Քանակական վերլուծությունները հանրային քաղաքականության մեջ.
Հ. ք. վերլուծությունը օգտագործում է քանակական և որակական տեխնիկաներ
հիմնախնդրի սահմանման, դրա ազդեցությունները դուրս բերելու և պոտենցիալ լուծումները ներկայցնելու համար: Քանակական վերլուծություններն օգտագործվում են քաղաքականության նախագծի և արդյունքների միջև եղած կապերը բացատրելու համար: Կառավարությունները գնալով ավելի մեծ ուշադրություն են դարձնում հ. ք. քանակական վերլուծությանը և չեն իրականացնի մի քաղաքականություն, որը հիմնավորված չլինի ծախսերի և շահույթների առումով: Քանակական վերլուծությունները բարդանում են, քանի որ եթե ցանկանում ենք իմանալ, թե տվյալ քաղաքականությունը ինչպիսի փոփոխականներից է ազդվում, անհրաժեշտ է հաշվի առնել քաղաքական միջամտությունը և իրավիճակային գործոնները: Հանրային քաղ. վաղ ուսումնասիրությունները հիմնականում կենտրոնանում էին հետևյալ առանցքային ոլորտների վրա` 1. Քանակական մեթոդոլոգիան` ներառյալ մաթեմատիկական մոդելավորումը, ծրագրավորումը, նկարագրողական վիճակագրությունը 2. Քաղաքականության ձևավորման և իրականացման քաղաքական և ինստիտուցիոնալ միջավայրը 3. Տնտեսագիտական վերլուծությունը և տեսությունը` հանրային և մասնավոր ոլորտների փոխհարաբերությունների շեշտադրմամբ` հաշվի առնելով ռեսուրսների բաշխվածությունը 4. Որոշումների ընդունման և իրականացման ռազմավարությունների և գործընթացների վարքաբանական և ոչ վարքաբանական մոտեցումները 5. Քաղաքականության ծրագրի կառավարումը, վերահսկումը և գնահատումը: Քաղաքականության վերլուծության մեջ քանակական մեթոդները գնալով ավելի շատ էին կիրառվում մի շարք խնդիրների պատճառով, օրինակ` էներգակիրների սահմանափակության խնդիրը ստիպում էր կառավարական և ակադեմիական շրջանակներին իրականացնելու էներգիայի աղբյուրների և պահանջարկի մաթեմատիկական մոդելավորում: Այսօր նաև վերլուծաբանը պետք է տիրապետի համակարգչային համապատասխան ծրագրերի, որոնք կիրառվում են մասնավորապես վերաբաշխիչ և կարգավորիչ քաղաքականությունների վերլուծության ժամանակ (օր.` շահութահարկ, աշխատաշուկայում հավասար հնարավորությունների ապահովում և այլն): Քանակական վերլուծության միջոցով հնարավոր է դառնում քաղաքականության գործընթացում տարանջատել արժեքները փաստերից, և նորմատիվային խնդիրները դառնում են տեխնիկական կարգավորման հարցեր: Քանակական վերլուծության ժամանակ որևէ ընտրանքի վերաբերյալ ստացված տվյալներն ընդհանրացվում են ամբողջ բնակչության համար: Քանակական վերլուծությունների ժամանակ առանձնացվում են այuպես կոչված «գործոնների վերլուծությունը» և «սկզբունքային բաղադրիչների վերլուծությունը»: 1-ինը դիտում է քաղաքականության փոփոխականները որպես որոշակի գործոնների գծային կոմբինացիայի արդյունք և ուսումնասիրում է այն գործոնների բնույթը և քանակը, որոնք փոփոխություններ են առաջացնում տվյալների բազայում: Իսկ սկզբունքային բաղադրիչի վերլուծությունը ուսումնասիրում է բաղադրիչները որպես հիմնական փոփոխականների գծային կոմբինացիա: Այստեղ կարևոր է հաշվի առնել նաև միջնորդավորված փոփոխականների դերը, քանի որ անկախ փոփոխականը կարող է ոչ թե ներգործել կախյալ փոփոխականի վրա անուղղակի կերպով, այլ ներգործել միջնորդավորված փոփոխականի վրա, որն էլ իր հերթին կազդի կախյալ փոփոխականի վրա: Օրինակ` եթե հետազոտություն ենք անցկացնում, թե քաղաքացու կուսակցական պատկանելությունն ինչպես է ազդում նրա կողմից որոշակի քաղաքականության ծրագրին աջակցելուն կամ ընդդիմադիր լինելուն, այստեղ առանձնացնում են մի քանի անկախ փոփոխականներ` օրինակ` սեռը, տարիքը, սոցիալական դիրքը, կուսակցական պատկանելությունը և այլն: Այսինքն` սրանք ոչ թե ուղղակի կերպով ներգործում են քաղաքականության ծրագիրն աջակցելուն կամ չաջակցելուն, այլ հետազոտությունների ընթացքում պարզ դարձավ, որ կա մի միջնորդավորված փոփոխական ևս` պետական պաշտոն զբաղեցնելը: Քանակական վերլուծությունների ժամանակ օգտագործվում է նաև վիճակագրությունը, որն ընդհանուր առմամբ կարող ենք սահմանել որպես որևէ ընտրանքի ուսումնասիրության արդյունքում ստացված քանակական տվյալների վերլուծության և ամփոփման գործընթաց, որի միջոցով կամ հաստատվում է հետազոտության սկզբում առաջ քաշված հիպոթեզը, կամ հերքվում է: Վիճակագրության իրականացման համար անհրաժեշտ են հետևյալ քայլերը` 1. Հստակ ձևակերպել հետազոտության նպատակը 2. Ուսումնասիրվող ընտրանքի չափերը, կառուցվածքը և բնութագրիչները 3. Փոփոխականների բնույթը և քանակը 4. Քանակական վերլուծության ժամանակ փոփոխականների չափման սանդղակը: Վիճակագրության տվյալները կարող է ներկայացվել աղյուսակի կամ գրաֆիկի տեսքով: Փոփոխականները կարող են ներկայացված լինել նաև տոկոսային հարաբերությամբ: