1.

SATUA NAGA BASUKIH

Jani ada kone tutur-tuturan satua, Ida Betara Guru. Ida Betara Guru totonan malinggih ring
Gunung Semeru, kairing olih putranidane mapesengan I Naga Basukih. Pesengan Idane dogen
suba ngarwanang, I Naga Basukih terang gati suba putran Ida Betara Guru totonan maukudan
Naga, marupa lelipi gede pesan sing keto jenenga?

Nah jani sedek dina anu, kandugi enu ruput pesan I Naga Basukih tangkil ring
ajine. Baan tumben buka semengane I Naga Basukih Tangkil, dadi matakon Ida Betara Guru ring
putrane, “Uduh nanak Bagus, dadi tumben buka semengan I Nanak nangkilin Aji, men apa
jenenga ada kabuatan I Nanak ring Aji, nah lautan I Nanak mabaos!” Keto kone pataken Ida
Betara guru ring putrane I Naga Basukih.

Ditu lantas I Naga Basukih matur ring Ajine, “Nawegang Aji Agung titiang kadi isenge ring
sameton titiange sane wenten ring jagat Bali, makadi Betara Geni Jaya sane malinggih kocap
ring Bukit Lempuyang, Betara Mahadewa kocap ring Gunung Agung, Betara Tumuwuh ring
Gunung Batukaru, Betara Manik Umang ring Gunung Beratan, Betara Hyang Tugu di Gunung
Andakasa, cutet ring sami sameton titiange sane wenten ring tanah Bali. Dening sampun lami
pisan Aji, titiang tan pisan naanin mapanggih sareng sameton, nika mawinan titiang nunasang
mangda sueca ugi maicain titiang lunga ka tanah Bali jaga ngrereh sameton titiange sami.”

Beh, mara keto kone aturne I naga Basukih, dadi di gelis Ida Betara Guru ngandika, “Uduh
nanak Bagus, nah yan dadi baan Aji sampunang ja I Nanak lunga ka Bali buate lakar ngalih
pasemetonan I Dewane. Nah apa lantas ngawinang dadi buka Aji mialang pamargan I Nanak,
mapan gumi Baline totonan joh pesan uli dini. Buina yan lakar I Nanak ngalih gumi Baline,
pajalane ngliwat pasih. Len teken totonan buat tongos sameton-sameton I Nanake malinggih
madoh-dohan, selat alas suket madurgama. Kaparna baan Aji, minab lakar sengka baan I Nanak
indike jaga mamanggih sameton. Buina yan pade I Nanak lunga, men nyen kone ajak Aji
ngawaspadain utawi nureksain dini di Gunung Semeru.” Dadi keto kone pangandikan Ida Betara
Guru buka anake mialang pajalane I Naga Basukih unduke lakar luas ka tanah Bali.

Baan isenge teken sameton, mimbuh baan dote nawang gumi Bali sing ya keto jenenga, dadi
buin ngawawanin I Naga Basukih matur ring Betara Guru, “Nunas lugra Aji Agung, yening
kenten antuk Aji mabaos, minab Aji ngandapang saha nandruhin kawisesan titiange. I wau Aji
mamaosang jagat Baline selat pasih raris mialang pajalan titiange ka Bali, beh elah antuk titiang
ngentap pasihe wantah aclekidek. Raris malih Aji maosang genah sameton titiange di Bali
medoh-dohan, maselat alas suket madurgama, amunapi se ageng gumi Baline punika Aji?
Kantun elah antuk titiang Aji. Yening Aji maicayang, punika Aji.” Dadi jeg keto kone aturne I
Naga Basukih, jeg nyampahang gumi Baline di ajeng Ida Betara Guru.

