Kum 23 Issue No.20 Missionary Tlngau August 2011 2342250 (O) 9615344234(M) Asst. Editor : H.

Zadingliana 2342294 (R) 9436157190(M) Cir.Manager : K.Lalremsanga 9436370298(M) Member : Rev.Dr.K.Lalrinthanga 9436158852 (M) : L.H.Liandinga 2342667 (O) Email Address : angelzaiteibh@Gmail.Com Address Baptist Church of Mizoram Office Serkawn, P.O. Zotlang - 796691 Lunglei, Mizoram Ph.Off - 2342250 Editor A man kum khatah - Rs 40 : HS.Lalhmingthanga

Thuchhuah rng rng hi a ziaktu mawhphurhna a ni a, Editor leh BCM ngaihdn a ni vek kher lo.

A CHHUNGA THU AWM TE

Sl.No 1. 2. 3. 4. 5. 6. 7. 8. Editorial Chanadipa Work Camp Tin Baje!! Tuichawng Camping Report tlangpui Rema leh Beii chanchin thar Baptisma ka chan hma chuan tualthah ka Tamale, Ghana Hlinglukhum aiah Parthi

Phk 1 2

Editorial Editorial MISSIONARY KOHHRAN Baptist Church of Mizoram (BCM) hi a din tirhte atanga mahni insengsova Chanchin Tha hril ngai pawimawh a ni a; March, 1903 a BMS Missionary Sap Upa leh Pu Buanga ten Sethlun an va tlawh khan, a hma kuma an buhthar Sawma Pakhat an Biak in buhzema liang tawnga an lo dah chu Tirhkoh (Evangelist) pahnih rawih nan an hmang nghal rap a ni. 2011-2012 hian BCM Budget Rs 100,125,000/- (32.32 %) chu Mission atan kan hmang dawn a. Kan Budget za zela 67 Central Budget (34 %) leh Service Budget (33 %) chu Hqrs. hmalakna leh Mizoram chhungah kan hmang dawn a ni. Kum hmasa 2010-2011 aiin kan Mission Budget hi Rs 20,151,230/- (nuai zahnih pakhat singnga) zetin a pung chho va, BCM in Chanchin Tha kan hrilnaa kan hma pawh a zau sawt khawp mai. Pathian hnenah lawmthu i sawi ang u. Hetih lai hian kohhranhoten Pathian ram tihzau tumin tawngtaina nen tan kan la nasa em em a. BCM Hqrs. Budget bakah hian Mission Field-a Work Camp, kohhran tlawh, Biak in leh Sikul sak, khawmpui kal, Missionary Furlough-a lo kalte Appeal chhanna, Missionary damlote kanna, ringthar tihduhdah tuarte tanpuina leh Missionary-ten rawngbawlnaa hma an lakna puih nan kan sum leh pai thahnem tham tak kan pe chhuak a. Kan Target tlina khum reng chunga, hetiang zat zata kan luang chhuak hian, Missionary kohhran nih kan tumzia a ti lang awm e. Missionary kohhran chuan thinlunga hmangaihna atanga insawr chhuakin Lalpa ram tan hlim takin thilpek hmangin rawng a bawl thin si a. Hetianga luang chhuak kohhrante hian thlarau lamah malsawmna ropui tak dawngin mittui nen Pathian an fak a, lei lawmna aia lawmna ropui van lawmnain an khat thin a ni. 2

Kohhran then khat leh hruaitu then khat mahni ram chhung leh tualchhunga inbenbela insawh muk lam ngai pawimawh, Pathian ram zauh tura mahni, tawngtai, thilpeka luan chhuah tul ti lo an awm bawk a. Lal Isua leh kohhran an hmangaih vanga heti zawnga thahnemngai hi an ni ve thovin a lang a. Hetiang mite hian kohhranah tam zawk hauhvin, rorelnaah an ngaihdan nawr tlang ta zel sela, BCM hi a pumpuia sawiin Missionary kohhran a ni zel thei ang em aw? tih hi ngaihtuah tham a ni. Hetiang kohhran leh hruaitute hi han bel chiang ila, thlarau lam testimony thar an nei khat a, van lawmnaa luangliam chunga Lalpa an fak hmel hmuh a khat deuh em aw tih theih a ni. Nilai zanah te, Inrinni zanah te, an kohhran Mission Convention tan zan Zirtawp zanah te an kohhran hmel tlangpui chu i hmu thei ang. Kohhran a chak lo tih hriain an vei ve tho a, an damdawi hriat chhun chu Evangelist tha deuh sawma Camping/ Crusade programme buatsaih a, kohhran chhem alh thar tum a ni mai. Ni e, rei lote chu an han hlim so hluai a, an han reh thla leh duak a, ngai an awh loh vek pawhin an tlahniam tlangpui thin. Missionary kohhran erawhchu harsatna karah pawh Chanchin Tha hril turin an insawr chhuak hram hram a. Biak in sak leh tualchhung hmasawnna tur Project chu nei ve mahse, chung thil ti chung chuan Lalpa ram zauh tumin khawvel an thlir a, chanchin chhia hlira khat khawvel mamawh, Lal Isua Chanchin Tha chu, sawi lovin an awm thei lo va, Thlarau Thianghlim thiltihtheihna nen an puang chhuak thin. Missionary-te ngei pawh han bel chiang ila, an inchhungah harsatna, rilru tihahtu, chhuanlamah hmang dawn sela chhuanlam tling tak tak awm chungin, an mahni Tirtu Lal Isua thupek awihin, tap chungin buhchi an feh chhuahpui a, mittui nen boralte an zawng hram hram a lo ni. Kohhran mi tam takte hi chuan kan ai awha kan tirh Mission Field-a bung mekte tawrh nasatzia te, an khawharzia te, hreawm pawisa lova Kraws pu-a chauva an thingthita an tluk hnawk hnawk zinzia te hi kan hre kher awm lo ve. Upa C. Lalthlamuanan (RIP), Riangvai chan kraws put hi ka Lal Isu, dam ni awm thei si lo; Nunna changa lawm mai lo hian, kan 3

tuar phal hian i ngawi reng fo, tia a lo phuah ang khan, an Gethsemane leh Kraws kawng zawhin, tuarna kal tlangin, Pathian hmangaihna thlum tak chu an thinlung atangin an sawr chhuak a, Pathian ram an tizau thin a lo ni. Mahse he Kawngkhawhar an zawh lai hian Lalpa Thlarau pawlna an chang a, Tuarna phena malsawmna chu hmuin, lungawi tak leh lawm chungin rawng an bawl a ni. Missionary kohhran chuan Lal Isua thupek zawm chu a ngai pawimawh ber a, chumi avanga tuarna chu pawisa lovin, he khawvelah hian an Lalpa ram tizau turin an feh chhuak a, thahnemngai takin an thawk thin a ni. Hetiang kohhran ni zel tur hian BCM hi i tang mar sauh sauh ang u.

*****************

Chanadipa Work Camp

Lalfakzuala Hnamte, Fin-Secretary, BMP Electric Unit, Hnahthial

. Kan Unit BMP in kumtir Plan a, a lo dah angin Mission Field a Work Camp nei turin kawng hrang hranga inbuatsaih a ni a, Tichuan Unit Committee chuan Birpara Field a Chanadipa hmuna Work Camp nei turin thu a ti tlu ta rup mai le. Tan lak a ngai nasa hle mai, a senso tur kan han chhuta kan huphurh tlang ngei mai Pathian rinchhan lo chuan hetiang sum zozai mai hi neih ngaihna a awmlo reng reng, amarawhchu kan Lalpa hosakna hi amah ringtute tan chuan chenzawh sen rual a lo ni love, Tichuan mi inpete leh thahnem ngaite kaltlangin Lalpan kan sum mamawhte chu min pe ta, keini rinna a chaklo tak tak te hian kan va phulovin a va lawmawm si em! Lalpa chu fakin awm rawhse, ni 15.11.2010 khan MST Bus chu kan Book fel ve ta der maile mumang chu a ni silo, a 4

tak ngei a ni e, a va ropui em! kan Bus hman hi seat 23 chiah awm a ni a, mi 20 leh Missionary-a lakthar pahnih nen a seat a leng tawk chiah kan ni leh tlat, a aia tam kal turin inpe ta ila kan va buai dawn em, chunglam hi chuan rorel dan a van thiam em! Tichuan ngai the, kan Lalpa kum 2010, Sahmulphah thla, ni sawmpariat zing dar 5:00-ah Upa Thangzikan tawngtaia min thlahin kan Nupui fanaute nen chuan hlim taka inhmuh leh beiseiin MST Bus atang ngei mai chuan kan invai liam ta anih kha, awih a va har zawk em, a tak ngei chu a ni si. Tichuan a zan khatna chu Vairengte-ah kan Baptist unauten min lo dawngsawng a, Pastor Rothangpuia leh kan Baptist memberte an va fel tak em, khulai kawtchhuaha Baptist an lo awmte khu a va hlu em! A zanhnihna chu Gauhati-a Baptist Houseah riak lehin Birpara chu 20.11.2010 Tlai dar 3:00-ah kan thleng a, BCM Compound-ah chuan kan invawm lut a, Missionary awm hoten Zanriah tuihnai tak mai an sum thawhkhawmin min lo buatsaih saka kan va lawm tak em! a tuk Pathianni chuan kan kohhran atanga Missionary-a kal Pu C. Thangzela awmna Tulsipara-ah kan inkhawm a, Pu C.Thangzelate nupa chuan Tukthuan min lo buatsaih sak nghal a, kan hun tawng hi lawmna tur hlir a ni e! A tuk Thawhtan ni 22.11.2010 chuan kan Work Campna tur hmun Chanadipa chu kan pan ta nghal a, Birpara atangin Km 30 vel a ni a, zing dar 11 velah kan thleng phei a, mawng pawh hung hman lovin hna kan tan nghal ta mup mup mai le, tumah hna inkawhhmuh kan ngai lo, mahni thiam zawng leh tihawm tawk chu kan thawk nghal zung zung mai a, a va nuamin a va hlimawm em! Tichuan zing thawh veleh atanga tlai ni tlak rak thlengin kan thawk char char mai anih kha, Ningani ni 25.11.2010 chuan a zualpui chu kan zo ta der mai a, tlaiah chuan member pali te chu Missionary Pu C.Thangzela-te quarter luah Ceiling siam turin Chanadipa ( a hming hi ka hre reng thei lo lutuk a, Chana-Dip atangin ka chhinchhiah a, ka theihnghilh ta lo) atangin an phei a, a tuk Zirtawpni chuan a tukverh te vuah felin Chanadipa Biakin a dung 32ft a vang 15ft chu sak zawh a ni ta, a tukverh leh Chokut tur hi kal hmain siam lawk vek a ni a, Bus ah kan phur nghal a, hei hian hna a ti awlsam hle mai. Chanadipa hmunah hian Kristian in li vel an awm a, Biak in te 5

