No.

01 SINSA THO HRANGA

Doh is G.

1. Oh Kristien vanglaihai irruoltakin,

Rengpa ta hrang tho mai ei tih;
Thupek zoi tuma ei ke pên ruolin,
Rengram inding thar nôk ei tih.

Sinsa tho hranga a siema omin,

Ama kutsuok ei lei nia;
Kha sinsa tho kha ei omna hrangin,
Rengpan lei inkung sai anih.

2. Ei Vânglai, Hratlai nihai sôt no nih,

Hi Rammuola ei om sung hin;
Khasîkin vanglai nihai hmang sain,
Rengpa ta hrang tho mai ei tih.

3. Ei vânglai nihai hloisul par angin,

A Satnahai la chuoi a tih;
Nakana Rengpa’n anihruoi tika,
La hong parsuok nôk ngêt ei tih.
No.02 SIEMTHAR NÔKNA

Doh is

1. Siemthar loi nun ei tam vângna,

Siemtharna in nang ei tam na;
Taksa tieng le irtha tieng khom,
Harthar hrangin siemthar ei tih.

Siemthar nôkna nôn chu,

Sêrtan le tan loi khom;
Innangna reng reng hi om ma,
Siemthar nôkna nôn chu.

2. Krista inzôkna chang loi hai,

Kristaa siemtharna ei nang;
Inzôkna chang iempuhai khom,
Ei hringna siemthar mai a nang.

3. Mihriem milung ngaituo murdi,

Ei nun hoiin hmang inlân khom;
Nitna irsang tak neiin lân khom,
Siemthar na nôn chu sawt thei mah.

4. Inzôkna chang iempuhai khom,

Ei hringna siemthar mai a nang;
Siemthar na khom Kalvariah,
Hongpan roh nang siemthar a ti.
No.03 INPUONG FAINA

Doh is D.

1. Tiena kannan rama champui tak lai khan,

Sil le kai fak hrang reng irsam ngai ma hai;
Jakob insung mihai milung a zing ie,
Khankhom an suopui le an lei irtong ta.

Inpuongfaina hi satvurna bul ani,

Ni u reng sinthopui ni lunginkham mo;
Ni chongbai suoktin hi mitin damna hrang,
Lungkhamna chongbai thum lei ni nget riseh.

2. Ni unaipa josef kha mo ni ma ung?

Mi hai hringna injôk hrang keng ki lei ni,
Lungzing no roi tia lungkham chongbai khan,
Insung raifanna le lomna an tung ta.

3. Irngeina le lungkham na’n roirêl inlân,

Ei ram le nam koiindang ngir sa nôk a ta;
Zingtin parhai enin an suokna’n suoin,
Rengpa lungkham roinpuizie hril tâng ei ti.
No.04 LUNGKHAMNA A SIP PATHIEN

Doh is C.

1. Kinai ni milung murdi chu ni pe ro,

Ni Rengpa Jisuo krista ni lungkham in chu;
Ki milung ang irput mi ni in lân,
Ni Rengpa’n a tuongna hi ni tuongpui sa roh.

Choiindom le inpak hrang pathien hring chu ni ni.

Dengtheina le intakna hmun nin hmu tir lan khom;
Hlimna hmuna ni hruoiin irtansaihai siet hrangin phal mak che
Lungkhamna a sip pathien hring nget chu ni lei ni.

1. Rengpa suola ki nun kir hmanglai khomin,

Ni lungkhamna mitin ni lei en sui ah;
Ki chukloina anga ni thuon no pu,
Ni lungkhamna roinpui lomin inpâk ki ti.

2. Iemom loi’n rengpa nang ki lei zui a,

Ah hoina hmuna vai nang ki lei zui ngaia;
Ki suolna tep joi loi ni ngaidam ro,
Ni sinthopu iemom hrang ni siemthar nôk ro.

3. Damlai ramchar dengtheina hmuna hin chu,

Lomna kumkhuo hrang rêng hi lei om maka;
Khan khom Rengpa kuong nget ki tûng tika,
Ki lungdûkna mit’rthi lomin inchang a tih.
No.05 CHONGSEPÊL

Doh is G.

1. Chongsepêl thing kross ah, Nirtanpu hmel ki hmu,

Mihriem hmel nek khoma insietin a om;
Atak tak ngei khom mihriemhai tak tak nekin,
In sietin a om kei misuol sik anih.

Halleluiah oh Halleluiah a thina sika khan,

Damna’rkip ki hmu;
Halleluiah tin zai vor ki ti,
Thiem chang ki lei ni tah.

2. Kei misuol ta hrangin ni varpêk fai vangna,

Ki thei dorin ni hnung hi zui mai ki ta;
Ki hratnona haia hratna tharin nin thuom roh,
Ki lamsuom tina nang chu lei ngir mai roh.

3. Ei natna hai pêlin khopên tieng chu a pan,

Mihriem hai hmusit le e hnolin a om;
Ei puoloina sikin vik irdulin a om ah,
A hliemna haia indam ei lei ni ta.
No.06 THOI EI TA INNGIR EI TI

Doh is

1. Ki chan sietzie hi’rngai u ta,

Jerusalem kul angin;
Ei ram ei nam a chim zoi tah,
Thoroi inngir nôk ei tih.

Thoroi inngir thar nôk ei ti,

Asiet loina rêng om ma;
Hrilsieta ei om loi na hrang,
Thoi ei ta inngir ei ti.

2. Mitin kulhai a chimzoi ta ,

Insung tin hai a chim ta;
Koiindang tin a lei chim ta ah,
Mi hai suoka ei om ta.

3. Ni mi hai chu lei suol ta in,

Kawlkil ten lei tung khomsien;
An suolhai sima an kirin,
Satvur ki ti ni ti kha.

4. Rengpa kei le ki in mihai,

Ni dân kin lei in siet a;
Khankhom aw Rengpa nang ki ngen,
Ki mitirthi irnghil nawh.
No.07 HEI EN U TA EI RENGPA SAW

Doh is

1. Hei en u ta ei Rengpa saw,

Kros pûttin ar tetpui ;
Changpui pu hrang an om loi mo,
Kei ki om hi te Reng Jisuo.

Ki hratna in zoi ma,

I tinmo ni a ta reng Jisuo.

2. Suolna nei loi ei Rengpa saw,

A thina hrang pûttin;
Sawl ngoi ngoi in ar tetpui ah,
Mirvak mai mai an chelta saw.

3. Aw eini vanglai lengruol hai,

Rengpa Kros putpui hrang;
Ei vanglai ni ei hrat lai hin,
Changpui ei ti ei Reng Jisuo.
No.08 KRISTA ZARIN KI VÂNSATNA

Doh is G.