Nah mapan keto kone aturne I Naga Basukih, men Ida Betara Guru jog kadi blengbengan
kayunidane miragi atur putrane. Dados jog nyampahang gumi Baline, buin sadah elah kone
baana nguluh mapan tuah amul taluhe geden gumi Baline. Sakewala pamuput ngandika Ida
Betara Guru teken I Naga Basukih, “Nanak Bagus Naga Basukih, Aji sing ja buin lakar mialang
pajalan I Nanak ka jagat Bali, nah majalan I Nanak apang melah!” Mara keto kone pangandikan
Ajine, beh ngrigik kone I Naga Basukih, jog menggal-enggalan nunas mapamit ring Ida Betara
Guru.

Nah jani madabdan kone I Naga Basukih buate luas ka Bali. Yan buat pajalane uli Gunung
Semeru lakar ngojog Blangbangan. Di benengan majalane I Naga Basukih, asing tomploka jog
pragat dekdek remuk. Telah punyan-punyanane balbal sabilang ane kentasin baan I Naga
Basukih. Sing baan geden lipine ngranaang sing keto jenega? Biuna telah patlangkeb kutun alase
mara ningalin I Naga Basukih.

Gelising satua tan ucap di jalan, jani suba kone neked di Blangbangan pajalane I Naga Basukih.
Mapan edote apang enggal ja ningalin gumi Baline, dong keto ya jenenga, jani menek kone I
Naga Basukih ka duur muncuk gununge, uli muncuk gununge totonan lantas I Naga Basukih
ninjo gumi Baline. Bes gegaen ningalin uli joh lantasan, terang suba cenik tingalina gumi baline
teken I Naga Basukih. Payu ngrengkeng I Naga Basukih, kene kone krengkenganne I Naga
Basukih, “Beh bes sanget baana I Aji melog-melog deweke, suba seken gumi Baline amul taluhe
dadi mahanga lakar keweh kone deweke ngalih sameton di gumi Bali. Dadi buka anake sing
nyager I Aji teken kesaktian deweke.”

Nah keto ja kone pakrengkenganne I Naga Basukih. Dadi tusing pesan kone ia rungu wiadin
anen pakrengkengane di ati tatonan kapireng olih Ida Betara Guru. Ida anak mula maraga
mawisesa, maraga sakti, sakedap dini sakedap ditu, cara angin tuara ngenah. Dadi dugas I Naga
Basukih ngrengkene masambilan ninjo gumi Baline uli muncuk gununge Ida Batara suba ditu,
sakewala sing tingalina teken I Naga Basukih. Ida mula uning ngenah ilang.

Men jani mapan aketo lantasan pakrengkenganne I Naga Basukih, ditu lantas Ida Betara Guru
jog nyeleg di sampingne I Naga Basukih tumuli ngandika, “Uduh nanak Naga Basukih nganti
suba pindo pireng Aji I Nanak nyampahang gumi Baline, I Nanak ngorahang gumi Baline
totonan tuah amul taluhe. Nah jani Aji kene teken I Nanak, yan saja gumi Baline tuah amul
taluhe buka pamunyin I Nanake, nah ento ada muncuk gunung ane ngenah uli dini. Yan buat
gununge ento madan Gunung Sinunggal. Jani yan saja I Nanak sakti tur pradnyan, Aji matakon
teken I Dewa, “Nyidaang ke I Nanak nguluh gununge totonan? Yang suba saja mrasidaang I
Dewa nguluh, nah kala ditu Aji ngugu teken kawisesan I Dewane.” Keto kone pangandikan Ida
Betara Guru teken I Naga Basukih.

Beh payu makejengan I Naga Basukih, krana tusing naen-naen gati dadi jog nyeleg Ajine di
sampingne. Dadi mapan aketo bebaos Ida Betara Guru, dadi matur I Naga Basukih, “Inggih Aji
Agung, yang wantah Aji nitah mangda nguluh Sinunggale, maliha yan bantas amonika
pakantenan jagat Baline, yening Aji maicayang jagat Baline jaga uluh titiang.” Keto kone aturne
I Naga Basukih kaliwat bergah.

