PASIAN HEH PEH NA BEK MAH LAM EN NA HIA BANG?

The Second Though

Hun kikhelkhel. Nate angei in angei in ngei
nawnlo. Thului thuthakin vulh nelh. Sia
ihkicih zong ngaihsut mahmah khit ciangin
dawn pat ding. Mihai hong kicih zahmahin
mipil zong hong kici ta. Pil akicite lakah ih
tualbial sangin hai akicite lakah tualbial
lengh ngaihmuan om zaw. Pasian na asem
taktakte in bangmah paulap zong kei. Koi koi
ah na tung zongin Pasian na asem nahih
ding thupi. Tuhun ciangin SDA lakah Pasian
na sepding/seploh teelding om kei. Sia maw,
pawlpimi, ihvekin Pasian nasem vive hi.
Hihzong buaipih ding hinawn kei. Koi ah
sem ding, bangci sepding, cih bek khensat ding hun hita. Ihgam ihlei ah asem ding omlo
thei gegu mundang zonding hoihpen lo thei. Asem ding tam lua zaw in akitawng tawng ihhih
zawk leh kitawnglo-a sep theih namun zon tuak. Pawlpi kum tam semsem, vaikuan nuamlo, inn
ngak nuam mi kitam ta zaw. Ahong kideih lopi lakah ih kikausi phum sangin ahong deihzaw
lakah diang lengh cidam huai zaw. Leitung mawhna pua-a apumthuak ding kisam cih lah
hilo, hilhcian na asemte adingin ahong kideih na ah sep ding. Minam aitman a, Pasian na asem
aom leh tua minam abei masiah koimah paikhia kei hen. Ahizongin, gam khual a, gamdang pai
om a, minam itlo gamdang pai zong om veve. Gamdanga om khempeuh minam itlo hituanlo.
Guaksuak lawh lianga nam it cih zong matkhai vomna hi. Neih le lam tawh nam ki itsiam zaw. Ka
zawn in hong hai sak zel.
SDA khat in Pasian na asep ciangin asepkop ding: thugen ding, thuhilh ding, innkuan vak ding, zi
lungkim sak ding, tate pantah ding, khua le tui khual ding, nam leh phung veng ding, ei le ei
kikhangkhan ding, tek le guai hun ading kiging khol ding. Hihlakah khat la in khat kipaai theilo.
Minam it in, adangteng nusia ding cihzong SDA biakna nasemte kuanzia picing lo. Hih sepding
atam theithei kakhual zawhna ah septuak.
Zogam leh zo mi a khangto sak ding in Pasian in bilvuhna ahong piak leh kem in khual in, pantah
in. Pasian hong sapna hi. Lampi tuamtuam zong zat kul thei. Tutawm in na zat lampite hong
kimawhsak thei awm tak. Tangko kei in. Sem in. Pasian tawh kam kikum in. Mite muhdan zahtak
ken. Nang leh na Pasian tawh na kiholimna zahtak in. Na nahlawh pek ding hi. Nang ngaihsutna
mite ngaihsutna suak sak kei in. Mite ngaihsutna zong nang ngaihsutna suak sak nuamlo picin.
Mi khat leh khat kibanglo a, Pasianin ahong hopih dan zong kilamdang tek hi. Tua hikei leh zi le
ta kituahin kisat lum khin ding hihang. Mi tawh akibanglo zo in Pasian na itding kisam hi. Mi
cihbang, mitat bangin na omlai teng we lee lee mah hilai hihang.
Na cihmawh hunin ahong kem ahong khualte lungdam sak in. Ann kam khat nekding zong mite
tungah lungdamna hi. Na mimal haksatnate hong kitheihpih het lo hi. Na koh Pasian bekin thei
hi. Khuahun in bangbang gen taleh na maiah lampi akihong zui in. Pasian hong vaihawm sakna
hi.
Nang le nang vaihawm leh thatang thu tawh bangmah sem ken. Hong kimawh sak ding hi.
Mikiangpanin huhna na ngah leh hong uk nuam ding uh hi. Nang tawh Pasian nadin laiteng
midang in hong uk thei lo ding hi. Pasian bek ki uk sak in.
A hun hun in Pasianin mizat deuh nei hi. Pasian khutzatte in atawntungin thanemna nei ngeilo,
cih hilo hi. Pasian tawh na omkhop leh thuakdingte na thuak zo ding hi. Mun khempeuh thu
khempeuh ah pum thuakzawh ding, cih zong Pasian deihna hilo zel hi. Gendingte gen kul a, thuak
dingte thuak kul a, theihsak dingte zong genkhiat ding hun om hi. Mi sangin niam zaw leng hong
kihuhdah lo hi. Mitawh kikim lengh mite in hong encik ding hi. Mite sangin tawm kikhangkhia
pian lehcin na mawhna hong kizong ding hi. Tua dinmun tuamtuamte anawk kha ngeilote in
anawk khate tungah bangmah pau kei zaw hen. Thuakzawhna in Pasian hong piak kha-tha hi.
