Edukasyon o Kayamanan?

Lakandiwa:

Ang dalawang mahusay na makata ay itatampok

Haharapin nila ay napakahirap na pagsubok

'Pagkat ang mga katuwiran nila ay magsasalpok

Sino kaya ang lalabas na matalino at bugok.?

Sa panahon ngayon ay ano ba ang mahalaga

Edukasyon ba o ang kayamanang tinatamasa?

Alam kung lahat ng tao'y naghahangad ng ginhawa

At ng karunungang nagpapapaunlad sa diwa.

Kanina pa sila nakatayo rito sa may gitna

Kung baga sa sundalo ay nakahanda na sa digma

Kanino kayo papanig dito ba o sa kabila?

Makinig nang husto at buksan ang inyong pang-unawa.

Ang titindig sa edukasyon hangad niya ay talino

'Pagkat ito ang pinili niya't talagang ginusto

Kaya't karangalan niyang matawag na isang henyo

Karunungan ay kasama na ng kanyang pagkatao.

Ang tingin ko sa kanyang katalo ay isang praktikal

'Pagkat itong kayamanan ang higit na minamahal

Kung mayroon kang kayamanan para na ring may dangal

Marahil ito ang nasa isip niya't iaaaral.

Nararapat lang na ang bagay na ito'y mapag-usapan

'Pagkat ang lahat ng tao ay mayroong kinalaman

Dahil tayong pinakasentro't pinatatamaan

Dapat lang makialam at huwag isara ang isipan.

Edukasyon:

Ang kailangan ng lahat ng tao ay edukasyon

Ito'y isang tulay upang maabot mo ang ambisyon

Kailangan nating sumabay sa takbo ng panahon

Mahirap maging mangmang at ituring na 'sang patapon.

Ang edukasyon ay masasabi na ring kayamanan

'Di mauubos dahil nakalagay sa iyong isipan

Kaibigan, maganda ang mayroong pinag-aralan

Para magkaroon ka ng magandang kinabukasan.

Ang literal na kayamanan ay mapapasaiyo

Dahil magkakaroon ka rin ng magandang trabaho

Kahit maralita lang balang araw ay aasenso

Lahat ay posible kung ikaw ay isang edukado.

Kung nakapag-aral malayo ang iyong maaabot

Ang mahahawakang salapi ay 'di lang kakarampot

Maaari ka ring maging among nakakapagpaikot

'Di isang tauhan na tila sunud-sunurang robot.

Walang imposible sa taong may isipang malawak

Naghahatid sa tagumpay dahil isa itong pakpak

Habambuhay na dala-dala't nasa likod ng utak

Daragin man sa apoy ay 'di rin mawawasak.

Ano ang kabuluhan ng kayamanang nauubos?

Baka kapag nawala na'y kasama ka ring matapos

Huwag mananalig sa kayamanan mong dinidiyos

Ibigin mo ang edukasyon ito ang aking utos!

Kayamanan:

Ang mahalaga sa daigdig na ito ay kayamanan

'Di ba't mas mainam kung maraming perang nahahawakan?

Ang sobrang pag-aaral ay pahirap lang sa katawan

Pinahihirapan nang husto ang sarili 'di naman yayaman.

Ang kayamanan ay 'di isang librong isinasaulo

Kundi magagamit sa araw-araw na pamumuhay mo

Dahil sa kayamanan magagawa lahat ng gusto

Malakas ang impluwens'ya mo't kapit sa gobyerno.

Ang diploma't medalya ay palamuti lang sa dingding

Nag-aral ka nga pero ba't tila mayroong tililing?

Samantalang ang kayamanan magagamit sa magaling

'Di maghihirap nang husto kagipitan ma'y dumating.

Ang edukasyon ba ay agad mo nang makakain?

Magagastos ba 'yan sa tindahan kung may nais bilhin?

Kung mayroong kayamanan 'di maaaring gutumin

'Di na kailangan na ang isip mo ay pigain.

