagataṃ tadā ||8.20||

tadā jñānaṃ tadā dhyānaṃ tadā siddhis tadāmṛtam |

trivajrāṇāṃ samāveśas tadā vai jāyate dhruvam ||8.21||

iti cittavivekaḥ ||

9. prakṛtivivekaḥ

prakṛtir eva hi cittasya mahābandhaḥ prakīrtitaḥ |

maraṇaṃ vāyutattvasya nāśaṃ ca vapuṣaḥ smṛtaḥ ||9.1||

sukṛtaṃ duṣkṛtaṃ caiva yatkṛtaṃ pūrvajanmani |

sarvaṃ prakṛtirūpeṇa śarīre 'vasthitaṃ sadā ||9.2||

prakṛtir dvividhā jñeyā śārīrī cittasaṃbhavā |

śārīrī vātapittādyā caittikī buddhigocarā ||9.3||

sukhaduḥkhādikaṃ citte kṣaṇikaṃ yad utpadyate |

buddhiprabhṛtayo ye ca te sarve prakṛter guṇāḥ ||9.4||

cittādyā yāḥ praṇaśyanti bhavanti ca kṣaṇaṃ kṣaṇam |

cittaprakṛtayas tās tāḥ sāgarād ūrmayo yathā ||9.5||

yāvat prakṛtayaḥ santi tāvac cittaṃ malīmasam |

naṣṭe prakṛtisaṃghāte cittaṃ nirmalatāṃ vrajet ||9.6||

dehe prakṛtayaḥ khyātā vātapittakaphādayaḥ |

cittam ākṣipya kurvanti te 'pi kāryāṇi sarvadā ||9.7||

vātaḥ pañcavidho jñeyaḥ pittaṃ pañcavidhaṃ smṛtam |

kaphaḥ pañcavidhaḥ khyāto mūlaprakṛtayaḥ smṛtāḥ ||9.8||

vāyunā saha yogena puṃsaḥ karmānusārataḥ |

kurvanti duḥkhabhogāya vyādhīn vā maraṇāya vā ||9.9||
kṣudhā nidrā tṛṣā mūrcchā śītasaṃtāpasaṃbhavāḥ |
saṃbhavanti ca ye bhāvās te sarve prakṛter guṇāḥ ||9.10||

valiṃ ca palitaṃ kuṣṭhaṃ bādhiryaṃ mūkatāṃ tathā |

prakṛtiḥ kurute dehe kāṇaṃ khañjaṃ ca kubjakam ||9.11||

yeṣāṃ prakṛtayo dehe nivasanti puraḥsarāḥ |

teṣāṃ na jāyate yogo vane bījāṅkuro yathā ||9.12||

naṣṭe prakṛtisaṃghāte vāyunā saha yogataḥ |

tadā saṃjāyate jñānaṃ niśānte bhāskaro yathā ||9.13||

prakṛtyā khādyate viśvaṃ sā kenāpi na khādyate |

prasādāt khāditā yena maraṇaṃ tena khāditam ||9.14||

iti prakṛtivivekaḥ ||

10. guṇavivekaḥ

guṇāḥ sāṃsārikāṇāṃ ca nivasanti kalevare |

prakṛter eva jāyante te 'pi sattvarajastamāḥ ||10.1||

nibaddhas triguṇaiḥ piṇḍo nibaddhaṃ cittam eva ca |

teṣāṃ samāsato bhedaḥ śrūyatāṃ ca yathoditaḥ ||10.2||

yady apy ete guṇā loke bhaṇyante samabhāṣayā |

tad api sāttviko bhāvo jāyate 'ṃśasahasrataḥ ||10.3||

lobhakrodhakṣudhāgarhāhiṃsādambhamṛṣābhavam |
yad atra dṛśyate martye tat sarvaṃ tamasobhavam ||10.4||

