Pawlpi Pukpih Mawhna Zungpi

Pawlpi Pukpih Mawhna Zungpi

Vantung in ama Pawlpi tatsatlo-in hong vil gige hi. Ahoihna leh lampialna khempeuh teltakin mu hi.
Hunlapin thuhilh ding pelh ngeilo hi. Thumangte ngahding leh migilote ngah ding thaman zong
theisak pah lel hi. Nungzui hunlai-in Lungdamnathu in manlaangtakin leitungbup lok hi. Pawlpi
tampi kiphut hi. Leitung aa om dawibiakna leh milim biakna pan aa hongpai minamkimte Christian
hong suak uh ahihmanin ngeina hoihlo tampi mah hong keng uh hi. Pawlpi pen Nungzuipi huntawh
kibanglo hi. Upna tawh kisai kinialna tawmtawm hong om hi. Lampialna leh mawhna in thuman-
thutak omna hong suankhia hi. Topa Jesu in, vantung panin ensuk a, pawlpi sagih tungtawnin
thuhilh hi. Tuate in, Ephesus, Smyrna, Pergamos, Thyatira, Sardis, Philadelphia, Laodicea te ahi hi.
Tua hunlai-in Pawlpi lian mahmah tampi omkhin hi. Antioch, Rome, Corinthian pawlpite minthang
mahmah uh hi. Tuate zanglo hi. Pawlpimin leh amau palsat mawhnate tawh kituakin, leitungbup aa
om Christian khempeuh thu hong hilh ahi hi. Tua hunlai-in Pasian Pawlpi min tuamvawh selo uh hi.
Amau omna mun ciatah min khatciat nei-in Pasian tawh kizom kimtek lel hi. Vantung in, khatbeek
khahsuah selo hi. Hih Pawlpite pen abanban aa kiluahto hituanlo hi. Pawlpi munkhat ciat aa om uh
ahi hi. Christian lampialna ahi palsatnate leh Pawlpi-min kituak ahihmanin, tua sihsan aa thu hong
kihilh ahi hi. Hih Pawlpi-min khiatna leh Christian te ii dinmun saikak a, leitung vannuai Christian
omkhempeuh thuhilh hizaw hi. Tua Pawlpi sagihte thanemna khempeuh SDA Pawlpi sungah
kimtakin om hi. Topa hong itna leh hong thuhilhna ih sin ding hi. Pasian in mite thu hong hilh
ciangin teelding namnih bek om hi. Tua pen sihna leh hinna bek ahi hi.
Pawlpimin leh Khalam dinmun
Ephesus Pawlpi Rev2: 1-7. Christ ti AD100.
Pawlpi pen siangtho, pauban om nailo hi. Tua ahih ciangin Ephesus tawh genteh hi. Ephesus cih
ciangin Deihhuai acihna hi. Nungzuite in upna khahsuah sangin singam zaw uh hi. Peter a
bungbuleh in kikhailum hi. Tua pen ama nget ahi hi. Stephen suangtawh kidenglum hi. AD100
ciang Pawlpi siangtho hi. Christian nuntak limci a, deihhuai mahmah hi. Lungdamnathu muizang
mahmah a, leitungbup zelman hi. Amyrna Pawlpi. Rev 2:8-11. AD 100-323. Hih hunsungin
bawlsiatna pen meikuang bangin siahuai hi. Christian te in tua haksatnate nawktan zo uh hi. Amau
kipiakna leh thuaknate Pasian aadingin namtui mahmah hi Smyrna pen Namtui cihna hi. Pasian in
amau sihna pen biakna-tau tungaa sagawh-biakna muinam bangin namtui sa hi. Hih hun pen Rome
lawki kumpite in Christian a bawlsiat laitak ahi hi. Pergamos. Rev2:12-17. AD 323-538. Kumpipa
Constantine Christian hong suak hi. Christian kithupiseh lua leuleu hi. Tua ahih ciangin Pergamos a
khiatna pen kitawisang cihna ahi hi. Leitung thuneihna uang lua, kiphatsakna uang lua a, Pasian in,
kiphatsakna pen Christian dinmun dingin deihlo hi. Pasian misiangthote in leitung thuneihna leh
aana neihna pelh kul hi. Pawlpi pen leitung kumpite mah bangin ki-uk hi. Thyatira. Rev 2:18-29. AD
538-1798. Jesu nungzui Christian te in lungsimtakpi tawh naseem uh hi. Thyatira pen a limnamtui
ki-aaptak aa nasep gennuam ahi hi. Itna, kipiakkhiatna leh upna, thuakzawhna tawh naseem uh hi.
