Ang bayan ng Mendez ay may natatangin kasaysayan. Nagmula ito sa isang
sitio ng Indang na tinatawag na Gahitan na may kahulugan na salitang gapas. Ginagapas ng mga naunang naninirahan dito ang mga damo na kung tawagin ay Cogon na siyang tumutubo sa lugar na ito bago pa man dumating ang mga Kastila. Sa paglipas ng panahon ay nadadagdagan ang mga bahay dito sa sitio Gahitan kaya ginawa na lamang ito na isang barrio at naging isang bayan noong Disyembre 1, 1875. Itinilaga ito bilang isang bayan ni Gov. Gen. Jose Malcampo Y. Monje. Pinagsama ni Malcampo ang tatlong barrio ng Gahitan, Palocpoc, at Anuling bilang isang malayang munisipalidad na tinawag na MENDEZ-NUEZ. Hinango ang pangalang Mendez-Nuez sa isang malapit na kaibigan ni Malcampo na isang Espanyol Admiral na si Castro Mendez-Nuez. Namalagi na isang munisipalidad ang Mendez simula 1875 hanggang October 15, 1903 sa ilalim ng Public Act No. 947, Komisyon ng Pilipinas na ginawang siyam(9) na munisipalidad ang dating dalawamput dalawa (22) munisipalidad ng Kabite. Ang Mendez at Bailen (Gen. Aguinaldo) ay isinama sa munisipalidad ng Alfonso. Pagkalipas ng 12 taon, noong Enero 1, 1915, nakamit muli ng Mendez ang kalayaan at naging isang munisipalidad ng Kabite. Si Pedro Aure ang gobernadosilyo ng Mendez sa unang taon ng pagiging munisipalidad nito noong 1876. Cayetano Aure, isang kamag-anak ni Pedro, ay nagiisang capitan municipal ng Mendez sa Unang Republika ng Pilipinas, 1899-1901. Ang anak ni Pedro na Marcilino Aure ay naging isang tanyag na heneral noong panahon ng Rebulusyon sa Pilipinas. Ang kanyang nom de guerre (bansag) ay Alapaap. Mula ng itatag ng mga Amerikano ang gobyernong sibil sa Pilipinal, si Heneral Aure ay itinalaga bilang pangulo ng munisipal ng Mendez mula 1901-1903.