Republic of the Philippines

6 Department of Education
Region III
SCHOOLS DIVISION OF ZAMBALES

FILIPINO
Kagamitan sa Pinatnubayang
Kasanayang Pampagkatuto
Pag-iisa-isa ng mga Argumento
sa Binasang Teksto
Ikatlong Markahan – Ikalawang Linggo
(Aralin 1)
FILIPINO – Ikaanim na Baitang
Kagamitan sa Pinatnubayang Kasanayang Pampagkatuto
Pag-iisa-sa ng mga Argumento sa Binasang Teksto
Ikatlong Markahan – Ikalawang Linggo (Aralin 1)
Isinasaad sa Batas Republika 8293, Seksiyon 176 na: Hindi maaaring magkaroon
ng karapatang-sipi sa anomang akda ang Pamahalaan ng Pilipinas. Gayonpaman, kailangan
muna ang pahintulot ng ahensiya o tanggapan ng pamahalaan na naghanda ng akda kung
ito ay pagkakakitaan. Kabilang sa mga maaaring gawin ng nasabing ahensiya o tanggapan
ay ang pagtakda ng kaukulang bayad.
Ang mga akda (kuwento, seleksiyon, tula, awit, larawan, ngalan ng produkto o brand
name, tatak o trademark, palabas sa telebisiyon, pelikula, atbp.) na ginamit sa modyul na ito
ay nagtataglay ng karapatang-ari ng mga iyon. Pinagsumikapang matunton ang mga ito
upang makuha ang pahintulot sa paggamit ng kagamitan. Hindi inaangkin ng mga
tagapaglathala at mga may-akda ang karapatang-aring iyon. Ang anomang gamit maliban sa
modyul na ito ay kinakailangan ng pahintulot mula sa mga orihinal na may-akda ng mga ito.
Walang anomang parte nito ang maaaring kopyahin o ilimbag sa anomang paraan nang
walang pahintulot sa Kagawaran.

Bumuo sa Pagsulat ng Kagamitan

sa Pinatnubayang Kasanayang Pamapagkatuto

Manunulat: Rhona E. Adlawan

Editor: Joel D. Orcino
Tagasuri: Marie Ann C. Ligsay PhD
Divine Grace Esteban
Albin Lee A. Arabe
Tagaguhit: Evangeline E. Ebidag
Tagapamahala: Ma. Editha R. Caparas EdD
Leonardo D. Zapanta EdD, CESO V
Michelle A. Mejica EdD
Manolito B. Basilio EdD
Ma. Lilybeth M. Bacolor EdD
Garry M. Achacoso
Rachelle C. Diviva

Inilimbag sa Republika ng Pilipinas ng Kagawaran ng Edukasyon Rehiyon III

Pansangay na Tanggapan ng mga Paaralan sa Zambales
Zone 6, Iba, Zambales
Tel./Fax No. (047) 602 1391
E-mail Address: zambales@deped.gov.ph
Website: www.depedzambales.ph
 6
FILIPINO
Kagamitan sa Pinatnubayang
Kasanayang Pampagkatuto
Pag-iisa-isa ng mga Argumento
sa Binasang Teksto
Ikatlong Markahan – Ikalawang Linggo
(Aralin 1)
 Pag-iisa-isa ng mga Argumento
sa Binasang Teksto

Panimula

Ikinagagalak kong batiin ka ng Maligayang Araw. Ikaw ay nasa Baitang 6 ng

pag- aaral sa Filipino! Sa Kagamitan sa Pinatnubayang Kasanayang Pampagkatuto
na ito, magkakaroon ka pa ng lalong kaalaman. Naranasan mo na bang bumasa ng
talata o debate na may pinagtatalunan at may kaniya-kaniyang argumento? Ano ang
masasabi mo kung ang bawat isa ay may dahilan o argumento sa paksang
ipinapahayag?

Ang argumento na nababasa mo ay nagpapalawak ng kaalaman mo sa paksa

na tinatalakay at nakatutulong ito para magkaroon ka ng sarili mong ideya o
pananaw. Sa araling ito, matututuhan mo kung ano ang argumentong tinutukoy sa
tekstong binasa.