nidrā tandrā tathājñānam ālasyaṃ smṛtilopatā |

tamasy eva prajāyante pradhānaṃ maraṇāntikam ||10.5||

gītaṃ nṛtyaṃ tathā vādyaṃ vastraṃ caiva vilepanam |

hasanaṃ kathanaṃ kāmāt sarvam etad rajobhavam ||10.6||

strīṇāṃ saṃgāśayā bhāvāḥ kriyante ye kṣaṇaṃ kṣaṇam |

pravṛttir maithune yā ca pradhānaṃ rajaso guṇaḥ ||10.7||

rajastamobhibhūtaṃ ca śarīraṃ sarvadā sthitam |

vināśam anayoḥ kṛtvā sattvam utpadyate dhruvam ||10.8||

utpanne sāttvike bhāve satyārtho jāyate nṛṇām |

satyārthe ca sati jñānaṃ nirmalaṃ bhavati sphuṭam ||10.9||

rajastamobhyāṃ saṃyukte śarīre doṣapūrite |

yo 'tra bravīty ahaṃ jñānī so 'jñānī vātulaḥ smṛtaḥ ||10.10||

svādhiṣṭhānena yogena na kṣīyete guṇau nṛṇām |

asti mudrā viśeṣeṇa gurumukhābjasaṃbhavā ||10.11||

iti guṇavivekaḥ ||
11. mahāmudrāvivekaḥ

kathyate 'sau mahāmudrā sarvatantreṣu gopitā |

yāṃ saṃprāpya manuṣyāś ca bhavanti surapūjitāḥ ||11.1||

janmakoṭisahasreṇa kṛtvā satkarmavistaram |

enāṃ prāpya bhavāmbhodheḥ pāraṃ gacchanti yoginaḥ ||11.2||

yoniṃ saṃpīḍya vāmena pādamūlena yatnataḥ |

savyaṃ prasāritaṃ pādaṃ karābhyāṃ dhārayed dṛḍham ||11.3||

āsane kaṭim āropya cibukaṃ hṛdayopari |

nava dvārāṇi saṃyamya kukṣim āpūrya vāyunā ||11.4||

cittaṃ catuḥpathe kṛtvā ārabhet prāṇayantraṇam |

candrārkayor gatiṃ bhaṅktvā kuryād vāyunivāraṇam ||11.5||

jāraṇeyaṃ kaṣāyasya cāraṇaṃ bindunādayoḥ |

cālanaṃ sarvanāḍīnām analasya ca dīpanam ||11.6||

kāyavākcittayogena kāyavākcittasādhanam |
bhaved abhyāsato 'vaśyaṃ mārgārūḍhasya yoginaḥ ||11.7||

anayā mudrayā sarvaṃ jāyate yogino dhruvam |

tasmād enāṃ prayatnena mahāmudrāṃ samabhyaset ||11.8||

sarvāsām eva mudrāṇāṃ mahatīyaṃ svayaṃbhuvā |

mahāmudrāṃ ca tenaināṃ vadanti ca budhottamāḥ ||11.9||

anayā bādhyate mṛtyur hiteyaṃ tena sarvadā |

cetasā vidhṛtā yena yantraṃ tenaiva nirjitam ||11.10||

asyāś ca prathitaṃ nāma padānāṃ prathamākṣaraiḥ |

uktaṃ ca yogayuktānāṃ pramodāya ca kevalam ||11.11||

iti mahāmudrāvivekaḥ ||

12. bandhavivekaḥ

iyaṃ yena mahāmudrā yogināṃ sidhyati dhruvam |

kathyate 'sau mahābandhaḥ śarīre prāṇadhārakaḥ ||12.1||

bandhaś ca dvividho jñeyo yathā bindur udāhṛtaḥ |

yonibandho hi devīnāṃ kaṇṭhabandho hi devataḥ ||12.2||

pūrakaṃ kumbhakaṃ kṛtvā dhṛtvā mudrāṃ bhayāpahām |

bandhaṃ saṃyojayet kṣipraṃ surāsurasugopitam ||12.3||

gudaṃ yonisamāyuktam ākuñcya caikakālataḥ |

apānam ūrdhvagaṃ kṛtvā samānena ca yojayet ||12.4||

bandhaṃ samārabhed yogī madhyamādvārapārśvataḥ |

saṃrodhya tripathaṃ yatnāt kuryād vāyoḥ suśṛṅkhalām ||12.5||
prāṇe cāropya vāyuś ca kṛtvā prāṇam adhomukham |
vāhayed ūrdhvagatyarthaṃ prāṇāpānaikayogataḥ ||12.6||