Kamsangzuaute thahaat hunsung hi.
Sardis Pawlpi.
Rev 31-6. AD 1798-1833. Pope khansungin misiangthote gamsimtham ah tai uh hi. Leinuai
khuapite ah teng uh hi. Misiangtho sumaimang zo lo hi. A omlai misiangtho gennuam ahihmanin
Sardis Pawlpi mintawh thuhilh hi. A omlai, a beibang, cihnopna ahi hi. Philadelphia. Rev3:7-13.AD
1833- 1844. Lungdamnathu pen leitung minam khempeuh theihsak nopna, sanggam ki-itna lungsim
nei uh hi. Philladelphia pen sanggam ki-itna acih nopna ahi hi. Protestants te Lungdamnathu puakin
missionaries hong paikhia ziahziah hi. Laodecea. Rev 3: 14-22. AD1844 to the end. Laodecea pen
mite tungah thukhen cihna hi. A thumante cihna zong ahi hi. Leitung tawpnahun tungta hi. Thuman-
thutak utut aa zontheih hun ahi hi. Vantung panin tuu leh keel sittelhun ahi hi. Mikhempeuh tungah
thukhenna thu hilhhun ahi hi. Tuu laitakin thukhenna pan suahtakna om keileh tawntung meikuang
bek omlai hi. Mawhsakna leh hanthotna Ephesus Pawlpi. Pawlpi vantungmi acih pen Pawlpi-uk
siate or naseemte gen hi. Amasa aa ki-itna kiam Amasa ki-itna omlo pen mawhna hang hi.
Na kisik keileh nameivak khinkhia ning ci hi. Tua pen Khasiangtho in nusia hipah lel hi.
Khasiangtho nusiatte gupna taan ahi hi. Pasian hoihna pen Ki-itna in hoihsak hi. Leitung vantung
pasian dang khempeuh tawh ama kilamdanna pen Ki-itna Pasian ahihman ahi hi. Pawlpi sung ki-itna
a kiam ciangin, a sungah Pasian tawh kigamla ahi hi. Itna in a lungduai thei hi. A hehpih thei hi.
Itna in a ki-el kei hi. A kiphasak kei hi. A gilo kei hi." Itna in a kilawmlo-in a gamta kei hi. Ama
phattuamna ding bek a zong kei hi. A heh thei kei hi. Mawhna awlmawh lo-in a om kei hi.
Thumanlo a gamtat nuam a sa kei hi. Thuman tawh a lungkim thei hi. Asia na khempeuh a im zo
hi. Na khempeuh a um thei hi. Na khempeuh a lamen thei hi. Nakhempeu a thuak keikai thei hi.
Itna in paktatna tawh zualzang ngeilo hi." Tu in ahihleh upna, lametna, itna thum om hi. Hih
thumte lakah itna a manpha pen ahi hi. 1Corinthian 13: 1-13. Keimah in vankam kapau thei
zongin itna om keileh, a gingthei pengkul, a gingthei daltuah bang bek ahi hi" Kamsangpa pilna
nei-in, thuthuk tampi kagen thei zongin, mual kin sak upna kanei zongin, itna kaneih keileh a
mawknapi ahi hi. Kaneihsa khempeuh pia-in midangte an vak beklo-in kapumpi pia in haltum
dingin kapia zongin itna kaneih keileh a mawkna ahi hi. 1Coringthian13: 1-3. Itna omlohna munah
thukham palsatna tawh kidim hi. Pasian itna pen thukham khempeuh kicinna ahi hi. Pasian thukham
khempeuh itna pan hong phulkhia hi. Christiante namtuina leh midangte huupzawhna pen itna ahi
hi. Itna longal lei kiba sak kei un cih pen thuzuite aading thukham lianpen hiding hi. Pasian
kiangpan itna i ngah aa, tua itna mah leitungah ih piakhia hi. Pawlpi pukpih mawhna Nicolaitan leh
Nungzui taktak hilo thuhilh-zuaute: Mitampite in Pawlpi pen nuntak kivakna ding bekin zong uh hi.
