መልከዐ አቡነ ሊቃኖስ

እም ፳ወ፰ ለኅዳር በዓለ ዕረፍቱ ለአቡነ ሊቃኖስ

ጐሥዓ ልብየ ቃለ ሠናየ ። ከመ እዜኑ ግብረከ ሊቃኖስ አቡየ ፪ማ፡ እስመ ፍቅርከ ሐፀነኒ እምከርሠ እምየ ማ፡
ሢም እግዚኦ ዓቃቤ ለአፉየ ። ወማዕፆ ዘዓቅም ለከናፍርየ።
ሰላም ለዝክረ ስምከ ዘተሴረከ ፊደሉ ። በጽላተ ሰማይ ዘላዕሉ ፪ማ፡ ሊቃኖስ ቅዱስ መትልወ ቅዱሳን ኵሉ ማ፡
መፍትው ዘልፈ ደቂቅከ በእንቲአከ ይበሉ ። ዝክረ ጻድቅ ለዓለም ይሄሉ ።
ሰላም ለስእርተ ርእስከ ቅብዐ መንፈስ ቅዱስ ዘአርሐሶ ። ዘይምዕዝ ጥቀ እምጼና ዕፍረት ወሐንክሶ ፪ማ፡
ሊቃኖስ ቅዱስ ለልዑል ዘትቄድሶ ማ፡ ሞገደ ዓለም አመ ፈቀደ ያሥጥመኒ በተከውሶ ። ትንባሌከ አባ ይኩነኒ መርሶ ።
ሰላም ለርእስከ ዘጌራ ቅድሳት ጌራሁ ። ወሰበነ ንጽሕ ቀጸላሁ ፪ማ፡ ሊቃኖስ ሐዋርያ ለእግዚአብሔር
መዋርስቲሁ ማ፡ ናሁ ናሁ ወጠንኩ ናሁ ። ለዕበይከ እሰብሕ ጸጋሁ ።
ሰላም ለገጽከ ዘያከፍእ ስኑ ። ለፀሐየ መዓልት ዋካ ብርሃኑ ፪ማ፡ ሊቃኖስ ቅዱስ ለእግዚአብሔር ምእመኑ ማ፡
መኑ መኑ ከማከ መኑ ። ሐውዘ ዓለም ዘኢርእየት ዓይኑ ። ሰላም ለቀራንብቲከ እለ መነና ድቃሰ ። ትጋሃ ወጸሎተ እንዘ
ይሬስያ ነበስባሰ ፪ማ፡ ሊቃኖስ ውዱስ እጼግወከ ተውዳሰ ማ፡ ሀበኒ አባ በረከትከ ሐዳሰ ። ወአእትት እምኔየ ዝሉፈ
ተጽናሰ ።
ሰላም እብል ለአዕይንቲከ ክልኤቲ ። እለ ሐውዘ ዓለም መነና ይነጽራ ሐውዛተ ዓለም አንታክቲ ፪ማ፡ ሊቃኖስ
ትጉህ አያየ መልአከ ኢመዋቲ ማ፡ ቅዳሕ ሊተ እግዚኦ ነቅዐ በረከትከ እስቲ ። ለነዳይ ጸሙእ ተምኔትየ ዛቲ ።
ሰላም ለአእዛኒከ እለ ኢፈተዋ ያስተአድማ ። ዛውዐ ዘማዊ ወቃለ ዘማ ፪ማ፡ ሊቃኖስ ትገህ ዘውገ ትጉሃን ዘራማ
ማ፡ ዜና ውዳሴከ ከመ እዜኑ በዜማ። ልስሐተ አፉየ ያጥዕም ለአፉከ ጣዕማ ።
ሰላም ለመላትሒከ እምብርሃነ ክርስቶስ ኤሎሄ ። ዘተጸገዋ ሱራሔ ፪ማ፡ ሊቃኖስ ኅሩይ ምዑዘ ምግባር
እምጼና ርኄ ማ፡ ለመላትሒከ ሶበ አቄርብ ስባሔ ። ውስተ ፍኖተ ጽድቅ ወሕይወት ኩነኒ መራሔ ።
ሰላም ለአፅናፊከ እለ ደርገ ይትረኀዋ ። መዓዛ አርያም ዘላዕሉ ከመ ያጼንዋ ፪ማ፡ ሊቃኖስ ስኂን ለመርዓተ
