PANAY BALITA NEWSPAPER

Eroplano na-aberiya, flights sa Iloilo airport na-

atrasar

Ni Ime Sornito

Saturday, March 11, 2017

Syudad sang ILOILO – Na-atrasar sang pila ka minutos ang flights

sang pila ka mga eroplano sa Iloilo International Airport kahapon

sang udto.

Ginkumpirmar sang Civil Aviation Authority of the Philippines nga

temporaryo nga nasuspendir ang biyahe sang pila ka mga eroplano

samtang ang iban naman nga mga manoghugpa ang gin-divert sa iban

nga mga airports matapos nga wala dayon makahugpa ang two-seater

plane nga may sakay nga tatlo ka mga pasahero kag piloto nga si

Richard Sayco halin sa Syudad sang Bacolod.

Gin-alegar nga nag-collapse ang landing gear sang two-seater

plane rason nga nagpabilin ini sa kahawaan.

Pag-abot sang alas-12:35 sang hapon kahapon, nagbalik naman sa

normal ang operasyon sang runway sang Iloilo airport.

Maswerte man nga wala sang may nasamaran nga mga pasahero sang

nasambit nga eroplano bangod nga nasolbar man gilayon sang piloto

ang problema./PB
LALAKI GINLASAK SANG TRAK

Ni Ime Sornito

Thursday, March 16, 2017

Syudad sang ILOILO – Masubo ang nadangtan sang isa ka lalaki nga

naga-obra bilang subpoena server sang Municipal Circuit Trial

Courts matapos nga ginsalakay sang nagahagunos nga six-wheeler

truck sa Brgy. Barrio Calinog, Calinog, Iloilo alas-cinco sang

hapon sang Martes.

Dead-on-arrival sa Calinog District Hospital ang biktima nga si

Gil Villanueva y Ayalyn, 53, kasado kag residente sang Brgy.

Canabajan, Calinog, Iloilo, bangod sang patal nga pilas sa ulo

kag iban pa nga bahin sang lawas.

Arestado naman ang drayber sang trak nga si Nerio Castellejo y

Castor, 65, kasado kag residente sang Brgy. Libot, Calinog.

Sa impormasyon nga nakuha sang Panay Balita kay Senior Inspector

Kenith Bermejo, hepe sang Calinog PNP, sakay sa iya motor nga

Kawasaki Bajaj 100CC nga duag blue nga may temporary plate no.

00160 ang biktima kag naga-usoy sang direksyon halin sa banwa

sang Calinog para magpauli sa ila balay. Pero pag-abot sa Brgy.

Barrio Calinog, aksidente ini nga nakabunggo sa layaw nga ido nga

gulpi lang nagtabok sa dalan rason nga nadulaan sia sang balanse

kag natumba sa highway.

Samtang nagahigdaon sa dalan ang biktima, hinali man nga naglusot

ang trak ni Castellejo nga mapadulong kontani sa banwa sang

Calinog rason nga nalasak gid sang rueda sini ang biktima.

Ginhingagaw pa sang mga residente dala sa ospital si Villanueva

apang ginbawian sang kabuhi bangod sang naangkon nga mga pilas.

Kasunod sini, nagmato-mato naman padulong sa Calinog PNP ang

drayber sang trak para magsungka./PB

‘ATM skimming’ madata sa Syudad sang Iloilo

Ni Ime Sornito

Saturday, March 18, 2017

Syudad sang ILOILO – Madamo na subong sang nabiktima sang

“skimming device” nga ginabutang sa automated teller machine

(ATM) sa mga bangko sa sining syudad.

Base sa rekord sang Bangko Sentral ng Pilipinas (BSP), tatlo na

ka mga persona ang nagdangop sa ila opisina matapos nga nabiktima

sang skimming device.

Paathag naman ni BSP Iloilo Acting Deputy Director Joanne Marie

Castelo, bangod sang ginabutang nga skimming device sa ATM,

ginagamit sang makawat ang nakatago nga electronics para kuhaon

ang personal nga impormasyon sang depositor lakip na ang nakatago

sini nga kwarta sa bangko.

Ang pinakadaku nga kantidad naman nga nadula sa isa ka depositor

naglab-ot sa P50,000 bangod sang pag-gamit sang skimming device.

Pero wala ginhingadlan ni Castelo kon ano nga mga bangko ang

natakdan sang mga skimming device sa syudad.

“Pila ka info ang nakalab-ot sa amon. So far, pagkabalo ko damo

sa Iloilo but ang nag-report sa amon tatlo ka bilog. Naga-

complain sila nga nabuhinan ang ila kwarta sa bangko. Lain-lain

ang amount, so far ang daku is P50,000,” hambal ni Castelo.

May kaangtanan diri, ginapanugyanan ni Castelo ang mga biktima

sang ATM Skimming nga magkadto gilayon sa bangko nga nag-isyu

sang ila ATM card kag i-reklamo ang insidente. Mahimu man sila

makadangop sa BSP para mahatagan sang aksyon sa sulod sang isa ka

bulan.

“Una kon na-skim ka, kadto ka gid sa bangko kon sin-o nag-issue

sang ATM card kag didto ka magreklamo. Kon gusto mo mag-complain,

mag-fill-up ka lang complaint form sa amon, forward namon sa

Manila. Sila na ang ma-investigate. Then, Manila i-directly email

ang person nga complainant nga amo ni ila findings,” eksplikar ni

Castelo.

Nahibaluan pa nga indi lamang diri sa syudad lapnagon ang ATM

Skimming bangod nga bug-os na gid nga pungsod ang nagareklamo

angut diri.

Ginapanugyan man sang BSP nga kon mag-transaksyon sa mga ATM,

siguraduhon nga masanag kag may gwardiya ang bangko.

“Advise ko sa public within office hours kung you want to

withdraw sa sulod sang bangko kag kon may diperensya, maka-

complain sa office. Kon indi office hours, withdraw sa bangko nga

may gwardya,” pagtakop ni Castelo./PB

Tigulang ginsalakay sang motor

Ni Ime Sornito

Tuesday, March 14, 2017

Syudad sang ILOILO – Ospital ang gintup-an sang 69-anyos nga

tigulang nga babae matapos nga ginsalakay sang motorsiklo sa

Barangay Aganan, Pavia, Iloilo alas-8:40 sang aga kahapon.

Ang ambulansya sang Pavia ang nagdala sa Western Visayas Medical

Center sa biktima nga si Erlinda Tugle, residente sang Brgy.

Aganan, nga nakaagom sang pilas sa ulo.

Sa interbyu sang Panay Balita kay PO2 Victor Laña, imbestigador

sang Pavia PNP, halin sa small market sang Pavia ang biktima kag

nagatabok na sa dalan para magpauli sa iya balay sang ginsalakay

sang motor nga ginamaneho ni Paul Guarnes, 21, sang Purok 2,

Pavia, Iloilo.

“Halin na sia sa small market kag matabok sa pihak. Ti, ang motor

nga nagadalan halin sa city pakadto sa Pavia. Ti, nag-panic ang

tigulang pagkita sang motor tapos ang drayber daw nagulpihan man

amo to nga nabunggoan sia” eskplikar pa ni Laña.

Wala man nakaluwas si Guarnes matapos nga natumba ini upod ang

iya motor sa dalan rason sang iya kabagrasan sa lawas.

Gindala man ini sang patrol car sang Pavia PNP sa Iloilo Mission

Hospital para magpabulong./PB