1

NOBENA A PANAGDAYDAYAW KEN

NUESTRA SEÑORA DE CARIDAD (AGOO)
(August 1)
 2

KANTA A PANGLUKAT

INGGET DALUS NGA INA

Ingget dalus nga Ina,

Umaykam kenka,
Sangoanan altarmo,
Agpakumbaba!

Ave, Ave, Ave, Maria!

Ave, Ave, Ave, Maria!

Pait ken sulisog,

Rag-o ken rigat,
Umaykam, Inami,
Innakam ipangag!

Ave, Ave, Ave, Maria!

Ave, Ave, Ave, Maria!

TANDAAN TI KRUS
Iti nagan ti Ama ken ti Anak ken ti Dios Espiritu Santo. Amen.

PANAGBABAWI
O Apok a Jesucristo, natan-ok ken mannakabalin nga
Apo iti amin a parsua, pagaammok unay nga inbukbukmo ti
daram gapu iti ayatmo kaniak ket inbatim ditoy daga dagiti
napateg a pamuspusan a pangsapulko kadagiti nasantoan a
grasiam nga innak pinukaw, ket intedmo met a
mangibabaet kaniak ni nasantoan ken nadalus nga Inam,
tapno agnaedak iti nainaan a tulongna, ket babaen ti
pangibabaetna, nalaka ti yaasidegko kenka a dumawat
kadagiti nabuslon a grasiam.
 3

Agyamanak, O Apo, iti naidumduma a dungñgom, isu

a pamkedak nga umawag kenka. Apo, sirurugit daytoy
kararuak kadagiti adu a basbasolko. Babawyek amin ida.
Sangsangitak amin ida. Taliawennak kadi, Apo. Saan a ti
kinadakesko ti kitaem nu di ket ti pannakapakawan ken
pannakaisalakanko. Pabilgem toy bagik ken kararuak tapno
maragpatko met dagiti grasiam a tartarigagayak a maipaay
iti pannakaidaydayaw Mo ken pagimbagan toy kararuak iti
agnanayon. Amen.

KARARAG KEN APO NUESTRA SEÑORA DE CARIDAD

(Iti patinayon nga aldaw)

O nasam-it unay a Virjen Maria, nadungñgo unay a

katalekmi, Nuestra Señora de Caridad, kinayat mo, O
Señora, iti naisaad iti tronom iti dayta napateg a santuaryo
tapno makitam, mapali-iwmo dagiti adu a rigrigatmi ket
mapardasam ti umarayat kadakami, ken tapno dakam amin
nga annakmo iti amin nga il-ili itangadmi kenka dagiti umas-
asug a matmatami. Idalannakami a naka-ay-ay-ay nga
annakmo; iturongnakami nga sumrek iti santuaryom ken
umasideg nga dumawat iti tulong ken pannarawidwidmo.
Laglagipem, O Señora ti Ayat, a maigapu iti dungñgom ken
kaasim, inibturam dagiti naranggas ken nadawel a panawen
ket nagbatika a sililinteg, sikakappia ken sidadalus iti uneg ti
santuaryom isu ita ti pagayusan ti ayatmo ken agnanayon a
kaasim kadakami. O Ina, dinakam kad baybay-an;
isalakannakam iti sulisog, iti bisin, iti kiddit ti tudo, saksakit,
dakes a pammatulad, ken ballikug a panursuro! Timudem
dagiti sasainnekmi; kaassiannakam kadagiti pakarigatanmi
ditoy a biag. Ket, Apo, igun-odannakam kadagiti naruay a
grasiam tapno maragpatmi met koma ti biag nga
agnanayon. Gapu ken Cristo nga anakmo ken Apomi. Amen.
 4