din anih chuan kan pung ve mai ang, an ti a, an sawi ang tak tak chuan kan haw hnuah hian mi 4 (pali) chuan Baptisma an chang leh der tawh anih chu, khulai hmunah khuan Lalpa ram tihzauhin a awm zel dawn e, banglovin i tawngtaipui zel ang u. Zirtawpni chhun chuan Chanadipa chhuah sanin, Birpara Mission Compound-ah bawk chuan kan invawmlut leh a, Zirtawpni chawhnu leh Inrinni zingah Birpara Mission Compound-a School tukverh leh Pulpit-te kan siam leh a, Inrinni chhun chuan Birpara atang hian Bhutan hi hnaite anih avangin kan va tlawh a, an khawlai a faiin a thianghlim ngei mai, Mizoram angin meizuk inkhap a ngai lo, zuk ngam chi a ni lo hrim hrim, tlaiah Birpara-ah let lehin a tuk Pathianni chuan Field Director Rev. Joseph Vanlalruata hovin Birpara khawdai Bhagatpara-ah Kohhran thar hawn a ni a, Pu Joseph-a chuan, Vawiin ni 28.11.2010 hian Jehova Jire Baptist Church hi din a ni tih ka puang e, tiin. Birpara Area-ah Lalpan kohhran thar min pek belh leh ta, Lalpa chu fakin awm rawh se! Chawhlui tuihnai tak kohhran ho chuan min lo buatsaih sak a, a va tuiin a van hlimawm em, hnam hrang leh tawng hrang ni mahila Kristaah chuan unau kan va ni chiang em, Pu Joseph-a hi Birparaah zanhnih a lo riak ve nghal a, kawm a nuamin a fel ngei mai, tunlai tawng takin a fel bontop a ni e. Birpara-a kan awm chhung hian kan Missionary-te an felin min van dawl zo tak em, kal ngai loh nen, tawng thiam loh nen, Bazar dawn ila, Min kalpui rawh u, kan han ti a, i he lovin min hruai dawr dawr mai a, kan van tibuai thin tak em! Pu Siamkima Vice-Principal chuan pa chan a chang thiam ngei mai, an zavaia chungah kan van lawm tak em! Ringthar ten Pathian fakna hla an han sa that that mai chu a ngaihnawmin a hmuhnawm ngei mai (Luka 10:23-24), Pathian hi an fak bik hliah hliahin ka hria. Aw le, ni 29.11.2010 zing dar 3:00-ah Birpara atang chuan Pu Josephan tawngtaia min thlahin kan khaw lam panin kan haw chho leh ta vung vung mai a, a lunglen thlak hle mai. Shillon-a BCM Madanriting-ah kan riak chho a, Shillong-ah pawh Baptist Church of Mizoram a lo awm zel mai, Baptist kohhran nih hi a lo 6

va nuam em! An Chowkider (a hming ka theihnghilh tlat) kha a va fel tak em, Shillong thlasik khaw vawt tak maiah zing dar 5:00 ah Tuilum intur Biak in kawtah zuk chhawp thei a! Tichuan ni 30.11.2010 zan chu Kolasib-ah kan riak chho leh a, Kolasib a kan Baptist Kohhran te hi a lawm ka fak em em mai chu, zan dar 10:00 velah kan thleng a, BMP leh BKHP ten Thingpui nen min lo hmuak anih chu! a zah thlak zawnga lak dawn chuan a zah thlak rum rum mai a lawm le, in rawngbawlna Lalpan malsawm zel rawh se. Missionary Tlangau kal tlang hian lawmthu kan rawn hrilh mawlh mawlh a che u. Hmuntin maia Baptist kohhran kan lo inzarpharh hi a lo va hluin a van nuam em, hah te pawh an tidam sawng sawng zel alawm.Tichuan ni 1.12.2010 Christmas thla intan ni chiah chuan kan khua Hnahthial chu tlai dar 3:00 velah kan thleng leh ta, Biakin tualah kan nupui fanaute leh kohhran hovin min lo hmuak a, naupang lawm leh thiannute lawm kan ak haw hnem bawk a, kan han inchibai sup sup mai chu, kan hlimzia kha aw! a aia hlimna tur a awm chuangin ka ring lo, suma lei tur nise a van to dawn tak em! Aw le, Pathian hruainain Chanadipa Work-Camp chu ni 18.11.2010 - 1.12.2010 chhungin kan zo fel ta der mai. Lalpa min hruaina leh min enkawlna hi a va ropui tak em, Lalpan kan Unit BMP te Ramthima a Biakbuk sa tura min han thlang tlat mai hi mak kan tiin kan va lawm tak em! Lalpa chu fakin awm rawh se! Tin, kumin 2010 hi kan Unit BMP Silver Jubilee kum a ni a Silver Jubilee kum a Ramthim a Biakin kan han sa thei te hi kan lawmna ti zualtu a ni. Aw le, a tawp bera ka sawi duh chu kan Missionary-te hi hun puma rawngbawl tura inpe an ni a, an mahni chuan an phut lovin sawi hauh lo mahse, tuna an awmdan ngawt aia an Service Rules hi tihthat deuh a van tha em, an phun lo ve tih avanga la tha tawka ngaih reng mai hi a dikber lo mai thei a ni. Kan Missionary te hi Promotion post siam ve dan awm thei se a va tha em, entirnan Field Director te hi ni ve thei ta sela a tha viau lo maw le, Pastor deputation a dah zel ai hi chuan Missionary Seniority post te ni ve ta sela, Field kalphung hre sa leh a ram mite tawngthiam nalsa an ni dawn bawk si a, hmasawn pawh a awl zawk daih lawng maw ka ti. 7

Tin facility te hi tha deuh zawkin pek theih ni ta sela a tha hle in ka hria. An quarters te pawh hi thuam that deuh nise; hlawh chungchangte pawh hi ennawnsak a va tha em, thil man a sang tawh si, sawrkar hnathawk pawn 6th Pay an hmang vek tawh si a, hlawhsan phuta thawk chu an ni lo na a, an dinhmun hriat thiampui a tha hle a ni. Hetianga an Service Rules kan siam that theih phawt chuan lawm lehzual chungin rawng an bawl thei ang a, Lalpa ram pawh a zau phah lehzual ngei ang. A tawp ber vawihnihna atan MissionField a Work Camp neih hi a van tha em i chhunzawm zel ang u, sum tuak nan nasa taka thawh a ngaia inpumkhatna min siam a, thlarau lamah pawh hlawkna kan chang nge nge, ram hmuhzauhna tha tak a ni, zuk leh hmuam ringtharte hian an ngaitheilo tlangpuia kan zingah pawh zuk leh hmuam tun thlenga nghei phah an awm nual mai a ni. kan Missionary leh Mission Field a thawktu zawng zawng tan i tawngtaipui zel ang u. *****************

Tin Baje!
Maz & Ezzie* 4th March, 2011 Kan Midum unauten, Tin baje, an sawi thin ang deuhin, kan tan pawh March ni 19, 2011 hi Australia-a kan hun tawpna tur kan Tin baje, a lo ni ve dawn ta der mai. Kan Australia cham hun chhung pawh a lo liam tep ta. Kum khat chhung hi a lo rei lo khawp mai. March ni 13, 2010-ah Australia leilung kan rawn rap tan ve a. March ni 13 2011-ah chiah Brisbane khawpuia kan lawina kohhranah min thlahna inkhawm buatsaih a ni leh chiah dawn a ni. March ni 18, 2010-ah tuna kan awmna unit/apartment-a awm turin kan lut a. March ni 18, 2011-ah chiah kan chhuahsan leh dawn bawk a ni. Chuti anih chuan Australiah hian ni 370 chiah chiah kan awm dawn tihna a ni. Cham deuh rih pawh tum ila, March ni 19 hnu lamah chuan dan lo anga Australiaa awm kan ni 8

tawh dawn a. Engkim tan hun ruat a ni miau va, helai kan hun awm hun pawh a lo tawp ve leh dawn ta a ni. Lalpan min kohna hmun ngei alpan min kohna hmun ngei , ,, , a ram leh mihring hmel hmuh hlan kan nghak hlel hle mai. mihring hmel hmuh hlan kan nghakhlel hle mai. Thlaleh tun ang hunah chuan Lalpan rem a tih chuan tawng zirin kan buai tan chho viau tawh ang. Tawngtainaah min lo hre zel dawn nia. Kan awm chhan: Helaia kan awm chhan ber training leh kohhran tlawh kual chu Pathian hruainain tluang takin harsatna awm miah lovin kan ti zo thei a. Kohhran ngawt pawh 25 ngawt kan tlawh reng mai. Support pawh kan hmuh belh chho reng bawk a. Tunah tak hian engzat percent nge tih kan hre thei rih lo. Kan rin danin 65 70% chu tling chho ve tawh turah kan beisei. 100% kan hmuh chhoh ngei theih nan tawngtai chhunzawm zel ila. Kan lawina Kohhran: Kan lawina kohhran City Tabernacle kohhran-te pawhin an kohhran atanga Missionary-a chhuak angin min pawm ve ta bawk a., hei hi a ropui hle. Hei hian kohhranhote tawngtaisakna leh sum leh pai support engemaw zat chu a keng tel ve bawk a ni. Kan sawi tawh thin angin he kan lawina kohhran hian min ngaihsak hle a. Rawngbawlna chanvo chi hrang hrang thuchah sawi rawngbawlna thlengin ui miah lovin min pe bawk thin a, a lawmawm tak zet a, Pathian hnenah lawmthu awm se. Brisbane atanga kan thlawh chhuah hun tur hi zan 11:45 pm-ah a ni dawn. Kan Senior Pastor phei chuan zan rei tawh ni mahse airport thlengin a thei theiin tawngtaia rawn thlah liam che u kan tum ang a ti hial a ni. Car: Kan thlen tirh atangin engmah tlachhamin kan awm lo. Sam 23-na hi a dik khawp mai. Kan in kan chhuahsan dawna ka nu Bible chang min chah a ni nghe nghe. Lalpa chu mi vengtu a ni a, Lalpa chu mi vengtu a ni a, Lalpa chu mi vengtu a ni a, Ka tlachham lovang, tih hi a dikzia kan hmu zel a ni. Pathian hnenah kan dil thin a, kan vahkualna tur a tam dawn si a, mi dangin min 9