1. Rengpa nini hruoidân lampui hi:

Kihong thirin a roinpui ie;
Ni satna le khozarngaina Rengpa,
Ki kuong tinreng a anin lang ngai.

Krista zarin ki vânsatna hi,

Puong zoi ma ung, ki phu loi ie;
Ni satna le ni lungkhamna Rengpa,
Dengtheina hmuna anin lang ngai.

2. Ni satna le khozarngaina Rengpa:

Ki mâna hin a luong liem mai:
Mi inrieng le invaitak nin lan khom,
Nang ki nei sikin kirtha arngam.

3. Dengtheina le vangduoina Rengpa,

Ki ta hrang chu ni hlu vangna;
Ni satvûrna ni lungngamna thu le,
Ni hmel nin hmutirtu an lei ni.

4. Rammuol roinpuina le irchongna,

Rammuol theina le varna hai;
Ni changno’n chu teploi ving an ni a,
Ni makunga hin ki hong inhlan.
No.09 KI CHUKNA RENGPA

Doh is F.

1. Kir siengna renga ta misuol ki ni,

Rammuol enin chukna nei ma - ung;
Thirna tenrenga ki hong thir khomin,
Chukna nei ma- ung ni ta hrangin.

Ki chukna Rengpa,ki satna Jisuo,

Nang vai hi ni ni, ki chukna le lomna;
Tun moh thiemno nin changtir a ta,
Thiem nin changtirpu chu krista a nia.

2. Iemom ma - ung ti nin hriet e Rengpa,

Ni ta hrangin iemom ma - unga;
A nin hrattir krista vai khan,
Iemom le chuka ni nir ngaia.

3. Felna nei ma - ung ti nin hriet Rengpa,

Khan khom fela ni ni lei bea;
Ki felloina murdi chu irbelin,
Ni felna puonin ni nir thuom ta.

4. Chukna nei loi, chuka ni ni bên chu,

Hi hringsung zoro toite a hin;
Thi dêna iemoma ni sintho hrang,
Ki hong inhlan e ki hringna hi.
No.10 HNENA PUON LA SIL KI TIH

Doh is G.

1. Rengpa ta hrangin sinhai tho ki ta,

Rengpa renga ta thilsa khom sabei ki ti.
Khankhom ki lomman chu a ta a ni,
Ki hrangin thilsa reng inhnar no ni.

A lampui hai chu intak khom sien,

Nuomin intan no ning ti kin hriet:
Roiinpuina zuong tung hrang chu ki thirin.
Sûn khat chu hnena puon la sil ki ti.

2. Rengpa ta hranga sinthopuhai chu,

Hlosam ngai mahai,hi hringsunga ngei khom hin;
Ama’r hminga intakna tuongpuhai,
Inlalna choiindomna chang an ti.

3. Lompumin Rengpa sin chu tho ei ta.

Lungoitak pumin Rengpa hnung chu zui ei ti:
Pathien ngâisak hi lung a chukin chu.
Manna le satvurna bul a lei nih.

4. Puonvar sila lêng irtansaihai khi,

Intakna tamtak renga ta hong suok an nih;
Dengthei loia sinthopu om mahai,
Ei sin lam angin lomman hmu ei ti.
No.11 HRINGNA THAR

Doh is

1. Rammuol thina ram ni khomsien,

Hringna thara leng nawk hrangin;
Bible in hringna a nin hril,
Hringna lampui chu Bible a nih.

Irngai roi ki zuong nôk hrang tâk.

Mitin an sintho pe hrangin;
Ki lomman chu a kuonga om,
I lomman mo hong hmu ta ei ta.

2. Rammuola lung inlenghai khom,

Hringna thar khôpui hoia khin;
Phingcham dangchar om ta no nih,
Misa tâk loina rama khin chu.

3. Hringna thara leng nôk hrangin,

Ei lakaihai tuom ta ei ti;
Bible -ah chonginkung angin,
Ei irphal ta mo, O ruol chimhai.

4. O nang invai hong lût ta roh,

Hi Bible hringna thuhlu hi;
Ni hrang zoro om ta no nih,
Ureng nang khom inhnung ta no roh.

Irngai roi ki zuong nôk hrang tâk,

Tia a chonginkung angin;
Khi sûm lai khin la zuong a ta.
A nai irhmang zong suokna hrangin.
No. 12 KI TUONG HI RENGPAN A PHAL

1. Rammuol lungdûkna hai le buoina kara hin,

Kamang le intaknahai’n a ni tuom;
Chardong le sôlin kin rum changpuitu ki koi,
Ni makunga ki hong kun O ki Reng jisuo.

Nang rotsan ta no ninga hi rammuola hin,

Injokpu Jisuo ki nei Ki hrang a thi kha;
Rammuolin ni lei hnolin nidem khomsienlan,
Nang ki song mai hrang a ni O a ninzôkpu.

2. Dengtheina ki tuong zoro’n inhriet nuom loin,

Ki lungdona hrang zonga kir vak vêl ngai a;
Midang hrang satvurna a lei ni tâk hi,
Ki tuong hi Rengpan a phal sêl thei ni maung.

3. Ki nuomlam hrang tak zonga sin ki zonglaiin,

Ki hranga atuongna hai ki hong hriet suoka;
Ki hrang dengtheina mo nilei tuong tâk hi,
Hril hrang zêl nei ta maung “Misuol keng ki nih”.
No.13 IEMPUHAI CHU

1. Iempuhai chu Rammuola ta koi suok ei nih,

Sinsa tho hrangin;
Rammuola mihai tho dân ang chu,
Thothei ni ta ma iempuhai chu.

Ei om dan chu thurchi sa leh,

Irhoi taka Om hrang ei nih;
Khanchu Rengpa irhming sa atah,
Danglam taka Om hrang ei nih.

2. Nuom lam hai le tho nuom lam hai,

Hmu nuom lam le en nuom hai khom;
Hril nuom lam le irngai nuom khom,
Adanglam zoita irtan hai kha.

3. Ei milung krista a om kha,

Krista angna tuongpui ei tah;
Irngaiintawm thuhnuoirolna,
Krista mi ninn inlang ei tih.

4. Hi hnuoi a hin krista anga,

Inlangpu hrang a koi ei nih;
Van kanan ram tung tik uol chu,
Irkip tâng ei ta Halleluiah.
No.14 NI TÎR ROH.

1. Ngairo koina lomman a hong tung ie.

Tumo tir ki ta, tumo a fe hrang;
Tiin Rengpa’n a ni koi,
I tin mo don tang ei ta.
Tumo Rengpa ta hrangin fe ei ti?

Ni tîr roba, Ki om, mo nimah.

Tangirsang tak le varuom a khom;
Nita hrangin chuon rêl sa ki ti,
Tiin ei dônloi hrang mo (tunhin) ?