eṣa yogavaro dehe siddhamārgaprakāśakaḥ |

samṛddhiḥ pratyayaḥ puṣṭir vihāyainaṃ hi nānyataḥ ||12.7||

nāḍyaḥ sravanti yāḥ sarvā hy adhomārgeṇa sarvadā |

mahatānena bandhena viparītā bhavanti tāḥ ||12.8||

adhovāhena tattvāni śarīrād bāhyagāni ca |

sārāṇi prapalāyante svakṣetrāt srotaso yathā ||12.9||

yathā bāhyagataḥ setuḥ pravāhasya nirodhakaḥ |

tathā śarīragaś cāyaṃ jñātavyo yogibhiḥ sadā ||12.10||

sarvāsām eva nāḍīnām eṣa bandhaḥ prakīrtitaḥ |

bandhasyāsya prasādena sphuṭībhavanti devatāḥ ||12.11||

so 'yaṃ catuḥpathe bandho mārgatrayanirodhakaḥ |

ekaṃ vikāsayen mārgaṃ yena siddhāḥ sukhaṃ gatāḥ ||12.12||

sṛṣṭimṛtyuprado mārgaḥ kathito 'yam adhogataḥ |

pāpapuṇyasya kartārau dvāv etau pārśvagāminau ||12.13||

kumbhake sarvatattvāni nikṣipya dṛḍhabandhanāt |

udānam argalaṃ kṛtvā prāṇāpānaikayogataḥ ||12.14||

bandho 'yaṃ sarvanāḍīnām ūrdhvagatinirodhakaḥ |

etasyaiva prasādena yonibandhaḥ prasidhyati ||12.15||

ayaṃ ca saṃpuṭo yogo mūlabandho 'py ayaṃ mataḥ |

yogatrayam anenaiva sidhyaty abhyasyatāṃ satām ||12.16||

ity amṛtasiddhau bandhavivekaḥ ||

13. vedhavivekaḥ

mudrā ca dvividhā jñeyā yathā bandho dvidhā kṛtaḥ |

yonimudrā ca devīnāṃ liṅgamudrā ca daivakī ||13.1||

yathā strīpuruṣābhyāṃ ca bāhyasṛṣṭiḥ prajāyate |

bāhye tu strīpuruṣābhyāṃ sṛṣṭināśaḥ śarīrataḥ ||13.2||

guṇarūpavatī nārī niṣphalā puruṣaṃ vinā |

mahāmudrāmahābandhau vinā vedhena niṣphalau ||13.3||

gṛhītvā vāyucakrāṇi kṛtvā bandhaṃ yathoditam |

vedhaṃ samārabhed yogī sacittenaiva vāyunā ||13.4||

prāṇaṃ mahābalaṃ kṛtvā madhyamādvārasaṃmukham |

vedhayet kramayogena catuḥpīṭhaṃ ca vāyunā ||13.5||
karābhyāṃ liṅgam āropya pṛthivyāṃ dhruvasaṃnibham |
tathā hi niścalaṃ kṛtvā pādadvayam adhomukham ||13.6||

avakrapādamūlābhyāṃ kaṭim utthāpya susthiraḥ |

āsphālayen mahāmeruṃ vāyuvajrāgrakoṭitaḥ ||13.7||

vedhaḥ saṃjāyate tena sabrahmāṇḍarasātalāt |

merumadhyagatā devāḥ kampante merucālanāt ||13.8||

mriyante meruvedhena brahmādyā devatā dhruvam |

ādau saṃjāyate kṣipraṃ vedho 'yaṃ brahmagranthitaḥ ||13.9||

brahmagranthiṃ tato bhittvā viṣṇugranthiṃ bhinatty asau |

viṣṇugranthiṃ tato bhittvā rudragranthiṃ bhinatty asau ||13.10||

rudragranthiṃ tato bhittvā chittvā mohamayīṃ latām |

udghāṭayaty ayaṃ vāyur brahmadvāraṃ sugopitam ||13.11||

mahāmudrā mahābandho mahāvedhas tṛtīyakaḥ |

tritattvair guhyaniryāsair ebhir yogaḥ prasidhyati ||13.12||

yas tritattvam idaṃ vetti sa vetti bhuvanatrayam |

yenābhyastam idaṃ daivāt sa syāt sarvagato vibhuḥ ||13.13||

guhyaguhyeṣu tantreṣu guhyaguhyeṣu devataḥ |

anenaivādhikāreṇa nṛṇāmevādhikāritā ||13.14||

sarvābhiṣekasaṃsiktaḥ sarvādhikārasaṃbhṛtaḥ |
siddhamārgeṇa saṃyukto naro bhavati nānyathā ||13.15||