A pumpi a kingak hangin a kha leh lungsim kinga lo hi. Pasian Tapa hong sihnathu in amaute
lungsim vutlo hi. Tua mite pen Pasian misiangthote aading gal-siahuai pen ahi hi. SDA kipatcil lai-
in Battle Creek ah Sanitarium Institutions lian mahmah khat nei uh hi. Zatopi tawh, pilna sang
tawh, Administration office tawh gawm khawmin, building nasia mahmah tawh om uh hi. Member
naseem khempeuh tua lai-ah kibuphual uh hi. Kikhen nuamlo hi. A sawtlo-in hong kaangtum hi.
Kiphelhzo lo hi. Mrs White in Pasian haal hi, cingiau hi. Nasep neilo ahih ciangin kikhenkek uh hi.
Lungdamnathu nasiatakin kizel zaw a, Pawlpi khangzaw hi. A kineih khempeuh pawldangah
mangthang hi. Nicolaitan . Nicolas pen Gentiles mi Pawlpi makai dingin sathau kinilh upa 7te lakah
khat hi. Antioch Pawlpi pan hong pai hi. Antioch pen Gentiles minamte omna pawlpi lian mahmah
khat ahi hi. Gentile Lawki ngeina ahi, gawlmek kithatsa, dawibiakna sa leh numei-pasal paktatnate
in Pawlpi sung huzaap hi. Pasian in nasia takin langpanin thuhilh hi. Tuhunin numei-pasal vaitawh
kisai pen kithaangzat mahmah hi. Gamdang paiding ten a zi ding uh vanvaikhak bangin, kikhak
ziahziah uh hi. Ordained Pastor ten zong deihsakna tawh a simthamin thunget sakin certificate pia
hi. Pasian mai leh mipimai ah kamciamna cihte ahi, Pawlpi neih kitenna siangtho pen limcitakin
kuaman nei nawn selo hi. Pasian naseemte numeivai aa paubang kitam mahmah hi. A khacinglo a
nausuak tamzaw mai hi. Upa-muanhuai tampi pen zinih zithum tawh om uh a, adaipih numeiphazah
meneu pan panto leng khutpi dong tungdekdek vive ngentang hong hita mai hi. Christianity
sianthona kimukha nawnlo hi. SDA bek kigen hilo hi. Pasian deihloh Nicolas upna cihciangin
Christian upna tawh kipawllo Lawki ngeina tawh kisawhpawi gamtatna ahi hi. Leitung tawh
kilamdang lo hi. SDA Pawlpi in Law & Grace upna ih telmahmah keileh kha tampi kitanlawh ding hi.
Pawlpi thukham in numei pasal, milian mineu deidan lo hi. GC president pa zong Churchboard
khutnuai ah om hi. Pawlpi sianthona pen Churchboard in kemcing ding hi. Palsatna leh mawhna pen
Pawlpi ngeina a suahlohna dingin dalin keem ding hi. A thanem-khate khoi ding a, Sianthona
sungah tumpih tawntung ding hi. Mikhat zahtakna tawh Christian standard khiam tuanlo ding
hi. Pawlpi a khan mah bangin palsatna zong tam ding hi. Upna bulpi sihsanin thapiak ding ahi hi.
Elder or makai khat ahihleh thusian mateng van kisuan lo-a, etcik in kikoih hi. Laymember ahihleh
etcik ci-in thungen aa thapiakna hun leh kilamkikna hun kipia hi. Kisikna lim hong kilat aa hoihlam
hong manawt ciangin ngeina munah kikoih kik hi. Tua pen Hehpihna leh thukham zatzia ding ahi
hi. Nicolus upna omlo ding, cilo hi. Nial in, ngeina suaksak ken, a cinuam ahi hi.