ወንጌል አፈዋ ማ፡ ኦ ዘዓቀብከ እንዘ ትዴግን ፍናዋ ። ፈሪሃ ኢየሱስ ክርስቶስ ለጥበብ ሥርዋ ።
ሰላም ለከናፍሪከ ዘኢነበባ አምፆ ። ሊቃኖስ ናብሊስ ለኀዘነ ልብ ዘታነፍጾ ፪ማ፡ አልቦ እምሰብእ ዘከማከ
በተባይጾ ማ፡ እምነገረ ከንቱ እንዘ ይመይጥ ገጾ ። ለከናፍሪሁ ዘሤመማዕፆ ።
ሰላም ለአፉከ እምነገረ ዘርቅ ዘተዓቅበ ። ከመ ቃለ መጽሐፍ ነበበ ፪ማ፡ ሊቃኖስ ድንግል ዘኢተአምር ሰብሳበ ማ፡
እንዘ እብል እሴብሐከ ወእዌድሰከ ካዕበ ። አፉሁ ለጻድቅ ይትሜሀር ጥበበ ።
ሰላም ለአስናኒከ ስሐቀ እለ መነና ። እምዘ ቦእከ ቤተ ጽሙና ፪ማ፡ ሊቃኖስ ሐሊብ ወአያየ መዓር መና ማ፡
ይምርሐኒ ጸሎትከ በአምሳለ ብሩህ ደመና ። እስመ ለሊከ ተአምር ዘይኄይስ ፍና ።
ሰላም ለልሳንከ እንበለ አጽርዖ ዘይጼሊ ። አኰቴተ አምላክ ስቡሕ እንዘ ይሄሊ ፪ማ፡ ሊቃኖስ ዕጉሥ ወትሩፈ
ምግባር ተጋዳሊ ማ፡ ሠውረኒ በጸሎትከ እምባህለ ልሳን መቊሰሊ ። ዘሕምዘ ውዴት ቦቱ ወሐሜት ቀታሊ ።
ሰላም ለቃልከ ዘይዜኑ ዘልፈ በኢያጽርዖ ። አኮቴተ አልፋ ወዖ ፪ማ፡ ሊቃኖስ ቃለከ አስምዓኒ በተዛውዖ ማ፡
ወስመ ዚአከ ሶበ አኅዝኩ ጸውዖ ። ቃልየ አጽምእ እግዚኦ እግዚኦ ።
ሰላም እብል ለእስትንፋስከ በጻሕቅ ። ከመ ዘይወጽእ ዘልፈ ነፋሰ ጥዒና ወሞቅ ፪ማ፡ እምነ ማእከላይ ኆኅት
ዘመንገለ ጽባሕ ወሠርቅ ማ፡ ለአውጽኦትየ እምዓምዓመ ጌጋይ ዕሙቅ ። የማነ ረድኤትከ ስፋሕ ሊቃኖስ ጻድቅ ።
 ሰላም ለጕርዔከ እምሰትየ ጠል ምድራዊ ። ዘተአተተ ግሙራ በግዕዘ መልአከ አርያማዊ ፪ማ፡ ሊቃኖስ ፍጹም
ከመ አቡከ ሰማያዊ ማ፡ ሠውረኒ በጽላሎትከ እምሥገርተ አርዌ ነዓዊ ። ከመ ዕፀ ሕይወት ኅሩይ ለኵሉ ማኅየዊ ። አየድዕ
አንሰ ዘምስለ ግናይ ለክሳድከ ሰላማ ። ወበአፈ ልብየ አስዕማ ፪ማ፡ ሊቃኖስ አንተ ለማኅቶትየ ተቅዋማ ማ፡ ፌማ ፌማ
ሶበ አፍቀረከ ፌማ። ላዕለ ርእስከ ረሠየ አስኬማ ።
ሰላም ለመታክፍቲከ አርዑተ ወንጌል እለ ጾራ ። ጸዊረ ፍግዐ ኃላፊ እንዘ ያስቆርራ ፪ማ፡ ሊቃኖስ ሠዋዒ ካህን
ዘሊቶስጥራ ማ፡ አንተኑ ወልደ አብርሃም ዘታራ ። ቅድመ ተጽንሶ በከርሥ ዘሰሐቀት ሣራ ።
ሰላም ለዘባንከ ዓዕፈ ድንግልና ዘተምጥሐ ። ፍትወተ አልባሰ ክቡራት ሶበ እምኔሁ ተመልሐ ፪ማ፡ ሊቃኖስ ትጉህ
