PËR AKADEMINË PËRKUJTIMORE KUSHTUAR 21 VJETORIT TË RËNIES HEROIKE TË
KOMANDANTIT LEGJENDAR ADEM JASHARI
- Intonimi i Himnit Kombëtar
- Të nderuar, me një minutë heshtje le të nderojmë sakrificën heroike të bijve më të mirë të kombit që dhanë jetën në shërbim të kauzës sonë kombëtare. LAVDI! (Kushtrim) - I nderuari Lulzim Jashari – djali i Komandantit Legjendar Adem Jashari, i nderuari veprimtar i lëvizjeve tona çlirimtare kombëtare dhe Lider i Shqiptarëve të Maqedonisë z. Ali Ahmeti, të nderuara familje të dëshmorëve të kombit, bashkëluftëtarë të komandantit, të nderuar përfaqësues të institucioneve shtetërore të vendit, të nderuar të pranishëm, “Edhe njëqind jetë me i pasë, të gjitha do t’ia falja atdheut” janë këto fjalët e Komandantit legjendar Adem Jashari që u shëndrruan në kushtrimin e lirisë për të mbrojtur identitetin dhe dinjitetin kombëtar. Fjalë që nuk harrohen, fjalë që më 7 Mars të vitit 1998 peshuan më shumë se malet dhe dridhën zemrat më shumë se tërmetet. Dhe kështu të edukuar me jehonën e këtyre fjalëve të lëna amanet dem baba dem, i dëshmuan botës atdhedashurinë më të sinqertë dhe më unike. Na mësuan ne, shenjtërinë e fjalës “LIRI”, ranë duke luftuar heroikisht por nuk vdiqën asnjëherë, u bënë shpirti i kombit të vetë. (Lejla) “7 Mars 1998, sot në Kosovë kanë lindur 1000 Adem Jashara. Sot secili prej nesh është Adem Jashari, çdokush që mendon që ai nuk ekziston më, mashtrohet rëndë. Liri dhe dritë në përjetësinë e Legjendës së Ushtrisë Çlirimtare të Kosovës. LAVDI!” – ishin këto fjalët e gazetarit të Radio Televizionit Shqiptar - Arben Asllanaj me të cilat përshkruajti momentin e rënies heroike të Komandantit Adem Jashari dhe familjes së tij. E kush mund të merr guximin edhe sot të thotë se ai ka vdekur?! Nuk vdesin kurrë Jasharajt jo, sepse arritën ta përjetësojnë nderin më të madh të një shqiptari – të ujisin tokën e mëmëdheut me gjakun që do të rrisë lisat e lirisë, që do të freskojnë e lulëzojnë pranverat e jetës së shqiptarëve kudo që ndodhen. (Kushtrimi)