yo jānāti tv imāṃ mudrāṃ garvas tasyaiva sārthakaḥ |

vijñātaṃ sakalaṃ tena nāḍyo devyāḥ prasādataḥ ||13.16||

ity amṛtasiddhau vedhavivekaḥ ||

14. abhyāsavivekaḥ

yena labdham idaṃ jñānaṃ labdhaś cintāmaṇis tathā |

prāpto bhadraghaṭas tena kalpadrumo mahānidhiḥ ||14.1||

idaṃ tattvatrayaṃ guhyaṃ trailokyasāram uttamam |

anabhyāsaratānāṃ tu narāṇāṃ niṣphalāyate ||14.2||

yathāprayogaśīlānāṃ nidhiś ca niṣphalāyate |

tathābhyāsavihīnānāṃ tattvaṃ ca niṣphalaṃ dhruvam ||14.3||

evaṃ buddhvā sadābhyāsaḥ kartavyaḥ sāttvikair naraiḥ |

abhyāsāj jāyate yogo yogāt sarvaṃ prasidhyati ||14.4||

dhṛtvā prāthamikīṃ mudrāṃ kṛtvā bandhau mahādṛḍhau |

āndolanaṃ tataḥ kuryāc charīrasya trimārgataḥ ||14.5||

punarāsphālanaṃ kaṭyāḥ sthiraṃ puruṣamudrayā |

vāyūnāṃ gatim āvṛtya kṛtvā pūrakakumbhakau ||14.6||
abhyāsam ārabhed yogī sarvopabhogavṛddhaye |
divārātram avicchinnaṃ yāme yāme tathā tathā ||14.7||

anenābhyāsayogena vāyur abhyasito bhavet |

vāyor abhyāsato vahniḥ pratyahaṃ vardhate tanau ||14.8||

vahnau vivardhamāne ca sukham annasya pākatā |

annasya paripākena rasavṛddhiḥ prajāyate||14.9||

rase vṛddhigate nityaṃ vardhante dhātavas tadā |

dhātoḥ saṃvardhanād eva pradhānaṃ vardhate rasaḥ ||14.10||

pradhānarasasaṃpattau satatābhyāsayogataḥ |
puṣṭo bhavati yogīndro dṛḍhakāyo mahābalaḥ ||14.11||

mahābandho mahābhyāsād balād eva prajāyate |

mahābandhamahābhyāsād rasasya jāraṇaṃ bhavet ||14.12||

śuṣyanti sarvadoṣāś ca malamūtrakaṣāyakāḥ |

rasasya cāraṇaṃ gātre nāḍīdvāreṇa sarvadā ||14.13||

māraṇaṃ kālayogena rasadvayasya melakam |

madhyamānupraveśo 'pi yogino 'bhyāsayogataḥ ||14.14||

karṇadhāraṃ guruṃ prāpya kṛtvā naukāṃ tanuṃ narāḥ |

abhyāsavāhanāsaktās taranti bhavasāgaram ||14.15||

yadi devāḥ svayaṃ jñānaṃ kathayanti muhur muhuḥ |

tadāpy abhyāsato yogaḥ sphuṭībhavati yoginām ||14.16||

dahyante sarvapāpāni janmakoṭikṛtāni ca |

ihaivābhyāsayogena tṛṇāni vahninā yathā ||14.17||

tapāṃsi yāni kathyante yajñadānavratāni ca |

koṭikoṭiguṇais tāni bhavanty abhyāsayogataḥ ||14.18||

prakṛtayo guṇā doṣā vyādhayo vividhās tanau |

naśyanty abhyāsayogena khe meghā vāyunā yathā ||14.19||

ityabhyāsavivekaḥ ||

15. mṛduvivekaḥ

sattvāś caturvidhā jñeyā mṛdumadhyādhimātrakāḥ |

adhimātratarāḥ śreṣṭhā bhavābdhilaṅghane kṣamāḥ ||15.1||

caturṇām eva sattvānāṃ prathame kathito mṛduḥ |

kathyante prathame tena mṛdūnāṃ lakṣaṇāni ca ||15.2||

vyādhitā durbalā vṛddhā niḥsattvā gṛhavāsinaḥ |

mandotsāhā mandavīryā jñātavyā mṛdavo narāḥ ||15.3||

eṣāṃ dvādaśavarṣeṇa caikāvasthā prasidhyati |

mṛduś ca sarvasattvānāṃ kaniṣṭhaḥ samudāhṛtaḥ ||15.4||
iti mṛdusattvavivekaḥ ||

16. madhyavivekaḥ

atiprauḍhā bhavārūḍhāḥ samavīryabalānvitāḥ |

samabuddhisamābhyāsāḥ samakāyāḥ samāgamāḥ ||16.1||

madhyasthā yogamārgeṣu tathā madhyavayogatāḥ |

madhyotsāhā madhyarāgā jñātavyā madhyavikramāḥ ||16.2||

varṣair aṣṭabhir eṣāṃ dvitīyāvasthā prasidhyati |

madhyapuṇyā gatau madhyās tenaite madhyamāḥ smṛtāḥ ||16.3||

iti madhyavivekaḥ ||

17. adhimātravivekaḥ

vīryavantaḥ kṣamāvanto dayāvanto mahāśayāḥ |

svasthānasukhitāḥ svasthā vayaḥsthāḥ sthirabuddhayaḥ ||17.1||

sākṣarāḥ saṃpadāḥ śūrāḥ sābhyāsāś ca damānvitāḥ |

sadā satkārasaṃyuktāḥ sabhyāḥ sadguṇaśālinaḥ ||17.2||

jñātavyāḥ puṇyakarmāṇo yoginaḥ siddhamārgataḥ |

trikāvasthādhimātrāṇāṃ ṣaḍbhir varṣaiḥ prasidhyati ||17.3||

ityadhimātravivekaḥ ||

18. adhimātratarasattvavivekaḥ

mahābalā mahākāyā mahāvīryā guṇānvitāḥ |

mahāmahoṣitāḥ śāntā mahākāruṇikā narāḥ ||18.1||

sarvaśāstrakṛtābhyāsāḥ sarvalakṣaṇabhūṣitāḥ |
sarvajñasadṛśākārāḥ sarvavyādhivivarjitāḥ ||18.2||