2. Rammuola roiinpuina le irzukna hai,

Sûntinin a lei ngim mailai hin;
Rengpa rol irnem tâkin,
A sintho hrang a ni koi,
Suonlam sinloiin a tun fe ei tih.

3. Ramchar hmun nun charna hi maksanin,

Irtha irhmang san hrang fe suok ei tih;
Rengpa ta hranga ngirin,
Mani irnghil ta ei ta,
Itinreng maksanin a sintho ei tih.

4. Ni taksa nget suokin fe thei mak che,

Ni varna le theina’n a chûk no thei;
Khankhom thothei tôk ei nei,
Chongchaina le thilpekin
Ei thei dôr angin a sintho ei tih.
No.15 ARON IRBÔLNA

Doh is Bb.

1. Rammuol hoina le Irchongna hai nei nôn lânkhom,

Reng Jisuo ki nei ta;
Lungchukna Irhel krista a khan,
Ki lei nei sa ta ie Halleluiah.

Aron irbôlna hai chu innang ta mah,

Reng Krista thisen ki suol irbôlna a nih;
Vana Renglukhum ki hmu thei na hrangin,
Krista’n ki suol murdi a ngaidam tah.

2. Thisen roiinpuitak, thisen irkhel,

Thisen irthieng kalvari a luong kha;
Kisuol sôpfaina a lei ni a,
A roiinpui vangna, Halleluiah.

3. Adama silkâi kha khekpai in,

Krista silkai in a nirbel taka;
Irchon dang hai khom in nang ta mah,
Krista kir chonhlu tak a ni uol tah.
No.16 AW KI LÔMNA RENGPA

Doh is C.

1. Hi kin zinna le kin khuolna rama hin chu,

Kirtha reng ngam thei ma, Rengpa ni hruoi roh;
Thimlal thuneina hnuoia kir hmang zoi man hin,
Oh vân irtha irthieng ni zuong pan tha roh.

Oh ki lomna Rengpa tinrenga ki tinreng,

Thina varuom lampui hro hrang ni phal no roh;
Hnena puonzâr kaia ni hnungzui hrangin,
Ki hringnun hluopu hi oh nin hne pe roh.

2. Hnuoi lungzingna le buoina ha’n ni bawm sienkhom,

Van reng Imanuel nangin ni hruoi mai roh;
Suol thuneina hnuoi intang santu hrangin,
Rengpa ki hringna hi ni siemthar nôk roh.

3. Mihriem felna le theinan ni sin ki thoa,

Khankhom lungkhamna dâna chukzoi ma unga;
Oh nang van irtha irthieng ni chang no hin chu,
Mihriem hi ite uol lei ni ma unga.
No.17 THURÛK IRTHUP

Doh is

1. Mihriema tep phâk loi le hmangna boi tak hi,

Mita hmuthei loi le mikuora hriet loi chu;
A nin hmutir krista irtanna zarin,
Ki lôm tak ie ki lôm tak ie Rengpa.

A vârkhel ie krista lungthungna hi,

Ki thi’r thula thi hril thei ma ung Rengpa;
Hnam tin chitin chongtin thirbik rêng nei loiin,
Ni nir tân ta Halleluia Amen.

2. Ki felloina hai le ki chuk nona hai chu.

Rengpan fela puonin ani lei inzôk tah;
Ki lomna hi thuin puong zoi ma-ung,
Ki hringsung hin tuom zoi noning Rengpa.

3. Ni thu khomin Rengpa irtha a vai nôn chu,

Ni thurûk irthup hi hmuthei mu-ung Rengpa;
Irtha mitin Rengpa a nir hmutir,
Halleluia, Halleluia Amen.
No.18 NI NGIRNA KHA HMUN IRTHIENG ANIH

1. Krista hnungzui hrangin mani irhnôl a nang,

Damlai Rammuol hin chan hrang tamtak hi ki nei;
Ki hlimna ki lomna ki nuom lam thil hai leh,
Ki theina ki varna pai a lei nang ngai a.

Mosie, ni ngirna kha hmun irthieng a ni,

Ni kekôk kha khek ro tiin Rengpa’n a hril;
Krista hnungzui hrang le a hmang nuom ni hrangin,
Ki hringnun rammuol hi mâk a lei nang tah.

2. Krista ta hranga hringnun irhlanpu hai chu,

An rammuol taksa nun lungkhamna nei ma hai;
Hnuoi a hin khuolzin châm ang ni ti inhriet,
Ram sa uol tieg sabeiin milung an irnghat.

3. Iemnan Mosie kha a hong puitling hnung khan,

Pharoa nainu naipa irbûk kha nuom maka;
Aigupta inlalna le irchongna nêkin,
Krista an endong na chu a leiin thang uol ta.

4. Ki suoksan Aigupta hi kirngai nôk ngaia,

Khankhom kha ram kha suoka kintang na a nih;
Hmuthei loi ramsa le damna hmunuompu khan,
Mani irhnôl paiin krista hnung zui ei tih.
No.19 OH RENGPA HI HI NANG KI N NGÊN

Doh is

1. Rengpa nirtha’n nirfang suok nôk inlan,

Kin khotang le sûngtin kulhai a chim zoi ta;
Ni ram sanin hnena kin chang lai hin,
Hriet loi karin kin nai donhai salin a hruoi mai ie.

Oh Rengpa hi hi nang kin ngên,

Ir zûl in phaning moh?
Naipang hai hruoi loiin itin mo hong ki ta;
Kin tar hai le Nai nupanghai, Nai pasal hai,
Kin ran murdi itin le ni ram ni hruoi intung roh,
Tôia changloiin itin mo hong ki ta?

2. Hnuoia irchon naihai kin nei hâi hi,

Suol thuneina hnuoia an ngim phal viet maung;
Hruoitu roiinpui Mosie a hruoi ang khan,
Lungdi murdi le ni vânram a khan ni hruoi lût roh.

3. Ei Insunga suolral hong hrat mai hin,

Rengram sanin itin mo fehla thei ei ta;
Thoi eita ei intieng Kir nôk ei tih,
Sungtin kulhai lei chim khomsien inngir thar nôk ei tih.
No.20 JERUSALEM THAR

Doh is

1. Vânram Roiinpuitak thurchi,

Tun mo hong hril thei an tah?
Chârdongna le intaka ei om lai hin;
Inzôkpu Jisuo Krista’n ar chutir lungkham kolah,
Vânram Roiinpuizie chu an hriettir a nih.

Oh Vânram sa inhoitâk chu,

Irruol kipa irsen loina ram a nih;
Lungkhamna ram hoia khan,
Roiinpuina var hoia khan,
Tung nget ki ti kha ram inhoi le sa chu.

