Professional Documents
Culture Documents
'Mahiya kayo':
Pagdepensa ng PNP sa
ECQ bday bash ng
NCRPO chief kinastigo
Bawal kasi ang mga "mass gatherings" habang may enhanced community quarantine
(ECQ), bagay na ipinagtanggol pa ni PNP chief Gen. Archie Gamboa.
"Hindi ba sila nahihiya sa sarili nila? ... Ang tapang din ng apog nilang ibalandra 'yun sa
social media pages ng PNP, at ipinakikitang exempted sila sa lockdown measures gaya
ng social distancing at pagbabawal sa mass gatherings," galit na sabi ni Bayan Muna
Rep. Ferdinand Gaite sa Inggles, Miyerkules.
Bago naging director ng NCRPO, dating director ng Police Regional Office-7 si Sinas
at iniuugnay noon sa "massacre" ng 14 magsasaka sa Negros Oriental.
Bukod pa riyan, siniguro naman daw na may physical distancing na nangyayari at may
face masks ang mga dumalo. Pero klarong walang suot na face mask ang ilan sa litrato.
Uminit naman ang ulo ng mga militanteng konggresista sa "palusot" ng dalawang PNP
officials.
"Bahala na sila kung anong tatawagin nila diyan, pero party talaga 'yun, at may klarong
paglabag. Makikita naman sa mga litrato," dagdag ni Gaite.
"Kaysa i-absolve si Sinas, mas okey na tignan kung ano ang mga posibleng violations,
lalo na't may mga litrato."
Ayon naman kay Sen. Francis "Kiko" Pangilinan, dapat masampolan ang mga
pasimuno sa nasabing pagtitipon.
"Kung seryoso sila sa pagpapatupad ng batas sa lahat dapat sampahan ng kaso ang
mga yan at ikulong kasama ang libo-libo na kinulong nila dahil sa ECQ violations,"
banggit niya sa isang pahayag.
Hindi ito ang unang pagkakataon na hindi nanagot ang ilang opisyal ng gobyerno sa
diumano'y paglabag sa quarantine protocols.
Marso naman nang hindi mapanagot si Sen. Koko Pimentel dahil sa kanyang paglabag
sa quarantine protocols, kahit na napatunayang may COVID-19 siya.
Nemo est supra leges o walang nakakataas sa batas – maliban na lamang kung
ito ay ang nagpapatupad ng batas na ito. Nakakahiyang isipin na sa Pilipinas, kung
saan lahat ay “dapat” sakop ng batas, mapabata ka man o matanda, lalaki o babae,
maputi man o kayumanggi ang kulay, kapag linabag mo ang panuntunan ay ikaw ang
mahahatulan ng kaukulang parusa maliban na lamang kung ikaw ay may mataas na
posisyon sa iyong pinanunungkulan. Habang marami ang nagugutom at naghihirap
dahil sa kakulangan ng aksyon ng gobyerno, mayroon naman tayong mga
tagapagpatupad ng batas na nagbubunyi at nagkakatuwaan pa sa gitna ng Enhanced
Community Quarantine na dapat ay kasalukuyang pinapatupad. Sa ganitong
nakakatakot na panahon na dulot ng pandemya at kawalan ng angkop na kakayahan at
aksyon ng gobyerno, kung saan marami ang di nakakatanggap ng ayuda at tulong,
kung saan marami ang di nakakapagtrabaho, nakakalungkot isipin kung gaano kasira at
kabulok ang sistema na ating sinusunod at ang mga nangunguna pa sa paglabag dito
ay ang mga tagapagpatupad ng nasabing sistema.
Noong mga nakaraang araw, ang mga opisyal ng National Capital Region Police
Office ay nagdiwang ng kaarawan ng kanilang Director Major General Debold Sinas sa
Camp Bagong Diwa. Ito'y nagdulot ng pambabatikos ng mga netizen matapos magpost
sa social media na nagpakita ng paglabag nila sa mga protocol na inaasahang kanilang
ipinapatupad. Malinaw na ito'y paglabag sa RA 11469 o Bayanihan To Heal As One
Act.
Nakakatawang isipin na ang mga taong nasangkot ay ang mga taong laging
nagpapaalala sa publiko na iwasan ang mga pampublikong lugar, iwasan ang mga
handaan o social gathering at manatili sa bahay. Kamakailan ay iba't ibang balita ukol
sa pag-aresto ng mga mamamayan na hindi nagsusuot ng face mask sa labas at mga
volunteers na ikinukulong ng mga pulisya ang kumakalat sa social media. Sila'y
agresibo sa pagpapatupad ng mga batas na ito pero kung silang inaasahang susunod
dito ay lumabag, ang mga batas na ito'y tila naglalahong parang bula. Sa madaling
salita, ang due process ay pabor lamang sa mga nakatataas ang katungkulan - at hindi
sa taong bayan.
Mayroon pa silang lakas ng loob na sabihin sa mga tao na ang mga litrato ay
edited umano at ang salo salong iyon ay kinuha pa noong Disyembre, ngunit nakita
naman ng ating mga mata na ang mga taong dumalo ay nakasuot ng face mask sa
pagdiriwang. Hindi ko alam na ang pagsuot ng face mask sa isang selebrasyon ay parte
na ng ating nakasanayan? Ang kanilang desperadong gawain na linisin ang kanilang
mga kalat habang nanonood ang mga Pilipino ay nagpapakita ng katapangan ng
kanilang mga apog.