navayauvanasaṃpannā nirvikārā narottamāḥ |

nirmohāś ca nirātaṅkā nirvighnās tu nirākulāḥ ||18.3||

janmāntarakṛtābhyāsā gotravanto guṇānvitāḥ |

tārayanti sarvasattvāṃs taranti svayam eva ca ||18.4||

adhimātratarāḥ sattvā jñātavyāḥ sarvalakṣaṇaiḥ |

tribhiḥ saṃvatsarair eṣāṃ turyāvasthā prasidhyati ||18.5||

ityadhimātratarasattvavivekaḥ ||

19. prathamāvasthāniṣpattivivekaḥ

avasthābhiś catasṛbhir yogaḥ saṃpūrṇatāṃ vrajet |

tāsāṃ saṃkṣepato bhedaḥ kathyate cānupūrvaśaḥ ||19.1||
ārambhaś ca ghaṭaś caiva paricayas tṛtīyakaḥ |
niṣpannaḥ sarvaśeṣeṣu yogāvasthāḥ prakīrtitāḥ ||19.2||

yāṃ yāṃ praviśaty avasthāṃ yogī cābhyāsayogataḥ |

tāṃ ca tāṃ ca gateś cihnaṃ kathyate ca samāsataḥ ||19.3||

guroḥ pādaprasādena samabhyarcya svadevatām |

abhyāsam ārabhed yogī gurupārśve prayatnataḥ ||19.4||

śubhe deśe śubhācāre sajjanair vā samanvite |

abhyased yogamārgaṃ tu subhikṣe nirupadrave ||19.5||

gṛhastho vāvadhūto vā yogābhyāse sadā rataḥ |

anupalambhato yatnāt svam arthaṃ sādhayed bhṛśam ||19.6||

agnisevābalāsevā pathasevā ca sarvadā |

prathamābhyāsakāle tu saṃtyājyā yoginā sadā ||19.7||

prāṇapīḍā yathā na syād abhyāsaḥ kriyate tathā |

pīḍite prāṇavāte hi dhātuṃ dahati pāvakaḥ ||19.8||

tasmāt tathā niroddhavyaḥ prāṇo 'yaṃ vitataḥ sadā |

anuṣṭhānāvasāneṣu vahaty avikṛto yathā ||19.9||

ahorātre 'ṣṭadhābhyāsaḥ samyakśikṣāvataḥ smṛtaḥ |

yaḥ punaḥ prathamābhyāsī tena kāryaḥ kramāt kramāt ||19.10||

abhyāse prathamārabdhe aṅgasādo bhaved dhruvam |

aśaktiś ca kṛśatvaṃ ca nānuṣṭhānaṃ tyajed budhaḥ ||19.11||

sadyabhujya na kāryo 'yaṃ tasya bandho hi duṣkaraḥ |

annavyavahite kukṣau jāyate vedanaiva ca ||19.12||

na kāryaḥ kṣudhitenāpi tathā viṇmūtraveginā |

abhyāsinā ca bhoktavyaṃ stokastokam anekadhā ||19.13||

ekāvasthā yadā pūrṇā vedho 'yaṃ brahmagranthitaḥ |

tadā daṃśo bhaven madhye kiṃcid ānandadarśanam ||19.14||

śūnyatānupraveśo 'pi vicitrakṣaṇasaṃbhavaḥ |

anāhatas tadā śabdo bhaveta madhyamāmukhāt ||19.15||

tadā cihnāni jāyante yogināṃ bāhyadehataḥ |

kathyante tāni sarvāṇi saṃkṣepād anupūrvaśaḥ ||19.16||

śubhakāyaḥ subhojī ca prauḍhavahnir balānvitaḥ |

sumatiś ca sukāntiś ca sunetraḥ sarasādharaḥ ||19.17||

subhagaś ca sugandhaś ca sukhī sarvāṅgasundaraḥ |

saṃpūrṇahṛdayo bhogī yogī prathamato bhavet ||19.18||

iti prathamāvasthāniṣpattivivekaḥ ||
20. ghaṭāvasthāvivekaḥ

dvitīyāyām avasthāyāṃ yogī dṛḍhāsano bhavet |

āsane sudṛḍhe bhūte vāyur madhyaṃ viśatyasau ||20.1||
kiṃcidvāyupraveśena yogināṃ jñānasaṃbhṛtiḥ |
saṃjāte jñānasaṃbhāre yogī devasamo bhavet ||20.2||