Malih Ida Betara Guru ngandika, “Cening Naga Basukih, nah ene titah Ajine ane abedik malu
laksanaang!”
Jani madabdaban lantas I Naga Basukih lakar nguluh Gunung Sinunggale ane ada di tanah Bali
uli di Gunung Blangbangane. Ditu I Naga Basukih ngentegang saha nuptupang bayu. Beh
ngencorong paningalan I Naga Basukih neeng Gunung Sinunggale, yan rasa-rasaang tulen ja
buka kedis sikepe di benengan nyander pitike kagangsaranne I Naga Basukih ngepet-ngepetang
muncuk gununge.

Nah jani disubane neked di Bali, buina suba kacaplok Gunung Sinunggale, beh kaling ke lakar
nguluh, ajin bantas mara muncukne dogen suba sing nyidaang I Naga Basukih ngepet-ngepetang
muncuk gununge. Mapan kagedean lelipi sadah sambilanga maplengsagan mesuang bayu, dadi
embid Gunung Sinunggale ane paek bena kelodne. Yan rasaang, beh cara munyin kerug sasih
kaulu munyin doosanne I Naga Basukih amah kenyelne, masih tonden nyidaang nguluh Gunung
Sinunggale.

Kacrita ne jani pelanan suba telah gading bayunne I Naga Basukih masih tonden nyidaang
nguluh gununge. Undukne I Naga Basukih buka keto kaaksi olih Ida Betara Guru, mawanan di
gelis Ida ngandika, “Nanak Naga Basukih, men kenken nyidaang apa tuara I Nanak nguluh
Gunung Sinunggale?”

Mara keto kone patakon Ida Betara Gurune, emeh kaliwat kabilbilne madukan jengah kenehne I
Naga Basukih. Sakewala buin telung keto ja lakar ngaba jengah, lakar pragat tuara nyidaang I
Naga Basukih lakar nguluh Gunung Sinunggale. Kaling ke nguluh makejang, ajin nguluh
muncukne dogen suba nandes. Dadi sambilanga masemu kabilbil matur I Naga Basukih ring Ida
Betara Guru.

“Nawegang Aji Agung, kenak Aji ngampurayang indik titiange bregah saha ngandapang jagat
Baline. Mangkin kenak Aji ngenenin upadarwa padewekan titiange baan titiang bregah!” Keto
kone aturne I Naga Basukih, jegan pragat tinut teken sapatitah Ida Betara Guru.

Nah sasukat I Naga Basukih nongosin Gunung Sinunggale, kapah ada linuh, kapah ada blabar,
buina tusing pesan taen ada angin slaung sajeroning Bali.

Nah, ada buka jani gunuge tegeh-tegeh di Bali, ento kone mawiwit uli Gunung Mahameru ane
katurunang di Bali olih Ida Betara Guru.

Sang Nandaka Muah Prabu Singa Kapisuna

Kacrita di alas Malawane ada kone lembu jagiran aukud, madan Sang Nandaka. Ane dadi rajan
alase ditu Sang Prabu Singa. Panjaknyane sawatek asu alase. Pinaka pepatih madan Patih
Sambada, I Nohan teken I Tatit. Sang Nandaka muah prabu Singa, masawitra becik-becik. Sang
Nandaka ngelarang kapanditan.
Sang Prabu Singa nyambran dina mlajahin tutur kadarman nginutin solah Sang Nandakane
sadina-dina mamukti padang, suud mamati-mati, suud mamangsa daging. Dening keto keweh
sawatek asune, krana tusing bisa neda padang, ambengan muah don-donan. Ditu lantas paum di
batan kayu kalikukune.

I Tatit ngraos teken I Patih Sambada, nerangang panjake pada kasengsaran, berag aking. Masaut
Patih Sambada sada kenyem, " ih, ento cai pada makejang, yan kapineh baan I dewek,
pasawitran Ida Prabu Singa teken Sang Nandaka tusing adung. Krana bina paksa len kapti,
artinne len soroh len tetujone. Jani dewek ngalih daya upaya apang Prabu Singa palas teken Sang
Nandaka. "Mara keto lega pesan keneh asune makejang, lantas paumane maluaran.