KARARAG ITI UMUNA NGA ALDAW

O Virjen Santa Maria, Ina ni Jesucristo ken Inami met,

adtoykam iti natan-ok nga arpadmo, ket agkaykaysakam a
mangidaton ken Jesus a Nanubbot kadakami, kadagiti
karkararagmi, ar-aramidmi, ragragsakmi, ken rigrigatmi,
babaen ti naayat unay a panangibabaetmo kadakami.
Ibturanmi met ken anusanmi ti amin a rigat, amin a tuok,
pagel ken tarumpingay no la ket di matungpalmi met dagiti
karkarimi ken annungmi a mangitantan-ok,
mangidaydayaw, ken mangiwaragawag ti nasantoan a
naganmo. Agyaman kami, O Ina, ta agnanayondaka a
makitkita, makasarsarita, ken madendennaan ditoy
nangayed a santuaryom, ket matulongannakami ken ti met
ilimi kadagiti di malitup a masapsapulmi ditoy a biag.
Manipud ita nga aldaw aginggat’ dikam maturpos daytoy
nasantoan a nobena a pagdaydayawmi, pagun-unnoymi ken
panakisaritami kenka, O Ina, ket adu unay dagiti dawatenmi
nga agpaay koma iti bagi ken kararuami, iti familiami, ili-ilimi,
ken amin pay met a tattao ditoy lubong. Parayrayem, O
Nuestra Senora de Caridad, ti panagayatmi kenka; tulongam
dagiti gimgimong a nabangon iti naganmo; ibukbukmo
kadakam dagiti grasiam a mangdalus ken mangpabileg
dagiti puspuso ken kararuami tapno maragpatmi met koma
ti makipagbiag iti agnanayon ken Jesukristo nga Apomi.
Amen.
 5

GOSOS

1. Yantangay sika ti katalekmi

A kararagan ditoy nga ili.
O natan-ok a Señora itontonnakami
Iti Puerto a pakaisalakananmi.

2. Iti altarmo a napnoan dayag

A ditoy nga ili naisaad
Sayamosommot’ sumngaw ken agwarnak
Kas sabong, makaay-ayo ken naslag
Ket dagiti umay kenka agkamang
Ubbog ti ayatmo inda alak-am.
O natan-ok…

3. Sika’t bigbigenmi a palungo

A nangispal tis egged a nakaro
Itoy ili ken amin a tao
Ken pakatookanda a napalalo.
Agyaman unay ita dungñgo
Daytoy il inga insalakanmo
O natan-ok…

4. Sikat’ ulep a gubbuayan ti imbag

Ket iti ilimi sikat’ mamatak
Ken mamadama-eg kadagiti tay-ak
Babaen pammatudom a makabiag.
Ni mannalon nga agdawdawat
Itdem liwliwana ken ragsak.
O natan-ok…
 6

5. Gin-awaka kadagiti tu-okmi

Isu amin daka, natan-ok nga Inami.
No ita dapanmo agrukbabkami
Itedmot’ nailangitan a liwliwami.
Manipud langit yulugannakami
Makabiag a tulong kasapulanmi
O natan-ok…

6. Reyna ka a mangnibinibi
O naisaad ditoy nga ili
Tulongam amin nga umay agpakaasi
Ta ti puom naayat, naasi.
Pasingkedem Señora dawdawatmi,
Parayrayem iti Anakmo toy ayatmi.
O natan-ok…

7. Nasam-it unay nga Inami

Dalongdongmo sal-lukubannakami.
Nasipngat a dalan kibinennakami.
Pakirdem kad pammatimi
Ta sikat’ kamang, namnamami,
Biag, ayat, ken sanggirmi.
O natan-ok…

8. Dayta Kordero ti Dios a kapapatgan

Nga adda ita barukongmo a kasin-awan
Iti naumbi unay a panagub-ubbam,
Ita pusom sireregget papudotan.
Tignayenna ta asim, inka iparang
Iti agsangsangit a kenka agkamang
O natan-ok…
 7

9. Aginakbay makaawis a sayamusummo

Manipud ditoy napateg nga altarmo.
Silulukat nasudi a parabormo
Kadagiti amin kenka pa-aklolo.
Awan pay pinaay ta ayatmo
Ta napnoan kat’ asi ken dungñgo.
O natan-ok…

10. Sikat’ nabileg a sanggirmi

Katalek, pia ken pigsami
Dakam amin, sikat’ ragsakmi
Rag-o, biag ken liwliwami
Timudem kad dagiti kantami
Pagdaydayaw ayesngaw toy ayatmi
O natan-ok…

11. Dagiti dapanmo pagrukbabanmi ida

O Reyna ti langit ken daga
Agdawatka kenka a si-inanama
Dagiti basolmi pannakapakawanda.
Marigrigat tulongam kad ida.
Aklonennakam nga agkamang kenka.
O natan-ok…

P: Ikakaasinakami Reyna ken Inami

G: Tapno maikarikam kadagiti inkari ni Kristo.