2. Kha khopui vâr satak chu,

Ar hming Jerusalem thar,
Khuo irkulna bang kha lunghlu’n artek ah,
Ar hming an hril Rângachak le tangkasum a vara,
Ar huon chu tuikeplunga’r vôtir a nih.

3. Kha khopui hoi taka khan,

Misa var innang ta mah,
Tha le arsihai khom innang ta no nih;
Rengpa enpu ni ata, Biekin khom om ta no nih,
Reng Jisuo chu hmu’n ama be ta ei tih.

4. A lungkhamna le satna,
Inpâkin hla sak ei ta;
Chardongna le suolna Intiromnahai,
Irdoina om ta no nih, Mikot irhoi roiinpuia,
Rengpa lungkhampuhai vai lût thei an tih.
No.21 TUONGNA LE THINA

1. Zân lungzîngtak zion chontan chunga,

Ki Rengpan a thisen a sema;
Kha anga milungzîng sûmpui dôr kha,
Ki Reng irthanvâiin a khêka,

Oh nangni Jerusalemhai oh,

Nangni a inren kha’n hre unglan;
Nin nat murdi nangni a indam kha,
A Chardongna hi’r nghil pui no roi.

2. Jerusalem irkul pêngtienga khan,

“Deipuhai thi dân ni ma” an ti;
Khankhom enta Kalvari lampui so,
Mipui kâra ki Rengpa ki hmu.

3. Enta Kalvari tung hrang a ni ta,

Itin mo ki itho hrang tâk ie;
Oh ki Reng ni Zuong kir nôk loi hrang mo?
Ni hmun hrang chu Kalvari a ni.

4. Nang irnghil thei no ning ki Reng Jisuo,

Kalvari tieng hong thîr mai ki ti;
Ki hrang ni tuongna ki milung sûnga,
Ki hrangchat tenin irnghil no ning.
No.22 FIELNA

1. Oh vân rama fe nuom mihai chu,

Reng Jisuo tieng vai en roi;
Hoitakin nangni lei hruoi a ti,
Reng Jisuo tieng vai en roi.

Reng Jisuo tieng vai en roi,

Reng Jisuo tieng vai en roi;
Sûn zânin nangni hruoi a ti,
Reng Jisuo tieng vai en roi.

2. Suolna hranga hlêmna nin tongin,

Reng Jisuo tieng vai en roi;
Pathien thu lungrila dôn unglan,
Reng Jisuo tieng vai en roi.

3. Nin hringnun lampui Intak khomsien,

Reng Jisuo tieng vai en roi;
“ Nin kuonga ki ommai” a ti khi,
Reng Jisuo tieng vai en roi.

4. Natna le thina tung khomsienlân,

Reng Jisuo tieng vai en roi;
Irvân ram khi nin tung mâka chu,
Reng Jisuo tieng vai roi.
No.23 NGÂI RO SANGSAWMHAI RAWL

1. Ngâi ro sangsômhai rol irhai,

Inpâkna roiinpui an sak;
Jisuon rammuol roi a rêla,
Vân mipuihai chu an lôm,
En ro vân toihmun chungah,
Jisuon rammuol roi a rêl.
Halleluia,Halleluia,
Jisuon rammuol roi arêl.

2. Jisuo kumkhuon roirêl inlân,

Roiinpuina ni ta nir seh,
Nit a hranga ni sinhai chu,
Ikhomin senthei no ni,
Ni lungkhamna lômom chu,
Ni hmêla khan inlang sien,
Halleluia, Halleluia.
Ni hmêla khan inlang sien.

3. Ninzokpu zuong irhnot ta roh,

Ni Roiinpui zuontîr ta roh,
Koina chiom an inhriet leh,
Hnuoi le vân irhmang an ti.
Khan lômna hla sak kin ta,
Roiinpui ri seh Rengpa chu
Halleluia, Halleluia,
Roiinpui ri seh Rengpa chu.
No.24 PA THUNUNNA

1. Pielrâl misa ki lungrila a hong vâr ta,

Kir tharngam sika kalchôiin;
Ki dengtheina lomnân a hong pâr,
Pa thununna ki tuong muolsuoin chu.

Pa thununna ki tuonglâiin,
Lungrîl mitirthin a nir sil ni tin;
Inhrethiem ma-ung,
Ka pa Lungthungna.

2. Thununna hloloi kholâi nâi chu ni ma-ung,

Kir siengna Reng thisen a nih’
Suol sinthoin Irhmangna ki ti,
Tâituona tung hrang ki Reng sin no hi chu.

3. Ki ta hranga ki hring lâiin lôm ngai ma-ung,

Ki Reng Krista koina anga,
Isak Mâichâma kin hlanin chu,
Satvurna tuikuong lomnân a hong luong.

4. Suolna Khopui a hin hmun le ram nei ma-ung,

Ki Reng Krista an hmusitna,
Pêlin khokôl tieng fe ki ti e,
Salem thara khin hmun la chang de ning.

5. Nita ki ni nirnghiltir no roh Reng Jisuo,

Ni hringnain nin hring inlân,
Damsûng ramkâra kin zin sûng hin,
Ki kalchoi tin hi ni thu ni ri seh.
No.25 LAM DOR DOR REI OH

1. Kei ki khuolzînna,
Chongsepêl, thina hmun ram hi;
Ki suoksan ni a nâi ta,
Thisen ram lâk pielrâla,
Thisen kop puonsil pumin,
Nilei don an tih.

Lam dôr dôr rei oh, (2)

Hnêpu hrâng lâmin lam dôr dôr ki ta,
Hmêlma hrâng lu râlthuomhai,
Salem thar hoi tuollâia,
I n ai tâng kita lam dôr dôr rei oh.

2. Irzal le hratnôn,
Kin rûmna hi ramchâra hin,
Sâbe Pânserhai choiin,
Angel khopui pielrala,
Thangsuo puonsa silkai le,
Ni lei don an ti.

3. Reng thuthung pêlin,

Sûn tinin invâipui khom rong,
Lungkhampu ki Rengpa khan,
Mi hrâng lei fe tahai le,
Hnêna Puonzârhai choiin,
Ni lei don an ti.

4. Va invâi angin,
Hmun tina invâipui khom rong,
Hmêlma Chongsiehai dongin,
Endong hmumâk tuong khom rong,
Hnena Renglukhum choiin,
Nilei don an ti.

5. Kêl le Belra vun,

Sila hmun le ram nei loihâi,
Ramchâr hmun le tang rama,
Nitin Invai khomsien
Ninjokpu le irtanhâi-
In lei don an ti.
No.26 THURCHI SA LE

1. Thîr u ta Simtieng sânga sâng an Irhmang,

Hringna bai zongin an Inrûm;
Thir u ta hmartieng sanga a sang chap rol le,
Lungzîng chardongin an Inrûm.