kalpui reng thei dawn si lova. Keimahnia motor neih ve a tulin kan hria a, tawngtai phawt mai ang kan ti a. Vawi engemaw zat kan tawngtai a, a chhanna kan hmu mai lem lova, kan mamawh lo aniang e tih pawh kan ngaihtuah hman hial a ni. Mahse Lalpan a hun takah motor secondhand car var, la thar tha leh nalh tak mai, kan neih phak miah loh tur min pe ta tlat mai. Keimahni ngeiin kan kohhran tlawhnaah mi dang tibuai lovin kan tlan ve pur pur mai. Hei hi Lalpan min pek a ni. Kan support: Mizo rilru nena inmil vak lovin helaiah chuan kohhran kan tlawh kual hian mi mal leh kohhran ang pawhin sum leh paia min tanpuitu tur kan zawng kual pah zel a ni ber. A chang chuan kan tlawmngai ve deuh thin. Mahse he kan thil tih kaltlang hian testimony tam tak kan neih phah thung a ni. Nikum engemaw lai atang tawh khan kan thinlungah Exodus-a Lalpan awm hle hle mai rawh u a tih te, Sam 121-na thu Mi tanpuina tur chu Lalpa lei leh van siamtu hnena mi a lo thleng angnangmah vengtu chu a muthlu lo vang tih te, Daniala thianten Nebukadnezzara hmaa an sawi min chhanchhuak dawn lo mah sela tih te, a tam mai. Kan sawi seng lovang. Heng Bible changte hian tih theih tak tak kan neih lohzia te, a thawktu tur chu Amah min kotu Lalpa a ni tih te, leh heng kan support hmuh tur ang hi Lalpan a duh chuan min pe thei ngei mai, mahse min pe rih lo pawh nise kawng dang kan hawi thei tawh lo, kir leh thei kan ni tawh lo, min kohna hmun hi kan thleng tho tho tur a ni tih te hi Pathian hma ngeiah pawh kan inpekna ti thartu, kan testimony dawn te an ni thin. Heng atang hian Pathian rinawmzia a takin kan hmu zui fo thin. December thla tir lam khan kan support level kha 30% hnuai a la ni ve ngawr ngawr a. Kan hun a tlem tawh si a, Tih theih vak awm si lo hian kan rilru pawh a tang nasa ve hle thin. Tawngtaina bak tih theih kan nei lo tih kan hria a. Kohhranhote min tawngtaipuina nasa takte avangin mak tak maiin Lalpan mi pakhat tunge a nih pawh kan hriat loh hmangin kan support level chu 20% velin a rawn belhchhah dawrh 10

mai a. Keini pawh min sep kang dawrh a ni ber mai. Kan hriat veleh thingthiin mittui nen Pathian hnenah lawmthu kan sawi nghal a. Tichuan mi mal leh kohhran atangte pawhin a rawn lut chho ve zel a. Kan sawi tawh angin kan lawina kohhranah ngei pawh Lalpan hna a thawk chho ta a ni. Anni hian an ministry plan anga thil a kal chhoh chuan kum khata kan mamawh 25% vel lai chu an rawn tum ve chho turah kan ngai bawk. Lalpan ropuina chang se. Kan lawm e: Mi mal, chhungkua leh kohhran, min tawngtaisaktu zawng zawngte chungah Pathian hmingin lawmthu kan sawi bang lo a ni. Nangmahni avangin vawiinah hian Lalpan hei leh chen hi min hruai thleng tawh a. Min kohna hmun leilung ngeiah kan lut dawn mek ta a nih hi. Pathian hnathawh chanchin sawi tur kan neih zel theih nan in mi tawngtaisakna bawk kan ngen a ni. Student Visa: Thenkhat hnena kan sawi tawh angin tunah hian Student Visa kan dil mek a. Kum khat chhung awm theihna permit a ni. Australiaa kan awm chhung ngeia he kan visa hi hmuh kan mamawh hle. A nih loh chuan tlemin a buai thlak deuh dawn a ni. Student visa hi kan hmu lo a nih pawhin Australia hi kan chhuahsan tho tho a tul dawn a ni. Tawngtaina tur: 1. Student visa Australiaa kan awm lai ngeia kan hmuh nan. 2. Brisbane atanga Bandung kan panna tur atan. 3. Hmun thar boruak thar kan tawnna tur atan Pathian hruaina 4. IB hnamte Lalpa lam an lo hawi nan. 5. IB hnamte hnena Chanchin Tha hrilhna kawng Lalpan min pek theih nan. 6. Tawng kan zirna tur atan. 7. Tawngtai leh sum leh paia min support-tu an lo pun zel theih nan. ADDRESS: 11

* Kan hming hi security thil avangin hetiang hian ziah thin a ni dawn a ni. Kan postal address hman lai hi helai kan chhuahsan dawn avangin hman a remchang tawh dawn lo a ni. Email lamah chanchin kan inhrilh chhunzawm zel thei tur ah kan ngai. (He lehkha thawn hi kan rawn chhuah tlai deuh a. Tunah chuan Rev. Lalfakzuala Hrahsel te chhung hi Indonesia-a Bandung khua, an khawpui ber Jhakarta atanga hla vak lovah a ram mite tawng zirin an awm mek. An fa pahnihna tur Pi C.Lalhmachhuani (Tetei) hian a pai mek. An tawng zir pawh a tluang e. April thla khan Student Visa hi Singapore-ah an hmu fel ta bawk. Lawmthu sawi chungin an tan i tawngtai chhunzawm zel ang u. Ed.)

*********************** TUICHAWNG CAMPING REPORT TLANGPUI R.Buatsaiha, Secretary, Mission Comt,. BCM Ramzotlang, Serkawn. Pathian khawngaihna avangin keini BCM Ramzotlang, Serkawn chuan kum sarih kan tlin thla April, 2011 a lo thlen meuh chuan Mission Field ah tumli (4) lai mai a huhova rawngbawlna kan lo nei ve ta reng mai hi a ropuiin Pathian malsawmna kan dawn a ni tih hi phat rual a ni lo. Rampawnah tumhnih Field fan a ni a, tumkhat workcamp neih a ni tawh a, kan hlawkpuiin zawng chhang thlak pawh kan ti hle. Kumin 2011 ah hian Planning a kan neihsa pawh ni lovin Lalpa thahnemngaihna zawk avangin Tuichawng, Ramchhung Mission-ah Salvation Camping buatsaih sak tura sawmna kan dawng nawlh mai a. Tualchhung kohhran Committee chuan he sawmna hi Pathian Aw a ni tih hria in Dt.27th -30th April, 2011 khan Camping hi a buatsaih ta a. Camping Report tlem ziak pahin Ramchhung Mission (Chakma) a Pathian ram tulzia leh 12

thlarau bote manna hun remchang a inhawn thu Missionary Tlangau chhiartute leh kohhran hote hriat atan ziak hi tul tlatin ka hria a. Ka thiam loh dan ang angin ka han ziak ve a ni. Dt. 26th April, 2011 10:00 a.m-ah Kohhran Chairman Upa Dr.F.Lianchhingan Pathian awmpuina dila tawngtai a min thlah hnu in Tuichawng panin kan kal a, 2:15 p.m-ah tluang takin Tuichawng kan thleng a. Tuichawng a kan Missionary ten lawm takin min lo dawngsawng a, Pu R.Nghakmawia Headmaster Inah lutkhawm in E.T Tuikhurliana Pathian hnen a lawmthu sawiin a tawngtai a, thlenin min ruatsak hnuin Camp na hmun torah bungruate kan dah fel nghal a. Camping na hmun atan hian Community Hall hman a ni a, eirawngbawlna leh BCM Ramzotlang atanga kalte inkulh nan camp-na hmun bul mai a Forest Quarter hman a ni a, a remchang in Forest Department chungah pawh an Quarter min hmantir avang hian lawmthu kan sawi e. He Camping-a rawngbawlna min hmansaktute hi Mar South Circle Chakma Evangelist Team leh Tuichawng Circle Team te an ni a. Speaker ah Pu Somoroton Mar South Circle Evangelist Team Speaker a ni a. Director ah Pu Rupendro, Tuichawng Circle Speaker niin Councellor ah team member te ve ve hman an ni a. Tawngtai khawlah Tuichawng kohhran hruaitute, Missionary te, keini ho eirawngbawl a buai lo zawng leh, eirawngbawltute pawh kan tawngtai bawk a. Tin, Ramzotlangah hian tawngtai khawl BKHP te bul tumin a awm bawk a; Buddhist sakhaw zuitu rinawm takte zingah, Buddhist hmunpui ah camping hi kan neih avangin tawngtai nasat a tul ani tih kan hria a. Tuichawng a kan Missionaryte phei chuan hun engemaw chen atang tawh khan chawnghei tawngtaina an lo hmang tawh a ni. Heng bakah hian kohhran hrang hrang ten min tawngtaipui tih kan hria a. Kan tawngtaina avangin Pathian hnathawh ropui tak kan hmu ta a ni. Lalpa chu fakin awm rawh se. He Camping a rawngbawltu hrang hrangte hi sawilan tulin ka hre tlat a, a chhan chu he Camp-ah hian Indona nasa tak a awm ani SETANA leh LAL ISUA. Sawi tawh angin Tuichawng hi Mizoram a Buddhist hmunpui pahnih te a a pakhat zawk a ni a. 13