sujīvī sumanāḥ śūro gaṇḍākṣakaṇṭhapūritaḥ |

dṛḍhadeho dṛḍhāsphālaḥ sphītaḥ sarvāṅganiṣṭhuraḥ ||20.3||

mahābalo mahāvīryo nityotsāhī pramoditaḥ |

tattvajño vidhijño vijñaḥ sarvajñabodhibodhitaḥ ||20.4||

prabuddho vibudho dhīmān dhyānī dhyānavidhānakaḥ |

śubhākāraḥ śubhācāraḥ śubhādhāraḥ śubhāśayaḥ ||20.5||

sarvalakṣaṇasaṃpūrṇo aśeṣadoṣavarjitaḥ |
jñātajñāno dvitīyāyāṃ yogī loke virājate ||20.6||

saṃpūrṇāyāṃ dvitīyāyām atiśūnyaṃ prajāyate |

bherīśabdas tadā madhye vimardakṣaṇasaṃbhavaḥ ||20.7||

dvitīyāyām avasthāyāṃ vāyusaṃpuṭayogataḥ |

tenāsyāḥ sarvato lokair ghaṭa ity abhidhīyate ||20.8||
iti ghaṭāvasthāvivekaḥ ||

21. ānandakālavivekaḥ

ghaṭitvā sarvagātrāṇi chittvā mārgau ca pārśvataḥ |

gṛhītvā sarvatattvāni vāyur bhavati madhyagaḥ ||21.1||

yadā vāyuḥ pravṛddho 'yaṃ madhyamāsphuṭitārgalaḥ |

tadā saṃjāyate vahniḥ kālānalakṣayaṃkaraḥ ||21.2||

bindūnāṃ patanānandaḥ kālo 'yaṃ ca kalevare |

bindupātena vṛddhatvaṃ mṛtyur bhavati dehinām ||21.3||

iti kālānandavivekaḥ ||

22. sahajānandavivekaḥ

sa eva recako vāyur jetavyo yogibhiḥ sadā |

yo 'sau bāhyagato dehe bindunā saha yogataḥ ||22.1||

jitvā sa ūrdhvago vāyur yadā madhyagato bhavet |

kālānandaṃ tadā jitvā sahajānandasaṃbhavaḥ ||22.2||

saṃśodhya pūrvakarmāṇi kleśākleśakṛtāni ca |

udayaty ayam ānandas tamasīva divākaraḥ ||22.3||

iti sahajānandavivekaḥ ||
23. prakṛtiguṇavivekaḥ

tadā prakṛtayo naṣṭā yatastāḥ karmasaṃbhavāḥ |

prakṛter nāśataḥ śīghraṃ guṇā naśyanti yoginaḥ ||23.1||

yadā naṣṭā guṇāḥ sarve yogināṃ karmayogataḥ |

tadā pañca kaṣāyāś ca nimajjanti niyantritāḥ ||23.2||

iti prakṛtiguṇavivekaḥ ||

24. kāyasiddhivivekaḥ

yadā siddhiḥ kaṣāyānāṃ bindudvayasya melakam |

siddhaṃ tadā vijānīyāt kāyaṃ sarvaguṇānvitam ||24.1||

śītātapatṛṣātrāsakāmalobhādivarjitaḥ |
ādhivyādhijarāduḥkhaśokasāgarapāragaḥ ||24.2||