Kumararagtayo:
Dawatenmi unay, O Apo ken Diosmi, nga ipaaymo kadakam
nga adipenmo a malak-ammi ti salun-at ti bagi ken
kararuami, ket babaen ti panangibabaet ni nagasat a Maria
a Reyna ti Ayat ken Inami, maispalkam koma kadagiti
pagladingitanmi ket magun-odmi ti ragsak nga agnanayon.
Gapu ken Krito nga Anakmo ken Apomi. Amen.
 8

MAUDI A KARARAG

O Nasam-it a Maria, nalpasen ti sumagmamano a kanito

nga inkam pannakisarsarita kenka, panagkarkararag ken
panagun-unnoy kenka, ket ita mariknami a nalag-an ti
panpanunotmi, naugasan ti kinarugitmi, ken napakired ti
lap-itmi. Agyamankami kenka, O Ina, iti amin a pusomi iti
dakkel nga panagayatmo kadakami. Ngem, O Nuestra
Senora de Caridad, agpakadakam manen kenka.
Pumanawkam iti sidong dagiti nainaan a matam a
mangkitkita kadakami ken ti ilimi ket palubusannakam kadi,
O Nasingpet a Virgen, a mangawit kadagiti nasantoan nga
ayatmo, ayat a pagpatulad, ayat a panginanamaan , ayat a
mangted iti kappia, ragsak ken urnos kadigiti familiami ken
ti ilimi. O Senora a napnoan anus, dinakam koma liplipatan!
Tarabayennakam koma nga agnanayon tapno nadalus laeng
ti panagbiagmi, nanakman ti galadmi, ken nasingpet ti
panagsasaritami. Anansata, O Ina, malap-it ti bagi ken
kararuami, ket no dadduma matnagkam iti sebbang ti
pagbasolan. Iti kasta, O Virgen a nasudi, palubusannakam
manen a kumamang kenka ken umasideg kenka a dagus a
sisasangit, sipaparintumeng ken sibababawi, ket dika kad
ipaidam dayta nainaan nga ayatmo kadakami.
Kibinennakam koma a dagus tapno magun-odmi met laeng
ti pakawan dagiti basbasolmi ken maitiponkam met manen
ken Jesus nga Anakmo. Amen

(Mamitlo a lualloen ti Amami, Ave Maria, ken Gloria a

pagdaydayaw iti Santisima Trinidad)
 9

KANTA A PANGGIBUS

Dagiti Saguday ti Reyna ti Ayat

1. O Maria, nalibnoska,
Nalasbang, napintaska.
Imnasmo’t awan pumada,
Reyna’t langit ken daga.

Koro:
Toy anakmo paaklolo
Ta saranay ti itedmo
Dika kad ipaidam
Tulongmo a nainaan.

2. O Bituen, raniag ti dalan,

Ken bagnos ingget rayray.
O Inami, inka silnagan
Nasipnget a pagnaan. Koro.

3. Nadaluska, Virgen Santa,

Nasam-it, nadungñgoka,
Ipakitam, O Señora
Ti ayatmo nga Ina. Koro.

4. Ti peggad toy biag naruayda

Mangallilaw kararua.
Dayta tulongmo, Señora,
Dawatko patgam ida. Koro.
 10

KARARAG ITI MAIKADUA NGA ALDAW

O mannakabalin unay a Señora ken agnanayon a katalekmi,

kinuna ni Hesus met laeng kenka: Dumawatka, Ina, ket diak
mabalin a paiden ti dawatmo." Kasta met ti kinuna kenka ni
San Bernardino de Sena, nga amin nga adda sadi langit ken
ditoy daga tungpalenna ti nakemmo. Ita ngarud, O Ina,
agdawatkam kenka kadagiti parabur ken grasia a
kasapulanmi unay. Ibabaetmo koma, O nasam-it a Virgen
Maria, ken nasantaoan nga Anakmo, ti Iglesiami, dagiti
Familiami, ti ilimi, ti agtuturay kadakami ken ti amin a
nasiones ditoy daga. Palag-anem koma dagiti nabantut a
parikut dagiti mangisursuro ken mangiwarwaragawag iti
napudno ken maymaysa a pammati tapno maisaknap ti Sao
ti Dios iti amin a disso ditoy daga, isu a taraon ken biag ti
amin a parsua. Saranayem met, O natan-ok a Señora, dagiti
amin a familia tapno marisut met koma, O Reina ti Ayat, ti
isip, pakinakem ken aramid dagiti pangulo ti ilimi ken amin a
nasiones ditoy lubong, tapno agari koma iti amin a tattao ti
agnanayon a kappia, urnos, talintalek, ken
panagkikinnaawatan, ket mabuangay ti maymaysa a Bagi,
maymaysa a Pammati, a kas intuyang ti Anakmo a
Mannakabalin unay ditoy daga. O, Ina, sika ti katalek ti amin
a Kristiano. Ipasagepsepmo koma kadagiti amin a tattao
dagiti nasantoan a birtudesmo ket iturongmo ida kadagiti
sakramento nga insungsung ni Jesus nga Anakmo tapno
maragpatda met ti agnanayon a biag sadi langit. Amen
 11