Kasanayang Pampagkatuto

Naiisa - isa ang mga argumento sa binasang teksto. (F6PB-IIIe.23)

1
 Mga Layunin

Sa pagtatapos ng Kagamitan sa Pinatnubayang Kasanayang Pampagkatuto

na ito, ikaw ay inaasahang:

1. natutukoy ang mga argumento sa binasang teksto;

2. nakabubuo ng argumento sa binasang teksto; at
3. naiisa-isa ang mga argumento sa binasang teksto.

Balik Aral

Panuto: Basahin ang talata at pagkatapos isulat sa isang pangungusap ang buod ng
teksto. Isulat ito sa iyong sagutang papel.

1. May kaniya-kaniyang paraan ang mga magulang sa paghubog at pagpapalaki

ng kanilang mga anak. May mga magulang na pilit inuunawa ang mga
pinagdaraanang problema ng mga anak. Mayroon namang ubod ng higpit
dumisiplina sa mga anak.

2. Tandang-tanda ko pa ang bakuran nina Lolo at Lola sa nayon. Maraming

punongkahoy at iba’t ibang pananim doon. Sagana sa prutas at gulay ang
buong bakuran. Malilim at malamig ang paligid. Kaya’t kaming mga apo nila
ay madalas magbakasyon doon.

3. Isa pang kahanga-hangang tanawin bukod sa Bulkang Mayon ay ang Bukal ng

Tiwi. Ang bukal na ito ay isa sa mga napagkukunan ng lakas-geothermal sa
bansa. Ito ay nasa lalawigan ng Albay.

2
 4. Ang bayan ng San Marcelino ay kilala sa ipinagmamalaking mapuputi at
matatamis na singkamas. Ito ay isa sa mga pangunahing kabuhayan ng tao
rito na sinasabing ang katangian nito ay makikita rin sa kanila. Matamis na
ngiti ang makikita sa mukha at ang mabuting kalooban ng kanilang puso. Sa
kalsada maririnig mo ang "kamas-kamas" na alok ng mga taong nagtitinda nito.

5. Maraming pagsubok ang nangyari sa taong 2020 ngunit sa kabila nito naging
matatag ang mga Pilipino. Hinarap ang lahat ng hamon sa buhay at mga
trahedyang hindi inaasahang dumating. Lumaban bumangon at hindi
nagpatalo. Nananatiling matatag na kumapit sa pananampalataya sa
Panginoon at nagtiwala sa kanyang sinabi na "Hindi Ko kayo iiwan maniwala,
magtiwala at manalig kayo sa Akin.”

Tandaan:

Sa paggawa ng buod o paglalagom ng talata, dapat na maunawaan at

malaman ang pangunahing diwa at paksang tinatalakay.

3
 Pagtalakay sa Paksa

Panuto: Basahin ang talata.

Ang Pandemyang Kinakaharap Natin

ni Rhona E. Adlawan, San Guillermo Elementary School

Ang mundo ay nahaharap ngayon sa pandemyang lumaganap at kinatakutan

ng lahat, ang COVID-19, na hanggang sa kasalukuyan ay wala pang lunas na
masasabing magsasalba sa mundo. Marami na ang nahawahan, nagkasakit at
nasawi. Lahat tayo ay apektado at nagkaroon na ng iba’t ibang argumento kung ano
ang nararapat gawin. Ang gobyerno ay nahihirapan din, dahil kung hindi ito
maaksyunan at masusugpo, maaring mas marami pang buhay ang masawi.

Lalo na’t patuloy pa ring pinag-aaralan ang tungkol dito sa virus. Nagkaroon
ng mga pagtatalo at argumento na kung ano ang dapat gawin upang maiwasan at
mapigilan ang COVID-19.
Narito ang mga mungkahi na isinagawa:

1. Pagmumungkahi ng lockdown

2. Pagpapalaganap ng mga Health Protocol

3. Pagtuklas ng gamot o bakuna para sa COVID- 19.

4
 Sa pagmumungkahi ng lockdown, napigilan ang
paglabas ng tao, kasabay nito ang pagbibigay ng
gobyerno ng ayudang pagkain at pera sa mga tao.
Nagkaroon ng malawakang pagpapatupad sa mga
kaalaman ng Health Protocol. ginamit ang lahat ng
komunikasyon lalo na sa iba’t ibang uri ng
pamamahayag upang maiparating sa mga tao ang
kahalagahan ng pag-iingat tulad ng social distancing,
pagsusuot ng facemask at face shield at palagiang
paghuhugas ng kamay at paggamit ng alcohol. Sa
ngayon, patuloy pa rin ang paghahanap ng bakuna na
maaring maging sagot sa suliraning ito. Iba’t ibang
argumento ang narinig, nalaman at nabasa natin,
patuloy pa rin ang aksyon at pag-aaral habang hindi pa
rin ito nagagawan ng mabisang lunas.

Lockdown nga ba ang pipigil sa sakit na ito? Pagsunod ba sa Health Protocol

ang magpapahinto nito? Ang bakuna nga kaya na sa ngayon ay sinisimulan nang
gamitin at ibigay sa tao para makita ang resulta kung magiging epektibo ang
kalalabasan para maibalik na sa normal ang lahat? Ang mga ito ba talaga ang
solusyon? Pero ayon na rin sa nangyayari ngayon, nasa tao ang problema. Ang virus
ay makakayang sugpuin at pigilan sa pagkalat kung susunod lamang tayo sa lahat
ng utos sa atin ng mga kinauukulan. Samut-saring argumento sa pandemyang ito,
mga reklamong walang tigil nating naririnig, mga hinaing at pagdurusa ng mga
lalong naapektuhan, patuloy ang paghahanap ng solusyon at sagot sa mga
naglalabasang problema kaakibat ng COVID-19 na kinakaharap natin.

5
 Ngunit higit na kailangan ng tao ay disiplina sa sarili, dahil kahit ano pa ang
gawin ng gobyerno kung walang disiplina ang mga tao hindi magiging matagumpay
ito. Disiplina sa sarili para mahanap ang tamang lunas. Ang dapat nating gawin ay
magkaisa, magtulungan at patuloy na manalig sa Panginoon na matatapos din ang
lahat ng ito.

Panuto: Basahin at pag-aralan ang mga sumusunod na pahayag ukol sa tekstong

binasa.

1. Lockdown nga ba ang pipigil sa virus?

2. Pagsunod ba sa health protocol ang magpapahinto ng virus?

3. Ang bakuna nga kaya na sa ngayon ay sinisimulan nang gamitin at iturok sa

tao para makita ang resulta kung magiging epektibo ang kalalabasan upang
maibalik na sa normal ang lahat?

4. Ang mga ito ba talaga ang solusyon? Pero ayon na rin sa nangyayari ngayon
nasa tao ang problema.

5. Ang virus ay kayang sugpuin kung susunod tayo sa lahat ng ipinatutupad sa

atin ng mga kinauukulan.

6. Ngunit higit na kailangan ng tao ay disiplina.

6
 7. Disiplina sa sarili para mahanap ang tamang lunas.

8. Magkaisa, magtulungan at patuloy na manalig sa Panginoon na matatapos din

ang lahat ng ito.

Tandaan:
Ang mga sumusunod na pahayag ay mga argumento sa binasa mong teksto.
Ang tekstong argumentibo ay naglalayong kumbinsihin ang mambabasa,
hindi lamang ito nakabatay sa opinyon o damdamin ng manunulat, batay din ito sa
datos o impormasyong inilatag ng manunulat. Ito rin ay naglalahad ng paniniwala,
pagkukuro o pagbibigay ng pananaw patungkol sa isang mahalagang isyu. Ito ay
naglalayong maglahad ng mga simulain o proposisyon upang mapangatwiranan ang
nais iparating na kaalaman sa mga mambabasa. Mayroong isang bagay na
kailangang mailahad na nagpapakita ng positibo at negatibong epekto nito.

Isang uri ng akdang naglalayong mapatunayan ang katotohanan ng

ipinahahayag at ipatanggap sa bumabasa ang katotohanang iyon. Naglalahad ng
mga posisyong umiiral na kaugnayan ng mga proposisyon na nangangailangang
pagtalunan o pagpapaliwanagan, hikayatin ang mambabasa na tanggapin ang
kawastuhan ng kanilang pananalig o paniniwala sa pamamagitan ng makatwirang
pagpapahayag.

