ግብረ ሕማማት

በስመ አብ ወወልድ ወመንፈስ ቅዱስ አሐዱ አምላክ ንቀድም በረድኤተ

እግዚአብሔር ወበሥምረቱ ወንጽሕፍ ዘንተ መጽሐፈ ቅዱስ ዘይደሉ አንብቦቱ በበ
ጾታሁ በመዋዕለ ሰሙን ክብርት እንተ ይእቲ ሰሙን ፍሥሐ እምኦሪት
ወእምነቢያት ወመዝሙረ ዳዊት ወወንጌላት ቅዱሳት ለዘበአማን በግዕ ቅዱስ
ወጥዩቅ፡፡ ሠራዕነ በአቅልሎ ወአሕጸጽነ በፍካሬ ከመይኢይኩን ሀኬት ለዘይሰምዕ
ዘክሮታ ወይትሔደስ ውስተ ኅሊና ጸዋትዊሃ ወነገራ፡፡ ወኢይፀራዕ ስባሔ ወውዳሴ
ወዘምሮ ለመፍቀሬ ሰብእ ዘኀረየ አግብርቲሁ እምኵሉ ፍጥረት በብዙኅ ሀብቱ
ወሠናይ መክፈልቱ፡፡ ወኢይክል ልሳን ፈክሮታ ወኢቀለም ወአጻብዕ ከቲቦታ
ወኢተርጕሞታ ወኢይክል ዘሥጋ በበ ንስቲት ሐግጎታ፡፡ ወአኮ እለ በኀጢእ
ወአኀጽሮ ወናርምም እምኔሁ ከመ ከመ ቁመት ኅሱር ወንኡስ ወዛተ ሰሙነ
አብጽሐክሙ እግዚአብሔር በሥምረቱ ወረድአክሙ በገቢረ ፍቃዱ ወጼሐ ለክሙ
ፍኖተ ረድኤቱ፡፡ወባልሐክሙ እምጸላኢ ወሐሳዊ ወእምሰራዊቱ ወእምኵሉ
ተቃርኖቱ ፡፡ እስመ ሐገጉ ባቲ አርድእት ንጹሓን ወአበው ቅዱሳን ወጻድቃን
ቡሩካን ሕገ ወአስተዳለዉ ወአዘዙ ባቲ በሥርዐት ወሠርዕዋ ወአጽንዕዋ፡፡ ወጽሕቁ
ለገቢረ ይእቲ ወኀሠሡ ከመ ኢይትሀከይ መኑሂ እምኔሃ ወአይድዑከመ ኢይኩን
ዝንጋዔ በምንትኒ ባቲ፡፡ ወጸሐፉ ንስቲተ እምኔሃ በውስተ ዛቲ መጽሐፍ ከመ
ይርአይ ወይፈጽም ገድለ እምኵሉ ሕገጊሃ ፡፡ወአኅለቁ ነገራ ወዘጽሐፉ ውስቴታ
ወዘዘከሩ በዲድስቅልያ ቅድስት፡፡