Sim, Hmar, sak le thang tieng fe eitih.

Mi ngoi, mi duk, Nam chi tinrenghai kuonga;
Fe ei ti thurchi sa le.

2. Suok ei ti saktieng u le sanghai kuonga,

Reng Jisuo irtanna thu hrilin;
Fe ei ti thangtieng dangchar urênghâi kuong,
San hrang zongin hringnun an hmang.

3. Suok ro urêng, Reng Jisuo lungkhamhâi kuong,

Taituon hringna thu hril hrangin;
Thîr vêl ta, Sim,Hmar,Sak le thang, urenghai,
Irhmangna khopuitieng an pan.

4. Thîr vêl ta, Urêng mihring leng mipuihâi,

Rammuol lomna, satna chên in;
An taituon hmun hrang ngaituo loia nun hmang,
San hrang chu nang le kei ei nih.
No.27 IMMANUEL A THI SIKIN

Doh is C.

1. Immanuel a thi sikin,

Thisen dung kha a luong suok;
Kha thisen kha kir silin chu,
Ki suol la fâi a ti;-(3)
Kha thisen kha kir silin chu,
Ki suol la fâi a tih.

2. Misuol thi hrang an hêmbe khan,

Damna tuidung a hmu;
Ama angin suol khom inlan,
Ni la ngaidam a ti,-(3)
Ama angin suol khom inlan,
Ni la ngai ngâidam a tih.

3. Kalvari tâng hoitak a khan,

Damna tuidung a luong;
Kha tui irthieng kir silin chu,
Ki suol sopfai a ti,-(3)
Kha tui irthieng kir silin chu,
Ki suol sopfai a tih.

4. Tinreng nekin ni hla hoitak,

Hi rammuol than hmuna;
Hlim le lomin nan pak ki ti,
Ni ninzôk tak sikin, -(3)
Hlim le lomin nan pâk ki ti,
Ni ninzôk tak sikin.
No.28 A ZING OM TA NO NI

1. A zîng om ta no ni a zuong tika;

A zîng om ta no ni a zuong tika;
A zîng om ta no ni a zuong tika:
A lungthung hai hruoi hrangin.

A lungthung hâi hruoi hrangin,-(2)

A zîng om ta no ni a zuong tika,
A lungthung hâi hruoi hrangin.

2. Chardong om ta no ni a zuong tika,

Chardong om ta no ni a zuong tika;
Zingkhovâr hoitak le a zuong tika,
A lungthung hai hruoi hrangin.

3. Chapna om ta no ni a zuong tika,

Chapna om ta no ni a zuong tika;
Satvur inthang choiin a zuong tika,
A lungthung hai hruoi hrangin.

4. Lomna hla sak ei ta a zuong tika ,

Lomna hla sak ei ta a zuong tika;
Lomtaka irbûmin a zuong tika,
A lungthung hâi hruoi hrangin.
No.29 NUN DAN KI LEI THEI TA

1. Hi Rammuola hin iempu an tam zela,

Khan khom iempu nun dan thei an tom baka;
Khan khom puokrik pel nun irngam loihai hrang,
Nun dân thei nir chutirpu Jisuo a nih.

Nun dan ki lei thei ta,-(2)

Nir chutirpu Reng Jisuo ama nget a nih,
Lungchukna ki nei ta, -(2)
Lungchukna nir chutirpu Jisuo anih.

2. Sum le pai irchongna duâmnahâiin,

Ruktôk nei uol mahai lungchukna an tak;
Inrieng Invai khom hi Jisuo chang non chu,
Tuong thei dan om ma na, lungchukna an tak,

3. Inrieng dan ki thei ta, Irchong dan hai khom,

Khop le tai phingchâma omdan ki thei ta;
Ni lungkhampu Rengpa itinreng a ni,
A nin hratpua khan tinreng ki thothei.

4. Krista lungkhamnan chu iten ni sen no ni,

Chitna le lungdûkna irhelnahai hin;
Lomna le lungthina ni hruoipu a ni,
A nin hratpua khan tinreng ki thothei.
No.30 OH ROIINPUITAK HALLELUIA

1. Oh roiinpuitak Halleluia,
Nang kin inpâk Immanuel;
Choiindomna le inlalna,
Tâituonin nita a lei nih.

Halleluia, Halleluia! Amen -(2)

2. Rammuol mihring namze tinreng,

Angel vâr leh lung kin irruol;
Irtanna thisen hlu zâra,
Salem thar tuollâia kin leng,

3. Oh anthûkin a var sang ie,

Ni vârna le ni lungkhamna;
Irtha rammuol rihoihai le,
Nir vân chongin inpuong zoi mah.

4. Oh nin hril roh, an thûknân lal,

Rankheng le thing chongsephur leh;
Vâna Renglukhum le irzom,
Hnuoi Eden leh Salem thar leh
No.31 JISUO LUNGKHAMNA LE SATNA

1. Jisuo lungkhamna le satna,

A khonzanân pak ei ti;
Vânram inhoi le satvurna,
Ei hrangin a hong siema.

Vânram ei tung tikin chu,

Kha nikhuo chu ei raifân tâng a tih;
Reng Jisuo ei hmuin;
Azoipu inpâk tâng ei tih.

2. Vânram pâna ei fe laiin,

Sûm zingin a ni bôma;
Khankhom ei khêl zoi tikin chu,
Zîng le chardong boi a tih.

3. Iemom le feltaka omin,

Sûntin a sintho ei tih;
An lalna ei changsâna hrang,
Sin ei ti ei hring kârin.

4. Ei maton lomman irzûlin,

A hlutzie hong thîr ei tih;
Lungmantam mikot ei lûtin,
Rângachak tuol lêng ei tih.
No.32 LUNGKHAMNA RAMMUOL VARPU

1. Oh lungkhamna rammuol vârpu,

Kalvari tâng thing kross chunga;
Ki Rengpan a tuong kha,
Ki ngâituo hin a hlu okna,
Thina’r khel ki hranga a tuong,
Thisen hlu an luongtir -(2)

2. Irngâisietna sipin a tuong,

Lungdûk beidong hlêmna hmuna;
A nirtan suok nokta,
A felna zara nun irnem;
Kir tha vân rama tung hrang chu,
Anpâk hnong thei no ning.-(2)

3. Hi rammuol hêka âr tanhâi,

A vân ramhoia irruolin;
Lâr hmukhom nôk ei ta,
Khin lungdûk irthanvâinahai,
Dengthei buoinahaiboi a ta,
Nirtanpu Reng kolah.-(2)

4. Sûn lômna hong tung lât a ti,

Ki Rengpan a ni hruoi tika;
A hmelsa hmu kita,
A ninzokpu indittak leh,
Taituon satvurna a lêngin,
An pâk mong thei no ning.-(2)
No.33 RENGPA NI SINTHO HI

1. Rengpa ni sintho hi,

Ni zuong inhar pe roh;
Nir chamtâkin thu zuong hril roh,
Ni mi inhriettir roh.