Smyrna Pawlpi
. Jews taktak ahilo jews bangaa kibawlvs9. Ephesus pawlpi a hilhna-ah nungzui taktak hilo
nungzui bang aa kibawl, ci hi. Tu-in Jews taktak hilo Jews bangaa kibawl, cileuleu hi. Pasian minam
hing ci-a, kiphatsakna leh Pasian Pawlpiman sungah om ing, ama naseem siampinam hing cih
kiphatsakna kibang hi. A pualam Jews leh a sunglam Jews om hi. Sunglam pianthakna omlo Pasian
naseem khauhmahmah pawlkhat om hi. Tua mite pen ki innteeksak mahmah zawsop hi A pualam
aa Judah mikhempeuh in, judah mitaktak hilo hi. A pualam vunaatna bektawh vunaat taktak hilo
hi. A sunglam Judah te bek Judah mim taktak ahi hi. Vunatna zong ..Khasiangtho thu hang aa
lungsimthak nuntakna tawh kisai hi. Rome2:28-29. 9:6-7.Gal 3:26-28. A pualam Judahmi banglo-
in a sunglam Judah ibatding Topa in deih hi. Ei Sabbath thuman, ei sanelo misiangtho, thuman-
thutak tangko, cihbek tawh Christian hoih kisuaklo hi. Sabbath tang mithat tampi om hi. Zukham
kawmsa aa thuman kupsiam mahmah om hi. Jesu Christ i sungah hong ten ding kisam hi.Tua pen
Paul in, sunglam vutaatna ci hi. Tuhunin piangthak kici hi. Ni sawm sung bawlsiatna nathuak ding
vs AD 303-313 kum-10 sung Diocletian kumpi in Christian nasia takin bawlsia hi. Misiangtho sisan
pen khaici bangin kituh hi. Leitungah zawngkhal takin a om hangin vantung hauhna pen amau
aading ahi hi.
Pergamos Pawlpi.
Natutna pen Satan tokhom hi. Khatveivei Satan in ih Pawlpi a zang theilo dingin kingaihsun hi.
Misiangthote leh Pasian pawlpi suksiatna muibun pen, makaipa aana zang thei leh tua sangaa
hoihzaw lampidang omlo hi. 2Thes 2:3. Makaite cihpeuhpeuh cileng bawlsiatna omngeilo ding hi.
Bawlsiatna pen Christian satandard khiam nuamlo, thuman tawh a ding tinten misiangthote hangin
piang hi.. Pasian in, Christian sungah kumpi aana zatding deihlo hi. Makai utte in sila suak ding
cizaw hi. Constantine kumpi Christian hong suah ciangin biakna makaite in power hong tamngah lua
uh hi. Pawlpi makai pen (man of sin 2Thes2:3) minvawh pah hi. Na tutna pen Satan tokhom hi
vs13. cingiau mawk hi. Pawlpi makaite aana hong liatpian ciangin, tokhom tungah Satan tu hi,
phawk in. Misiangthote nakpi-in kikep kul hi. Anti-pas acih ciangin Pope aana langpang a thuman
tawh a ding misiangthote gennuam ahi hi. Balaam kamsangpa. vs14. Numbers24, 25. 2Peter2:15.
Jude 11. Balaam in, Nicolaitan lampialna banah sum-siangtholo deih hi. Golhsum tawh naseem
nuam hi. Milim biakna leh milim biakna sa neek pen palsatna kikim hi. Gawlmeksa ih neek ciangin
milim bia mahtawh kikimin Pasian in ngaihsun hi. Number25:2-3 Balaam kamsangpa in Balak piak
(bribes) iplah hi. Tuhunin niangtui-taih, an-taih a kicite pen, Pawlpi sungah zatding kilawmlo hi.
Sangnaupang pilte grade-hoih kipia lo hi. Siate athoih kul hi. Minam enin grade peuh kipia thei hi.
Pasian Pawlpi hoihna khempeuh Balaam kamsangpa leh Nicolaitan ngeina in valhtum khinzo hi.