Nemonin dewasa melah, I Sambamda nyilib nangkil ring Sang Nandaka, ane sedek masayuban
di beten kayu bingine. I Sambada ngenggalang nyumbah lantas matur. "Inggih Ratu Pranda
mungguing kabecekin pasawitran I ratu ring Sang Prabu Singa nenten nyandang baosang.
Sakewenten ampurayang pisan, sane mangking Sang Prabu Singa nyesel raga, antuk kadropon
makanti ring I ratu. Ida wantah eling ring raga nilar sesanan ratun buron. Ida ngandika sapuniki,
"jani awake tau teken unduk I Lembu, tingkahne corah mapi-mapi sadu. Yadiapin I Lembu
matanduk nyanyap, awakne gede, sing keweh awake, ngalap kapatianne".

Keto aturne I Sambada ngadu ada, lantas ia mapamit. Tan kacritayang di jalan, I Sambada suba
tangkil teken Sang Singa, nyumbah-nyumbah matur, "Inggih, Ratu Sri Mregapati, titiang nunas
ampura! Titiang polih tangkil ring Sang Nandaka. Dane maosang dahat singsal pamargin cokor I
Dewane. "sapunike pangandikan dane, "cai Sambada, bapa nuturin cai, buat jelen laksana
singane. Tusing pesan ia ngelah idep kapiwelasan, kabatek baan lobanne kaliwat. Punika patut
kayunin I Ratu, sampunang I Ratu tleman! Gelisang pegatang pasawitran I Ratune ring I
Nandaka. "Sang Prabu Singa kipak-kipek sarwi mapineh-pineh, "tanpa guna tresnan deweke
teken I Nandaka! Jani mula sewayan deweke masiat nglawan Nandaka".

Sang Prabu Singa lantas bangun, gegancangan majalan kairing baan I Sambada, I Nohan, I Tatit
muah asune makejang, nuju tongos Sang Nandakane.

Sesubane neked di arepan Sang Nandakane. Sang Prabu Singa ngelur ngajengit, tumuli nyagrep
baong Sang Nandakane, getihne muncrat. Sang Nandakane ngawales nyenggot, beten lambung
Sang Prabu Singane. Pamuputne makadadua ngemasin, pada purusa di payudan.

Nah, tangarin pesan pisunane, krana pisunane manganan teken pedang, sida nguugang
pasawitran, kulawarga, banjar muah desa.(*bb/stb)

Kaketus saking :
* Buku Pupulan Satua Bali
Belibis Putih

Kacrita ada bendega madan Narajana. Ia nongos di pesisi kelod. Sadina-dina Narajana ngalih be
di pasih. Narajana negakin jukung sambilanga mamancing. Di kenkene ia masih makena jala.
Tibanan suba Narajana nyalanang geginane ento.

Jani Narajana merasa sebet. Sawireh uli semengan pancinge tonden ada ngamahin. Kanti tengai
Narajana tusing maan be angan aukud. Basangne marasa seduk. Awakne marasa panes. Peluhne
nyrekcek sawireh panese ngentak.

Narajana ngliwat ka tengah pasihe. Ditu ia nepukin parangan gede. Pesu kenehne bakal mareren.
Mawinan ia tuun, laut ngagah bekel. Ungkusan bekelne misi sangu asambekan. Tipat galeng
duang bungkul. Pesan lindung akaputan. Sambel isen macakcak misi uyah kusamba atemelosan.

Suud madaar Narajana masayuban di beten kayune. Makelo ia mailih-ilih. Laut teka angine
ngasirsir. Lega kenehne muponin dayuh. Mara Narajana matolihan kangin, saget tepukina ada
belibis putih. Ditu ia iju ngejuk kedise baan jala.

Narajana tengkejut ningeh kedise mamunyi jlama, " Bapa ! Bapa ! Eda tiang tampaha, Bapa !,
Yening Bapa olas nuduk tiang, bakal tulungin tiang Bapa ngalih be ."
Narajana nuutin munyin kedise. Sawireh tumben ada kedis Belibis Putih bisa mamunyi jalma.
Belibise ngorahang dewekne nawang tongos bene mapunduh. Laut matujuhin Narajana ka
tongose ento. Mawinan Narajana liu pesan maan be gede-gede tur mokoh-mokoh. Sasubane
sanja belibise abana mulih. Laut gaenanga bada di sisin balene.