Mandir lian tak a awm a, an Puithiam (bante) rualin an thutchilh hmuk a. Jeriko kulh nghet tak ang khan helai hmun Lunglei atanga darker li (4) lek kalah hian Buddhist kulh nghet tak mai a lo ding luah a ni. He Indonaah hian, keini lamah chuan ; Chakma Evangelist Team pahnihte, Missionary 20-te, Non Mizo Evangelist Pu K.Lalmuanawma leh Pu Thara te, keini ho member 11 leh Tuichawng a ringtute leh BCM kohhran engemaw zat min tawngtaisak tute kan ni. Indona chu Lalpa Indona a ni a, hnehna chu Lalpa ta a nih angin hnehna chu Lalpan a chang zel ang. Thil kan hmuh leh kan hriatte: He camping a kal kohhran hoten thil kan hmuh leh kan hriatte tam tak sawi tur kan nei a. Chung zing a tlem a zawng chauh kohhran hote hriat atan tarlang ila: 1. Tuichawng hmun a BCM Missionary-te an vain an nupui pasalte nen 19 an ni a. Kan hmuh danin heng kan Missionary te hi Lalpa ruat an ni ngeiin kan hria, an rawngbawlnaah lungawi thlak kan tih rualin lehlamah chuan an thawhna hmun ringthar siam chungchangah an sak em em a, Buddhist kulhpui a ni kan tih tawh kha, an thahnemngaihna leh an thawhrim a an vei ang hu a ringthar an pungchak thei lo hi hreawm kan tih puiin kan khawngaih hle a ni. I tawngtaipui mawlh mawlh ang u. Kan cham chhungin Missionary-te nen kan inpawh tha em em a, kan thawkho tak tak a ni. Kan Missionary te hi an hriselna a tha lo hlawm hle mai a, tawngtainaah i hre reng ang u. 2. BCM in Chakmate zinga rawngbawl tura Chakma Evangelist Team a din hi Lalpa tih a ni tih hi kan hmuh dan a ni. Heng Evangelist Team te hian an chipui thlarau boral mekte hi an vei tak tak a, Krista hnen a hruai turin tih tak meuhvin thahnemngai takin, dodalna leh vauna karah Krista Chanchin Tha hi an tlangaupui a ni. Heng team memberte hi chhungkaw khawsak harsa tak tak te an ni a, an tan rawngbawl a chhuah reng mai chu a harsa em em a, an duh ang leh inpek ang pawh in Lalpa tan an pen chhuak hlei thei lo a ni. Tanpui an ngai ngawih ngawih a, tawngtaisak an mamawh reng a ni. Tin, Team te hi Orientation Training neihpui an tul hle in kan 14

hria. Chakma ngeiin Lal Isua Chhandamna thu an puang hi Chakma zingah a tla na a, a sawt em em a, tuna an dinhmun thlir erawh chuan Pathian thu thiam an mamawh ngawih ngawih a ni. 3. Chakma Mission-a kan rawngbawlna hi tih tak tak a kan kalpui chhoh zel hi a hun tawh hle. Chakma Mission thlir letna leh Survey Report kan thlir chuan Chakma zinga rawng kan lo bawl dan hian duh thu a sam lo em em a, tih tak tak in kan lo bei lo niin kan hre tlat a ni; Bru zinga kan rawngbawl angin Chakmate hi rawng kan bawlsak lo deuh, Tripura, Arunachal, Rabba etc. te zinga rawng kan bawl ang hian Chakmate zingah hian rawng kan lo bawl lo niin kan hria. Sakhaw nghet tak nei sa, sakhua a nghet tak lo ni tawh kan beih dan hi a lo chak tawk lo a ni. Lalpan min ngaidam sela tunah hian kan rawngbawl dan kan her rem chho mek a. Chakmate pawh an inhawng a, thapui chhuah a kan beih chuan Hnehna chu Lalpan a chang zel ang. Kum 2010 a Chakma a Survey neihah chuan Mizoramah hian Chakma mi 1,13,722 an awm a, an zinga mi 4,987 te chauh Kristian an la ni a nih chu! Kristian hi 4.38% chauh an la ni a, hna a va tul em. Kan thlawhhmaah hian Thlambul hnim bum thlawhfai tul em em in kan awm niin ka hria. Kan tapchhak zawl ngei ah Lal Isua min Chhandamna thu hre lo, chhandam ngai ka ni tih in hre lo, chhandam ngai si an va la tam em! Chakma zinga kan rawngbawl tan atang chuan kum 72 a lo ni reng tawh mai, tunah hian Bible pawh an la nei mumal lo a ni. Keini ringtu hnathawhpuitute hi Lal Isuan min dem mai angem le? Chakmate hi an in hawng a, tun hi rawngbawl hun tak a ni. Buh te an eng a an hmin zo ta e, tunah hnathawktute chauh an nghak e, i thawk chhuak thei dawn em? Rawtna leh sawmna : Chakma te zinga kan rawngbawlnaah hian, ringthar kan lo neih tam zawk theih nan, kan vai huam reng chung hian neih bitum bik nei a rawngbawlna telh a tulin kan hria a, kan rawt e. Kan sawi taw hang khan Lunglei atanga darkar li (4) lek kalah hian Buddhist kulhpui Tuichawng ah a awm a, he Buddhist kulhpui thiat tur hian Lunglei khawpui a kohhranhote hi i tangrual 15

ila, beihpui thlak reng ila, Lalpan hnehna a chang ngei ang. Ringthar siam nan a hlawkber chu Salvation Camping buatsaih a ni. Mission Field tlawh a kan fehchhuak thin te, Work Camp kan neih thin te hi a tangkai em em rualin, ringthar siam nan chuan a hlawk ber lo tlat a ni. Kan thawktute leh a fehchhuak te tan a hlawkin min fuih thar tu anih reng lai hian Camping tluk chuan ringthar a siam lem lo niin a lang. Aw le, Tuichawng a Ringtu dinhmun han sawi lawk ila, Tuichawngah hian mihring 3,100 an awm a, ringtu Kristian chu 334 chauh an awm a ni, ringtu chu zaah sawm vel chauh an la nih chu. Baptist kohhran pahnih BCM Tuichawng (180 vel) leh BCM Zero (60 vel) an awm a, Presbyterian kohhran (80 vel) pakhat a awm bawk a ni. Kan rawngbawl dan chu School hmang in a ni ber a, Home visit te, Open Air Service te, Home Crusade te hmang in Missionary ten rawng an bawl reng a, kan Missionary te sawi dan in ringthar siam nan chuan hautak deuhvin lang mahse Camping neih hi a hlawk ber a, a khat tawk a neih reng theih nise chuan ring thar hi kan neih belh reng thei ngei ang. A tawp nan, keini kohhranho a bikin Lunglei khawpui chhung a mite hian Tuichawng Buddhist kulhpui hi Lalpa chakna rinchhanin, Thilpek, Tawngtaina leh Mahni ngei che chhuakin i bei ang u. Kan Missionary te hian puih an ngai a nia, kumin a Camping kan zuk neih boruak kal lai hi tinung zelin, helai hmunah hian Lal ram i din ang u. Kan Missionary te hian Camping buatsaih turin sum an nei lo, keini chuan kan phal chuan kan nei a ni. Helai hmun a Salvation Camping buatsaih saktu tur an va mamawh em! He thuziak tlemte hi Lalpa thahnem ngaihna a ni tih hria a, kohna chhang turin kohhranhote Lalpa hmingin ka sawm a che u. Tu kohhranin nge he sawmna hi chhang dawn le? Tawngtaipui an ngaihnate : 1. Kan Missionary ten Hriselna tha tak neia thahnem ngai taka rawng an bawl zel theih nan. Hmun lum leh Malaria tamna a

16

2.

3. 4.

5.

ni a. Hrisel lohna kawng hrang hrangin kan Missionary-te a tlakbuak reng a i tawngtaipui ang u. BCM Tuichawng hian kumin 2011 hian Buddhist atangin ringthar 50 siam an target a ni. An Target hi an tlin ngei theih nan i tawngtaipui ang u. BCM Zero hian Biakin an sa dawn a, an sak puitlin ngei theih nan. Chakma Evangelist Team te tan, Pathian thu hriatnaah te, Piantharna tak tak an neih theih nan te, an chipuite veina tak tak an neih zel theih nan leh rawngbawlna an hlen chhuah zel theih nan. Chakma ringtute leh kan thawktute lungrual taka an thawhho zel theih nan, Setanan nasa takin a bei a, kohhran chhungah inpumkhatna tih chhiat tumin kawng hrang hrangin a bei a ni. I tawngtaipui ang u. Lalpan malsawm rawh se, Amen.

(Upa Buatsaiha thahnemngaihna hi a ropuiin a lawmawm tak zet. Lalpan July, 2010 - June, 2011 chhunga Mizorama Chakma hnam zinga kan rawngbawlhona mal a sawm a, mi 850 chuangin ringthar Baptisma changin, Biak in 12 lai a ding thar ta. Thawh tur erawhchu kan la ngah hle mai! I tang sauh sauh ang u. Ed.)

