Editor: H.

Malsawmtluanga
Ph: 9615425400 / 9436784572

Thingsulthliah Students Union

Jt. Editor: Lalromawia Ph:2370285 Correspondents: K.Khualluna : 9436392830 Lalbiaktluanga : 9612322711 Ramngaizuala : 9862386148

Thingsulthliah Sub - Town Weekly Newspaper

VOL. VII

No. 8 THINGSULTHLIAH

Ni 9 March 2013

(INRINNI)

THINGSULTHLIAH LUITHUAM RAM A KANG Tunkar ni 5/3/2013(thawhlehni) dar 11:00 am vel khan Thingsulthliah Luithuam bul ram atangin kangmei a chhuak a. Helai bul hnaia Tuikhur siam mek Upa Pawl(Unit-I) ten hmu hmasain an hnathawh lai kalsanin kang thelh turin an thawk chhuak nghal a. An Mobile phone hmangin VC leh YMA hruaitu an hriat ang ang te an hrilh hre nghal a. Tin, Hospital Area lam atangin kangmei hi chiang takin a lang thei bawk a, VC leh YMA hruaitute lo hrilh an awm nual bawk. VC Information Mike hmangin tlang-au nghal a ni a, a hria apiangte an tlankhawm nghal a, rin ai daihin meialh hi a nasa a, mihring chenna In a kangkai mai ang tih hlauhawm khawpin a awm a ni. Hetih laiin Camp Area Chhuahlam veng-a Tuisem mek te hrilhhre nghal bawkin an tuisem lai an titawp nghal a; Kangmei chhuahna bul hnai Pi Malsawmi Sailo In bul Tui-Point atangin tui ti-hawin pipe sei hawhkhawmin meialh nasa zual te an phuh a. Mi tlawmngai thahnem takin a mawnglam atangin an rawn thelh chho bawk a; mihring In kangkai tur lo veng pawl te awmin, vanneihthlak takin chhun dar 1:00 velah kangmei hi thelh mih a ni ta a ni. Kangmei lo chhuah Dan : Thingsulthliah VC ten kangmei lo chhuah dan hi an chhui nghal a. Naupang thenkhat Luithuam-a kal ten meizial an zuk thu an hre nghal a. Hemi ni chawhma lama Luithuam-a kal naupang an hriat zawng zawng te an kokhawm a. Naupang thenkhat chuan Meizial (Ciggarette) an zuk thu leh an zuk bung an paih thu te, a thlang lamah an zuk leh thu te an sawi a. Naupang meizial zuk bung atanga kangmei hi chhuak a ni thei mai ang em tih chu zawhna lian tak a tling a, finfiahna tak tak awm lo mahse kangmei lo chhuah chhan hi a nih mai a rin theih a ni. VC ten naupangte chu tawngkain na takin an zilhhau a, tun hnuah meizial zuk ruk bansan tur leh ram lamah nawhalh leh zial kenglo turin an hriattir bawk a ni. Heng naupangte hi kum 10 atanga kum 14 inkar te an ni hlawm a, Camp Area naupang 4, Diakkawn Area 2 leh Hospital Area naupang 1 te an ni a. Tunlai hi School chawlh lai a ni a, hnathawka chhawr rual loh naupangte hi nu leh paten veng uluk zual sauh ila; ram lamah kalin thil sual(zial zuk) te an ching thin tih hriain a tuate pawhin mahni fate theuh kan khuahkhirh a ngai hle a ni. Khawtlang chhiatna thlen thei thil hi thil hote atangin a intan thei a ni tih i hre tlang theuh ang u. MRB SELING BRANCH HAWNG Ni 5/3/2013 khan Mizoram Rural Bank, Seling Branch chu Bialtu MLA & Home Minister Pu R.Lalzirlianan Ribbon chep chatin a hawng. MRB Office hi Pi Lalchawii Building-ah a awm a, A hawnna function chu YMA Run-ah hman a ni. He Bank thar Manager hi Pi Lalzoliani a ni a, Office Asst. Nl Lalramhluni niin Facilitator atan Samuel Lalchhanchhuaha S/o R.Siamliana, Seling chu lak a ni bawk. Tunah hian Account hawng duh tan a hawn theih nghal reng a, Loan pawh a remchang angin an pechhuak thei a ni. A/C nei tawh sa tan Home Branch(Seling)-ah transfer theih a ni a; MRB Thingsulthliah Branch-a loan la mek te tan erawh Home Branch-a transfer hi la tih hmanhmawh theih a nilo. Hetih laiin MRB Tst-a loan la ten Seling Branch atangin an rul thei tho tih MRB hotute chuan an sawi. TST CHC TAN PE Tunkar khan Baktawng-Tlangnuam atangin Thingsulthliah CHC chuan thutthlengsei 5 an dawng a, thilpek petute chungah CHC hotu ten lawmthu an sawi. Tin, Poor-Fund tan Mizoram UPC, Bial LAD ten Rs. 1000/- an pe a, an chungah pawh CHC hotu ten lawmthu an sawi a ni.

INNEI Ni 6.3.2013 khan Rozami D/o F. Lalhnema, C/A leh Vanlalsena S/o N.K Thanga, Aizawl Ramthar Veng te Thingsulthliah Presbyterian Kohhran Hall-ah an innei. Ni 7.3.2013 zing dar 7:00 khan Vanlalpeka S/o Thapa, Seling Zahngai Veng leh Lalfamkimi D/o Laldinpuia, Khuangthing te Seling Presbyterian Kohhran Sunday School Hall-ah an innei. NREGS NI 12 INHLAWHNA Tunkar nilaini khan NREGS ni 12 inhlawhna a lo thleng leh a, heta ni 2 bik hi mei lam sialna tur a ni thung ang. Tuna ni 12 inhlawhna lo thleng tur nen hian kumin 2012-13 chhung hian ni 88 chiah kan thawhna tur a ni dawn a; ni 100 tlin lohna ni 12 dang inhlawhna tur pawh lo thleng leh mai tura ngaih a ni. Thu kan lo dawn danin ni khat inhlawhna Rate Rs. 136/- ni mek chu kumthar April 2013 atang chuan
Rs.148/- a ni tawh dawn a ni.

HEADMASTER THAR Thingsulthliah Govt. M/S-II Headmaster Pu T. Zoramthanga chu Tawihzo M/S-ah sawn a ni a. A hmunah hian Tawizo Headmaster Pu H. Laltanpuia a rawn awm thung ang. Pu H. Laltanpuia hian tunkar Thawhlehni khan Joining Report a rawn pe fel tawh a ni. LO AWM THAR Pu V.Vanneihsanga (Sangtea) Office Attendent, MRB Tst Branch ami chu MRB Falkawn Branch-ah transfer a ni a, a hmunah hian Tv Lalrohluna(Valtea) S/o Maj Vanlalthanga chu Dinthar Branch, Aizawl atangin a rawn awm thar. INSAWN DAWN Salvation Army, Thingsulthliah Bial C.O, Capt. Lalsangzuala te nupa chu Chhawrtui Bial C.O.-ah dah an ni a. Ni 21.3.2013-ah an awmna tur hmunah an kal ang. Ni 17.3.2013ah Tst C.O. Bial-in an thlah ang. Capt. Lalsangzuala te nupa hi Western Division DYS Maj. JC Ngurthanzauva te nupa-in an rawn thlak dawn a, Ni 21.3.2013-ah lo thleng tura ngaih an ni.