Thuak kinken lengh zong ahong thuaksakte hai sak zaw thei hi. Mihing khat in adang khat tungah
aanna alak dingin Pasianin geel nailo hi. Aana cih pen pu dawimangpa gaam hi. Jesus in asih
dong athuak thu aom bangin athaukzawh vetloh, adawnkik sestet thu tampi mah om hi.
Adiakdiak in, zomi lakah ihtualbial ciangin kipahtawina pen minor hisakin kimawhsakna pen ki
major sak hi. Hih ihtheihsiam nakleh ei le ei khasiat nading sial zon kei ni. Zomi ihcih pen
mikhantoh ding deihlo, ei khantoh ding bek amunuam minam hi. Jesus hun lai zong Jerusalem-a
ukpite in amun kip uh kip leh deih uha, Jesus aminphat ding deih lo hi..
Doctor lukhu akhu ngei nailote in akhute mawhsak hi. Amau mahmahin akhukni ciangin miten
mawh sak ding uh hi. Lukhu pua lah mi khat zong om nai lo hi. Mite deih nasep sem in nuam
ihsak hun aom bangin Pasian deih bang lian nasep ih sep nop hun zong om hi. Bangbang lukhu
na khu zongin agikzaw thu ngaihsun huai hi. Lukhu seplohpi alei hileng kipua zolo thei
hi. Sem a nangah lukhu na puak zawh keileh im ziau zaw in. Min hong theihpih kha in teh! Mite
lelh theih thu in pilna hilo, za, hauhna, mihon huzaap hi.. Hih huzaapte pen na kum atam tawh
kituakin na talsik dan kikhel hi. Pawlpi na pattah zawk hun oma, tate pantah zawk hun om hi.
Sepding vive mah ahihhangin priority piak zawk ding om hi. Ih neu lai in ih pa pen leitungah
athahat pen ih sa hi. Ih tangval ciangin ih pa pen hatlo, hai ih sa hi. Zi le ta ihneih ciangin ihpate
bangmahin suan le khak anei zo athahat mahin ih kingaihsun hi. Ihpate in ahong sihsan khit,
bangkua vai ei le ei ihdin ciangin ih pate apil lam, athahat lam ih nung phawk san hi. Zi nei
nailopi innkuan vai mihilh kei in. Pil nasang na ngah nai keileh angahte mawhsak nai kei in.
Gamdangah aom khempeuh an lim antui aneding kisa ngei hi. Biakinn kah khempeuh zong nuam
sa-in alam lamte kisa ngei hi. Gamdangah biakinn maan maan a akahte pen mite sanga nangh
akisa, zawng akisa, Pasian huh kisam akisate hi. Awm phosa in biakinn akah ding zomi
gamdangah kitawm lai hi. Innlam lo lam ahuh zuahzuah te zong kumpi awi loh nengneng tawh
amehkop theite hizaw. Tuhun ciangin Sabbath atang vetlo SDA zong om hi. Alungnuam SDA
tawm hi. Kawlgam pawlpi thu akonlawh zo laite pen mi itte hi. Minuamsate hilo hi. Khut-khat
tawi, khe-khat khai hun a akhangkhiate hiding hi. Pawlpi tawh kisaite buaipih lua kei un. Pasianin
SDA pawlpi phutin azang ahileh anawngkai sak khempeuh Pasian mahin hemkhia ding hi. Pawlpi
vai pen nang le kei vai hilo, Pasian aituam vai hi. Nang le kei sangin kin zaw hi. Pasianin ei kipiak
zawh tungtawnin hong zang hilo a, ahong thawhzawh thu tawh ahong zang hizaw hi. Pasianin mi
tampi nei hi. Tua mite Pasian bekin thei hi. Ei theih mi theihte zong Pasian mi nahilo thei hi.
Pasianin pawl sungah athunei nuam tampi sangin acihcih azui nuam mi lungulh zaw hi.
Nainganzi asiam sangin khagilkialte zong zaw hi. Anungtolhte sangin thu muthakte pantah nuam
zaw hi. Thuduhte sangin Sian-duhte ngai zaw hi. Pasian nasem dik tak vive ih hihleh hih pawlpi
kiukina buainate veng dinga, upna ze-et na hong lut ding hi. SDA-Pawl sungah nasep na kipat vet
leh SDA pawlpi tawh ki zom in. Pasian na ihsep nop leh nikhat in nai 24 sung nasep kul hi.
Pasian nasemte lakah part time kiapna om ngei lo hi. Cial nasep kei in. Pawl nasep leh Pasian
nasep akilamdanna hong kilanglang ding hita hi. Jesus ahong kum mengmeng keileh pawl nasep
tawh kha tampi kiman suah ding hi. Pawl buainate hangin mi mawhsak kei in. Nang kisit tel zaw
in.
Dr. Dalmang