********************

REMA LEH BEII CHANCHIN THAR

8th June, 2011 Hui khua-ah zan khat riakin : Kan chanchin lo chhiar thin chuan in la hria ang a. Kan thianpa Eric-a kan tih kha ke leh 17

lam zeng a ni a. Nikuma University a zawh dawn hma ni chiahin bike chesualah a pain a boral san a. March thla khan min lo tlawh a, amah ngeiin Baibul min dil a, phur takin kan pe a. An khua-ah zirtirtu hna a hmu a, nupui a nei ta bawk a. An khuaa zin turin min sawm fo thin a. Remchang lain May thla chawlh rei lote kan neih lai khan Rema a va zin ta nge nge a. An khua tak chu a la thingtlang ve hle a. Kalkawng pawh la metal loh a ni a, a khu ve khawp mai. In 50 vel a awm a, an vaiin kan tum bik Hui hnam awmna a ni a, Isua hming la lam ngai lohna hmun a ni. Nipui intan tir mah ni se, thlaler a hla lo bawk a, a ro hle mai. Leilung ro avangin tui a harsa a, mi an rethei a, kan awmna province-a thingtlang pilril zual te chu sawrkarin khawpui hnaihah a sawn chhuak nual reng a ni. Phur tak maiin an lo mikhual a, Eric-a nupui leh a laizawn ten hlim takin ei leh in an lo siam sak a. Titi hona hun tha tak an nei thei a. Haw dawnah chuan Baibul leh Isua film te, Pathian thu tape-a ngaih thlak turte, Bible thawnthu leh Chhamdamna chanchin thu ziak te a pe a, hlim takin an in haw san a. A hnu-a kan inbiak leh chuan Pathian thu an ngaih thlak chu ngaihnawm an tih thu a sawi a. An nunah heng te hmang hian Isua inpuang chhuak se tih hi kan tawngtaina a ni. Tawng zirna : Chainis tawng zirna kan la chhunzawm ve tlauh tlauh a. Beii pawh nitin class a la kal a, a pa boral avanga a haw chhunga an lo zirsan pawh a um pha leh tep tawh e. Tawng mai chu kan harsat lutuk lova, chhiar leh ziah hi a har ve khawp mai. Pathian zarah hma kan sawn ve zel a, min tawngtaipuinaah lawmthu sawi chungin min hre chhunzawm zel turin kan ngen che u a ni. Zirlaite nen inhmuhna : Tun Semester-ah hian engtinge rawngbawlna hma kan lak ang kan ti a. Zirlaite class pakhat zela kan ina lenga sawmin, cake ur inzirtir pah a, inkawmhona kan buatsaih a. Chawlhkar tin Inrinni zanah kan sawm thin a ni. Beii hovin a thenin cake an ur a, a thenin Rema hovin games te an 18

khel a, kan bengchheng thei hle! Hetiang hun kan hman ho atanga Hui thiante siam a, University Campus kan chhuahsan hunah pawh kan la inkawm chhunzawm zel theih nan kan ti a ni. Ring tharte : Hman deuh khan kan thianpa (zirlai) pakhat, ringtu tha tak mai, Chanchin Tha rawngbawlnaa tui em em mai chuan an kohhran (In Kohhran) ah Hui thiante an kal ve thin tih a sawi a. In hriat angin keini ramdang mi tan va inrawlh a theih loh avangin, amah kal tlang hian Baibul pahnih, Muslim hote hriathiam zawnga lehlin chu kan pe a. An inkhawmna chanchin kan zawh leh chuan Hui zirlai 4 te chu ringtu-ah an inpe a. An zinga pakhat chu Rema zirlai hlui a ni nghe nghe a. Baibul kan pek pawh a hlan chhawng tawh a ni tih min hrilh a, kan va lawm em! Tunah hian kan thianpa hi a zirna a zo dawn a. Zirlai zinga hun puma rawngbawl turin kan awmna hmunah kum 3 vel la awm chhunzawm a tum a, kan theih ang angin kawng hrang hrangin kan tanpui ve thin a ni. Hui hnam ho zinga rawngbawl a tul ziate kan sawipui thin a. Han Chainis ringtuten Hui hnam ho veina nei a, anmahni hnam mil leh hriat thiam zawnga Chanchin Tha an hrilh theihna tura tawngtai turin kan sawm che u a ni. Min tlawhtute : April leh May thla khan kan Field-ah tlawhtu kan ngah hle a. Australia atangin team pahnih, mi sawm panga velin min lo tlawh a. GIA-a kan hotupa ber lo kalin kan lo mikhual bawk a, kan buai ve hle. Heng min tlawhtute hi kan zirlaite nen hun tha tak an hmang hova, Isua ringtu an ni tih leh an lo nihna chhan te an sawi a, kan hlawkpui hle a ni. Khual tha : Kan Hui thiannu Lara, kan khaw bul hnaia zirtirtu thawk mekin min lo tlawh a duh thu a sawi a. Hun rei tak kan inhmuh tawh loh avangin min ngaih thu a sawi a sawi ve thin. A hnenah hian Pathian Lehkhabu pawh kan pe tawh a. Nikum khan an khuaah zinin an chhungkua leh thenrual tha te zawng zawng nen hun hlimawm tak kan hmang ho tawh a ni. May ni 29 19

khan a thiannu nen min lo tlawh a. Chaw te kan ei pui a, riak tura kan sawmna lawm takin an pawm a. Hlim takin kan inkawm hova, Pathian thute pawh kan sawi pui a. Pathian Lehkhabu leh Isua film te, leh Pathian thu ziak dangte kan pe a, lawm takin an dawng a ni. Remchang hmasa berah an khuaah zin turin min sawm ve a, Pathianin rem a tih chuan la tlawh leh ngei kan tum a ni. Chhiat tawh chungchang-a lawmthu sawina : Beii pa Pu K. Lalzarliana chuan April ni 18, 2011 khan cancer avangin chatuan ram min pansan thut a. Chhungte nena hun hman ho kan duh hle laiin Field tlawhtu kan ngah lai tak a nih avangin kan nupain kan haw thei ta lo va. Beii chu April ni 20 khan a lo haw a. Tawngtaina kan dawng nasa a. Pathian Thlarau Thianghlim awmpuina leh thlamuanna nasa takin kan dawng a, kan lawm hle a ni. Tin, Beiin a u nau neih te a han nangin a buaipui ve thei a. May ni 14 khan tluang takin a lo let leh a ni. Min tawngtaipuitu zawng zawng te chungah lawmthu kan sawi nawn leh a ni. Tun hnai ruahmanna : A hmaa kan sawilan tawh angin September 2010 June 2012 chhung hian kan nupain full-time in tawng kan zir dawn a. University-a kan in chhuahsanin apartment thar June thla tawp hian kan luah dawn a, zirtirtu atangin zirlaiah kan inthlak rih dawn a ni. July ni 18-25 chhung hian Chiang Mai-ah GIA Team Leader (Fd. Directors) intawh khawmnaah kan tel ve leh dawn a. Tunah hian class te kan zo fel tep a, kawng hrang hrangin kan hmachhawp te ti hlawhtling turin kan inpuah chah ve mek a ni. He hmunah hian Pathian hnathawh a kal mek zel a. A thu awiha kan lo awm ve ringawt pawh hi Pathianin a hunte-ah a duh angin a hmang ve thin a lo ni. Hui hnam zingah Chanchin Tha a lo thlen zel theihna turin tawngtainaah min hre fo turin kan ngen che u a ni. **************** 20

Baptisma ka chan hma chuan tualthah ka pawisa lo. J.Chhawnkimi, Instructress Arunachal Pradesh ( W ) field Thu chhuah tur pawimawh tak tak a awm teuh mai a, tun tum a tan chuan kohhrante leh mimal thahnemngai tak tak te tawngtaina (in tawngtaina) chhanna hi lo en teh ule . A hmasain kohhrante leh mimal Pathian hmangaihtu te u, in zavaiin, kan Lalpa Isua Krista min hmangaihtu hmingin chibai ka buk tak meuh meuh a che u. In rawngbawlna Lalpan malsawm zel rawh se. (1) Dt 26.6.2011 niah mi 12 in Baptisma an chang :- Heng Baptisma chang te hi an mimal chanchin a ngaihnawm hlawm khawp mai, a then chu Hindu atanga rawn inlet te an ni a. Taba Tema hi kum 47 mi a ni a Hindu a ni a, nasa takin a dam lo a, Sialte hmangin, sum tam tak sengin an inthawi a. Damdawiin lianah phai lamah an kal thul, engmah a ang thei lo a. Kristiante min kova a luah malsawm sahriak kan thih sak a, kan tawngtai a, hlate kan sa a, a dam ta a. A inthawina a hal vek a, Baptisma a chang a, a hlim ta hle a ni. Amah hi V/C member a nia, nupui pahnih a neia fa panga a nei a, a pa hi kum 95 putar a ni a, an chhungkua tawngtaipui an ngai hle e. (2) Tualthah ka pawisa lo :- Baptisma chang zingah Sawmpa-i hi a lawmawm hle mai. Baptisma a chan zawhin Lalpa zanriah ei hmain Pulpit hmaah an vaiin an ding tlar a, kan Field Director Rev.Laltanpuia Kawlni in Certificate hlanna te neiin an tan kan tawngtaisak lai chuan a tap nasa em em mai a. Dt 28.6.2011 ka quarter-ah a lo kal a, lawm thu leh a chanchin a sawi a. Tun hma chuan ka sual em em mai a, ka thinrim chuan, mi tu pawh hi khawih hrep ka duh mai zel a, ka pasal pawh ka hlau lo thah mai pawh ka pawisa lo a ti a. Mahse tunah chuan mithar ka lo ni ta a. Baptisma ka chan rual rual khan keimahah Isua a lo nung a, ka sualna zawng zawng a ti bo tawh a ni a ti a. 21

Sawmpa-i hian fapa 1 leh fanu 1 a nei a, amah hi kum 24 mi lek a la ni a, a fanu chu kum 4 a ni tawh a a la tawng thei lo a, tawng chu a hre veka a tawng theih nan i tawngtaipui ang u. A pasal hian zu a rui reng bawk a tawngtaipui a ngai hle. Amah hi rinna lamah a huaisen viau a, a huaisen zel nan te. (3) Hindu ka thiante Bible ka pe ve ang. :- Tok Honia-a hi Madras ah Engineer zirlai a ni a. Baptisma ka chang hi ka lawm tak zet zet a ni. Nitin Bible chhiar leh tawngtai hi ka duh a, ka ti zel ang a, ka thiante pawh Bible ka sem ve ang a ti a. Bible 10 kan pe a July 3, 2011 ah a zirna chhunzawm turin Arunachal a chhuahsan dawn a amah hi tlangval a ni , tawngtaipui a ngai hle mai. Baptisma changthar kan neih hian kan lawm tak zet zet thin a, nangni chuan in rawn hmu pha lo a. Keini chu in thilpek leh in tawngtaina rah hmu in biangah lawmna mittui a luang fo thin e. (4) Kan Field Director leh ramhuai an inmelh rum :- May 18, 2011 zan darkua (9) a ni tawh, phone a ri a. Madam lo kal rawh nula Monjui ramhuaiin a tibuai, an rawn ti a, kan Field Director ka phone nghal a. Awka zangkhai takin e ni e tiin min lo chhang a. Khua a nuam lo viau a, eng a thim bawk a, ramhuai hnawtchhuak tur chuan huphurhawm ve tak a ni. Mahse Pathianah kan in tichak a, hlau pawh hlau lo in huaisen takin kan kal ta a. Monjui te chu Hindu an ni a. Ni thum leh zan thum engmah ei lo leh in lo, muhil bawk lo in Hindu puithiam ten an lo thawi char char a, engmah a sawt lo a. A kawlh em em mai a, tawngtai pawh a duh lo a. Mahse Pathian thu Mat.28:18 Lei leh vana thu neihna zawng zawng ka hnenah pek a ni tawh, kan Field Director chuan a chhiar a. A lu chungah kut kan nghat a, Lal Isua hmingin ramhuai chu kan hau a. Kan zingah hian a rammi ringtu 2 an awm ve a, kan vai chuan kan tawngtai a, ramhuai chu a chhuak ta a. Thil mak tak chu Ramhuai chu a 22

