Cerita Rakyat Banjar - Ni Yaksa (Intingan wan

Dayungan)

Dangariakan .....,kisah baandi-andi

Intingan wan Dayuhan, nang disuruh umanya, manjaga pahumaan
banih sudah manguning, pipit banyak mamakan,
sambil mamburu pipit, badua bapantunan

Hari bamula sanja, kadap samun di huma,

badua takutanan

Kada saapa, lalu datang Ni Yaksa, pamakan manusia

awaknya panjang basar, sapuhun kariwaya
muntungnya cawah banar, kaya kawah balanga
rambut banyak bakutu, halilipan wan kala
mula handak mamakan, apa akal Intingan
badua bapantunan

U kaka u kiki, banih kita dimakan pipit, u kaka

anai-anai bahindik-hindik, u ading
ulat bulu nang mamutiki

Ni Yaksa, Ni Yaksa....., nang bungas langkar lagi pambarian

Kami pang rela dimakan hampian, 'mun dibari habu halaban
Dayuhan mamusuti, dibawa barabahan, sambil bakakutuan,
Ni Yaksa kanyamanan, lalu pang taguringan,
disimbur di matanya, awan habu halaban
raksasa kalimpanan, bakuriak kapadihan
Intingan wan Dayuhan, hancap basambunyian,
di pinggir baruh dalam....

Ni Yaksa jarunjungan,
matanya kabur, bukah manyasahi
tacabur di baruh, balalu mati
badua barami-rami

U kaka, u kiki...
banih kita dimakan pipit, u kaka
anai-anai bahindik hindik, u ading
ulat bulu nang mamutiki

==========================================

nang di atas lirik lagu lahannya Nanang Ardiansyah nang judulnya 'Intingan wan Dayungan' nang
mangisahakan tantang badua baading nang barhasil mamati'i raksasa pamakan manusia bangaran
Ni Yaksa... lagu ini cukup mangisahakan kasaluruhan kisahnya.... ulun kaingatan bahari jaman SD
ada pak muatan lokal masih banyak kisah-kisah nang kaya ini, kada tahu am lagi nang wahini....
 SULING BAMBAN
            Hari itu kaya biasa bubuhan Palui takumpulan pulang di warung Acil Irus.
            “ Kamana haja Lui Babarapa hari ini ikam pina kada talihat,” ujar Garbus Batakun.
            “ Hanyar-hanyar tadi kami saparanakan mudik ka Hulu Sungai, “ ujar Palui.
            “ Ada kaluarga nang garing bangat atawa maninggal duniakah ?” ujar Garbus.
            “ Kada. Kami mahadiri acara bakakawinan anak mamarinaku nang badiam di
Angkinang,” ujar Palui.
            “ Barapa kali Lui ikam sudah bailing ka anu mamarina ikam nintu,” ujar Acil Irus
sambil manyurung banyu the anu Palui nang duduk basandar di tihang warung.
            “ Hanyar sakali nintu ,” ujar Palui.
            “ Kaya apa salawas di Angkinang,” ujar Tulamak.
            “ Aku marasa himung. Karna disana pambangunan talihat maju kada katinggalan
lawan dairah lain. Jua disana banyak rapun nang ganal-ganal nyaman gasan wadah
bahanup. Kada kaya di kuta nang panas karna kadada wadah gasan baistirahat.
Kalabihan lainnya pulang nilai-nilai kagutungruyungan masih dijunjung tinggi.
Disana warga rakat bagutung ruyung. Kaya manajak sarubung, mangawah,
babasuh piring wan sabagainya,” ujar Palui.
            “ Amun kaya itu baarti masih ada haja nilai-nilai budaya bamasyarakat nang
lastari. Kada kaya di kuta nang handak napa-napa pasti baduit,” ujar Tulamak.
            “ Pangalaman lain adalah Lui,” ujar Garbus.
            “ Ada pangalaman lucu wan anih waktu aku ada disana,” ujar Palui.
            “ Napa mati anih ? Apakah ikam disana batamu lawan hantu ? Karna biasa aku
mambaca di surat kabar bahwa disana ada rapun kupang nang takanal bahantu
karna ada urang halusnya. Bujurankah Lui ?’ ujar Tulamak.
            “ Wayahini kada tadangar lagi pang. Tahuam lagi bahari. Karna wayahini rapun
kupangnya sudah matian,” ujar Palui.
            “ Pangalaman anih napa tadi Lui ?” ujar Garbus handak tahu.
            “ Mamarinaku maadaakan karasmin.....” ujar Palui.
            “ Napa karasminnya Lui ?” ujar Garbus mamagat pander Palui.
            “ Karasminnya adalah suling bamban,” ujar Palui.
            “ Hau, bujuran anihlah. Saumuran hanyar nia mandangar. Mau juakah sulingnya
babunyi ?” ujar Garbus.
            “ Karna itulah aku baduhara maitihi karasmin nintu. Aku jua sawat mangira suling
nang diulah dari bamban, tanaman nang batangnya mining. Kawa diulah jadi bakul
pamasakan,” ujar Palui.
            “ Imbah pang kaya apa karasmin nintu,” ujar Tulamak.
            “ Sakalinya kaya urkis dangdut biasa. Tapi parbidaannya urkis nintu diiringi lawan
babarapa buah suling, “ ujar Palui.
            “ Sulingnya suling bamban lah Lui ?” Garbus batakun.
            “ Sulingnya suling biasa jua. Ada suling nang diulah dari bamboo alias paring. Ada
jua suling wasi,” ujar Palui.
            “ Napa marganya mati disambat suling Bamban Lui. Padahal kada diulah dari
bamban,” ujar Garbus.
            “ Asa kada mungkin. Ikam nih bakaramput haja kalu Lui,” ujar Tulamak.
            “ Aku kada bakaramput. Handak tahulah sakalinya bubuhan paurkisan tadi asalnya
matan kampung nang ada di Angkinang yaitu kampung Bamban. Jadi dingarani
Suling Bamban,” ujar Palui takurihing.
            “ Bah kami kira bujuran diulah matan batang bamban nang mining nintu, sakalinya
ngaran grup urkis nang baasal matan kampung Bamban,” ujar bubuhan Garbus
wan Tulamak.
            “ Makanyaam rajin-rajinlah buhan ikam mailangi kulawarga nang jauh. Nyaman
pangalaman batambah wan kada katinggalan habar,” ujar Acil Irus. (akhmad
husaini)

AMPIH JADI GURU

            Kaya biasanya buhannya bakumpulan di warung Acil Irus. Ada haja nang
dipanderakan.
            “ Wayahini manusia kada tahu supan lagi. Apalagi bibinian nang mambuka aurat
dihadapan urang banyak mambuat lalakian jadi kacar malihatnya,” ujar Garbus
manyurung pander.
            “ Bahari kada harapan kaya itu, inya gin supan disambat kada baadat,” ujar
Tulamak.
            “ Ini kalu sudah jamannya Mak ai. Hidup kada baaturan lagi. Manggawi
sakahandak hati saurang haja,” ujar Garbus.
            “ Napa nang buhan ikam panderakan. Kudangar sual supan-supan. Dimana
manukarnya ?” ujar Palui nang hanyar datang.
            “ Kada inya sual supan-supan nang kawa diulah sayuran itu pang. Tapi ini sual
supan santun Lui ai,” ujar Tulamak.
            “ Oooh itukah. Kukira ada urang nang bajual supan-supan nyaman aku manukar,”
ujar Palui.
            “ Napa Lui bini ikam mangidamkah handak manggangan supan-supan,” ujar
Garbus.
            “ Kada pang. Tapi lawas banarham kami kada marasani,” ujar Palui.
            “ Lihati Bus. Palui nih kada tahu supan jua. Baju kada sing kimaan,” ujar Tulamak
nang hanyar taitihi baju Palui.
            “ Aku kada ingat buhannya ai. Tapi aku ada pangalaman bahari waktu masih
duduk di SR alias Sakulah Rakyat,” ujar Palui.
            “ Kaya apa pangalamannya Lui,” ujar Garbus handak tahu.
            “ Karna tadi buhan ikam bapander sual supan santun. Ini ada hubungannya yaitu
saikung guru nang ampih maajar marga kasupanan,” ujar Palui.
            “ Napa marga supan haja maka jadi ampih. Sayang banar padahal amun wayahini
jadi guru kangalihan,” ujar Tulamak.
            “ Gurunya nang maajar kami itu lalakian. Sidin sudah tuha. Kami buhan anak
muridnya bahanu tatawaan bila pas sidin maajar,” ujar Palui.
            “ Napa mati buhan ikam tatawaan Lui ?” ujar Garbus.
            “ Nang kami tawaakan karna waktu sidin maajar bahadap kaanu kami. Risliting
salawar sidin babukaan. Kira-kira sidin wayah nintu kada ingat mangaririk. Atawa
jua risliting salawar sidin nintu sudah rusak. Lawan jua pas sidin kada basalawar
dalam. Burung sidin kalihatan handak tarabang. Karna kada marasa tantu sidin
kalihatan handak tarabang. Karna kada marasa tantu sidin ranai haja. Samantara
kakawananku tamasuk aku, apalagi nang bibinian kihik-kihik tatawa sambil pina
asa supan mancangangi,” ujar Palui.
            “ Kaya apa imbah nintu. Sariklah sidin Lui,” ujar Tulamak.
            “ Sidin kada sarik pang. Imbah kaluar kalas kami itihi hanyar sidin marasa. Kulihat
sidin pina lihum saurangan. Tapi imbah kajadian nintu sidin kada maajar lagi di
kalas kami,” ujar Palui.
            “ Hau ampihkah sidin ? Apakah ada hubungannya marga supan tadi,” ujar Garbus.
            “ Sapalih ada jua pang kalu. Tapi nang pasti imbah kajadian lucu sakaligus
manyupanakan nintu kada lawas sidin gagaringan karna umur sidin sudah tuha.
Kada lawas maninggal,” ujar Palui.
            “ Bah dikira bujuran ampih jadi guru marga kasupanan. Pantas haja amun
maninggal dunia. Palui....Palui.....Palui....” ujar buhannya gagarunum kakalahan.