J OSIAH KUMPI PA

Kum 8 naphak lai-in, bang nahih hiam? Mimal khat ciat dawnna kibang kim hetlo
ding hi. Kei hunlai ciangciang ka gamtat danuh a kivalak theilai khatam.
Technology khan tawh ko neulai kum 8 ka phaklai thu genleng tulai khangno ta
dingin mitkha ah zong geelthei hetlo ding leh ong dot dinguh tam mahmah ding
hi. Sangkah in gam khangto ten khedan leh laibu a zatlai takun, ko pen suanglai
leh suanglaikung, miten white board leh soft pen a zat laitak ei gam ah
blackboard
leh leikang tawn, miiphiu, miten computer a zat uh teh en laibu leh ballpen,
manual type writer hi lai, leitungah a nungta tektek mite leh ei kilamdang
phadeuh sese, kua ngawhding ih hi hiam? A tawpna ah ong uk kumpite mah
ngawhding simloh a dang muzopak keng. Tun hoh leitung level in technology
lamsangah kikhauhpai mahmahta suak hi. Pasian thupha cihding simloh gending
dang theituanlo leuleu hing.
Kum 8 ka phaklai leh tuhun a naupang kum 8 te omdan ka tehkakkak ciangin ken
lah a mau nun takzia ngaihsun zo keng, amau zong kei' a ong ngaihsutsak pih
theikei un teh. Ko neulai sangah laisim hun lobuang seng peuh kineih in, ling
peuh kineih in, buangnai kap in duupi khauh thei penpen bang kidemzen in,
Japan gallai a thautang kilawn bang thautang dawn teng tawh peklung
kimawlin kidem in, ah! tamlua... ong gennawn dah ning.. ka computer game
kimawl danteng uh hih dan teng hi zen hi. Tulai a tebel tu ziuziau in khutme kawk
tangsak kekkek in ut teng kimawl thei. Tu hun teh bawlung kimawl ding hi leh
uniform mah buut mah tawh ko hunlai bel ka uniform uh kikek sak kha leng ci-in
uniform a kisuah khia hi zaw hi. Sangkah leng siate uliante' thu ngai, biakinn ah
kikhawm leng thuhilh siate thugen kingai, hi leh hikei leh thumang ding sello ding
himawk hi. Hih teng bilbial dan pen ei khang ci mai ni. Bang suak ding ih hihiam
kithei lo hi.
Josiah a kici naupangno kum 8 pa pen na tuacilo hi. Singgah bangin kituat leng
kum 8 kiimpawl
pen min lian nailo, ang kiukiau kihi pan hi. Leitung a kumpi suak lakah a khangno
penpen kumpi pa, tangthu a kigengen kumpi Josiah thu suut dih ni. USA te bang
hileh bangzahta in a pil a, a siam zongin, bangzahta in Pasian a um a muang
mahmah zongin kumpi piakding lamet omlo hi. Kumpi suahnop leh natural born
US citizen hiding, kum 35 pha hamtang ding. Josiah kum 8 a phakin politics
kimawlmawl khin hi cimawk ei'. Politics kimawl cih ciangin mite thugen ngaingai
cih hilo in ama' thugen miten ngaingai, mite lungsim ngaihsutna toknawi khin hi
cih himai lodia?
Kumpi ong sep kum 18 ong uk sungin Biakinn Temple ah siampi asem Hilkiah in
biakinn sung teng nin a hahhah leh sabuai ansuai sungahThukham Laibu Book
of the Law mu hi, ci hi. Nidangin mi muh dingin kiphah khia ngei hetlo hiding
hiven or zatding phallo a kisel simsim zong himai thei or Pasian thupiak sang
mite bawl thukham thupi sak zaw tamzat zaw himai thei maw. MU cih lawmlawm.
Va zawt kha sese khelkhel keileh mu hetlo ding a, a muh khitteh la in kumpipa
Josiah pia hi.
Tua laiin laisiangtho cih zong bu tamnai hetlo ding leh Moses at bu nga tengbek
hilai ding cileng sim ngitnget khollo hile uh kilawm maw. Eh! amau kawk kha ing,
ong maisak un. Tuhun teh Biakinn sungah laisiangtho bu khat mu ingh ong kici
leh lamdang kisa khollo ta hi. Nang bu khat bek mu maw? Ken bu tampi mu veng
e cih ding hong hita hi.