Narajana sayang pesan teken belibise. Sesai baanga dedaaran buka ane daara padidi. Mawinan
belibise demen pesan atinne. Kasayangang baan Narajana buka nyayangang pianak.

I Belibis Putih ningeh orta uli kedis goak. Kone di gook lelipine ada emas-emasan liu pesan.
Emas-emasan ento pejanga teken malinge dugase malu. Jani malinge suba mati. Ditu I Belibis
Putih ngorahin Narajana apang ngalih emas-emasan ento. " Bapa ! Kema Bapa ka pasisi kelod.
Tingalin kayune gede ane misi gook lelipi." Yening suba tepuk lantas seebin gooke. Yening ada
emas dadi Bapa nuduk. Sawireh malinge ane ngejang emase suba mati. Ia maan emas-emasan
majalaran tan patut.
Narajana gegison ka pasisi. Saget tepukina ada kayu gede misi gook dalem pesan. Makelo ia
tusing bani macelep. Sawireh takut gutil lelipi. Mara tepukina ada bikul di bungasne, mara
Narajana bani nyelepin. Bengong kenehne ngatinang emas-emasane liu pesan. Laut abana mulih.

I Belibis Putih buin ningeh pasadok uli cicing gudig. Kone di paciringane liu arta brana
matanem. Arta branane ento engkebange baan malinge dugase pidan. Jani malinge suba kone
mati. Ditu I Belibis Putih buin ngorahin Narajana apang ngalih arta brana ento.

Kanti liu Narajana ngelah emas-emasan muah arta brana. Makejang ulihan patuduh I Belibis
Putih. Tonden ada abulan ngubuh I Belibis Putih saget suba dadi anak sugih. Mawinan ia sayang
pesan teken I Belibis Putih.
Jani Prabu Boja sedekan sungsut. Sawireh tusing nyidayang mutusang wicara. Ada pandita ajaka
duang diri. Maka dadua sedekan merebut rabi. Ane istri tusing nyidayang ngelingin rabinne.
Encen ane sujati, encen ane siluman. Ditu I Belibis Putih ngorahin Narajana apanga ka puri.
Ngaturang pamutus wicara sakaning nungkalik. ento mawinan Narajana lantas ka puri. Tur
makusara bakal nyidaang mutusang wicara.

Sasubane Sang Prabu nauhang pangandika, lantas Narajana matur teken panditane maka kalih. "
Inggih, Ratu Pandita ! Puniki wenten caratan tanah asiki. Durusang Ratu ngranjing ! Sapasira
sane nyidaang ngaranjing, punika sane patut nuenang rabine."

Mara keto aturne Narajana, prajani Panditane ane sujati kalenger. Ragan idane enyem leteg,
praraine kembang lemlem buka enggal bakal seda. Sawireh karasa ring kayun tusing nyidaang
bakal ngaranjing.

Sakewala Pandita ane siluman ledang pesan. Prajani egar kayun idane. Buka tusing ada
nandingin. Sawireh aluh pesan antuk ida ngayunin. Lantas tusing dadi tambakin di nujune
nyelepin caratane.

Sasubane di tengah, Narajana lantas nyemak caratane. Laut kasengsengin tur katunjel di apine
gede. Kanti caratane belah tur Pandita ane siluman seda puun sengeh. Mawinan ledang pesan
kayun Ida Sang Prabu.