7
 Gawain

Pinatnubayang Pagsasanay 1

Panuto: Batay sa binasang teksto, sagutin ang mga tanong, piliin ang letra ng
tamang sagot at isulat ito sa sagutang papel.

1. Ano ang pandemyang lumalaganap sa mundo?

A. HIV
B. H1N1
C. COVID-19
D. African Swine Fllu

2. Bakit kinatatakutan ang COVID-19?

A. nakahihilo
B. nakatutulala
C. nakamamatay
D. nakalalapnos

3. Ano ang mga ginagawa para masugpo ang COVID-19?

A. pinagmulta ang tao
B. tinakot ang mga tao
C. nagkulong ang mga tao sa kulambo
D. nagpatupad ng health protocol, lockdown at tumutuklas ng gamut

4. Batay sa teksto, alin sa mga argumentong nabasa mo ang kailangan ng tao upang
matigil ang COVID-19?
A. pagmumungkahi ng lockdown
B. pagsunod sa health protocol ang pinapatupad ng pamahalaan
C. Disiplina sa sarili ang kailangan para matigil ang COVID-19.
D. Ang mundo ay may kinakaharap na pandemya sa ngayon.

8
5. Anong mabubuong argumento sa nabasang talata ang magbibigay solusyon
sa suliraning kinakaharap ng bansa?
A. Sundin ang gusto mo at pinaniniwalaan mo lang.
B. Kailangan magdahilan ang tao para magawa ang gusto.
C. Ang pandemya ay matatapos kung susuportahan ng pamahalaan ang mga
tao.
D. Ang kailangan ng tao ay sumunod sa mga batas at magkaroon ng tamang
disiplina sa sarili.

Pinatnubayang Pagsasanay 2
Panuto: Basahing mabuti ang teksto at sagutin ang mga tanong pagkatapos nito.
Isulat ang sagot sa sagutang papel. (2 puntos bawat bilang)

Pagpapatupad ng K-12 Kurikulum bilang Sistema ng Edukasyon sa Pilipinas

ni Rhona E. Adlawan, San Guillermo Elementary School

K-12, isang sistema ng edukasyon na itinulad sa mga kanluraning bansa na

sinasabing magtataas ng kalidad ng edukasyon sa mga susunod pang henerasyon.
Marami ang nagsabi na dapat lamang na ipatupad ang K-12 Kurikulum dahil ang
Pilipinas na lang ang natatanging bansa sa Asya na sampung taon lamang ang pag-
aaral ng Basic Education; magkakaroon ng pagkakataon ang mag-aaral na pumili
kung magpapatuloy pa sa kolehiyo o magsisimula nang magtrabaho pagkatapos ng
Senior High School kung sakaling wala na silang pera upang maipagpatuloy ang pag-
aaral; at kahit hindi nakapag-aral ng kolehiyo, kuwalipikado na rin silang
magtrabaho, ngunit sa kabila ng pagiging praktikal ng K-12.

9
 Marami pa rin ang hindi pabor dito dahil kulang ang pamahalaan at buong
bansa sa paghahanda. Walang ginawang pag-aaral kung makakatulong ba ito sa
mga Pilipinong mag-aaral, basta na lamang itong ipinatupad kaya hindi sapat ang
pagsasanay ng mga guro para sa idadagdag na dalawang taon sa pag-aaral.

Patuloy din itong magdudulot ng hindi kaaya-ayang kalagayan sa mga mag-

aaral habang nag-aaral ng dalawang taon kung saan magkakaroon ng pagbabago
pa sa pagpasok ng Grade 11 at 12. Ito ay magdudulot ng kawalan o kakulangan ng
mga magpapatala sa mga Pamantasan na sa kalaunan ay magtutulak sa kanila na
magtanggal ng mga empleyado lalo na sa kanilang mga guro at kawani.

1. Ano ang paksang tinalakay sa teksto?

2. Pumili ng isang pahayag na nagsasaad ng argumento sa binasang teksto.

3. Alin sa mga sumusunod na argumentong pahayag ang sinasang- ayunan mo?

Bakit?