Ni sintho inhar roh,

A tun nang kin ngen e;
Oh Rengpa nangin ni pôl roh,
Sat ni vur mai inlan.

2. Rengpa ni sinthoah,
Nir hming inlal ri seh;
Ni lungkham mitin lungsûnga,
Sem ir-al mai inlan.

3. Rengpa ni sinthoah,
Ni chong satvur inlan;
A dikzie arthieng a felzie,
Iemna’n nin hriettir roh.

4. Rengpa ni sintho hi,

Satvur ruo zuon pha roh;
Inlalna hi nangma ta hrang,
Keini hrang Satvurna.
No.34 HNUOI DENGTHEINA

1. Hnuoi dengtheina hin lôm irkip thei ma,

Hringlai sûn khom hi hloisul pâr ang vai anih;
Hring sotna khom lungzingna vai,
Roi’npuina khom sûmphai ang vai anih.

Oh ki hong thira,
Ki Reng lengna Jerusalem thar khi;
Rengpa roi’npuina irzâm vel,
Hnuoia hin zaivor kâr ki nghakhla ngêt e.

2. Lungzingna chardongna le intakna,

Endong hmumakna le hrilsietna murdihai;
Donga kin vaina ram hi chu,
Suoksan kar hi ki nghakhla ngête.

3. Reng lengna khopuihoi ki tung tikin,

Suol thuneinahaiin ni tôn phak ta no nih.
Ir erona om ta loiin,
Thina khom chu omta ngâi no nih.
No.35 RUOLSA RENG JISUO

Doh is D.

1. Ruolsa Reng Jisuo ki nei lômna thuruk neipu,

Rammuol mihai hmuphak loi lômna;
Chardonga ki lungngamna lungzinga kirnghatna,
Ruolsa Reng Jisuo a om chardong ngâi maung.

Lômin nanpak ki ti ki Reng a ninzôkpu,

Nang anga ninhnempu Rammuola om mahai;
Suol inthemna kara hin ni hmel nin hmutir roh,
Reng Jisuo ki îrchon hlu ni lei nih.

2. Suolna phaivuo’n ni nurin nitin ni ngîm khomsien,

Krista a khan kir tha arngam e;
Ama chu kin humhim na ki kulpui det a nih.
Ruolsa Reng Jisuo vai hi kir ngamna a nih.

3. Hi hnuoi dengthei a hin chu kirtha irngam thei ma,

Suolna le thina ram vai a nih;
Khankhom ki Rengpa kuonga ki hong tîka chu,
Ki lungdûkna mitîrthi lômna inchang a ti.
No.36 RENG JISUO KI NEI

Doh is E.

1. Reng Jisuo ki nei sikna khan lampui chin hro ki leini,

Ki nuom lam thilhai chu tho thei ni ta mah;
Ki ruk tôka lungchukin intakin dengthei khomsien,
Anuom lam a om hrangin Reng Jisuo’n a ni nghak mai.

Ki hringnun (Ki hringnun) hi oh a boi tika,

Nir tanpu hmelsa’n ditom kha hmu ki ta,
Kha khan ki hnuoi mitirthi ni lei hui fai pe a ta,
Roi’npuitak in leng ki ti, Reng Jisuo ki nei sikin.

2. Hnuoi irchongna inlalna le roi’npuina nei no khom rong,

Reng Jisuo nei ki ta hrangin a ruk e;
A hmelsiet hrang phal ma ung,Arhming siet hrang phal maung.
Ki hranga itinreng chu,Reng Jisuo vai hi a nih.

3. An tak vangna rammuol hi chu lungchukna reng hi om mah.

Irsâng uolna sabeiin hmun a sip zoi;
I sika ki buoi ngai mo, I sika ki beidong mo?
Lungchukna’rkip Reng Jisuo ki irchon hlu tak a nih.
No.37 RENGPA KI SUOLNA A TAM

Doh is G.

1. Rengpa ki suolna a tam ah,

Mihriema tep ruk ni ma ung;
Khankhom lungthung rol irnemin,
Indot takin nini koi mai.

Ki he hi Jakob he ni khomsien,
Esau silkai in ki’rvo a;
Irchon luo hrang krista silkaia ni nir votir,
Rengpa irphu ma ung.

2. Ki he hi hlemtu suol he ang,

Jakob he ang chu a lei nih,
Esau silkai kristaa khan,
Ki suolnahai a ngaidam ta.

3. Ki suolnahai irkhu hranga,

Ni tuongna hmel en ngam ma ung;
Irphu loi lungkhamna irkhel,
Taituon hringna ni nin hlan ta.

4. Ki chukna le ki satna tak,

Nang ngêt Jisuo nang ki neiin;
Tu dang khom irngai ta ma ung,
Itinrênga tinreng ni nih.
No.38 IRSIRNA

1. Hi hnuoi hringnun ram kinvaina ram hi,

Hringnun suola ni tin ki hmang laiin;
Pathien nuom dan hi ngaituo loiin,
Mani satna’n ni hmel kir hli ngai.

Oh Rengpa (Oh Rengpa) ni ngaidam roh,

Irsirin ni kuong ki hong kir;
Ni felna irthieng khan nir chu’n lan,
Rengpa ni hnol loiin ni ram nin tung roh.

2. Ni Nam indanghai Israel khomin

Nang lei mâksan a an om lai khomin;
An chakna’rhai kha nin hriet angin,
Kin chapna’rhai ni lei sâm nôk roh.

3. Kin suol ngaidamtu kin tieng hmâi zuong nghân

Mi suol chongchai na hi ni sâm inlan;
Nangma nuom dân anga om hrangin,
Nirtha’rthiengin nin hartir thar roh.

4. Ki hringnun lampui hi ki hong ngaituo’n,

Mâni dikna satna’n nang ki zui a;
Irsâng le roi’npui a irngaiin,
Irhmangna lam hro mo ki lei nih.
No.39 NI SINTHO INTHANG HAI

1. Ni sintho inthanghai an hril,

Zion ei Pathien khopui,
A chong inkung boi ta ngai loi,
Nang an ding a omna hrang,
Kumtuong lungpuia irnghât chu,
În moh inhning thei a ta?
Nin zôkpun banga irkulin,
Hmelmahâi chi no chi ni.

2. En roh kumtuong tuihnâra khan,

Hringna tui zuong luong suokin;
Ni nâihai murdi an fâ ngai,
Irsam reng nei no nihâi,
Kha anga tuidung luong laiin,
Tu moh dangchâra sôl hrang?
Rengpa chu a pekpu a ni,
Kumtuongin mong ta no nih.

