Immaculate Conception School of Theology

Nuestra Señora de la Caridad Formation Community

Pantay Daya, Vigan City, Ilocos Sur

KARARAG ITI IMATANG

TI IMAHEN NI
NUESTRA SEÑORA DE LA CARIDAD
TI BANTAY
“Patrona ti Kailucoan”

12 January
 KARARAG KEN APO CARIDAD

Apo Santa Maria, Nuestra Señora de la Caridad nga Ina ti

ayat, asi ken tulong, saanmo pulos a binaybay-an ti Iglesia. Ta ti
ayat ken tulongmo awan ti pilpilien ken ilak-laksidna a kas
impakitam iti panangibabaetmo iti padaya sadiay Cana, ta no man
pay saanmo nga akem ket tinulungam dagiti nagkasar babaen ti
panagdawatmo ken Jesus nga anakmo. Inami a napoan gracia,
awan patinggana ti pannulongmo, ta babaen ti bendisyon nga
imburaymo kadagiti amin a kameng ti familia a kumamang kenka
ket natibker ti pammati ken talekda gapu ta inbilangmo ida a dung-
dungoem unay nga annakmo kas inbilin ni Jesus. O nadungngo
unay nga Inami, maikarikami koma nga umasideg kenka a kas
annakmo, ket iburaymo kadi dayta mangnibi-nibi a kaasim ken
tulongmo kadakami a kumamang kenka.
O Manangngaasi unay nga Inami a kamang dagiti
managbasol, napalalo unay ti tulongmo kadagiti amin nga
umararaw kenka. Ta sika ti Ina a saan a pulos a makaammo a
manglipat ken mangbaybay-a kadagiti annakna a kas iti dimo
panangbaybay-a ken Jesus nga anakmo, idi a nabati sadiay Templo
ket kasta unay ti danagmo ken ti panangsarakmo kenkuana. Isu
ngarud nga agkama-talekkami nga umasideg ken agdebosion
kenka, tapno maadaankami iti di-agsarday nga ayat iti maysa ken
maysa, mapaimbag ti panagbiagmi a tumulad iti bugbugtong nga
Anakmo a ni Jesus a mangtungpal iti kinasanto ti biag; ken tapno
magun-odmi dagiti gungona dagiti nasantoan nga aramid nga
inbilinna.
Ina ti langit ken daga, ammomi a gapu iti kinakapsotmi, di-
mabilang dagiti basbasolmi iti Apo. Isu ti gapuna nga agpakpa-
kaasikam kenka a tulongannakami, tapno matungpalmi amin dagiti
bilbilin ti Dios. Kadagiti nainaan nga imam, O Santa Maria,
itaklinmi ti agnanayon a pannakaisalakanmi. Buyogannakami
kadagiti dungngo ken kaasim, tapno dikam supapakan iti
naranggas a panangtal-likod kadagiti agnanayon parabor ti Dios.
Idawdawatannakami kenni Apomi a Jesucristo nga Anakmo, tapno
mapapigsakami iti gracia nga agayat ken agsublikami a sipapasnek
a mangaramid kadagiti bilbilin ti Dios, ta bareng no manipud ita,
maidatonmi ti nadalus nga ayat ti puspusomi.
 O manangngaasi unay nga Apo Caridad! O ingget-anus nga
Ina! Liwliwa ken taklin dagiti managbasol, katalek dagiti tattao,
ken mangibabaet kadakuada iti saklang ti Dios! Ipaannugotmo
kadakami, ipagapum iti kaikarian ken bileg daytoy napateg unay a
debosion, tapno maikarikami nga annakmo, ta inton dumteng ti
ipapataymi, ti pannakakitami kenka ket maikarikami a sumagpat iti
agnanayon a ragsak ken kappia iti sidong ti Dios, sadiay
pagarianna. Kasta met, O katalekmi, nga ipalak-ammo kadakami
dagiti dawatenmi iti daytoy a panagdaydayawmi iti Nasantoan a
Trinidad iti agnanayon nga awan inggana. Amen.

KARARAG ITI PANNAKAIDATON

TI KAILUCOAN KEN APO CARIDAD

O nadungo nga Inami, Apo Caridad, gapu iti di-agsarday

nga ayat ken asim kadakami nga annakmo, nangnangruna unay
kadakami ditoy Ilocandia, idatonmi ti aminmi, agraman pay ti
kararua ken bagimi, ita Nainaan a pusom, tapno ibabaetnakami ken
Jesus nga Anakmo. Ala ngarud, O katalekmi, Apo Caridad,
pabilgem ti ayatmi iti Dios babaen ti panagayatmi iti padami a tao.
Umaykami kenka a si-inanama unay a sallukobam ita
nainaan a bidangmo dagiti pam-pamilyami, tapno matiganayon
dagiti agaassawa ti nairut a singgalot ti natarnaw nga ayanayatda.
Maipa-sagepsep koma dagiti nagannak, kasta met dagiti addaan
aywan, kadagiti panunot ken puso dagiti annakda, dagiti
nakristanoan a kababalin ken pannursuro ti Iglesia. Dawatenmi, O
Inami, nga ibabaetmo dagiti amin a nasion ditoy lubong,
nangnangruna ditoy pagilianmi a Filipinas. Itdem met koma ti
naan-aanay a panagayat ken pannarabaymo kadakami a natipon-
tipon ita ditoy sibaymo. Mataginayonmi koma ti napasnek a
panagtalekmi kenka ta ammomi nga awan ti baybay-am kadagiti
umas-asug nga annakmo.
Kamaudiananna, agyamankam’ unay kadagiti adu a
parabor nga inaw-awatmi kadagita nawayway nga imam.
Pangabaroanenmi a dawaten kenka, O Inami, Apo Caridad, a
taginayonem koma ti tulongmo kadakami, tapno kalpasan daytoy
ababa a panagbiagmi ditoy rabaw ti daga, kibinennakamto nga
agturong sadi langit nga umawat iti di-malaylay a balangat ket
makipagdaydayaw ken makipagrubabkamto met kenka iti
agnanayon iti Ama, ken iti Anak ken iti Espiritu Santo, a Dios iti
agnanayon nga awan inggana. Amen.

Lualoen ti Lima (5) nga Ave Maria …