SINNA 02 - PASIAN IN KUA HIAM ???

Thupatna: Pasian bang tawh kibang hiam? Bang hunin hong om hiam? Amah ih thei ding hiam? Dotna tampi
tak om hi. Dawnkikna ding a om hiam? Om mah hi. Tuate dawnkikna ding Lai Siangtho sungah Pasian in hong
lak hi. Lai Siangtho tawh kisai ih sin khin zo hi. Pasian' thubu taktak a hih lam ih thei khin hi. Lai Siangtho
Pasian' kammal takpi hi ci-a ih up nak leh Pasian' thu a maanin hong gen ding hi cih ih muan ding a hihi.
Lai Siangtho pen Pasian tawh kipanin, Pasian tawh tawp a hih manin, Pasian' Laibu kici hi. Lai Siangtho in,
Pasian bang tawh kibanga, Amah tawh koici kizp ding cih, A hong theihsakna dinga Pasian' hanciamna a hihi.
Pasian' thu ih muh khiat pak theih ding bang teng hiam cih en dih ni.
1. A nungta, a maan Pasian khat bek kua hiam? Jeremiah 10:10
Theih ding: Pasian pen lungsim seh leh phuahtawm thu hi lo hi. Upmawh sansat zong hi lo hi. A om taktak - "a
nungta Pasian" a hihi.
2. Pasian koi-ah teeng hiam? Phatna La 11:4
Theih ding: Aksite khengin, mihing muh zawh lohna munah Pasian teeng hi. Ama vangliatna in khawvannuai
khempeuh huam hi. Hun leh mun in Amah khaktan thei lo hi. Na Khempeuh Ama'n thei-a, vangliatna
khempeuh Ama kiang pan hong pai hi. Kumpi Masa 8:39
3. Pasian a mu ngei a om hiam? John 1:18
Theih ding: Mihing' kicin lohna in a kicing Pasian tawh hong kikhen sak hi. Pasian a kihilna a mangmuhnate uh
kamsangte in Lai Siangtho sungah a gen uh hangin, maitang kisi-in Pasian mu kha lo uh hi.
4. Pasian' omzia koi bang hiam? 1 Peter 3:12
Theih ding: Pasian in mu thei-in za thei hi. Ngaihsun thei-in phawk thei hi. Phatna La 84:11. Mimala a om
Pasian a hihi. Maitang mei-in, bil nei-in, mit nei-in, muk nei-in, kam nei-in, khut nei-in, khutmete zong nei hi.
Paikhiatna 31:81. Phatna La 34:15; 89:34. Mimala a om Pasian a hih hangin, mun khat bekah om lo hi. Hun
khat sungin mun khempeuh ah om thei hi. Zak loh, theih loh nei lo hi. Phawk thei-in, ngaihsun thei-in, mawh
mai sak thei-in, ih tuah khak dahna leh haksatnate hong hehpih thei hi.
5. Pasian' omzia a thupipen bang hiam? 1 John 4:8
Theih ding: Pasian' omzia khempeuh leh Ama sepna khempeuh tungah Ama itna tung tuangpen hi. Amah
thutang a hih hangin itna picing A neih manin hehpihna tawh kidim hi. A maan itna khempeuh Pasian' kiang
pan hong kipan hi.
6. Pasian' tawntung pianzia koici kigen hiam? Phatna La 90:2; Hebrew 13:8
Theih ding: Pasian a om loh hun om ngei peuhmah lo hi. A om loh ding hun zong hong om ngei peuhmah lo
ding hi.
7. Pasian' hih theih loh na khat peuh a om hiam? Matthew 19:26
Theih ding: Pasian pen vanglian tawntung a hih manin, Ama hih theih loh na khat beek om lo hi. Job 42:2.
8. Pasian bek in a hih theih na nam nihte bang hiam? Isaiah 45:28; 46:9,10
Theih ding: Bangmah a om nai lo pana na khat peuh om khiat sak theihna leh, mai lam thupiang ding gen kholh
theihna pen a maan Pasian bekmah in a neih a hihi. Pasian kici napi hih bang siamna a nei lote khempeuh
pasian-zuau a hihi.
9. Bang zah ciang dong ei' kiang nai-in Pasian hong om thei hiam? Phatna La 139:7-10

Theih ding: Pasian om lo ding ci-a mite a taimang theihna ding mun khat zong om lo hi. Pasian' kiang panin a
bumang zo kei ding hi.
10. Cihmawh hun cianga mihing in Amah a belh theihna dingin Pasianin bang kamciam pia hiam? Isaiah 41:10
Theih ding: Pasian' kiang pana ih bukmang ding hi lo hi. Mimal khat ciat hong huh dingin kamciam hong pia hi.
Mihiingte' tunga Pasian' hoihna bei cih om thei lo hi.
11. Mihing' tunga Pasian' hehpihna a bei thei ding hiam? Phatna La 103:17,13.
Theih ding: Ama hong hehpihna bei thei ngei lo hi. Ih nu ih pate' hong hehpihna sangin Ama hong hehpihna
lian zawtham lai hi. Isiah 66:13.
12. Hong itna hangin koi-ah a teeng dingin Pasian hong kum suk ding hiam? Isaiah 57:15.
Thukhupna: Hih bangin Lai Siangtho in Pasian' thu hong gen hi. Vangliatna nei mahmah napi hehpihna nei
mahmah zel hi; pil mahmah napi dik mahmah zel hi; thutang mahmah napi thukhual mahmah zel hi. Mihing in
pianna a neih hangin Pasian in pianna nei lo hi. Tua a hih manin mihing leh Pasian kizakim thei ngei lo hi.
Mihing in Pasian zonga, Pasian' deihna bangin gamta-a, Pasian lungsim a hih theih zaha a zil ciangin,
lungnopna lianpi ngah thei hi. Mihing in Pasian a zon ciangin a mu theihna dingin Pasian mah in na huh hi.
Pasian ih zon ciangin ih nuntakzia zong hong kikhel hi.