Bi’l-icap mevaki’-i baideye sevk olunacak ve divan-ı harplerden celp edilecek olan ümera ve zabitana harcırah itası ve memleketlerine gönderiliyor iken esna-yı rahta hastalanıp da araba ve mekkari vasıtasıyla nakillerine ihtiyaç görünen efrad-ı askeriye için dahi bir ücret tahsisi ve bir mahale memur olup da memuriyetleri teehhür edenlere evvelce verilen harcırah nısfının kendilerine terkiyle nısfının istirdadı hakkında şura-yı devlet tanzimat dairesinden kaleme alınan mazbata ve melfuf layiha-ı nizamiye meclis-i mahsus-ı vükelada lede’l-mütalaa ol-babda tanzim olunan mazbata melfufuyla beraber arz ve takdim kılınmış olmağla ol-babda her ne vechle irade-i seniyye-i cenab-ı hilafet-penahi şeref-müteallik buyrulur ise mantuk-ı alisi infaz edileceği beyanıyla tezkire-i senaveri terkim olundu efendim. Fi 14 Muharrem sene 310 Fi 26 Temmuz sene 308
Sadr-ı Azam ve Yaver-i Ekrem
Cevat
Maruz-ı çaker-i kemineleridir ki
Reside-i dest-i tazim olup melfufuyla manzur-ı ali buyrulan işbu tezkire-i samiye-i sadaret- penahileri üzerine mucibince irade-i seniyye-i cenab-ı padişahi şeref-müteallik buyrulmuş olmağla ol-babda emr ü ferman hazret-i veliyyül emrindir. Fi 15 Muharrem sene 310 Fi 27 Temmuz sene 308
Vilayat-ı şahanede bulunan kaza ve nahiye kaimmakam ve müdürlerinin erbab-ı ehliyetten intihap ve tayini ve mektep mezunlarının dahi suret-i istihdamı için intihab-ı memurin komisyonunun vezaifini ta’dilen kaleme alınan layiha-ı nizamiyenin gönderildiğine dair şura- yı devlet tanzimat dairesinden tanzim olunup meclis-i mahsus-ı vükeladan tezyil olunan mazbata layiha-ı mezkurenin nüsha-ı musahhahasıyla beraber arz ve takdim kılınmış olmağla münderecatı hususunda her ne vechle irade-i seniyye-i hazret-i hilafet-penahi şeref-müteallik buyrulur ise mantuk-ı alisi infaz olunacağı beyanıyla tezkire-i senaveri terkim kılındı efendim. Fi 7 Rebiülevvel sene 310 Fi 16 Eylül sene 308
Sadr-ı Azam ve Yaver-i Ekrem
Cevat
Maruz-ı çaker-i kemineleridir ki
Reside-i dest-i tazim olup şura-yı devletin meclis-i vükeladan müzeyyel mazbatası ve melfufu ile beraber manzur-ı ali olan işbu tezkire-i samiye-i sadaret-penahileri üzerine mucibince irade- i seniyye-i cenab-ı hilafet-penahi şeref-müteallik buyrulmuş olmağla ol-babda emr ü ferman hazret-i veliyyül emrindir. Fi 8 Rebiülevvel sene 310 Fi 17 Eylül sene 308
Reji şirketi sermayesinden dört yüz kırk bin liranın ba-irade-i seniyye-i cenab-ı padişahi tenzilinden dolayı şirketin hisse senedatının kıymet ve adidlerine ve bunlardan atiyen mevki’-i tedavüle vaz’ edilecek kısmının suret-i ihracına müteallik tadilatı havi layiha-ı nizamiyenin Reji nizamname-i asliyesine tezyili hususuna dair şura-yı devlet tanzimat dairesinin meclis-i mahsus-ı vükeladan müzeyyel mazbatası nizamiye ile beraber 10 Cemaziyelahire sene 308 tarihinde arzı huzur-ı ali kılınmış idi. Reji idaresi bu babda bir karar itasını isti’mal etmekte bulunduğunu havi maliye nezaret-i behiyesinden bu kere varid olan tezkire mezkûr mazbatalar ile layiha-ı nizamiyenin suretleriyle beraber arz ve takdim kılınmağla ol-babda her ne vechle emr ü irade-i seniyye-i cenab-ı hilafet-penahi şeref-müteallik buyrulur ise hükm-i münifi infaz edileceği beyanıyla tezkire-i senaveri terkim olundu efendim. Fi 12 Rebiülevvel sene 310 Fi 21 Eylül sene 308
Sadr-ı Azam ve Yaver-i Ekrem
Cevat
Maruz-ı çaker-i kemineleridir ki
Reside-i dest-i tazim olup melfufatıyla beraber manzur-ı ali buyrulan işbu tezkire-i samiye-i sadaret-penahileri üzerine mucibince irade-i seniyye-i cenab-ı hilafet-penahi şeref-müteallik buyrulmuş olmağla ol-babda emr ü ferman hazret-i veliyyül emrindir. Fi 13 Rebiülevvel sene 310 ve Fi 22 Eylül sene 308