Kapag masaganan marami ka ring matutulungan

Mga kapatid na dukha at nangangailangan

Na 'di man lang makapasok sa matinong paaralan

Tapos ngayon ay itinuturing n'yo pang mga mangmang.

Paano sila makakapag-aral kung walang pera?

P'wera na lang kung iskolar na may sumusuporta

Alam mong taun-taon tumataas ang matrikula

Kaya't sa edukasyon ay 'di na ako aasa pa!

Edukasyon:

Ang edukasyon ay malaki rin ang naitutulong

Huwag solohin ang karangalan, pilantropong gungong

Kung wala itong edukasyon tayo kaya ay dudunong?

Baka sa walang hanggang kamangmangan pa'y nakakulong.

Kapag walang tinapos 'di ka igagalang nang husto

Mamatahin ka lang ng kung sino'ng impakto't demonyo

Kaya nasapawan si Bonifacio ni Aguinaldo

Nang maliitin s'ya noon ng isa sa mga Magdalo.

Kung may likas na talino pero 'di naman binungkal

Walang kabuluhan para ka na ring nagpatiwakal

Sayang lamang ang kaloob kung 'di marunong magmahal

'Pagkat ang talino'y kinukulob at 'di pinabubukal.

Edukasyon ay mahalaga alam 'to ng gobyerno

Kaya't inilagak nila rito ang malaking pondo

Kung lahat ay nakapag-aral walang magiging bobo

Magiging matatag ang pamumuhay mo sa mundong ito.

Karamihan sa namumuno'y pawang edukado

Kapag mahina ang namumuno saan patutungo?

May maganda bang naiisip ang tulad mong utak ginto?

Kung puro kayamanan lang ang laman ng 'iyong puso.

Malaay mo balang araw maging pinuno ako ng bansa

Kaya't pakaiingat ka sa iyong pagsasalita

Kilalanin mo na ang edukasyon ay mahalaga

Huwag sabihing dunong-dunungan 'to, mangmang na bata!

Kayamanan:

Ano' nangangarap ang isang 'to na maging lider

Paano nasasarapan kang tawagin na boss at sir

Kung 'di ko pa alam gusto mo lang gayahin si Hitler

Ingat sila sa 'yo baka manira ka ng rebolber.

Kailangan pa bang maging propesor at senador

Upang maging tanyag at isang magaling na orador?

Ako kahit sa bahay lang mag-aral dahil may tyutor

Sa pag-aaral mo baka ako pa ang mag-isponsor.

Bakit si Presidente Erap drop out sa Ateneo?

Samantalang high school gradweyt lang ang lider na si Suharto

'Di ito nakukuha sa taas ng pinag-aralan mo

Nasa yaman at hangaring makapaglingkod sa tao.

Alamin mo ang datos maraming walang trabaho

Mga nakatambay kahit nakatapos ng kolehiyo

Ang iba ay 'di nagamit ang pinag-aralang kurso

Kaya't nasayang lang ang apat na taong binuno.

Kung magsalita ka akala mo'y napakatalino

Ba't alam mo ba ang lahat ng bagay sa mundo?

'Yan ba ang natutunan sa paaralan, ang maging idealistiko?

Baka sa sobrang pagbabasa nasira na ang ulo.

Huwag sanang akalain na mukha akong salapi

Nakamtan ko ito dahil sa aking pagpupunyagi

'Di nakapagtapos pero may talinong nakakubli

At nahihigitan pa kita sa aking pakiwari.

Edukasyon:

Karamihan talaga sa mayayaman ay mayayabang

Ang dating ng salita ay nasobrahan sa anghang

Napakakitid ng isip mo dahil utak-alamang

Akala mo ay dakila wala namang pakinabang.

'Di ako naniniwalang yaman ay bunga ng pagsisikap mo

May nakapagsabing namana lang sa nasira mong lolo

Paano ka uunlad lalo kung mahina ang iyong ulo?

Baka ang makinabang ng kayamanan mo ay ibang tao.