chhuah dawn hian rum zet mai hian mit meng danglam takin min rawn melh a. Kan field Director chuan hlau hauh loin rum zet hian a lo melh ve a. Hindu ho inthawina hrui fei deuh patling pawhin an pawh chah zawh loh chu Monjui chuan a pawt chat a. Kan tawngtai hmain a bana Hindu chhinchhiahna chu kan zai chat bawk a. Ramhuaiin a chhuahsan hnu chuan ka riltam a tia, chaw a ei a, a inphihfai a. A luah malsawm sahriak kan thih a, Hinduin an thawina zawng zawngah chuan Lal Isua thisen hluin Lal Isua hmingin dai kan theu a, an kawngka ah chuan rinna in kan field Director Rev.Laltanpuia Kawlni chuan Lal Isua Kross a phun a. Tunah chuan Monjui pawl sawm zirlai kum 17 mi chu phur takin Biak inah a inkhawm thin a. Bible kan pe a, mut dawn apiangin chhiar turin kan hrilh a. Ani pawh hian Baptisma a chan ve ngei nan leh an chhungkaw tan tawngtaipui an ngai. Unau 3 an nu leh pa an vaiin chhungkaw member 5 an ni. Awle, an mimal chanchin ngaihnawm tak tak a tam mai a, heng hi Lalpa tih vek a ni e. Vawikhatah sawi sen mai chi a ni lo. Vawikhat pawh Republic vengah ka thiannu Biakthuami (Bti) te inah zan dar 8 ah ka ding tan a, zing lam dar 2 ah ka tawp thei tawk a. Biakinah kan tawngtai tlaivar ta nghal a, chu mi tum chuan Pi.Biakchhungi Nurse leh Pi Romawii damlo te an dam ve a ni. Lalpa hna thawh dan hi sawi sen rual a ni lo! A makin a ropui a ni. (5) Baptisma hi :- Lal Isua ngeiin Mathaia.28:19 Chutichuan kal ula, hnam tin ami zirtirahte siam ula, Pa leh Fapa leh Thlarau Thianghlim hmingah chuan baptis ula, tia a sawi hi a lo va pawimawh em ve le aw Mizoramah Sunday School zirtirtuah kum 23 lai ka lo thawk ve tawh a. Baptisma zirtirtuah te ka lo awm ve thin a, ka fate leh midang te pawh Baptisma an chanlai hian ka mittui a lo tla zawih zawih thin a, mite an tap ve mang si lo a, engti zia nge ni aw ka ti thin a, ka zak viau thin a. Tunah hian hmana ka tah thin na kha a lo dik a ni. Lal Isuan Baptisma chan hi a ngai pawimawh hle a ni tih a tharin ka 23

lo hre nawn leh ta e, Halleluiah! Lalpa chu fakin awm zel rawh se! (6) Ka puanthui zirtirnaah chuan :- Arunachal mite hian Baptisma an chan hma loh chuan ringtuah an inchhal lo a. Baptisma an chan chiah hian Kristian dik takah an inngai a, meizuk, zu in, sahdah, dawt sawi, sual lam reng reng chu ti tawh lo turah an inngai hmiah a ni. Puanthui zirtir hmain minute 45 vel hi Pathian thu leh hlate ka zirtir ve thin a. Hindu an nih pawhin thla 6 chhung chuan Kristianah awmin Baptisma te an chang a, an khaw lama an hawn hun pawhin an chhunzawm ve zel thin a, a lawmawm teh a sin. (7) Tawngtaipui kan ngai e :- A chang chuan ruahsur emaw khawlum nisa vawl vawlah te dam mang lo chung te, a chang chuan chak lo chung chung pawh a feh chhuah a ngai thin a. Amaherawh chu Mizoram atanga kohhran ho te thahnem ngai taka in lo tawngtai tlatna avangin peih loh chung chung pawh in kan feh chhuak hram hram thin a. Kei phei chu kum 61 lai ka ni tawh a. Kan peih nan te, kan hrisel nan te, chhel taka hrehawm kan hmachhawn ngam nan te, thlarau bo tam tak kan man zel nan te min lo tawngtaipui kan ngai em em asin. Lalpa ropui ber rawh se. (Pi J. Chhawnkimi hi BCM Recognised Missionary, Nyishi Baptist Church Council hmunpui Naharlagun-a Women Skill Training Centre-a Puanthui zirtirtu hna thawk mek a ni. Thlarau mi, a bula awm te chuan zinga tap hluam hluama a tawngtai thawm hriat loh theih loh khawpa tawngtai taima, thlarau bo vei, thahnemngai tak a ni tih hai rual a ni lo! Min ngen ang hian tawngtaipui hi kan bat a ni. Missionary Addressa a phone no. atangin chanchin zawh theih reng a ni e. Ed.) ***************** 24

Tamale, Ghana Remlalliana Fanai, Ghana, West Africa. A khawngaihna leh thatna danglam ngai lova mi enkawltu Pathian leh Kohhran hote bang lova tawngtaina a min chelhtu zawng zawng hnenah a tharin lawmthu ka sawi a ni. Ka Language Evaluation hmasa ber ka han zo ve ta a, hma pawh ka sawn chho ve hret hret zel e. Ka thlen chin atang hian hmabak zir tur leh hmasawnna tur erawh a la tam. Tamale (Northern Region) Ghana SIM team hi kan lian lova, Tamale, Northern region bik ah chuan SIM Missionary Pu Dooshik-a te chhung (Korean mi) leh kei kan ni mai a.Anni hi kum 14 lai helai hmunah hian rawngbawlin an lo awm tawh a, Kohhran phun hna an thawk ber a ni. Dagbon ah hian thingtlang khaw inkar hlat ang reng tak tak a awm a, Dooshik-a leh ka rawngawlpui-te nen Tamale khaw pawn thingtlang hmuna BCA kohhranho awmte tlawh in, hun kan va hman pui ve thin ani.Heng kan kohhran enkawltu pastor-te leh hruaitu te hi tawngtaipui an ngai em em a, mihring ve mai niin, chak lohna leh tlin lohna nei ve vek an ni a. Heng kan hruaitu leh Pastor-te hi an zahin an chung en em em a, he an nihna leh dinhmun pawimawhzia hi an hriat a tul hle. Heng an hruaitute awm dan a zir hian kohhran member-te hi an chakin an chak lo thei si a. Chuvangin thlarau lama siamtharna/inpekna thar nena kohhran enkawl hna pawimawh tak hi an thawh a, kohhranten hma an lo sawn zel nan i tawngtaipui thin ang u. Thalai lam ve thung - Tamale DCC huam chhungah SIM in kan thawhpui Bible Church of Africa (BCA) hian kohhran 12 neiin heng kohhran te te-ah hian thalaite rawngbawlna hian kohhran a ti phuisui em em a ni. Sunday zinga hruaitu, praise & worship kaihruaitu, Bible study hruai, tawng lettu (interpreter) mawhphurhna phur takin, chak takin ang kengkawh thin a ni. Amaherawhchu Pathian thu a fuih leh kaihhruai la ngai em em an 25

ni. Kan sawi lan atang hian heng thalaite tihmasawn tur hian hruaitu tha, kawng kawhhmuh theitu tur an mamawh a ni tih kan hre thiam awm e. An inhawng a, than pawh an duh; mahse, hruaitu tha awm lo chuan an zuih ral leh mai dawn si. Nakin lawka kan hruaitu turte an nih dawn avangin chher hriamtu, kaihruaitu an mamawh em em a ni. Hna thawh tur a tam, thawktu an tlem si! Tunah hian BCA thalai engemaw zat chu discipleship training/programme kal chhohpui mek an ni a, Pu Doo Shik-an a neih puiin, then khat Boarding school-a awmte an nih avangin an school-ah te kan va neihpui thin a ni. Hei lo pawh Lal Isua zui dan zirtir ngai thalai engemaw zatin min la nghak thup a ni. Tawng thiam a tul leh pawimawhzia leh rawngbawlna remchang tam tak hian min tiphur a, min tichak a, an Tawng thiam thuai thuai min ti chaktu ber pawh a ni. Evangelism - BCA kohhran thenkhat-te hi Mission rilru puin, an hnampui te hi an vei ve em em mai a, an theih tawkin feh chhuah leh Chanchin Tha hril program neiin hun an hmang ve thin a ni. Tum khat hetiang hun Pathianni zingah kan nei a. Pitar upa ve tawh tak kum sawmsarih chuang a ni hial awm e, kan va tlawh a damlo kumbetin a lo mu reng mai a. Tawngtaina-te kan va nei a, Pathian thu te hrilhin hun ka va hman pui a, tichuan kar hnih thum liam hnu chuan chumi thingtlang khua kan kohhran ah chuan inkhawm lehin, kan Pastor-in pitar chanchin min lo hrilh a. Kei pheichuan ka lo hre reng tawh lo va. Chu pitar chu a dam a, that lam panin an kohhran ah a lo inkhawm thu-te han hriat chuan min ti lawm em em mai a. Chumai pawh ni lovin, i chanchin min lo zawt a, khawge Siliminga? (chu chu mi Ngo an koh dan a ni) tiin min lo hrilh a. Mahni infak tumna lam ni lovin, ka rawn thai lan na chhan ber chu, kan rawngbawlsaka-te hi eng ang mi pawh lo ni sela berh/rethei ve tak pawh lo ni sela, hmangaihna atanga kan tih apiang chu engmah lovah a chang lo a ni. Keini zawngin hre tawh lo mah ila, an lo la hre reng thin a ni. Heti lama Is**m sakhua atanga Kristiana in pe then khat te hi eng vang a Kristianna inpe nge i nih ti a an zawh chuan, hmangaihna avang tiin an chhang zel a ni. Ringtu nun atanga rawn luang chhuak hmangaihna nun an 26

