Irog

Oh, aking iniirog

Iaalay ko sa iyo ang aking puso nang taimtim
Kailangan pa ba ng dahilan para ika’y mahalin?
Ako’y hindi pa nakakalunok ng paru-paro
Ngunit ang aking sikmura’y tila puno
Tila ba’y nakakaramdam ng kiliti
Tuwing ako’y tinatawag mo

Noo’y nagsawa sa mga awiting pag-ibig

Ngayo’y ang mga awiting pag-ibig na ang nagsasawa sa’kin
Noo’y hindi ko mawari
Ngayo’y ramdam ko na ang hiwagang pinapahiwatig

Ako’y nakulong sa munting sansinukob

Na nakakubli sa iyong mga mata
Tila ba’y nababalot ng hiwaga ang bawat salita
Na iyong binibitawan

Sana’y huwag kang mawala

Sapagkat lahat nang makikita’t mahahawaka’y
Mawawalan ng kulay

Sa totoo’y ayaw kong mabuhay sa mundong

Walang kakulay kulay at musika
Kahit ang mga anghel ay masisintunado sa pag-awit
Kung ika’y lumisan

Ang damdamin ko’y totoo at iyong iyo

Tulad ka man ng bituin na mahirap abutin
Ako’y matiyagang gagawa ng hagdan patungo sa iyo

Hinding hindi ako pipiglas sa yakap ng iyong hiwaga

Ayaw kong kumawala
Kung pwede ay habang buhay mananatili
Sa yakap ng iyong hiwaga

Oras ay hindi namamalayan tuwing ika’y aking kausap

Minsa’y hiniling na bumagal ang ikot ng mundo
Makausap at makapiling ka lamang nang matagal
Alam kong ang aking pagkauhaw ay walang humpay
Ngunit ang pag-ibig sa’yo’y ganoon din

Lahat ng paraan ay aking hahanapin at gagawin

Makasama, makapiling, makausap ka lamang
Tila ba’y para akong siraulo na nagkukuwento sa mga bituin
Kung gaano ako nahulog sa iyo
Nauunawaan kaya ng sansinukob ang bawat salitang sambit?
Nauunawaan kaya nito ang ating pag-iibigan?
Hiling ko’y di tayo paghiwalayin nito
 Tanging ikaw lang ang magiging laman ng tula
Tanging ikaw lang ang himig ng mga kanta
Ikaw at ikaw lamang ang laman ng puso’t isipan

Sana’y huwag mong maliitin ang nag uumapaw kong damdamin

Handa akong sungkitin ang buwan para sa iyo
Handa akong hilingin ang pagsabog ng bawat bituin
Kung ang kapalit nito’y makapiling ka habang buhay

Siguro nga ay maaga pa, at siguro’y di pa panahon

Para sa isang bagay na panghabang buhay
Ngunit ako’y maghihintay
At patuloy na iibigin ka