Marami ngang kayamanan 'di naman marunong humawak

Kahit katiwala lolokohin ka dahil walang utak

Baka matulad ka sa kuwento ng Alibughang Anak

Walang pagpapahalaga sa bukas at 'di nagbabalak.

'Di ba't ang malaking kayamanan ay nakakasilaw?

Kung ganoon ba't ang tao dito pa ililigaw?

Edukasyon ang kailangan natin sa mundong ibabaw

'Di ang kayamanang 'di madadala kapag pumanaw.

Ang paniniwala mo'y tulad sa ibang salesman

Sabi nila ang edukasyon ay 'di na kailangan

Mas malaki raw ang kinikita nila sa bentahan

Nasa husay mag-sales talk at networking lang ang paraan.

Ang karunungan na dulot ng edukasyon ay 'di napaparam

Samantalang ang kayamanan ay para lang hiniram

Ayokong matulad sa 'yo na walang kaalam-alam

Ang kapal ng apog mo na sa akin ay makialam!

Kayamanan:

Hoy! Bakit sinasabing mahina ang aking kukote?

Kung totoo umatras na sana ako sa debate

Wala namang kabuluhan ang mga pinagsasabi

Paikot-ikot lang, 'di pa gaanong makaatake.

Sa panahon ngayon may makikita ka bang libre?

D'yan nga sa edukasyon mo ay ang taas ng tuiton fee

Sa buong bansa halos pribado ang nagmamay-ari

Pero wala sa akin 'to dahil sa maraming salapi.

Ipinagmamalaki mo ang edukasyong komersyal?

Ang karunungang para sa lahat, ipinangangalakal

Sobrang daming gastos, ang bayad ay pagkamamahal

Ito ba ang tinitindigan mo, kuno'y intelekwal?

Kung gusto n'yo na maging mahalaga ang edukasyon

Baguhin ang maling sistema na pinaiiral n'yo ngayon

Tayo ay magbigayan 'yan ang sabi ng Panginoon

Kabig kayo ng kabig parang 'yung ibang relihiyon.

Marami ang nagsasabi na sila raw ay nakatapos

Ngunit kung tanungin mo ay 'di makasagot ng maayos

Kung kuto lang sila marahil ay akin nang pinulbos

Kung nakapag-aral ba't sa talino'y kapos?

Ang kayaman ay ayokong magamit lang sa luho

Bagama't sinasabi ng iba na ito ay isang tukso

Nais kong ituring ito na isang dalisay na ginto

Na nararapat lamang sa may malilinis na puso.

Lakandiwa;

Sa aking narinig tila ang isip ko'y tinutuhog

Sa init ng pagsasagutan n'yo para kayong mambubugbog

Baka sa gitna ninyo ay biglang may bombang sumabog.

Maganda ang katuwiran n'yo na naibigay

Sa katotohanang aral ay 'di kayo suminsay

Ngunit pareho kayong tama sa aking plagay

Magagamit ito sa araw-araw nating pamumuhay.

Huwag sanang sasama ang loob n'yo sa akin

Kung sasabihin kong kayo ay may kahinaan din

Bilang lakandiwa igalang ako at huwag batikusin

Nais ko lang kayong maging mabuti sa aming tingin.

Ikaw Edukasyon, 'di ba't ikaw ay para sa lahat?

Ba't mapepera lang ang nakakapag-aral ng sapat?

Paghusayin rin ang turo mo ito ang nararapat

Kapag naganap 'to ibabantog ka ng walang puknat.

Ikaw Kayamanan, huwag kang masyadong magpasikat

Tama na, sa sariling bangko huwag nang magbuhat

Ang biyaya ay ibahagi sa iba't iyong ikalat

Kung ganoon habambuhay ang aking pasasalamat.

Sa oras na ito nais ko munang maging neutral

Paumanhin kung naghintay kayo nang napakatagal

Ang paghuhusga'y maaaring bawat indibidwal

Yamang napanuod na ninyo ang aming pagtatanghal.