hmuh khan, Lal Isua hnen a hruai thleng thin a lo ni! Mi ten min chhiar min thlir reng e, ka awm dan zawng zawng an hai lo, Krista nun mawi leh Chanchin Tha, keimahah hian hmuh an chak thin. Mi mawl ve tete niin kan thil hrilh/sawi erawhchu an hre vek lo. Dar ring taka an vuak ang hian, thil tam kan sawi hi, an bengah a ri ring vek si lo. Hmangaihna atanga kan tih erawh chuan an hrethiam em em si. Pathian thu kan hriat anga tha ang hian ringtute hian han nunpui thei zel thin ila chu, ava han ropui dawn em! Ring lo thian te zinga hun ka hman thinna atang hian nun pawimawhzia hriain, an zinga awmdan/nundan, an Hnamze mila nun dan ka inzir chho ve zel a ni. Heng M*lim zinga rawngbawl hi a awl lo, mahse Pathian chakna ringin kan kal zel ang a, Nang hmunah, kei ka hmunah Tawngtainaa kan tan tlan phawt chuan Lalpa hnathawh ropui tak kan hmu zel ngei ang. Kpandu Fellowship : Thla kal ta atang khan Bible Church of Africa (BCA) Kpandu Fellowship tlawh program ka zawm tan a. He fellowship-ah hian baptisma chang an la awm lova, member tlemte, nu leh naupang an ni. Thingbuk daihhlim hnuaiah inhmuh khawmna neih thin a ni. Kawngkam leh kawng a kal vel tan pawh thawm hriat phakna hmun a ni. An rinna a la chak lovin, kaihharh leh dawmkan ngai em em an nih avangin, chawlhkar tin tlawha rawngbawlna hun ruat tawh a nih angin, Pathian chibai bukhona leh thu zirtirna neihpui mek an ni. A chang chang in helai kawnga lo kal m*lim then khatte rawn thu chawlin kan thusawite an ngai thla ve thin. Chuvang chuan helai hmun hi, a chhehvel a mite tan Pathian hmangaihna thu zirna leh hriatna hmun centre pawimawh tak a la ni ang tih hi ka beisei in ka tawngtaina pawh a ni. Tunah chuan Dagbanli tawngin ka Testimony leh Bible stories te buatsaihna leh sharing ka nei tan ve tawh a. Hei hi practical- a tawng zirna peng pakhat pawimawh tak a ni bawk a ni. Tawngtaipui ka ngaihna te :1.Tisa leh thlarauva chakna leh hriselna leh Dagbanli tawng ka zir mek tan. 27

2. He Kpandu Fellowship meeting neih chhoh mek tan an Pathian thu dawn tawh te chi anga an thinlungah tuh a lo nih a, zawi zawi a thangliana an Kristian nun te hmasawnna tha tak an neih theih nan. Leadership Training : Ni 23rd to 25th May, 2011 khan Leadership Training Diny u khua (village)ah tluang taka neih a ni a. A huhova inpawlkhawmna hun tha tak kan hmang a, hruaitu rawn kal zawng zawng ten malsawmna nasa tak an dawn ngei ka beisei a ni. Gushiegu DCC leader-te hmel hriat tharna hun tha tak a lo ni bawk nen. Zan tinin training neih chhung hian tawngtai / fellowship inkhawm neih a ni a, kohhran member te leh khaw mipui te zai, lam leh Pathian thu ngaithla turin an lo kal khawm thin a. A zan tawp ber ah phei chuan M*lim leh an pi leh pu sakhua (African traditional) zuitute nen mi sawmnga aia tamin min rawn zawm hial a. Khuang ri thawm hria in, a phur zual te chu lamtualah an lut ve a, zai leh khuang ri remin a bial in kan lam mup mup a. Chutianga hlim hmel pu tak leh thinlunga au chhuak Pathian fakin hun rei tawk tak kan hman hnu chuan, a tawpah mak tak maiin mi panga an rawn pen chhuak a, Isua Krista an Lal leh Chandamtu atan an pawm a. An chungah kut te nghatin, rinawm taka nung tur leh, chu mi zan atanga nun thar Krista nun a nung turin, Pathian kutah kan hlan a. Tin mi then khat damlohna nei te, harsatna / buaina neite an rawn pen chhuak bawk a, an tan tawngtaina kan neih sak bawk a ni. Helai mite hi puithuna at thlak kawngah an buai (superstitious) em em mai a, a chhan chu thil engemaw an nuna danglam deuh, mumangah a ni emaw, a tak a ni emaw, chu chuan nasa takin an nun a ti buai thin: Entir nan, tlangval pakhat chuan heti hian min hrilh: Hun engemaw chen kal ta ah khan mumang (nightmare) ka nei a, chuta chin chu hlauhna thuk tak ka nei a, chu chuan ka nun a bawih nghet tlat a, ka taksa a khawihin ka kut leh ke te motorbike ka khalh zawh ah darkar khat dawn che thei lovin ka awm thin a ni, tiin. He thil a nuna harsatna avang hian damna Pathian thiltihtheina atangin a zawng a, kan tawngtai sak a, kan fuih bawk a - Lal Isua chauh kan hlauhna zawng zawng min hneh saka min 28

zalentirtu, amah chauh ring a, Setana chungah Lal Isua hminga hnehna puang turin kan in thlah ta a ni. He Diny u khua (village) mipui zinga then khat te chuan an pi leh pute sakhua (African traditional) an la zui hlawm a. He khuaa kohhran hruaitu mi pahnihte ngei pawh chu sakhaw zuitu chhungkua atanga lo seilian te an ni. Pakhat zawk chu tuna Pastor hna Diny u khua ( village) a thawk mek hi a ni. A chhungte erawh chuan an sakhua chu an la zui vek a. Lal Isua a pawm khan, ban san turin an vau a, a ban san loh chuan in chhuahsan turin an hrilh hmiah a. Isua Krista chu nghet taka pawm a thlang ta zawk a, tin in pawh a chhuah san nghal a ni. Nimahsela Pathianin tunah hian chhungkua leh chenna in a pe, tin ama chenna khua ngei Diny u ah chawisana awmin Pastor hna a thawkin Kohhran a enkawl mek a ni. Kha Leaders training chhung khan a pa upa lam tawh tiang hawlin zing tin an lo kal a, kil khatah devotion kan neih chhungin an lo thu ve thin a, Pathian kan be lai ngun takin min lo thli thlai thin a ni. Tawngtaipui an ngaihna te : 1. He chhungkaw tan hian tawngtai sak ila, an pi leh pu sakhaw vawn thlah a, kohhran hruaitute kal tlanga Pathianin ami te zingah a tel tir ve theih nan. 2. Pastor tan Thlarau Thianghlim hruaina dil ila, a beram te enkawl a, heng mi ring thar panga te pawh tha taka a tanpui a, rinaah an lo thanlen theih nan.

Mailing address P.O.Box 1221, Tamale, Ghana. E-mail remafanai.fanai@gmail.com/rem.fanai@motimail.com Mobile no. - 00- 233- 0273940874 SIM NEI address - SIM NEI, GPO Box 66, Shillong 793001, Meghalaya, India email: sim.in.nei@gmail.com 29

SIM East Asia - SIM East Asia Ltd, 116 Lavender St., #0409 Pek Chuan Building, Singapore, 338730 SIM website: www.sim.org (Tv.Remlalliana Fanai, B.A, B.D hian Africa hmar thlang lam Ghana ramah BCM leh SIM thawhhona hnuaiah kan ai awhin Missionary hna a thawk mek a ni. Tawng zir chungin Music leh Thalaite zinga thawkin rawng a bawl. Tawngtaipui ang u. Ed.) ******************

HLING LUKHUM AIAH PARTHI. C. Lalramnghaka Pasighat Hun kha leh chen nghak hlel tak chunga kan lo thlir leh kan fate pawhin mutmawh hnarmawh a an lo neih tawh chu kan lo thleng leh ta hlawl mai! Kum sawm leh pasarih lai Mizoram a Good Friday hmang tawh lo kan nih avangin he hun ropui tak, lei leh van Lalber keini misualte tana a lo thiha a thawhlehna cham phaphak chu Mizo zemil dik tak nen a Amah fak leh chawimawi nan kan ram neihchhun MIZORAM ngeiah hian hmanve zai kan rel ta a. Dt 15th April 2011 ah Arunachal Baptist Council Assembly kan zo fel chiah tihin kan chhuak ve nghal a. Kalkawngah pawh chambang lutuk lovin ni 19th April, 2011 ah chuan Lunglei kan thleng a ni. Nidanga lawm avanga bianga mittui luang chunga min lo hmuak thintu ka nu duhtak ka hre chhuak vawng vawng mai! Thiante u kan nu leh pa leh unaute hi an lova hlu em. Chu chang a ni lo Upa C.B. Thansanga te, Pu. J. Lalzauva te an ngaihawm hle mai. Kan haw nikhua a min lo lawm thintu leh tawngtaina hun rawn hmang thintute kha anni a, mahse tunah zawng Ropuina ramah min kalsan tawh si a. Chhungte leh thian tha ten min lo hmuakin kan han inhmukhawm leh zawng rilru a zangkhai viau tho mai. Good Friday leh Easter Sunday pawh duhthu samin Mizo takin zaikhawmna hun 30