KARARAG ITI MAIKATLO NGA ALDAW

O manangaasi nga Ina ken katalekmi, adtoykam ita, iti

arpadmo ken iti natan-ok a tronom, nga agun-unnoy kenka
a sumasainnek ta nupay idawdawatanmi dagiti bukbukodmi
a panggep, biag, ken kararuami, annungmi met, O Señora,
kas naikappen iti pudno a Pammati ken maymaysa nga
Arban, nga idawdawatanmi met dagiti amin a kakabsatmi a
simiasi iti nasatoan a Pammati. Anansata, O Maria, ta adu
met dagiti nasingpet nga adda iti ruar ti Pammati nga agur-
uray laeng iti pannakaipaltiing ti Sao ti Dios kadakuada, ken
adu met kadakuada ti agay-ayat iti padada met laeng a tao,
ken agsapsapol iti kinapudno. Dagitoy, O Señora de Caridad,
ti inkam ita idawdawatan ket sapay koma ta babaen dayta
mangliwengliweng a kaasim, mawaknitan dagiti
matmatada a siaabbung kadagiti mangibalballaibu a sursuro
ken sirib ; maruk-atan koma met dagiti panpanunotda a
sibabalud iti nakillo a pammati. Iti daytoy a panggepmi, O
Señora, dawatenmi kenka ti panangtarabaymo kadakam
nga agnanayon tapno dikam maisiasi iti nadiosan a
Pammati, ket dagiti koma naiwawa agsublida met laeng iti
maymaysa nga Arban babaen ti panangibabaetmo iti
Anakmo, ket agpulangda met laeng iti maymaysa a Pastor,
isu ni Jesukristo nga anakmo ken Apomi. Amen
 12

KARARAG ITI MAIKAPAT NGA ALDAW

O Ina ti Kaasi, biag ken namnamami, sirurukbabkam ita nga

aldaw nga agdawat iti ayat mo ta tulongam ken saranayem
amin a mangmangged ditoy ili mi ken iti amin a disso ti
lubong. Bigat, aldaw ken malem, O Nuestra Señora de
Caridad, makitkitanakam nga umay agparparintumeng,
agkarkarag, ken agun-unnoy ita saklangmo; makitkitam
dagiti awit mi a babantut ti biag mi ditoy daga, maigapu, O
Inami, iti panagsapulmi, panagtegged mi ken
pananggunodmi kadagiti kasapulanmi a taraon ti biagmi, ti
familiami, ken ti pay met pada mi a tao. O Virgen Santa
Maria, sika ti awaganmi a mangiburay ken mangipaay
kadakam kadagiti isu amin a grasia nga agubbog iti naduñgo
ken nasudi, nasantoan a puso ni Jesus nga Anak mo, tapno
mapudnoanmi a tungpalen ken aramiden dagiti annungmi
kadagiti trabahomi, ket mailisikam iti kinasadut,
kinagaramugam, kinapalalo, kinatiri, ken napalanguad a
sursuro ken galad. Wen, nadungo nga Inami, dinakam kadi
baybay-an a mangmangged; paraburannakam kad iti
agnanayon a kired ken salun-at, kappia ken namnama. Kasta
met, O Nasantoan a Virgen, a tulongam dagiti awanan
trabaho ken panggedan tapno nalaka met ti panagbirukda
kadagiti kasapulan ti bagi ken kararuada, ket iti kasta, O Ina,
mairagpatda koma ken Jesucristo nga Apomi, isu a Taraon,
Dalan, ken Biag nga agnanayon, Amen.
 13