A. Marami ang nagsabi na dapat lamang na ipatupad ang K-12 Kurikulum

dahil nahuhuli na tayo kung ihahambing sa mga karatig bansa sa Asya.
B. Marami ang hindi pabor sa pagpapatupad ng K-12 dahil kulang ang
pamahalaan at ang buong bansa ng paghahanda para dito.
C. Walang ginawang malalimang pag-aaral kung makakatulong ba ito sa mga
Pilipinong mag-aaral.

4. Ano ang masasabi mo sa pagpapatupad ng K-12 Kurikulum sa ating bansa?

5. Ano ang maaari mong mabuo na argumento sa binasang teksto?

Pang-isahang Pagsasanay

Panuto: Basahin ang isang halimbawa ng editoryal.

Paglaban sa COVID – 19; Nananalo ba tayo?

ni Rhona E. Adlawan, San Guillermo Elementary School

Malaking alalahanin sa ating lahat nang marinig sa balita ang Corona Virus
2019 (COVID-19) na lubhang mapanganib at nakamamatay. Marahil ay marami ka
nang narinig na mga kuwento tungkol sa sakit na ito kamakailan. Walang tigil sa
pagtatrabaho ang mga kagawaran ng pamahalaan. Kung mararanasan ang mga
sintomas gaya ng lagnat, pangangati ng lalamunan, ubo, sipon at pagtatae ay
maaring komunsulta kaagad sa malapit na ospital upang masuri ang kalagayan.

10
Dapat nating malaman ang mga paraan upang makaiwas at malabanan ang sakit
na ito.

Mayroong dalawang paraan upang mapigilan ang paglaganap nito, ang una
ay mag-quarantine o ibukod ang iyong sarili at iwasan muna ang malapitan o pisikal
na pakikisalamuha sa iba. Ang pangalawa ay pagpapalakas ng katawan sa
pamamagitan ng pag–inom ng mga bitamina upang tuluyang makagawa ang ating
katawan ng antibodies na tumutulong upang mapalakas ang ating imyunidad at
tulungang malabanan ang nasabing virus. Ang mga antibodies ay maaaring tumagal
ng ilang araw o linggo upang mabuo pagkatapos magkaroon ng impeksyon at ito’y
maaaring manatili sa dugo ng ilang linggo o higit pa pagkatapos gumaling. Dahil
dito, ang pag-eksperimento sa paggamit ng antibodies bilang lunas ay hindi dapat
basta–basta isinasagawa sa taong may COVID-19. Sa oras na ito, ay hindi pa alam
ng mga mananaliksik at dalubhasa sa larangan ng medisina kung ang pagkakaroon
ng antibodies ay tiyak ng ligtas sa covid ang isang tao sa hinaharap. Ang tanong, ito
ba ay magiging epektibo at magiging sagot sa ating suliranin? Marami pa rin ang
nagdadalawang-isip sa pagpapaturok ng bakuna dahil sa pangamba ng magiging
epekto nito. Ang maaari nating gawin sa ngayon ay maghintay at magtiwala sa mga
eksperto at pamahalaan na patuloy na naghahanap ng lunas upang tuluyan nang
mawala ang COVID -19.

11
A. Panuto: Basahin at sagutin ang mga sumusunod na tanong. Isulat ang sagot sa
sagutang papel.

1. Ano ang paksang tinalakay sa editoryal na binasa?

2. Ano ang dalawang paraan para mapigilan ang paglaganap ng corona virus?

3. Ano ang katwiran ng dalawang paraan upang mapigilan ang paglaganap ng

corona virus na magkatulad?

4. Tama ba ang argumento ng bawat isa sa dalawang maaring gawin upang

mapigilan ang corona virus? Bakit?

5. Alin sa dalawa ang sa tingin mo, ang mas epektibong paraan upang mapigilan
ang pagkalat ng corona virus? Pangatwiranan.

B. Panuto: Basahin ang mga pahayag at suriin ang mga ito. Isulat sa sagutang papel
kung ito ay Argumento o Hindi-argumento sa binasang Editoryal.