Sawireh suba nyidaang mutusang wicara, lantas Narajana kadadosang Mantri Agung. Tur setata
ngiringang pamargin Ida Sang Prabu. Di nujune mutusang wicara ane keweh-keweh, Narajana
setata ngidih itungan teken I Belibis Putih.
 Sang Arjuna Polih Panugrahan
Kaketus Saking : Iktihasa Arjuna Wiwaha

Wayang Arjuna

Kacrita mangkin Niwatakawaca sayan dot manahnya nguugang suargane. Para punggawa miwah
para tanda mantrinya sami sakti tur misadia ngetohang urip, melanin Niwatakawaca. Akeh
sampun genah-genahe ring suargan karusak olih Niwatakawaca. Sawireh asapunika raris Ida
Sang Hyang Indra makarya naya singid marupa sabaya dagingnya Niwatakawaca pacang kaicen
upah. Pamuputnya naya punika mapikenoh becik santukan Niwatakawaca usan ngrusak
suargane. Nanging Niwatakawaca sampun uning dikapan para dewatane kayun lakar
makekasihan melah-melah sareng watek raksasane. Punika awinan Niwatakawaca tangar, tumuli
ngutus teteliknyane nylusup rauh ka jagat tigane. Sapangrauh tetelike ipun ngaturang gatra indik
Sang Arjuna matapa ring Gunung Indrakila. Samalihnya sampun polih panugrahan punika
mawinan Sang Arjuna kaanggen kanti antuk Ida Sang Hyang Indra. Punika awinan
Niwatakawaca ngutus raksasa momo Si Murka sane sampun kalumrah daat sakti praya ngrusak
yasan Sang Arjunane. Tan ucapan Si Murka ring margi kacrita sampun raauh ring Gunung
Indrakila. Mailehan ipun ngrerehin genah Sang Arjuna nangun yasa nanging nenten kapanggih.
Mawastu ipun brangti sahasa pacang ngusak Gunung Indrakilane mangdane obah yasan Ida Sang
Arjuna. Mawastu Si Murka masalin rupa dados celeng daat kabinawa aeng tan bina sakadi
Kumbakarna. Gunung Indrakilane kalumbih, tanahe masepuk batu-batunyane sambeh maleketik,
punyan-punyan kayune akeh bah balbal paslengkat. Goane genjong magejeran dindingnyane
belah siag. Dening asapunika digelis Sang Arjuna nglesuang yoga, uning ring karauhan
durmanggala. Medal Sang Arjuna malincakan sinambi makta panah sregep saha gandewa
sampun mapentangang. Kacingak celenge nglumbih, batu pilahdekdek remuk asing poroda,
sinamian sambeh plaketik. Daat gegaok Sang Arjuna nyingakin tingkah celenge krura pisan
nglumbihin gunung. Gelis madabdab raris nyaluk kawaca tur gelang. Sasampune puput
mabusana raris Ida sayaga nyantos sapangrauh i celeng. Kacrita mangkin Ida Sang Hyang Siwa
taler rauh magredegan mrika. Pamargan Ida jangkep kairing antuk para dewa resine. Saking
Siwa Loka Ida Sang Hyang Siwa uning tur ngaksi kawentenan Sang Arjunane sampun puput
yasan Idane. Ne mangkin panamayan Ida Sang Hyang Siwa nureksain majalaran antuk rebat,
anggen Ida ngaruanang kadiran Sang Arjunane. Punika awanan pajalan Si Murkane kasarengin
Ida Sang Hyang Siwa. Ida nyaru-nyaru sakadi tingkah juru boros, mangda polih dalihan marebat
ring Sang Arjuna. Critayang mangkin celenge sedeng nyantepa nglumbih tumuli kaintip olih
Sang Arjuna. Sang Hyang Siwa taler sareng ngintip celenge, tur kadangsekin tumuli raris
kapanah antuk panah mamutama mawastu keni lambungipune. Sadaweg punika Sang Hyang
Siwa nyarengin nimbakang panah taler ngeninin lambung celenge. Tatun celenge wantah asiki
samalihnya panahe kapastu antuk Ida Sang Hyang Siwa mangda dados asiki. Ring sampune
padem Si Murka encol Sang Arjuna nangsekin misadia pacang ngabut panahe sawireh Ida nenten