leh Biakin lamah pawh duhthu samin Pathian chibai bukna leh chawimawina hun kan nei ta! Thianteho an lam dalh dalh kan hmuhte chuan tihve theih kan chak mahse kan lo lam lo rei lutuk tawh a kan zak deuh tlat a nih chu! A tawp tawp ah chuan ka han tho zawk mai a, tha takin ka lamve leh thei ta! Lalpa chu fakin awm rawh se. Thisen hlu, thisen hlu, Thing Kros chunga luang khan; Sual lakah min tlanin Misual thiam min chan tir. ti a kan han zaite chu ava han nuam tak em. Solfa thluk dik chiah pawh ni lova, Kroslo ngo Kroslo ngo tih leh ngawt ai chuan thinlung a fan thuk bik riau a nih chu. Mizo ze mil tak mai a Pathian kan fak leh chawimawi theite hi a va han nihlawh thlak thin teh reng em! Tam tak chuan chung ang hlutna leh ropuina danglam zia pawh hre chang lo hian Zaikhawm leh lamte hi kan han peih lo em em mai leh nghal a, a pawi ka ti ngawt mai. Missionary rawn tir rawh u. Good Friday boruak hlimawm tak hmangzoin thlarau lamah pawh zawr hnap khawpin kan han in chiah leh kha a ni a. Kan hotute nen rawngbawl dan tur ruahmanna han siamho tur chuan Kohhran Office-ah chuan ka han leng a. Kan hotute nen kan han inhmu chu, hlim takin min lo chibai a E, i lo thleng ta a ni maw! A lawmawm hle mai, in tan kan lo tawngtai thin a sin!...... Lawngtlai South Bial hruaituten Missionary lo chhuak an awm a nih chuan rawngbawlna rawn nei turin rawn tir rawh u an ti a, i remchang ang em? min han ti chu; ka thinlungin Pathian hnenah lawmthu ka sawi mawlh mawlh a ni. Missionary te ngai pawi mawh lem lo leh, an rawngbawlna chachin pawh ngaih thlak sak chak tawh lem lo te hi awm theih deuh tawh a nia, chutiang kara hetiang han tawnte chu vanneih thlak deuh a ni. Kei chuan, E, theih loh leh remchan loh 31

thu chu awm lo ve, ka kal a nge, ka ti ta a. Tichuan Lawngtlai South Bial, Diltlang Bial leh Aizawl East Bial te fanga rawngbawlna nei tur chuan thu kan ti tlu ta a ni. Phu loh Parthi mawi Dt 7th May, 2011 ah chuan kan fanute pahnih leh keini nupa nen chuan rawngbawlna nei turin Lawngtlai lamah kan phei ta a. Bial Mission Committee hruaitu pahnihten Sumo stand-ah min lo hmuak ran mai a. A phurawm tan hle mai. Bialtu Pastor fel tak Rev. James Chuaukailiana te inah min thlen tir a, a thiannu Maruati pawh chhangchhenu tih hriat miahloh in a che char char a, a nuamin a hahdam thlak hle mai. Lawngtlai South Bial Mission Committee hruaitute an fakawm thlawt a, malin min awmtir lo tih theih a ni. Program zawng zawng ah Bialtu Pastor hoin min telpui zar zar a, kan pualin chawhlui min buatsaih sak pawh hlim leh tlai takin kan kilho bawk a ni. Kohhran pasarihah rawngbawlna kan nei vek a, chungahte chuan hlung takin inpawlhona kan nei ziah thei bawk a, a ropui ngei mai. Kohhran kan tlawhnate tualchhung kohhran zaipawlin hla an nei thei deuh zel bakah, Bethany kohhran zaipawl te, Bial zaipawl te leh Lawngtlai Area Choir ten kan rawngbawlna hmunah min tawiawm thei bawk. Bethany Kohhran Zaipawl phei hi chuan kan rawngbawlna hmun apiangah min telpui deuh zel a ni. Zaipawl memberte leh hruaitute chungah kan lawm tak tak a ni. Tin, Lawngtlai Area Choir te hian Adi incheina inbelin Adi-in hla an rem bawk a, a va han ropui em! Rawngbawlna ah hian kan thawhhona hi a va han tha tak em, tih min ngaihtuah tir a ni. Pu. C. Championthangan phal taka a motor min hman tirah chuan kan chhungkua a in vawm lutin Diltlang Pastor Bial chhunga rawngbawl turin Dt 16th May, 2011 khan Lawngtlai khawpui chu kan lo chhuahsan leh ta a. Kan kal vawi khatna a ni bawk a, kan tan chuan vairam khawpui then khat ai pawhin hmuhnawm kan ti zawk emaw tih tur a ni. Chhun dar khat velah Diltlang chu thlengin Bialtu Pastor leh kohhran hruaitu then khatten min lo hmuak thap mai a, 32

kan va han lawm tak em! Rev. P.C.Lalmuankima te quarter nuam tak maiah chuan mahni in ang maiin kan khawsa leh ta a. Pi Mabiaki a fel char char hle mai thin a, mi a duatin kan mamawh tur hi a ngaihtuah em em reng zel mai a, keini ang duang tan chuan Lal emaw kan inti hman tep a ni. Program awm dan turte Pastorin min han hrilh zung zung a, tawngtaina te kan neih hnuah hemi zan hi chuan program pawh nei hran loin, a duh apiang lo lenglutin inkawmna hun a tan kan hmang a ni deuh ber mai. Missionary dangte hian an la tawn pawh ka ring lo, dt 17th May, 2011 zingah chuan aurinna atang hian nu fel tak aw chu a ni phawt mai, Vawiinah Missionaryte pualin Olympic khel mualah neih tur a ni a, mi zawng zawng lo tel theuh turin kan sawm a che u, a han ti lauh lauh mai chu; ropui tak hi a ni ringawt. Diltlang a lum tih hi chu tih ve mai mai a ni. BKHP hote chuan lum an ti teuh lo! Football an han khel chiah phei chu e, kan la hmuh ngai loh Drogba farnu tih te, Messi farnu tih vel ho hi an lim puat puat mai a nih chu! Ropui tak a ni ringawt mai. Keini chhungkua pawh khawlum leh refreshment an siam tui lutuk kan pal sual deuh nge? Kan zawr hnap mai maw le!! Malsawmna a luang liam a ni ber e. Diltlang Pastor Bialah hian kohhran paruk an awm a, program an lo ruahman ang taka tih theih loh (damlohna avangin) vawi khat kan nei zauh tih loh chu kohhran ho hmel kan hmu kim a, rawngbawlna duhawm tak kan nei a ni. Rawngbawlna hmun hrang hrang a kan neih naah Bialtu Pastor leh Bial Mission Committee leh Bial puipaten min tawiawm zar zar a. An fakawm tak zet zet a ni. Phal tak leh inpezo tak mai a Motor leh mahni rawn inthawhte hmuh tur an lo awm thinte hi a va han ropui thin em! In hnenah ka awm zel ang, ti a min tiamtu thutiam hi a dikin a ropui a ni! Ngai tak leh inthlahlel tak chungin dt 23rd May, 2011 ah khan BCM Diltlang Bial kohhran hote nen chuan kan lo in then leh ta. Lunglei lamah let lehin Bazar Veng Baptist kohhranah leh Kikawn Baptist Kohhranah duhsakna avanga hun pek kan ni a, hun tha tak mai hmang hoin dt 11th June, 2011 khan Aizawl East Bial a 33

rawngbawl turin kan chhungkuain kan chhuak leh ta a. Bial Mission Committee Secretary Rbt. B. Lalthakima (Rev. B. Thangchina fapa) leh Upa H.Lalmuankima ten an mahni motor ve ve kengin station ah min lo hmuak a, chuta tang chuan Aizawl kan chhuahsan hun thlengin min thlah tawh lo reng reng a ni. Mi an ngaihsakin engkimah min tanpui zar zar a, kan lawm tak tak a ni. Bialtu Pastor Rev. Lalrinliana leh a thiannu pawhin an program cancel vekin min hmanpui deuh vek bawk a ni. Aizawlah hian kohhran pasarihah rawngbawlna kan nei a. Pathian zarah kan program angin kan kal thei vek bawk a, kan lawm tak tak a ni. Thlir letna tlem :1) Mizoram Baptist Kohhrante hian Pathian ram zau nan kan thinlung, rilru, taksa leh sum leh pai kan la pe tha hle. 2) Kohhran aiawh a kan tirh Missionary te kan la ngaihsak tha hle a, thalai lamte hi chuan tawngka in dahpawimawh angin lang mahse thinlung tak hi chuan kan ngaih thah tan deuh niin hmun then khatah chuan a lang. 3) Kohhrante hian kan rawngbawlna chanchin hi a te ber atanga a lian ber thleng in hriat fiah chian kan chak hle, mahse then khatte hi chuan kan bengkhawn teh chiam lo thung. 4) Tualchhung kohhran thenkhat chuan anmahniin Missionary an tir chhuak a, Mission field pawh an lo nei reng mai tih ka hmuh chuan min tihlawm hle lain, hun kal zel tur ka thlir erawh chuan thil tha ber a nih rin harsa hlein ka hria. 5) Kohhran kan tlawh zawng zawng deuh thawah Missionary pual a chawnghei tawngtai nei thin kohhran or fellowship an awm thin a. A va han thlamuan awm em; kan tawngtaipuite chanchin leh rawngbawlna chanchin thar lam te hi ngaihsak zui zel thei ila chuan duhthusam a ni leh zual ngei ang. Heng bial pathum a hun kan hmannaah hian a lawm kohhran leh fellowship hrang hrangte mai bakah pawh mimal ang tein thil pek kan dawng nasa hle mai a. Chumai bakah kan phu hauh loh 34

chawimawina Pangparthi mawi tak mai tum nga lai mai kan dawng a nih chu; a va han ropui tak em!! Lal Isuan keimahni avangin hling lukhum a khum a, a thisen a luang a, kross-ah mualpho takin khai kanin a awm a; mahse keini ve thung erawh chuan Amah avang in Pangparthi kan hlawh si!! A makin hriat thiam a har hle a nih hi!!. Heng zawng zawng malsawmna kan dawnte hian nasa leh zuala thawk sauh sauh turin thinlungah thu a sawi tlat a ni. Chaweia min sawmtute zawng zawng pawh kha ka ngaihtuah let hian ropui ka ti. Thilman sang tak ni mahse atui tui, a tha tha min hlui thei reng zel vek mai a, kan phu loh thil vek mai a ni tih kan hria. Krista zara kan chan a ni tih kan hria a, kan lawm tak tak a ni. Deputation Furlough kan zawh hnuah ni khat kan chawl a, dt 21st June, 2011 ah khan kan ram Mizoram chu thlahlel tak chungin kum engemawti chhung a tan mangtha tiin kan lo vai liam leh ta a ni. Tichuan tluang taka kalin dt 24th June, 2011 zing dar riat vel khan kan rawngbawlna hmun Pasighat, Arunachal East Field Headquarters chu, damtein kan lo thleng leh ta a ni. A rawngbawlna hna khawngaihna avanga min kawl tirtu Lalpa chu fakin awm rawh se!

35