Kanggo sampurnane ngelmu sangkan paraning dumadi, Ki Ajar Salokantara
budhal saka Gedhongsanga menyang pucuke Gunung Merbabu. Nalika arep budhal Ki Ajar ninggal weling marang wong-wong wadon ing kono supaya ora mangku gaman nalika rajang-rajang. Nanging kepriye bae manungsa kuwi nggendong lali. Mangkono uga Nyi Endang Kirana iya lali marang welinge Ki Ajar Salokantara. Pinuju rewang wong duwe gawe salagine ngiris-ngiris daging, pesone diselehke ing pangkone. Awit ngrajang wewaler, Nyi Endang Kirana banjur ngandhut. Tumekaning wektu lairan, Endang Kirana ora nglairke jabang bayi nanging nglairke ula gedhe aran Baru Klinthing. Ki Ajar Salokantara sing pranyata sidik paninggale, mesem ngandika lirih “Aneh tenan kadadeyan iki. Mara rungokna Baru Klinthing. Lamun kowe bisa nglekeri Gunung Merbabu tepung gelang, kowe dakaku anak. Nanging yen ora bisa bakal mati.” Krungu ngendikane Ki Ajar, Baru Klinthing nyaguhi. Sarta banjur wiwit nglekeri Gunung Merbabu. Baru Klinthing tleser-tleser mlaku. Dalan diambah dadi legok dawa banget. Banjur dadi kali. Marga saka dawane kali iku diarani Kali Panjang. Baru Klinthing nglekeri gunung, awake melar saya dawa, kaya karet bae. Kurang sailat bae bisa gathuk. Nanging awake ora bisa melar maneh. Najan dipeksa- peksa tetep ora gaduk. Baru Klinthing banjur ngeletakae ilate kanggo nyambung bisane gathuk tekan buntute. Ki Ajar periksa ilate ula dipeletake. Kanthi trengginas ilat dikethok. Ki Ajar banjur ndhawuhi Baru Klinthing supaya mertapa ing kono amarga ora kasil olehe nglekeri gunung. Sanalika awake Baru Klinthing lemes, nglempuruk ora bisa lunga- lunga. Awit saka lawase, nganti kagubet oyot-oyotan lan katutupan ing thetulukan. Kocapa ing Banarawa, desa sakelore Gunung Merbabu. Pengarepe wong desa kono diarani Ki Juru Mathokan. Ing wektu iku lagi mandhegani wong desa sing padha mbebedhag kanggo kapreluane memetri desa. Nanging nganti awan durung oleh beburon. Kabeh padha gumun dene ing nalika iku ora weruh kumliwere kewan. Saka kesele anggone padha mlaku, banjur padha leren. Ki Juru Mathokan ngiris- ngiris oyot sing dilungguhi kanggo leren. Sapira kagete dene oyot sing dilungguhi mau ngetoke getih. Sawise cetha yen daging, terus dadi rayahan lan diberek-berek wong sing padha mbebedhag. Sawise oleh bagian daging, wong-wong mau padha bali. Dheweke ora padha ngerti yen atemene daging mau ya saka ula gedhe kangaran Baru Klinthing. Siji bae ora ana sing ngira yen mulihe ditutake bocah bajang. Satekane Banarawa si bajang clingukan. Ora ana sing dijujug. Saka bingunge mung klitar-kliter ing desa kono. Ngiras ngenteni matenge daging. Bareng wis sawetara wektu, kira-kira olehe padha mangsak daging wis padha mateng, bocah bajang mau mara ana ing omahe Ki Juru Mathokan njaluk daging. Krungu, tembunge Si Bajang Ki Juru nesu, kawetu tembunge kasar “Jebul mung arep ngemis bae. Ora melu kangelan melu enake. Kana lunga ! Adoh-adoh saka kene!”. Si Bajang klintih-klintih lunga. Saben omah sing diparani padha siya-siya, ora ana sing gelem menehi daging batang sairis. Si Bajang banjur marani omah bobrok, gedheg kang cagake wis padha reyot. Sing manggon ing omah reyot iku wong wadon tua aran Mbok Randa Lebak. Sanajan Mbok Lebak uga kacingkrangan nanging atine loma, seneng tetulung marang liyan. Si Bajang dijak mangan bareng, sing ngladeni karo sumeh kaya kaluwargane dene. Sadurunge lunga si Bajang aweh pesen marang Mbok Lebak “Yen ana banjir bandang, nungganga lesung karo enthong ya Mbok.” Mbok Lebak mara prelu neges nanging si Bajang mak klepat wis ora katon gegere. Tanpa sabawa bocah bajang nancepake sada ing latar kanggo sayembara sapa sing bisa mbedhol. Wiwitane bocah-bocah cilik sing padha dolanan sing nyoba mbedhol. Nanging siji wae ora ana sing bisa. Suwe-suwe wong-wong tuwa sing kendhuri uga pengin nyoba. Ewa semana ora ana sing bisa. Sanajan uwis padha ngetokake kasektene lan akeh sing ngrewangi mbedhol bebarengan. Sadane kaya- kaya malah saya ambles.
Si Bajang, sukmane Baru Klinthing, ngguyu cekakakan karo malang kandhak
kawetu tembunge,”He, wong Banarawa, sing wuta marang kabecikan, aja dumeh lagi bisa banjur gumedhe. Elinga menawa urip iku mung sakedhepe netra, nanging kebak duraka. Yen ora ngati-ati, bakal sengsara tekan neraka.” Sada banjur dicabut dening Bajang dewe. Tilase dadi tuk kang gedhe banget, wetuning banyu. Desa Banarawa geger puyengan. Sadhela bae sirep. Desa sakisine kaleban banyu, dadi rawa. Kesuwur aran Rawa Pening. Mung Mbok Lebak sing slamet. Klakon nunggang lesung welahan enthong nganti tekan Demak. Kapethik saking Buku Ajar Basa Kelas 3