ዘአፈድፈድከ ትጋሃ ማ፡ ጸግወኒ አባ በረከትከ ብዚኃ ። ዘያሜንን ዕንቈ ወወርቀ ቀይሐ ።
ሰላም ለእንግድዓከ ድርዓ አዕምሮ ዘተከድነ ። ወፈትለ ሥላሴ ዘኢይትበተክ ፍጡነ ፪ማ፡ ሊቃኖስ ብፁዕ
ዘአፈድፈድከ ብፅዓነ ማ፡ አምኃ ብፅዓን ለዕበይከ ከመ ናቅርብ ንሕነ ። አንሥእ ኃይለከ ወነዓ አድኅነነ ።
ሰላም ለሕጽንከ ሊቃኖስ ለባሲ ። ሃይማኖተ አብርሃም ይስሐቅ ወያዕቆብ አበ ነጋሢ ፪ማ፡ በምግባረ ገድልኒ
ዘውገ ኢዮብ ተዓጋሢ ማ፡ ተማኅፀንኩ በጸሎትከ ገብርከ አባሲ ። ውስተ ሕጽንከ ምርፋቅየ ረሲ ።
ሰላም እብል ለአእዳዊከ በእማኄ ። እንበይነ ኅሪት ጽድቅ ዘአፈድፈዳ ሙቃሔ ፪ማ፡ ገባሬ መንክራት ሊቃኖስ
ወጸዋራ ማይ በከርሠ ምሔ ማ፡ ፈጸምከ ተጋድሎ እንዘ ወጸዋሬ ማይ በከርሠ ምሔ ማ፡ ፈጸምከ ተጋድሎ እንዘ ትቀንት
ርኅራኄ ። በውስተ ጸላእት ምጕያዮን ለግሔ ።
ሰላም ሰላም ለመዝራዕትከ እብል ። ዘእምቀስተ ብርት ይጸንዕ ለምግባረ ገድል ፪ማ፡ ሕጠተ አኰቴት ሊቃኖስ
ወዘበረከትከ ሰብል ማ፡ ጸግወኒ በረከትከ በመዝራዕትከ ልዑል ። እንዘ ውስተ ኃይል ተሐውር እምኃይል ።
ሰላም እብል ለኵርናዕከ ጽኑዕ ። ዘሕማማተ ገድል ተወክፈ በከመ ልኩዕ ፪ማ፡ ጥዑመ ዜና ሊቃኖስ ዘውገ
ጸቃውዕ ማ፡ ይበዝኅ ትፍሥሕትከ በሰማያዊት ምሥዋዕ ። እምፍሬ ስርዝኅ ትፍሥሕትከ በሰማያዊት ምሥዋዕ ።
እምፍሬ ስርናይ ወዓዲ እምቅብዕ ።
ሰላም ሰላም ለእመታቲከ ዓዲ ፪ማ፡ ተክለ በረከት ሊቃኖስ ሠርፀ ዓፀደ ወይን ዘጋዲ ማ፡ ሊቃኖስ ሐዋርያ
ሊቃኖስ ቃለ ዓዋዲ ። ይዕቀባኒ እመታቲከ እምእመተ ሰይጣን ረዋዲ ። ህየንተ ሠናይ ለሰብእ እኪተ ዘይፈዲ።
ሰላም ለእራኃቲከ በእኂዘ በትር እለ ተሰቊራ ። ቀኖተ ክርስቶስ ማኅየዊ እንዘ ይዜከራ ፪ማ፡ ሊቃኖስ ኅሩይ ቢጸ
ኅሩያን ሕዝበ ድዮስጶራ ማ፡ ለዕበይከ እግዚኦ በቅድመ ትጉሃን ሐራ ። ዳዊት ይሴብሕ ወይዜምር ዕዝራ ።
ሰላም ሰላም ለአጻብዒከ በበአሐዱ ። እንዘ አሠርቱ እሙንቱ ለተቀንዮተ ጽድቅ እለ ተወሐዱ ፪ማ፡ ሊቃኖስ
መዋዒ ለእግዚአብሔር ተልሚዱ ማ፡ አቡየ ሰባሕኩከ ለሕዋስየ እምጕንዱ ። ከመ ተሰብሐ አብ በክርስቶስ ወልዱ ።