3. Omna hmun tinrênghâi khan,

Inlalna zôkna hrangin;
Mei le sûmin a zuong târa,
Rengpa a nâi ti hrietnân,
Nitin mânna chu a peka,
An chongchâina a ler ngai,
Hossana inpakna’rhai khan,
Rengtoihmun an tortira.

4. Rengpa zion khopuia khan,

Lungkhama nin om tîrin;
Rammuolin ni hmumâk khomsien,
Nir hming vai song ta ki tih,
Rammuol lômna a boi theia,.
Anlalna le satnahâi,
Zion nâihai ti nôn chu oh,
Lômnatak nei no nihâi,
No.40 IRTHARNGAMNA

1. Hin keng hringna tui chu a luong,

Kalvaria zuong suok kha;
Mi tamtâk damna hrang a luong,
Tukhom a in nuom murdi;
Nang Eden natna’r veipu kha,
Hong inlân va in zel ro,
Khanchu kalvari tui irtheing,
Ni milunga luong a ti.

2. Khanchu hi tui inhremaiin,

Mi dang khom inhrilhai ro;
Mi tukhomin a in in chu,
Dam nget nget a ti ti ro,
Jisuo hi inlal tâng a ta,
Irvân mi irthienghai khin,
Raifan hlanthang sak tâng an ta,
Ei Pa Pathien makunga.

3. Hi rênga ta kumkhuontuongin,
Hi hringna tui hi a luong;
Thoi nôk naiin a tui irthieng,
Kumtuongin in tâng an ti,
Belrate hringna irthiengin;
Sansuohai irvâi an ta,
Eden nunchan boi tâng a ta,
Hringna tharin leng an ti.
41 NU LE PA IRNGEILOI

1. Pa hai Irngairoi, ei in sung a chim zoita,

Nuhai Irngairoi, ei naihai ei ir nghil.
Oh Vanglai hai, ei in sung donsui aruk,
Sungkuo in ngirpu hrang nini.

Nu le Pa Irngeiloi
Insungkuo fel ngai mâk e,
Hmumâkna,irsuolna irvîkna insunghai chu,
Nakana la chim ngêt hrang anih.

2. Pahai irngairoi, tho hrang inhremak me,

Pathien thu teple chongchainan irhnel inlan,
Ni in sung roirel ngaisak loi ninîn chu,
Ni in sung donsuipu ni nih.
Nuhai irngairoi, Naihaiin nang an thop.
Pasal Inzâloi mihuong le hrangsie hai
Rammuol mitak le irdin loi ninin chu,
Irsir in Mitirthi luong ati.

3. Ruolthar irngairoi, irsirin hongkir roh,

Inrui tho mi le zu in mi ni nin chu
Irsuol thongaile sum irdâi mihai chu
Nakana irhmang nget ati.

4. Dongmate Irngairoi, nin indit infel roi,

Rammuol hoina irzulin ni sôt hrei ta,
Thoi inlân inzôkpu kross chu irput inlân,
Sungkuo in ngîrpu hrang ei nih.
No.42 THINA LE NAKANA

1. Lung a nin leng thir hnong no ning,

Hnuoi lungdûk khel ram so;
Damlai lungdûk sûmpui zing hi,
Khel ki ti chapna ram.

Hnuoi Lungdûk mittui hul a ti.

Ki chaplâi ni hek a ti.
Oh Rengpa hmel hmu ki nghâkhmo,
Oh boi ta ro hnuoi hnong om.

2. Kalvari ki khit roi’npui,

Van ram inkhar ar hong;
Valuo ta ro duoh, Oh kirtha,
Ni ram inkung an lang.

3. Ki chap lai zân thim boi a ti.

Jordan dung rala khin;
Oh kirngai ki lômna tak chu,
An lengna rama khin.

4. Oh itika mo tung ta ning,

Ki chunga khuo hoia khan;
Tuidung zing kirkan kai tika,
Chap ram irngai no ning.
No.43 RENGPA KI VA LOM IE

1. Rengpa Jisuo oh nang kir ngai,

Ki nunna hin,zuong om mai ro. (zuong om mai roh)
Sun le zanin ni ompui roh.
Khan ki mittui, hul ta atih.

Rengpa ki va lom ie,

Nang ni thop nôn lan chu,
Irhnêl hrang reng nei ma ung.
Atun hin chu Rengpa,
Ite dang reng hi’rngai ma ung PA,
Nangma a khan, kir ruk ving ta.

2. Intakna hai ki tong zoro’n,

Oh ninzôkpu, Nin thêm mai roh, (Nin thêm mai roh)
Intakni le Beidong lai khom
Ni chel mai in, Ni Ompui roh,
(Repeat Stanza-2)
No. 44 KRISTA TAKSA EI NIH

Doh is Gb.

1. Nangni rôi hi krista taksa le a ônhai nin ni a,

Mi khoul cham ang ni ta mak chei ;
Mi irthienghai le taituon hmunkhat ,
Pathien sunghai nin ni uol ta.

Aw ureng enfel anang ni taksa le ni hringnun kha ,

Krista taksa nina hmel an lang mo ?
Ni thu’n thiem chang ni ta ni thu nget in thiem chang no chi nih,
Ir en felin Renpa pan rawh.
2. Rengpa’n ama ang arthienga ama aioh hranga,
A ni koi hai ei lei nia;
Khankhom tunlai iempu nun a hin,
Krista hmel reng inlang ta ma?
3. Mi tukhom pathien hrilsieta porinche tirtu chu,
Ama chu muolinphoi a ti;
Rengpa in chu arthieng angna,
Ni chengna hra’n irthieng tir raw.

4. Tunlai iempu nun ei hong thirin,

Ei sak hmel hai enin, krista milung oi thei ni maw?
A chin a lien inrui thei ei chîng,
Milung ngaituana asa maw?
No.45 RENGPA JUONG NOKNA NI

Doh is D. Upa Tinsiek Bangkheng

1. Rengpa juong nokna ni roi’npuitak juong tung a tih,

A lungthunghai bekulin koi bûm a ta;
Sak le thang sim le hmara mihai rol khom a ti,
A khopui irthienga ni hruoi lût hrangin.

A khopui lungmantam arkul,

Ami kot chu rangachak sailungvâr arvon;
A khopui tuol hoi rangachaka inluon,
Nisa var nang ta no nih,Belrate chu vâr tâng a tih.

2. Irtong khoma ni roi,npui tak hong tung tâng a tih,

Beidong taka ei lei iteipui hai leh;
Hmunkhatin khopui pan suom ei ta,sûm lai a khin,
Van silkai irbelin khopui lût ei tih.