iti kāyasiddhivivekaḥ ||

25. vāyusiddhiḥ

siddhakāyo yadā yogī hṛdayagranthibhedataḥ |

mahāśūnyaṃ tadāyātaṃ kṣaṇaṃ vilakṣaṇaṃ tadā ||25.1||

śabdo 'pi mardalo madhye tadā saṃjāyate dhruvam |

tadāsau niścalo vāyuḥ sthirasamādhimadhyagaḥ ||25.2||

vāyusiddhis tadā dehe jñātavyā yogibhiḥ sadā |

vāyusiddhir yadā dehe saṃvittir jāyate tadā ||25.3||

saṃvitteḥ ṛddhayaḥ sarvāḥ saṃbhavanti ca yoginām |

yadā saṃdṛśyate ṛddhis tadā siddhir adūrataḥ ||25.4||

iti vāyusiddhiḥ ||

26. samādhivivekaḥ

yo 'sau siddhimayo vāyur madhyamāpadaniścalaḥ |

tadānandamayaṃ cittam ekarūpaṃ nabhaḥsamam ||26.1||

yadānandamayaṃ cittaṃ bāhyakleśavivarjitam |

bhavaduḥkhāni saṃhṛtya samādhir jāyate tadā ||26.2||

iti samādhivivekaḥ ||

27. siddhacittavivekaḥ

yadā samādhisaṃpannaṃ sahajānandasaṃbhṛtam |

cittam eva tadā siddhaṃ sarvaduḥkhabhayāpaham ||27.1||

iti siddhacittavivekaḥ ||
28. kāyasiddhilakṣaṇam

yat karoti yadā yogī sarvaṃ bhavati tatkṣaṇāt |

yoginaḥ kāyasiddhasya jānīyāl lakṣaṇaṃ dhruvam ||28.1||

iti kāyasiddhilakṣaṇam ||

29. tṛtīyāvasthāvivekaḥ

kāyavyūhādikaṃ yac ca parapurapraveśanam |

īkṣaṇaṃ śravaṇaṃ dūrāt tat siddhavāyulakṣaṇam ||29.1||

sarvajñatvaṃ trikāyasya sarvajñānāvabodhakam |

lakṣaṇaṃ siddhacittasya jñātavyaṃ jñānaśālibhiḥ ||29.2||

+ iti kāyavākcittānāṃ kathyate siddhilakṣaṇam + |

nānāprakārato yāni sarvāṇi kathitāni ca |
tṛtīyāyām avasthāyāṃ tāni cihnāni yoginām ||29.3||

bāhyajñānapraṇāśena madhyamādhyānayogataḥ |
jñānaparicayo yasmāt tasmāt paricayo mataḥ ||29.4||

iti tṛtīyāvasthāvivekaḥ ||

30. jīvanmuktilakṣaṇavivekaḥ

rudragranthiṃ tadā bhittvā pavanaḥ sarvapīṭhagaḥ |

prabhāsvaramayaṃ cittaṃ vipākakṣaṇabhūṣitam ||30.1||

ekākāraṃ tadā cittaṃ jyotirmayavilakṣaṇam |

tadā dundubhiśabdaś ca siddhālaye prajāyate ||30.2||

trayāṇāṃ ca yadā siddhiḥ syāt kāyavāyucetasām |

mahāsiddhis tadā jñeyā jīvanmuktiphalapradā ||30.3||

icchāsamādhisaṃpanno yogīndro 'pi tadā bhavet |

tadā mahāsamādhiś ca puṇyaśloko vṛkodaraḥ ||30.4||

tadānandamayo yogī sarvajñaḥ samadarśanaḥ |

sa vandyaḥ sarvabhūtānāṃ pūjyaś caiva trilokataḥ ||30.5||

avyāhatagatir nityam avyāhatekṣaṇaśrutiḥ |

avyāhatānandasaṃdoho 'vyāhatajñānasaṃbhṛtaḥ ||30.6||

sarvaiśvaryaguṇopeto 'nantajñānāśrayo vibhuḥ |

mahāsiddhyanvito yogī sarvasiddheḥ samāśrayaḥ ||30.7||

na dahaty agnitaś cāsau na majjati jalād api |

avadhyaḥ sarvalokānāṃ yogīndro guṇavarjitaḥ ||30.8||

tasmāt sarvamayo yogī sarvabhūtamayo 'pi saḥ |

sarvajñānāśrayo nityaṃ sarvalokaprapūjitaḥ ||30.9||
saṃtuṣṭas tārayel lokān kruddhaḥ siddhivināśakaḥ |
jñānasiddho hi yogīndro devānāṃ vai bhayaṃkaraḥ ||30.10||