ሰላም እብሎን ለአጽፋረ እዴከ ዘውግ ። ከመ እንተ መብረቅ ግሩም እለ ይትኃተዋ በደርግ ፪ማ፡ ወሀቤ በረከት
ሊቃኖስ መምህረ ሥርዓት ወሕግ ማ፡ ከመ ያድኅነኒ እምረኀበ አንብዕ ወዑግ ። ኅብስተ ሐሤት ሴስየኒ ለብእሲ ድግዱግ ።
ሰላም ለገበዋቲከ በመቃኒተ ገድል እለ ጻመዉ ። ዕሤተ ጸጋ ሰማያዌ እንዘ ይሴፈዉ ፪ማ፡ አፈቅረከ ሊቃኖስ
ለሕሊናየ እምሥርዉ ማ፡ አብአኒ አባ ኀበ ስንእዋኒከ ሀለዉ ። ጊዜ ሙታን እምንዋም ጽሕዉ ።
ሰላም ለከርሥከ ዘኢፈቀደ ተሴስዮ ። ኅብስተ ዘያጸግቦ ወማየ ዘያረውዮ ፪ማ፡ ሊቃኖስ ብፁዕ አስተበቊዓከ
በተጋንዮ ማ፡ እስመ ለልብየ ከመ ላህበ እሳት አውዓዮ ። ወከመ ኵናት በሊሐ ፍቅርከ ረመዮ ።
ሰላም ለልብከ ዘኀደረ ውስቴቱ ። ልበ ኢየሱስ ክርስቶስ ወሀቤ ሕዋሳት ዓሠርቱ ፪ማ፡ ሊቃኖስ ጻድቅ ሶበ
ሰአልኩከ ለለዕለቱ ማ፡ ዕቀበኒ አባ ወባርከኒ ባሕቱ ። በበረከቶሙ ለኄራን ሠለስቱ ።
 ሰላም ለኵልያቲከ እግዚአብሔር ዘፈተኖ ። ከመ ኢሀሎ ውስቴቱ ምግባረ ሀከክ ወተሳንኖ ፪ማ፡ ፍትወ ምግባር
ሊቃኖስ እምፍትወ ምግባር ዕንቈ ሰርዲኖ ማ፡ አፍቀረ ስነ ፍቅርከ ዘአልቦ መንኖ ። ከመ ለእስራኤል ያዕቆብ ዘአፍቀረ ስኖ
።
ሰላም ለሕሊናከ ዘኢሐለየ ዓመፃ ። ተክለ በረከት ሊቃኖስ ለገነተ ወንጌል ሠርፃ ፪ማ፡ ውስተ ሕሊናየ አኅድር
መንፈሰ ሕሊናከ ዘየአቅጻ ማ፡ ለቀስተ ልሳን ከመ ኢይንድፈኒ ሐፃ ። ዘቆማ ሐፂር ወዓቢይ ድምፃ ።
ሰላም ለአማዑቲከ ፍቅረ መለኮት አዶናይ ። ዘተሠውጠ ቦቱ አርአያ ሀሊብ ወማይ ፪ማ፡ መርዓዌ ወንጌል
ሊቃኖስ ዓዕፈ ድንግልና ርሱይ ማ፡ ከመ ናይድዕ ዜና ዝክርከ በውስተ ጉባኤ ዓባይ ። ናሁ አዳም ወናሁ ሠናይ ።
ሰላም ለንዋየ ውስጥከ አስከሬነ ሥጋከ ዘተከብተ ። ትሕትና ወየዋሃተ እንዘ ይሬሲ ሲሲተ ፪ማ፡ ሊቃኖስ ስቡሕ
እጼግወከ ስብሐተ ማ፡ ከመ ትጸግወኒ አባ ወኢትትሐየየኒ ሊተ ። ውስተ በዓትከ መክፈልተ ወርስተ ።
ሰላም ለሕንብርትከ ዘአዳም መልአኩ ። ከመ ክበበ ወርኅ ዘይነብር ለሰማይ በምጽናዑ ፪ማ፡ ካህነ አርያም
ሊቃኖስ ሊቀ መዓርጋት ሰቡኡ ማ፡ መጥወነ ዘንተ እንዘ ትብል ዘለለጊዜሁ ወሳኡ ። ሥጋሁ ለክርስቶስ ንሥኡ ብልዑ ።