1. Ang ibig sabihin ng COVID-19 ay isang sakit na wala pang lunas.

2. Malaking alalahanin sa ating lahat nang marinig sa balita ang COVID-

19 na nakamamatay.

3. Sa iyong palagay, alin ang mas epektibong paraan upang malabanan

ang COVID-19?

4. Sa ngayon ay hindi pa alam ng mga mananaliksik kung ang

pagkakaroon at paggamit ng antibodies ay tiyak nang ligtas panlaban sa
COVID-19.

5. Ang tanong, ito ba ay magiging epektibo at magiging sagot na sa ating

suliranin?

12
 Pagsusulit

Panuto: Basahin ang Editoryal tungkol sa edukasyon sa panahon ng pandemya.

Tugon ng Kagawaran ng Edukasyon sa Pandemya

Ano ang naging tugon ng Kagawaran ng Edukasyon sa pandemya? Ito ang

naging malaking isyu ng bansa sa panahon ng COVID-19. Isang malaking hamon o
pagsubok sa mga paaralan at ahensya ng gobyerno ang isyu kung ipagpapatuloy pa
ba ang pagbubukas ng klase o pagpapaliban na muna dahil sa panganib na
maaaring idulot ng COVID-19. May mga eskwelahang nagsuspende ng klase dahil
sa pagtugon sa on-line classes at ang iba ay hindi na tinapos ang taong panuruan.
Sa pasukan noong Agosto 2020, ang mga estudyante at magulang ay naghanda sa
mga posibleng maging problemang papasanin nila habang hindi pa natatapos ang
pandemya.

Sa tekstong ito, pinag-usapan ng mga tagapag–balitang mula sa Rappler na si

Bonz Magsambol at Manunulat na si Jodesz Gavilan, ang mga lumabas na problema
nitong mga nakaraang buwan kaugnay sa edukasyon at kung ano ang mga hakbang
na gagawin ng Kagawaran sa Edukasyon (DepEd) at Komisyon sa mas Mataas na
Edukasyon (CHED). Ang pasya ng DepEd ukol sa mga alituntunin sa nalalapit na
pasukan ay base sa isang pag-aaral, ngunit ayon kay Magsambol, “Sa pag-aaral na
ito, sa paraang on-line, iyo’ng mga estudyanteng may internet lang ang makaka-
angkop. Paano iyong mga estudyanteng walang kakayahang magkaroon ng internet?
Paano sila makakasabay sa gayong uri ng pag-aaral hindi ba?“

13
Isang tinitingnang paraan ay ang paghalo ng on-line classes at face-to-face classes,
ngunit habang ang banta ng corona virus ay narito pa, makatitiyak na malaki ang
maitutulong ng paggamit ng internet sa mga unang buwan ng pasukan. Sa kabila
ng pandemya habang mas dumarami ang mga taong nahahawahan ng corona virus
at unti-unti pa lamang nagbubukas ang ekonomiya – iginiit ng DepEd na handa ang
ahensiya na magbukas ng klase sa Agosto 24. Distance learning o online classes ang
magiging sagot dito sa halip na pisikal na klase sa pamamagitan ng naimprintang
modyul na ibibigay sa mga estudyante na kanilang sasagutan sa kanilang tahanan
at mga leksiyon sa telebisyon o radyo.

Maraming tutol sa pasya ng DepEd

na ituloy ang pisikal na pag-aaral. Ayon sa
mga magulang at estudyante, naapektuhan
ng lockdown ang kanilang kabuhayan at
hindi nila kakayanin ang gastusin. Marami
ring pamilyang walang kakayahang bumili
ng sariling kompyuter o magkaroon ng
sariling internet. May mga magulang din na
hindi nakapag-aral kaya hindi sapat ang
kaalaman para maturuan o magabayan ang
kanilang mga anak sa pagsagot sa modyul.

Ayon sa datos noong Disyembre 2019

ng DepEd, 67% lamang ng mga Pilipino ang
may kakayahang magkaroon ng internet.
Paano ang natitirang 33%? Ayon sa DepEd,
bibigyan ng naimprintang modyul ang mga estudyanteng walang internet. Batay sa
datos nitong Hulyo 7, humigit sa 18 milyong estudyante mula sa pampubliko at
pribadong paaralan na ang nakapagpatala. Mahigit sa kalahati lamang ito ng 27
milyong estudyante noong nakaraang taon.