Pasian naseemte in anlim vaakte bek thupha pia uh hi. Lamet nei a kipia ante pen siangtho lo hi.
Tua thupha pen vantung samsiatna hizaw hi. Thuman tawh Pasian naseemte kipuapaih hi. Letsong
piazote pen panmun hoihnono pia uh a, thupha saangte ci uh hi. Thumanna taisanin Balaam lampi
zui uh hi. Tua Balaam kamsangpa in thumanlohna tawh kingah golhsum iiplah a, ama palsatna
hangin thuhilhna ngah hi. 2Peter2:15-16.
Thyatira Pawlpi
Keima sila naseemte puktheihna ahi, kamsang numei Jezebel ci hi. Jezebel pen Ahab kumpipa zi
hi. Baal kamsang tulkhat anvak hi. Tua kumpinu in Pasian kamsang tampi that hi. Tua mah bangin
Pope khut sungah misiangthote in gimna thuak uh hi. Tua bang aana zangin Pawlpi makaite gamta
thei veve hi. Pasian thuman misiangthote thuakna pen Lawki kumpi sangin nasia zaw hunsau lazaw
hi. Constantine kumpipa in nisuahnalam Constantinople acihna munah zumpi tuahin teng hi. Rome
khuapi kumpi zum pen Bishop-pa nusiat hi. Bishop-pa in biakna leh kumpi ukna aana kopkhawm
aa, damdamin power lian tektek hi. Lawki Rome kumpi sangin Pope power siahuai zawlai hi.
Nuntakna laibu sungpanin amin uh lakhia ngam mawk hi. Pawlpi sungpan amin phiatsak ek uh
hi. Milim biakna leh kamsangzuaute in Israel gam uk hi. Keima sila naseemte in numei leh pasal
mawhna a bawlna ding ahi zongin, milim biaknasa neekna ding ahi zongin, kamsang numei Jezebel
note sungah om hi. Rev2:20. Monarchy ki-ukna ahi Bishop, Father, Papa ki-ukna tawh Christian
kihei khia hi. Cikmah hun a piangngei nailo bawlsiatna hong tung ding hi. Matt24:21. Biakna
makaite pen Infallible ci uh, amau tungah mawhsut uh, sum tawh kitan uh, tuisiangtho kitheh uh.
Singlamteh awk thupisak hi. Dawite lau hi, ci uh hi. Jesu-lim Biakinnpi sungah koih hi. Nungzuipite
leh Mary limte koih uh hi. Amai-ah zahtak pia-in kun uh a, milim biak ngeina hong zang uh hi.
Vantungah Jesu siampi khatbek om kici napi, midangte mawhsut uh hi. Hell sung peuh puak
mawkmawk uh hi. uh hi. Jesu in, thukham palsatpa, siatna mangpa tapa, hong kilang masa ding
a, a kibia Pasian a kici khempeuh sangin hong kipahtawi zaw ding a, Pasian bangin Biakinnpi
sungah tu-in, Pasian hing hongci ding hi. 2Thes2:3-4.

Sardis Pawlpi
A nungta bangin na om hangin, a si nahi hi. Leitung maitang tuamin Christian kidim hi. Biakinn
lianpipi vansunin lam uh hi. Singlamteh pen biakinn khumvum leh mualsangdawnah sangkhai uh hi.
Christian kithupi-muh mahmah hi. Amau lungsim sungah Jesu kisangkhai lo hi. Amauhoihna leh
nopsaknate bek thupi seh uh hi. Christian Livingstandard pen dawibiate tawh kilamdang lo hi.
Pasian muhna ah a kha uh si hi. Reformation kici Puahphatna hong piangkhia hi. Germany gamah
Martin Luther in Pawlpi manlohna upna nam-91 pulak hi. Pasian telkhiat galhang hong piang ziazua
hi. John Wicliff, John Huss, cih bangin a gamgamah diang ciat uh hi. Puahphatna omsimin zumpi-
ngak Inntekte in sangzolo tawntung zaw hi. Puahphatna makaite Pawlpi langpang suaksak hi.