madue kayun sangsaya. Kacingak Sang Arjuna encol pacang ngabut panahe, kala punika Ida
Sang Hyang Siwa ngandika brangas, "Ih, enyen iba langgana pesan teka iju-iju nyemak panah
tan patolihan. Nirdon cai maketu muah maganitri nongos di gunung alas nanging laksanan caine
mamati-mati. Panganggon caine dogen pandita, nanging keneh caine corah." Kosek kayun Sang
Arjunane mireng raos kadi punika mawastu kebus buka panggang, sawireh dukane kaliwat tur gelis
nyaurin, "Nyen iba kaliwat ngawag mamunyi. Adeng-adeng cai ngraos eda kadlumuk. Mirib cai tusing
nawang kai. Cai apang tangar kai tuah ane madan Sang Arjuna. Bas kaliwat iba mesuang munyi nyakitin
kuping. jani kai ngorahin, yen iba tusing ngidih kapelihan, tur ngusap ebuk di batis kaine tuara buungan
iba matiang kai." Sapunika pangandikan Sang Arjunane. Ida Sang Hyang Siwa gelis ngelepas panah
kairing olih para dewane. Mabriuk sami ngembulin Sang Arjuna nanging Sang Arjuna nenten
ajrih. Sang Arjuna daat tangar gelis nglepas panah marupa gulem maduluran ujan angin saha kilap tatit
suarannya magrudugan. Malih Sang Hyang Siwa ngambil panah Nagapasa krura galak. Kapagpag olih
Sang Arjuna antuk panah Geruda. Tan Kacritayang rames payudane, pamuputne senjatane pada telas
dekdek lidek. yudane sane mangkin tanpa senjata, pada mamogol punika mawinan pada ejuk saling
maruket saling pantigang. Santukan bes suene, pamuputnya kasoran Sang Arjuna tur keni kanjambak.
Sang Arjuna polih ngwalesang sayaga ngintip saha kasaup cokor Sang Hyang Siwane, praya pacang
kapantigang nanging Sang Hyang Siwa sane malingse dados juru boros saget ical tan palarpan. Sasampun
sang Hyang Siwa malecat gelis turun sabeh sekar kadulurin weda pangastungkara jaya-jaya miwah suara
genta paklening ring ambarane. Kacingak Sang Hyang Siwa maraga Ardanaresuari malingga ring sekar
tunjunge. Swatejan Ida dumilah galang. Irika raris Sang Arjuna ngaturang sembah. "Inggih Ratu Bathara
ampura pangubhaktin titiang i nista. Sakal niskala pangubhaktin titiang ring jeng Bhatara nenten tios.
Palungguh Bhatara, meraga api medal saking kayu, maraga minyak medal saking santen. Palungguh
Bhatara pacang malingga ring sang maraga luih sane setata ngulik tutur kadiatmika. Palungguh Bhatara
ngebekin jagat. Palungguh Bhatara maraga unteng tatuane mautama. Palungguh Bhatara malingga ring
sahananing sane wenten. Palungguh Bhatara ngebekin Bhuwana Agung miwah Bhuwana Alit. Palungguh
Bhatara maraga Utpeti, Maraga Stiti. Palungguh Bhatara maraga Pamralinasahnaning sane wenten.
Palungguh Bhatara pinaka jiwan jagate, pinaka jiwan sahananing sane katon miwah sane nenten katon.
Sakadi lawat bulane sane wenten ring pasone madaging toya. Yan toyane ening bersih, janten cedang
lawat bulane punika. Sapunika taler Palungguh Bhatara, wantah ring Sang Wicaksana saha langgeng
mayoga semadi kewanten sane prasida nyingak Palungguh Bhatara saha sueca jeneklanggeng
mapawayangan ring Ida. Palungguh Bhatara paragayan Ida Sang Hyang Widhi. Palungguh Bhatara
maraga suci nirmala nenten sida antuk nglawatang. Nanging Palungguh Bhatara pacang prasida
kapanggihin, prasida karasayang antuk Ida sang maraga Maha Yogi, saantukan kawiaktiannya wantah
punika tetujon Ida sane pinih mautama." