Wikang Filipino… Sagisag ng Pagka-Pilipino

Ni Ernest Genesis Mercado Guevara

Tagalungsod, tagalalawigan,ang iba’y nagbalikbayan

Isang lahing kinamulatan, sa isang bansa isinilang,
May sariling wika na sa puso at isipa’y nakapunla
Liping hindi ikahihiya dahil sa Pilipinas tayo nagmula.

Wikang Filipino,hatid sa madla’y karunungan

Sumasalamin sa kalinangan at damdaming makabayan,
Tulay na nag-uugnay sa pagpapahayag ng kaisipan
Nagsisilbing kawing tugon sa pag-uunawaan.

Wika’y pundasyon sa karunungang pantao

Tagapaghatid ng kaalaman at katangian ng Pilipino,
Mahalaga sa usapan at pangangatwirang totoo
Marapat na pahalagahan para sa kaunlaran at pagbabago

Matagal ng usapin pagpapaunlad sa wika ng bayan

Dahil lubos na niyakap, wikang nagmula sa dayuhan,
Dayuhang dumusta, Oo! Dumusta! Ginulo ang isipan
Kaya ng tayo’y lumaya, nawala sariling pagkakakilanlan.

Sa ganitong kalagayan, dalubwika may mithiin

Masusing pinag-aaralan pag-unlad ng wika natin
Para matunton ang kaganapan ng lahat ng naisin
Ang mapayabong pa ang lahat ng mga wikain.

Upang matugunan ang suliranin ng sambayanan

Wikang Filipino, siya nating kailangan
Kung wikang Filipino ang gagamitin sa araw-araw
Tiyak itong epektibo, mga gawa’y makabuluhan.

Wika nati’y yayabong kung tatanggapin ang pagbabago

Na gamitin ang diyalekto at salitang hiram sa kausap mo,
May batas na nagpapahintulot na pag-aralan ang mga ito
Huwag lang kalilimutan ang wika nati’y Filipino.

Sagana ang Pilipinas sa mga katutubong wikain

Iba-iba ang bigkas at iba-iba ang diin ngunit ito’y Filipino pa rin,
Saanman dako ng bansa malaya nating gamitin
Ilokano, Sambal, Ivatan, Ifugao na sariling wika atin

Kilos na kababayan, Kumilos ka! Wika natin ipagmalaki

Kilos na kababayan, Kumilos ka! Ito na ang panahon ng ating pagbubunyi.
Kilos na kababayan, Kumilos ka! Ngayon ay buwan ng mga wikang tatak ng ating lahi.
Kilos na kababayan, Wikang Filipino… wika ng liping kayumanggi.