ሰላም ለሐቌከ ኃይለ መንፈስ ቅዱስ ዘአጠቀ ። በምግባረ ቀዊም ወገድል በዘኢይተነትን ሕቀ ፪ማ፡ ሊቃኖስ
ሐዋርያ ዘኢያጥረይከ ጸሪቀ ማ፡ እምነ ጻድቃን ሶበ አፈድፈድከ ጽድቀ ። ስመ ዚአከ ተሰብሐ ጥቀ ።
ሰላም እብሎን ለአቊያጺከ ከመ መንታ ። ለተቀንዮ ጽድቅ ኃይለ እለ ፍጹመ ቀነታ ፪ማ፡ ሊቃኖስ አቡየ
ወእምየ ለዕጓለ ማውታ ማ፡ አስተባሪ ስብሐታቲከ እንዘ አየድዕ በጾታ ። ከመ ምስለ ጎህ ትትባረይ ሳኒታ ።
ሰላም ሰላም ለአብራኪከ እብሎሙ ። እስራ ዓመተ ወሐምስተ እለ በእንተ ጽድቅ ደክሙ ፪ማ፡ ንጉሠ እስራኤል
ዳዊት በከመ ይቤ ቀዲሙ ማ፡ እግዚአብሔር እንዘ በኃይሉ ያጸንዖሙ ። ለጻዳቃን ብዙኀ ሕማሞሙ ።
ሰላም እብል ለአዕጋሪከ ክልኤሆን ። ዘኢያንሶስዋ ምንተ ውስተ ፍና እከይ ወሚን ፪ማ፡ ሊቃኖስ ኅሩይ ዘባሕርየ
ትዕግሥት መድፍን ማ፡ ተዘኪረከ ዘይቤ ቃለ ኢየሱስ እሙን ። ዘአዝለፈ ትዕግሥቶ ውእቱ ድኁን ።
ሰላም እብል ለሰኳንዊከ ክልኤ ። ፍኖተ ዓመፃ እለ ኢሖራ ወኢድኀፃ በጕጓኤ ማ፡ ሊቃኖስ ብፁዕ አስተበቊዓከ
ቅድመ ጉባኤ ማ፡ ከመ እኅቱ ቅድመ መርዓዊ አመ ይከውን ውዋዔ ። ቅብዐ ድንጋሌከ ሀበኒ በግምዔ ።
ሰላም ለመከየድከ ውስተ ፍና አምላከ እለ ጸንዓ ። ከመ ኃይል ዘልፈ እንዘ ይረትዓ ፪ማ፡ ጸጋዌ ትፍሥሕት
ወኃሤት ሊቃኖስ ወይነ መርዓ ማ፡ ነዓ ነዓ ከመ ታርውየነ ነዓ ። እስመ ኪያከ ነፍሳቲነ ጸምዓ ።
ሰላም ለአጻብዒኪ ውስተ ፍና ጌጋይ ዘኢኃለፋ ። ወበእብነ ስሕተት ህቅ እለ ኢተዓቅፋ ፪ማ፡ መሠረተ አሚን
ሊቃኖስ ወኰኵሐ ሃይማኖት ዘኬፋ ማ፡ ዝክረ ውዳሴከ እንተ አይዳዕኩ በተስፋ ። ቅድመ ዓይነ ፀር ይኩነኒ ሐገፋ ።
ሰላም ለአጽፋረ እግርከ በአርአያ ፀሐይ ወወርኅ ። እለ ያበርሃ ዘልፈ ውስተ ቤተ ጸሎት ንጹሕ ፪ማ፡ መሥዋዕተ
አምልኮ ውኩፍ ሊቃኖስ የዋህ ማ፡ በከመ ይቤ ዳዊት ወልደ አብርሃም ወኖኅ ። ገሃደ ሠረቀ ለጻድቃን በርሀ ።
ሰላም ለቆምከ ዘአሠነየ ፈጣሪ ። ከመ ቆመ አዳም ፍትው ወላዴ መሐሪት ወመሐሪ ፪ማ፡ ሊቃኖስ መነኮስ
ወልደ እንጦኒ ወተክለ መቃሪ ማ፡ በከመ ይቤ ዳዊት እንዘ ቃለ ጥበብ የኃሪ ። ጻድቅሰ ከመ በቀልት ይፈሪ ። ወከመ ዝግባ