KARARAG ITI MAIKALIMA NGA ALDAW

O Ina a manangaasi ken managan iti Pia dagiti Masaksakit,

indengannakam, Señora a mangikakaasi kadagiti amin a
masaksakit nga adipen ti Mannakabalin a Dios nga Apo;
dawatenmi nga iburaymo koma kadakuada dagiti gracia a
makapasalun-at, makapakired, ken makadalus. Ipalubos mo
kadi, O Virjen Santa Maria, a babaen ti balsamo dayta danum
nga agpuspusuak iti sibay ti santoaryom, kas iti ubbog a
pinasukay mo iti gukayab idiay Lourdes a nagparangam,
maagasan koma dagiti naruay ken nadumaduma a sakit ken
sagubanit ti bagbagimi. O Ina, katalekmi, iti imatang dagiti
naduñgo a matam, makitam dagiti naidalit iti sakit kadagiti
balbalay wenno kadagiti ospital ditoy ilimi ken amin a disso
ditoy lubong; isaadmo kadi, O Nuestra Señora de Caridad,
dagita nainaan a dakulap mo iti mugingda, puspusoda,
barukongda, bareng koma met mapunas ken maagasan
dagiti saksakitda. Wen, O manangaasi nga Ina, no dakam
met ti agsagaba iti sakit, subuken iti sulisog, ken gargarien ti
dakes, palubusannakam kadi a kumamang kenka iti
madaras ken agdawat ita nainaan a tulongmo, isu a
makapunas kadagiti rigrigat, pagel ken ladingit a malak-
ammi. Parayrayem koma nga agnanayon, O Virjen Santa
Maria, ti panagtalek ken pananginanamami kenka, ken
kasta met ti yaasidegmi koma nga agnanayon iti denna ni
Jesucristo nga Apomi, Amen.
 14

KARARAG ITI MAIKANEM NGA ALDAW

O nadalus ket naayat a Virjen Maria, adtoy kam ditoy

nainaan nga arpadmo nga agdawdawat iti
panangibabaetmo kadagiti amin nga ubbing ken agtutubo
ditoy ilimi ken ti amin a disso ditoy lubong. Anansata, O
Nuestra Señora de Caridad, a kas kinuna met laeng ni Jesus
nga Anakmo, “Bay-anyo dagiti ubbing ta umayda Kaniak,”
idatonmi ngarud kenka dagiti annakmi ken dagiti amin nga
ubbing ken agtutubo ditoy ili, ta tubayem koma dagiti
naganus a nakem, biag, ken puspusoda tapno mananamda
ti siribmo, ti taknengmo, kinasantam, ken kinadalusmo; ket
sappuyotem koma ida nga iturong iti nalinteg a dalan ni
Jesus nga Apomi. Ipagapum kadi, O nasam-it nga Ina, ta
kadagitoy nga aldaw, panawen, ken siglo, adu dagiti
ragragsak ken sursuro a makagargari, makaallilaw, ken
makasulisog, ket dagiti ubbing ken agtutubo nalap-itda ken
naganusda ket nalakada unay a matnag iti basol. Iti kasta, O
nasingpet a Virgen, pardasam kadi ti mangbalakad ken
mangipalagip kadakuada iti annongda nga agayat, agadal,
ken agserbi iti Dios a Namarsua. Kasta met, O Inami, a dika
koma baybayan dagiti pagadalan a makaisuro iti
pannagayat iti Dios ken iti maymaysa ken pudno nga
Pammati, ket ibukbukmo koma met, O Virgen ti Ayat, dagiti
nasantoan a grasia kadakami a nagannak ken amin pay met
a nagannak ditoy lubong tapno maisungsong ken
maiturong met dagiti ubbing ken agtutubo iti nanakman
ken nadalus a panagbiag, isu a makaliwliwa iti Dios Ama nga
agnanayon. Amen.
 15