3. Namtin chitin pathien devâna la ngir an tih,

An sinthaw lam angin lomman hmu an ta;
Hringna lekhabua arhming boi chu meidil panin,
Arhming chuonghaiin van ruoithe chang an tih.

4. Khopui irthienga suol porinche rêng om ngai ma,

Mi lak, doithei, uihai lût thei no ni hai;
A thisena sopfaihai vaikêng roi’npui takin,
Puonchek inthang silin Reng Krista ruolin.

5. A Rêng toi hmuna toiin kumsang roi rêl a tih,

Irtanhai an lomna hla chuoi ta no nih;
Zion hla thar chu sak tâng a ta, lâm dor dorin,
Chapna om ta no nih Hallelui Amen.
No.46 NI ROI’NPUI IE

Doh is C.

1. Aw Reng pathien ni thilsiemhai ki ngaituo’n,

Arkhel tiin ki milung a sip ngai;
Ar’si ki hmu, vân inrûm roi’npui kin hriet,
Ni thilthawthei zie rammuola an puong.

Khan kirtha’n a ninjokpu an pâk ie,

Ni roi’npui ie (2)
Khan kirtha’n a ninjokpu an pâk ie,
Ni roi’npui ie (2).

2. Ramhnuoihai le hmunhring kir fang hai hin,

Thingrêla vatehai irhai kin hriet;
Tangirsang roi’npuia ta ki zu thir a,
Tui luong

3. Pathienin a nai neisun a juong tir hi,

Ki ngaituoin suisuok zoi thei ma-ung;
Kros chunga ki suol lawmtakin a pel a,
Thisen suokin ki thi’r thulin a thi.

4. Roi’npuitaka Krista a juong nawk tika,

Ni hruoi a ta lawmnain sip ki tih;
Chawi’ndawmna’n bawkkhupin chubai mûk ki ta,
Pathien ni roi’npui ie ti’n khêk ki tih.
No.47 KI IRTHIENGNA KRISTA

Doh is D.

1. Ki irthiengna Krista a nih,

Suol renga ta nir tan suok in;
Ki zalen ta van ki changta,
A nin zawkna Krista a nih.

A roi’npui ie, Halleluiah,

Ki sandamna Krista a nih;
Ki felna le ki irthiengna,
Ki roi’npuina Krista a nih.

2. Thina hringna inlalna hai,

Vantirtawn le thuneinaha’n;
Krista lungkhamna renga ta,
Ni sen naw ni thil I khomin.

3. Nuclear bomb chi om hai nekin,

Ki song oul ie ki reng Krista;
Rammuol buoina chim phak loia,
Iemna irthan ki leng mai mai.
NO.48 KI THEINA A TAWM

Doh is D.

1. Rengpa ki hratna theina tawm khawmsien,

Ni sinthaw hrangin ni ni koi mai mo;
Song hrang le pên hrang dang reng nei ma ung,
Ni Gospel thu vai hi song uol ki tih.

Ki theina a tawm, ki theina a tawm,

Ki theina a tawm ie,aw Rengpa. -2

2. Irtha boi’rhmang sâng tam irhmang hrang chu,

Phal mak che Rengpa ni lungkham an nih;
Khankhom hrilpu hrang in rûk zoi mahai,
Rengpa ni hmang ro kei hi fe ki tih.

3. Irnge le tuiêk fâksiet thei na ah,

Ni ta hrangin irchonhai kol non lân;
Vâna tuiêk fâksiet thei loina ah,
Inkhawlkhom lan lomin sip nget ni tih.

4. Rengpa ki theina hi a tawm nget e,

Fe suokin va hril thei uol ma unga;
Ki nei sun chongchai thilpek inhlân hi,
Ki theina ki pumin ki hong inhlan.
 NO.49 PANTHAR A NANG

1. Tiena Reng David hringnun chau angin,

Rengpa kin hringna hi a chau zoi tah;
Siemthar a nang a ni hre loiin
Kin hringna hi nitin a liem mai ie.

Panthar a nang a ni Rengpa,

Siemthar nawkna a nang ani Rengpa;
Hung lawmom tawmte kin nei sûng hin,
Ni siemthar nawk rawh aw Rengpa.

1. Tiena thiempu Eli sungkuo angin,

Rengpa kin ruoltin hi a chim zoi ta;
Suolin nitin Rengna in suo in,
Sûn tin ruoltin lai roi a rêl mai ie.

2. Tiena Jerusalem kul chim ang khan,

Rengpa ni koiindang khom a chim mai ie;
Krista lungkhamna irnghil pai in,
Sum ngaihlutna in roi a rêl mai ie.

3. Tiena Aigupta cham tak lai a khan,

Kin ram le nam khom hi a cham mai ie;
Suol sinthawna le
Nitin kin ram a roi a rêl mai ie.
NO.50 RENG MÂN A LÂM KI TIH

Doh is Gb

1. Arkhêl tin ki damsung ni hmang boi zel ki tih,

A nin zawkpu lungthungna kir ngaituo in;
Arkhel ti’n ki monga ki milung arfang suok,
Misuol kei a nin thang arkhel ie.

Vân Renpui in thil roiinpuitak a ni tho pêk,

Rengpa a khan ki lôm tak tak a;
Reng David le inmo Reng mâna lâm ki ta,
Inzapui om khawpin choiindom ki tih.

2. Michukloi le hmangna boi kei misuol tak hi,

Archon hluopuitu hra’n a ni lei’n thang tah;
Kha nêka hlu imo lôm hrang dang ki nei a?
Reng mâna khan lâm hrang reng ki nih.

3. A tun chu a kip loi in kin hriet ki Rengpa,

Asa uol famirkip ni a tung tika;
Hriet irkip ni ang in hre’rkip sa tâng ki tah,
E anga roi’puiin mo lom tang ki tah?
No.51 SAK HMING AN KOI TIKA

Doh is

1. Rengpa bekul an ring tikin chu,

Zoro om ta no ni;
Tâituon khovâr hoitak chu vâr ta a ti,
Thina râla hnuoia mi,
Inzôkhai tung zoi tika chu,
Khin sak hming an koinaa khan om ki ti.

Khin sak hming an koi tika chu ( 4 )

Om ki ti.

2. Kha sûn vâra khan chu kristaa,

Mi irthieng thoi an ta;
A thoinôkna roi’npui chu chang sa an ti,
Amin thanghâi vân ram tuol,
Inhoi a hruoihâi tika,
Khin sak hming an koinaa khan om ki ti.

3. Zing renga ta misa tâk dênin,

Rengpa sin tho ei ti;
A lungkhamna irkhêl thurchi hril ei ti,
Ei hnuoi sintho ei zoi tika,
Rammuol sûn a hek tika,
Khin sak hming an koinaa khan om ki ti.