bhraman sāṃsārikaṃ cakraṃ bhuvanatrayapañjaram |

tad bhittvā helayā yogī yāty ānandamayo vibhuḥ ||30.11||

evaṃ varṣasahasrāṇi lakṣāṇi ca śatāni ca |

parvatāgre guhāyāṃ ca krīḍanti siddhayoginaḥ ||30.12||

viraktā bāhyavijñāne raktāḥ samādhimadhyataḥ |

tiṣṭhanti vijane sthāne yogino jñānacakṣuṣaḥ ||30.13||

evaṃbhūtāś ca tiṣṭhanti dṛśyante kāryaśālinaḥ |

jīvanmuktāś ca te jñeyā ye siddhā jinarūpiṇaḥ ||30.14||

iti jīvanmuktilakṣaṇavivekaḥ ||

31. mahāmudrāvivekaḥ

niṣpannā yoginaś cātra śeṣāvasthāsv avasthitāḥ |

niṣpanna iti tenāsyā nāmākhyātaṃ jagattraye ||31.1||

niṣpanno 'yaṃ yadā yogī brahmadvāreṇa niḥsṛtaḥ |

tadā vīṇādhvanis tatra vāyuḥ śabdāyate kalam ||31.2||

mahāmudrādibhedena mahāmudrā ca yoginām |

saṃpadyate tadāvaśyam asaṃkhyaṃ yogalakṣaṇam ||31.3||

iti mahāmudrāvivekaḥ ||

32. asiddhakāyalakṣaṇavivekaḥ

nānyaḥ panthā dvitīyo 'sti muktaye yogino bhuvi |

jīvanmuktiṃ gato yogī mahāmuktipadaṃ vrajet ||32.1||

na muktir mṛtakāyasya vimārgapatitasya ca |

prakṛtiṃ karmato dṛṣṭvā maraṇaṃ prakṛter guṇaḥ ||32.2||

tāvad buddho 'py asiddho 'sau naraḥ sāṃsāriko mataḥ |

yāvad dravati bījendro dehato brahmarūpakaḥ ||32.3||

asiddhaṃ tad vijānīyād vapur abrahmacāriṇām |

jarāmaraṇasaṃkīrṇaṃ sarvakleśasamāśrayam ||32.4||

ity asiddhakāyalakṣaṇavivekaḥ ||

33. asiddhavāyulakṣaṇavivekaḥ

yāvad vimārgago vāyur niścalo naiva madhyagaḥ |

asiddhaṃ taṃ vijānīyād vāyuṃ karmaguṇānvitam ||33.1||

ity asiddhavāyulakṣaṇavivekaḥ ||

34. mahābhūtapariṇāmavivekaḥ
yāvac cittaṃ calad dehe bāhyajñānasamākulam |
asiddhaṃ tad vijānīyān nibaddhaṃ karmarajjubhiḥ ||34.1||

ityasiddhacittalakṣaṇam ||

ūrdhvaretā yadā yogī gṛhītacittamārutaḥ |

kāyavākcittasaṃsiddhiṃ dhyānādevopalakṣayet ||34.2||

iti sarvayogalakṣaṇam ||

evaṃ samādhisaṃpanna ānandatrayananditaḥ |

śarīragopanaṃ kuryād aiśvaryeṇa ca yogadhṛk ||34.3||

iti mahābhūtapariṇāmavivekaḥ ||

35. nirvāṇavivekaḥ

tadānandamayo yogī jñānakāyo mahodayaḥ |

avyayo niṣkalo vyāpī śivaḥ sarvagato vibhuḥ ||35.1||

viśuddhajñānadeho 'sau prapañcaguṇavarjitaḥ |

sarvajñaḥ sarvago nityaḥ satyārtho 'pi mahodayaḥ ||35.2||

iti nirvāṇavivekaḥ ||

niryāsaṃ sarvatantrāṇāṃ sarvadarśanasaṃmatam |

ghṛtam iva bahukṣīrād uddhṛtaṃ yatnato mayā ||36.1||

nāmnā amṛtasiddhiś ca siddhisopānapaddhatiḥ |

śrīmanmādhavacandreṇa kṛteyaṃ yogināṃ śubhā ||36.2||

yāvat sāṃsārikaṃ cakraṃ bhramati grahavigraham |

tāvaj jīyāt trilokeṣu śrīvirūpākhyasantatiḥ ||36.3||

kṛtam ātmaprabodhāya pramodāya ca yoginām |

mṛṣājñānavatāṃ puṃsāṃ camatkārāya kevalam ||36.4||

susabhyānāṃ prabodhāya tathā vivartmaśālinām |

kutarkakumatīnāṃ ca kṛto 'yaṃ capalagrahaḥ ||36.5||

śukrasya amṛtaṃ vācyaṃ mokṣasya jīvitasya ca |

trayāṇāṃ kathitā siddhir amṛtasiddhir ihocyate ||36.6||

svarge martye ca pātāle ye ca tiṣṭhanti dehinaḥ |

teṣāṃ sukham avicchinnaṃ pravartatāṃ nabhaḥsamam ||36.7||

tribhir granthaśataiḥ sarvaṃ yogopāyasalakṣaṇam |

proktaṃ guṇavatāṃ yatnāc cakṣurbhūtaṃ ca nirmalam ||36.8||

buddhabodhiguruṃ natvā śrīavadhūta+vihuṇaṃ+ |

kṛto yo grantharājena saṃpūrṇo 'yaṃ manorathaḥ ||36.9||

ity amṛtasiddhiḥ samāptā