Kumpi Josiah hile cin bang nacih diam? Tulaitak bang hileh kawlte pau leh
siapaa pitsi khat mu le cin bang nacih diam? London khua oxford museum ah
koih leng bel kihauh lawh lian ding theih sa. Bek thamlo amupa minthanglo in a
om diam? Hauh lawh, minthan lawh ding khat ngaihsunsun kha ngei zen mah
ingh. Hilkiah in kumpi Josiah kiangah tua laibu laizial a va piak teh Josiah in bang
cih hiam? Kei tavuan hikei, kei kumpi hing. Kamsang leh siampi te ap ning
cideksuai lo hi. Josiah in la in lem in a banban in sim pah ngekngek hi. Tua
hunlai laisiangtho a bu hinailo savun dal kizial hilai ding ci leng bangzah in a sau
tam. Savun kizial ding hiven phekhual banghileh koi cia a hizen tam? Laisiangtho
siam ten tua laibu pen the book of Deuteronomy Thu hilhkikna bu hi ci uh hi.
Alian 34 ciang om hi. Na lemin na simdih viavua leh, Josiah in zong sim
ngekngek ci hiven. Kumpi Josiah dingin na kibulh unla.
Josiah in Pasian thei in Pasian' kammal te it mahmah hi. Tua Thukham Laibu
sungah bang simkha hiding hiam a sim khit teh dahin a puan balkek hi ci hi. Ama
tung bekah adah hiloin, a mipihte tung, biakinn ah nasem siampite tungah zong
dah hi.
Topa in hih bangin ci hi: En un, hih lai mun leh a tuangah a tengte tungah
Judah kumpipa in laibu sunga a sim khiatna thute khempeuh ka tungsak
ding hi. Bang hanghiam cih leh amaute in kei hong nusia-in pasian dangte
tungah paknamtui hal uh a, amau khut tawh a bawl milimte tawh kei hong
hehsak uh ahih manin hih mun tungah ka hehna so ding a, ka hehna dailo
ding hi.
Josiah dingin kituat leng, Judah kumpi, ih kum lah kum 26 khawng hipan, ei
sanga khangham thudot ding vive, siampi lah omlai, hih a tunga Topa thugente
za leng ih bangci om ding hiam?
Kei bang bel nehno phadeuh ka hihciang kidikin kapkap kha ding hing. Josiah
zong dahin kapin a puan balkek zawzen hi.
Josiah ih cih kua a hiam? Apa kumpi Amon leh anu kumpinu Jedidah. A pu
kumpi Manasseh
kumpi ginalo penpen hizen hi. Apa aki suamlup khit ciangin Josiah in kumpiza
aluah hi. Kum 8 aphak laitak.
Josiah in zong Topa thugen te a simkhak ciangin upzawh huai hetlo khatin
ong gamtang hi. Hi cih leng midangten ong bangci ngaihsut tam cih zong khualzo
nawnlo hi. Biakinn Temple sunga paizia khempeuh zong awlmawh zo nawnlo hi.
Awlmawh hileh khangnolai hiven siampite' cih bangbang manding in omlel ding
hi. Ama hihna ah linglawng vetlo in lungbawk takin action ong la hi.
Josiah in Israel biakna makaite' phal Temple sunga idol milim kizuakte ong vatpai
ong sunen dikdek hi. Israel te biakinn sunga biakna dangdangte phunggyi teng
ong notkhia hi. Biakinn sunga milim zuakna sumbuk te ong susiazan dikdek hi.
Biakna dang phunggyi te that mang hi. Israel biakinn sunga biakpiakna tawh
kilehbulh khempeuh ninbung sungah ong lawnkhia hi. Pasian' kammal Pasian
thu a zuihna hang ahi hi. Tua laitakin kum 26 pha pan hi. Laisiangtho in hih
siansuahna a kipat cilin Josiah kum 20 pha pan hi ci hi.
Kum 20, khangno kum 20 ih phaklai in i tangsiatte phulphullai kha ding hi. Ih Aw
hut ngangngang laitak hi kha ding hi. Ngal hapaktung bangin kuamah ih kihtatloh
laitak hikha sop ve. Numei ten zong amau leh a mau akitheih laitak hin teh.
Naupang kumpipa zong ong tangval san ta. Pumpi tunga na khempeuh akikhel
mah bangin biakpiakna luiteng a thakin ong khekto. Biakna zong ong puahpha/
lemtuah kik reorganize zen hi. Khangno khat ii hih dingin vaat veve maw.
Israel ta dingin biakpiakna pia ding, biakinn paiding cih pen tulai Shopping Mall
paidan tawh kibang ding hi. Egypt gam pan Canaan gam zuanding a sehnel nisa
lak ah gilkial dangtak pipi sungpan Pasian ompihna a phawkna dinguh lungdam
biakpiakna biakinn pai nahi uh hi. Gal leh sa khut sung panin Pasian hotkhiatna
ngah den uh ahih manin biakinn pai a, Pasian bia na hi uh hi. Biakinn pai a
biakpiakna a neihuh Pasian bianuam bek na hi uh hi. Biakinn pen Israel ta dingin
khuamial sung pan khuavak lamlak meitangpi na hi hi.