-Hinango mula sa akda ng Rappler.com, Mayo 14, 2020

A. Panuto: Sagutin ang mga tanong sa binasang Editoryal. Isulat ang sagot sa
sagutang papel.

1. Ano ang paksang tinalakay sa editoryal na iyong binasa?

2. Ibigay ang mga argumentong nabanggit sa isyung binasa.

3. Alin sa mga isyung nabanggit ang higit na dapat gawin dahil nakapagbigay
ng tamang argumento? Pangatwiranan.

14
 4. Tama ba ang argumento ng bawat isyu? Bakit?

5. Kung ikaw ang tatanungin, alin sa mga argumentong binanggit ang iyong
pipiliin? Argumento ba ng online class o modular learning? Bakit?

B. Panuto: Basahin ang mga sumusunod na pahayag at tukuyin kung Argumento

o Hindi–argumento ang isinasaad ng bawat pahayag. Isulat ang sagot sa
sagutang papel.

1. Iba-iba ang paraan ng mga paaralan at ahensya ng gobyerno sa pagsagot

sa sitwasyon.

2. “Sa pag-aaral na ito, sa paraang on-line ang pag-aaral ng mga estudyante.

Iyong mga may internet lang din.”

3. “Paano iyong mga estudyanteng walang kakayahang magkaroon ng

internet? Paano sila makakasabay sa gayong uri ng pag- aaral hindi ba?”

4. Sa halip na pisikal na klase kaharap ang mga guro sa mga paaralan,

tuturuan ang mga estudyante sa pamamagitan ng naimprintang modyul,
online learning, at mga leksiyon sa telebisyon o radyo.

5. Ayon datos noong Disyembre 2019 ng DepEd, 67% lamang ng mga

Pilipino ang may kakayahang magkaroon ng internet.

Pangwakas

Panuto: Basahin ang teksto, pagkatapos ay magbigay ng limang (5) argumentong

binanggit dito. Isulat ang mga ito sa sagutang papel.

Kabataan, Pag-asa ng Bayan?

ni Rhona E. Adlawan, San Guillermo Elementary School

Ang ating bayaning si Dr. Jose Rizal ay nagsabing… “Ang

kabataan ang pag- asa ng bayan.” Kung siya ay nabubuhay sa ating
panahon at malayang nakikisalamuha sa iba’t ibang pangkat ng
mga kabataan, gayon pa rin kaya ang kanyang paniniwala?
Magmasid tayo.

15
 Sa isang pook libangan na maingay ang paligid, halakhakan ang iyong
maririnig at halos hindi iyon maaninag dahil sa usok. Lahat ay nagsasalita, lahat
gusto ay bida. Sumasabay sa di kaaya-ayang tugtugin o musika na hindi alintana
ang naghihintay na mga magulang, na ang pagpapaalam ay tatapusin ang group
study o di kaya’y mag- eensayo para sa pangkatang pagtatanghal. Hindi nauubusan
ng dahilan sa pag-uwi nang hindi tama sa oras.

Sa isang computer shop makikita ang mga mag-aaral na naka - uniporme pa,
karaniwan ay mga lalaki, malalakas ang sigaw at nagsasalita ng mga masasamang
salita sabay sa pagpindot sa mga nilalarong video games. Isa na dito ang
kinahuhumalingang Mobile Legends na nagkakaroon pa ng pustahan. Minsan pa
nga, ang perang baon para sa pagkain at pambili sa gagawing proyekto ay nauubos
sa pustahan dito.

Ilan lamang ito sa mukha ng

kabataan sa ngayon na wala na o mababa
na ang pagpapahalaga sa edukasyon
kaya’t higit pa silang nagiging problema
ng bayan. Ilan pa sa kabataan ngayon ay
ang nagiging hadlang sa pag-unlad ng
bansa. Nagkamali nga kaya ang ating
pambansang bayani sa kanyang iniwang
matalinghagang pananalita? Marahil ay
hindi naman lahat ng kabataan ay pare–
pareho at katulad ng ipinahahayag sa
talata, marami pa rin naman ang maayos at matitino na maaaring maging sandigan
natin pagdating ng panahon. Tamang kalinga at paggabay lamang ang kailangan
upang buhay nila’y di-malihis.