KARARAG ITI MAIKAPITO NGA ALDAW

Natan-ok ken managayat a Virjen, Ina a napnoan anus ken

sirib, adtoykam iti arpadmo iti daytoy nagasat a kanito nga
inkam manen panagun-unnoy ita nainaan a pangibabaetmo
kadkam iti Nadiosan nga Anakmo, ket dikam masaba ti
gagarmi a dumawat ti tulongmo tapno mapasanto,
mataginayon, ken maisaknap koma ti vocasion iti kinapadi
ken napudno a ministro ti maymaysa a Dios ken Pammati.
Adu, O Señorami, dagiti kakabsatmi a mawawan ken umao-
aoag iti pannakaisuro ti nadiosan a Pammati kadakuada ken
kadagiti annakda, ngem iti kinakurang dagiti napudno a
ministro, mabaybay-anda a maisurot iti killo a pammati;
agsagaba da iti bantut dagiti basbasolda ket matayda piman
a di makaamo ken makabalikas iti nagan ti Dios a Namarsua.
Isu nga ayaten, pagserbian, ken ipangpangruna iti amin.
O, nasingpet nga Ina, tulongam ti Santo Papami, dagiti
obispos, papadi, ken amin a tumultulong iti Simbaan ken iti
Pammati. Tulongam met dagiti agtutubo a naanep nga
agadal a naimbag a Pastor ken napnoan gagar nga agserbi
iti Dios, ta isuda, O Nuestra Señora de Caridad, ti agaywanto
kadakami ken dagiti pay met amin a tattao iti sidong ti Santa
nga Iglesia. Saranayem ngarud, O Virgen a taklin ken
namnamami, dagiti amin a seminaryo ken seminarista ditoy
ilimi ken ditoy lubong; bendisionam ida ket pakirdem ida
maigapu met laeng ken Jesukristo nga Anakmo, Isu a Dios
met laeng nga agnanayon. Amen.
 16

KARARAG ITI MAIKAWALO NGA ALDAW

O natan-ok a Virjen Maria, katalek ken Inami, adtoykam iti

nadiosan nga arpadmo a mangidaton kenka iti biag,
kararua, ken karkararagmi, agsipud ta dakami, O nadalus a
Virjen, agdaldaliasatkam laeng ditoy rabaw ti daga, ket
dumtengto ti kanito nga idadanonmi met iti
pagtungpalanmi nga agnanayon. O Nuestra Señora de
Caridad, adu dagiti kimmamang kenka a nagasug iti
pannaranaymo ta kinunam iti maysa a nasingpet a Santa nga
sabatemto dagiti debotosmo no dumteng ti oras iti
ipapatayda tapno adda bang-ar ken kamangda. Isu ngarud,
O Ina, nga agasugkam ita a kanito, a dinakam koma baybay-
an; ipaaymo koma nga agnanayon kadakami dayta
tulongmo; silawam koma iti di mamengga ti dalanmi ditoy
daga nga inkam pagpagnaan; pabilgennakam kadi a
makidangadang iti sairo tapno dikam masulisog ken maiyao-
aoan; tarabayennakam iti sadinno man nga ayanmi tapno
dikam maidalit iti basol. Ket no bilang nga maitibkol kami iti
basol, O Ina, alawennakam kadi a dagus ta sika, O Virjen, Ina
a nasingpet unay, ti pataw ken kalasagmi ditoy a biag,
ingganat’ dikam mairagpat iti pagarian ti Dios nga
agnanayon. Amen.
 17

KARARAG ITI MAIKASIAM NGA ALDAW

O Virjen a mannakabalin unay, pagsarmingan ti linteg ken

Inami a di ket natulawan iti basol a tawid, addakam iti
nasantoan nga arpadmo iti daytoy nga aldaw a paggibusmi
iti nabalitokan a nobena a pagdaydayaw ken pangisaknapmi
iti dayagmo, ken kasta met a pagadalanmi kadagiti
agkakapateg ken agkakapintas a saguday, galad, ken
birtudesmo. Agyaman kami, O nasingpet a Santa Maria,
kadagiti grasia nga inparaburmo kadakami kabayatan ti
panagdebosionmi kenka ken iti nadiosan nga Anakmo,
ket dikam masabaan ti ragsak ti pusomi ken kararuami ta
inpalubosmo a dumennakam iti natan-ok a sibaymo, ken
mangnamnamakam ita dungngom ket ayatmo, ta piman,
agnanayonkami, O Ina, a mawawan iti duñgom ken
pangibabaetmo isu a taraon ti kararuami ken kired ti bagimi
nga agibtur iti rigat ti biag ditoy daga, ken kalasagmi nga
makidangadang iti basol ken pannakasulisog. Ita nga aldaw,
O nasam-it nga Inami, aggibusen daytoy a nobena nga
idatonmi kenka, ngem ikarimi, O Virjen nga ingget dalus, ti
masansan a panagsublimi kenka. Pabaroenmi nga
agnanayon ti ayat, talinaed, ken panagdaydayawmi kenka.
Kumamangkam kenka iti amin a kanito ti panagbiagmi.
O Ina, italiawmo kad ngarud dagita matam kadakami tapno
addakam koma nga agnanayon iti sidong ni Jesus nga
Anakmo ken Apomi. Amen.