Ngeina palsatin minvawh zawsop uh hi. Ahih hangin tua puahphatna pen Pasian in namtui sa hi.
Galhang, ci-in vantung in ciamteh hi. Kamite, ci-in pahtawina ngahsak tawntung hi. Puahphatna
khempeuh pen bawlsiatna hiam, nuainenna hiam, thuaksiatna khatpeuh tungtawnin piang thei
tawntung hi. Biakinn tawh mipi tawh nopci tak-a om khempeuh pen khalam picinna hituanlo hi.
Sapul omna ah sasialne vasa hon om hi. Pasatna a tam ciangin leitung mihingte in lungkimna ngah
zaw uh hi. Effort munkhatah laisiangtho kikupna kanei uh hi. Thukham thu ahi hi. No SDA ten
zong nagen bang un, zui tuan kei uteh, hong kici a, etteh cinglo i hitaveh maw cih tawh ihmu
theilo-in kangaihsun hi. Pawlpimaan cih bektawh kimainawt zolo hi.
Philadelphia Pawlpi.
Kuamah khakzawhloh kongpi namai-ah honsa-in om hi. Philadelphia a khiatna pen sanggam ki-
itna, cihna ahi hi. Lungdamnathu hangin kideidanna omlo hi. India gam ah William Kelly pai hi.
Kawlgam ah Judgson hong pai hi.missionary tawlngalo-in hong tung uh hi. China-gam, Africa-gam
leh leimong dongin missionary kipai sak hi. Sanggam ki-itna lungsim bektawh lungdamnathu
kipuaksawn zo hi. David tawhtang vs7. David tawhtang acih pen mipawlkhat in, Pope or pawlpi
makai thuneihna sakha uh hi. Tawhtang neipa pen Jesu hi-a, tua tawhtang pen ama hong sihna ahi,
Lungdamnathu tawh kipawl thuman-thutak in kong honna tawh ahi hi. Tua thuman a taangko
Pawlpi in vantung kong honna tawhtang nei hizaw hi. Mipum-mimal aana neihna hilo hi.
Laodecea Pawlpi.
Eite thu hong kikhen ding hi. Pasian thukham zangin thukhenna kibawl ding hi. Jesu a sang
mawhmaisakna ngahte aadingin suahtakna thukham hiding hi. Jesu sisan tawh sawpsiangna
ngahlote aadingin sihna thukham hiding hi. Jesu in Pasian thukham pen, ki-itna thukham or
suahtakna thukham ci sese hi. Jesu sungah a nungta khempeuh in suahtakna ngah ding uh hi.
Christian minpua tultampite pen mopipuan neilo ahihlam kiphawk ding uh hi. Sa lah salo, votlah
votlo a lumbek, acih ciangin leitung mite tawh kilamdang lote ahi uh hi. Azongnuamte aadingin a
khaktan omlo hi. Kong honsa-in kikoih hi. Gupna a taanleh zong amau teel hilel hi. Pasian in
nuntakna leh sihna teelsak a, amau teel bangbang thaman ngah ding uh hi. Tua pen vantungmi-3
taangkona kici hi. Sapi ciamtehna leh Pasian ciamtehna teelhun leitung tawpna ahi hi. Thukham hilh
aa palsatte leh thukham nial aa palsatte mawhna kibang ahi hi. Jesu muan manin thukham
thudonlo-in i omkha ding hi. Thukham hilhna bek tawh suakta dingin i lamen kha ding hi. A nih
tuakin pukna ahi hi. Pasian kamsung pan-a pusuak thu tawh a nungtalo Christiante pen Jews taktak
hilo hi, nungzui taktak hilo hi. Laisiangtho tungaa kingalo lungsim sawlna bektawh kalsuan
Christiante pen Satan beelsung a omsa ahi hi. Topa muak dingin ih kigingnai hiam! Jesu sisan tawh
kisawp puan nasilh nai hiam! Vuuk bangin a ngo diam! Vantunglam zuan dingin, vantungmite tawh
tonkhawm dingin na kilawm hiam? Calvary mual napha ngei hiam? Gethseman huan ah Topa tawh
natung ngei hiam? Hun tomno sung bek omlai hi.