16
 Mga Sanggunian

Belvez P. (2011). Landas sa Pabasa, Batayang Aklat sa Filipino 6, Kagawaran ng

Edukasyon Republika ng Pilipinas
Illeris, K. (2014). Transformative learning and identity. Journal of Transformative
Education, 12(2), 148-163.
Roman Jr, G. Q., Reyes, W. M., Valencia, M. C., & Tantengco, N. S. (2015).
PILOSOPIYANG PANG-EDUKASYON NI RIZAL: ISANG PILOSOPIYANG
PILIPINO SA EDUKASYON. The Normal Lights, 8(2).
Vallejo Jr, B. M., & Ong, R. A. C. (2020). Policy responses and government science
advice for the COVID 19 pandemic in the Philippines: January to April
2020. Progress in Disaster Science, 7, 100115.
Vihinen, M. (2020). Strategy for disease diagnosis, progression prediction, risk group
stratification and treatment–Case of COVID-19.

17
Susi sa Pagwawasto

18
 Pasasalamat

Ipinaaabot ng Pansangay na Tanggapan ng mga Paaralan ng Zambales ang

taos-pusong pasasalamat sa mga sumusunod, na nakapag-ambag ng tagumpay
para sa paghahanda, pag-unlad, pagtiyak ng kalidad, paglimbag at pamamahagi
ng Ikatlong Markahang Kagamitan sa Pinatnubayang Kasanayang Pampagkatuto
sa lahat ng asignatura sa iba’t ibang antas bilang tugon sa pagbibigay sa mag-
aaral ng naaangkop na kagamitang pampagkatuto hango sa Pinakamahalagang
Kasanayang Pampagkatuto (MELCs) - ayon sa mga pagsasanay na nakabatay sa
mga pamantayan ng pinatnubayang kasanayan at tuwirang pagtuturo:
Una, ang Learning Resource Development Team na binubuo ng mga
manunulat at tagaguhit, sa kanilang iginugol na panahon at kakayahan upang
makabuo ng iba’t ibang kinakailangang kagamitang pampagkatuto.
Ikalawa, ang mga tagapatnugot sa nilalaman, tagasuring pangwika, at
mga tagasuring pandisenyo na maingat na nagwasto at bumuo sa lahat ng
Kagamitan sa Pinatnubayang Kasanayang Pampagkatuto upang matiyak ang
kawastuhan at katugunan sa mga pamantayan ng Kagawaran ng Edukasyon;
Ikatlo, ang mga gurong tagapatnubay at mga guro sa bawat asignatura sa
kanilang malapit na pakikipag-ugnayan sa mga punongguro, sa kanilang
lingguhang pamamahagi at pagbabalik ng mga Kagamitan sa Pinatnubayang
Kasanayang Pampagkatuto at sa kanilang madalas na pagsubaybay sa pag-unlad
ng mag-aaral sa lahat ng paraan; at
Panghuli, ang mga magulang at iba pang pantahanang tagapagdaloy sa
kanilang pagbibigay sa mag-aaral ng kinakailangang patnubay at gabay upang
maisagawa ang mga gawain at upang patuloy na matulungan ang bawat mag-
aaral na maging responsableng indibidwal sa hinaharap.
Sa inyong patuloy na paghahatid ng kaalaman sa mapanghamong
panahon ay lubos na makamit ang sama-samang pagpupunyagi at matibay na
malasakit na pagsilbihan ang ating mag-aaral na Zambaleño.
Muli, ang aming walang hanggang pasasalamat!
Tagapamahala

19
 Para sa katanungan o karagdagang puna,
maaaring sumulat o tumawag sa:

Pangsangay na Tanggapan ng mga Paaralan ng Zambales

Zone 6, Iba, Zambales
Tel./Fax No. (047) 602 1391
E-mail Address: zambales@deped.gov.ph
Website: www.depedzambales.ph