Israelte khapsa gamnuam zuanin ong paipaina uh ah migam milei nawkkha
luahkhauh ahih manin minam dangte zialetong, pauleham, nekledawn, silhleten,
biakna cihte ah ong sit nawnlo uh hi. A lai mahmah uh zong kawlpau tawh ong
thuah gawpve uncin ee... Tua sungpan na khem peuh siatna ong kipan hilo ding
maw. Kahbia gawpta. Pasian biakna ding innpi sung nangawn ah Pasian omna
ding awnglo phialin pasian dangte kitung leuhlauh cih zawzen. Ahi theiding
mah hiam? Bangdingin Siampiten milim zuakding phal zawzen uh hiam? Temple
a siampite khasum kicin semsemna ding hiam. Josiah banga i pu David khekhap
themcik zong piallo a ih zuih tentan kei leh puahna ding ollo ding hi. Josiah in
zong Pasian tawh aki zopna mite tawh aki zopna sangin khauhpaisak zaw ahih
man a aphialzo na hi hi.
Josiah zong amah pantah a thu hilh, siampi Hilkiah simloh adang siampite bangci
siampi hiding hiam i ngaihsun thei hi. Thukham Laibu simsim phenphen
ngeikhollo teng hikha ding hi. Ahi zongin Josiah in kumpigam makaihna dingin
tua a ngahkhiat pilna theihna tungpan decision making khensat theihna ding
lungsim leh thuman thutak kana lungkhauhtak lungbawk taka sawi
dinlo/ dingtang linlianna ding Pasian kammal leh a pu David khekhap mah na ci
teltal hi.
Josiah zong na hiteltal na hibekbak keileh bangmah hituanlo hi. Anlangh ah
gualnam beh pen a phincil ahi teltal phadeuh hiding hiam ka nu tappih ka pi leh
ka nu mahmah "sakbek Lia nu hiveng e" ci-in la nangawn in a kiawi zangei zen
hing. Ih sakbekbakna pen mipi adingin zang ding ih hi hiam? or ei pumpi bek
adingin zang ding ih hiam? Josiah in a thu muhkhiat kuama kiangah genselo in
omcip ngiungeunuam hileh omtheilua ding hi. Ahi zongin mite gamtat siatna
Pasian lungkimlohna a theih a kipan a lungkhauhna a sakbekna hangin gen
khialo in omthei mahmahlo nahi zaw hi. Tua man mahin mikhempeuh in Josiah
sepkhiatte hangin Pasian' deihna a thei khia amu khia na hi uh hi.
Josiah lungbawkna in Israel minam ta dingin Ni thak khat ong suak hi. Abeisa thu
abeisa hi in dot kikkik kullo, bangdingin tua cih hih lawmlawm nahia? cih cih kullo
himawk hi. Josiah in Pasian' a dingin lungtang na nei hi. Josiah zong a pa
akisuamlup khita kipan siampite tawh ki thuah tawntungpa hi-in laisiangtho bel
thei mahmah kha ding hi. Temple sunga biakpiakna paizia a kipan a theihloh
tawm mahmah kha ding hi. Ngaihna pan zakna, simin,umin, semkhia bawlkhia
pah ahih man laisiangtho kammal in mi khel a kicite na hi hi.
Thukham Laibu ong muhkhiat a kipan biakinn sunga milim kikoihte Pasian'
deihloh Pasian awiloh ahih lam a thakin ong mukhia hi. Siampi Hilkiah in
vamukha kei zenzen leh Israel temple sung a paizia omzia te Josiah in a hiding
mah sasa kha zen ven cin mate. Azen zenin Kumpi Josiah in siampiten zong
Temple ah milim zuakding phallel ahih teh ken zong phamawh satuan keng, a ci
hi zenzen leh Israel mite tungah bang thusia a piang tam? Josiah ka phatna
lianpi pen, kumpi hinapi in politics sangin spiritual Pasian thu a ukzawk a
sepzawk ka muh teh etteh huai kasa mahmah hi. Etteh zawh ding bel baihpakin
un keng.
Ka sunga milim bang hi a, milim biakna paknamtui hal bang hiam? Pasian in
theihtelna ong guan hen. Tua te theitel in paihmang ding in Josiah bangin
lungsim thakhauhna ong guan hen. Ka simngeiloh laisiangtho kammal te ong
musak hen. Athak in thangahna ding Thukham Laibu te zong ong mukhia sak
hen. Ama deihna tawh kituak biakpiakna ah ka dinzawhna dingin Josiah te
bangin thuthak ong pia hen la, thuman thutak ah khotakin ong ding sak hen.