Територијата на РМ според природните одлики на просторот се дели на посебни
природни целини како што се котлините, полињата, планинските масиви, речните сливни подрачја и сл. Заради подобра организација како и поради поголем стопански развој територијата на РМ е поделена на административни единици како што се географските региони ( источен, западен, северен, јужен ) и општините. Во РМ има над 1750 населени места кои се групирани во 80 општини, а тие се поделени на градски и селски општини. Општините во РМ во својот состав имаат повеќе населени места па затоа нивниот број на жители е секогаш поголем од градот или селото во кој е седиштето на општината. Според бројот на население општините во РМ може да се поделат на мали и големи општини. Општина со само едно населено место е општината Вевчани и припаѓа на групата мали општини. Големи општини се оние општини кои имаат над 50.000 жители како на пример: Куманово, Тетово, Битола, Прилеп и др. Градот Скопје поради големиот број на нaселение е поделен на неколку општини поради полесно функционирање на институциите во исполнување на потребите на граѓаните. Општини во склоп на градот Скопје се: Центар, Аеродром, Кисела Вода, Чаир, Ѓорче Петров, Сарај, Гази Баба, Карпош, Бутел и Шуто Оризари . Согласно вакавата територијална поделба на просторот на РМ се организира градењето на линиската и институционалната инфраструктура како на пример изградбата на патишта, водоводни системи, електродистрибутивни системи, канализациони системи потоа образовни установи, здравствени институции, трговски маркети, административни институции и сл. Сите овие инфраструктурни објекти ја сочинуваат линиската и институционалната инфраструктура без која не може да се организира нормалниот живот на граѓаните во нашата земја.
Прашања за домашна работа:
1. Колку општини има во РМ?
2. Која општина во РМ има само едно населено место? 3. На кои општини е поделен градот Скопје?