ብዙኅ ከማሁ ይዔሪ ።
ሰላም እብል ለመልክእከ በህቁ ። እንዘ ማየ ትጋሃ አውኀዝ ለልብየ እማዕምቁ ፪ማ፡ ሊቃኖስ ፍትው ለዓፀደ
ወይን ዓፅቁ ማ፡ አድኅነኒ ዘልፈ እግዚኦ እስመ ኄራነ ምድር ኃልቁ ። ወአንሥአኒ አመ አነ ውስተ ግብ ወደቁ ።
ሰላም ሰላም ለጸአተ ነፍስከ ክቡር ። በቅድመ እግዚአብሔር ፪ማ፡ ሊቃኖስ ሀሊብ ጥዑመ ዜና ወዝክር ማ፡
በጸአተ ነፍስከ ዛቲ ሰዓተ ፍሥሓ ወፍቅር ። ይትፌሣሕ ሰማይ ወትትሐሠይ ምድር ።
 ሰላም ለበድነ ሥጋከ በዓዕፈ ድንጋሌ ዘተጠብለለ ። ድኅረ አዝለፍከ ወድኅረ ፈጸምከ ገድለ ፪ማ፡ ሊቃኖስ
ሐዋርያ እንተ ሰበከ ወንጌለ ማ፡ ለምግባረ ጽድቅ ዘያቀውመኒ ላዕለ ። ሰማያዌ አቅንትኒ ኃይለ ።
ሰላም ሰላም ለግንዘትከ በአጽፍ ፡ ድኅረ መንፈስከ ወፅአት በፈጽሞ ገድል ትሩፍ ፪ማ፡ መርበብተ ሕይወት
ሊቃኖስ ወመሥገርተ ነፍሳት ገሪፍ ማ፡ ዘአቅረብኩ ለከ ጋዳ ስብሐት ተወከፍ ። ከመ ስብሐቲሁ ለወልድ ዘኅሩይ እምእልፍ
።
ሰላም ለመቃብሪከ ወለዝኅረከ ሐዲስ ። ዓፀደ ፍሥሓ ወሞገስ ፪ማ፡ ሊቃኖስ ጠቢብ ሊቀ ደናግል ሐምስ ማ፡
ጸግወኒ አባ በረከተ ኄራን ሠላስ ። አብ ወወልድ ወመንፈስ ቅዱስ ። ኀበ ተቀብረ ሥጋሁ ለክርስቶስ ቃል ። ከመ ኢተረክበ
ዓፅሙ እምድኅረ ሠላስ መዋዕል ፪ማ፡ እንበለ ዳእሙ መግነዙ ወሰበነ ርእሱ ጥብሉል ማ፡ በድነ ሥጋከ ከማሁ ሊቃኖስ ኮል።
ኢተረክበ በውስተ ዝኅር ለከሢተ መንክር ወኃይል ። እስመ እምኀበ አብ ኮነ ሕይወትከ ጠል ። ስብሐተ ለእግዚአብሔር
ፈጽሞ ዘአክሃለኒ ። በኃይለ መንፈሱ ቅዱስ እንዘይረድአኒ ። ሊቃኖስ ምልክያል ዘካዕበ ስምከ ተምዓኒ ። ውዳሴ መልክእከ
ዝንቱ እምነ ኵሉ ዘይሤኒ ። መባአኒ ወቊርባነኒ ። አአኵቶ ለእግዚአብሔር ወዘልፈ እባርኮ ። በሰጊድ ወአስተብርኮ ፪ማ፡
እስመ ረሰየኒ ድልወ ለነቢብ ወለሴርኮ ማ፡ ዜና ዝክርከ ሊቃኖስ እምልበ አዕሩግ ዘሠወርኮ ። እስመ በአፉየ ይትከሠት
ሠመርኮ ። ስብሐት ለእግዚአብሔር ዘአክሀለኒ ፈጽሞ ። ዜና ዝክርከ ዘወጠንኩ በሰጊድ ወአስተሐምሞ ፪ማ፡ ሊቃኖስ
ጠቢብ መዝገበ ትዕግሥት ወአርምሞ ማ፡ ለቃለ አፉየ ውስተ ልብከ ኅትሞ ። ቃለ ነጎድጓድ ከመ ኃተመ ዮሐንስ በፍጥሞ
።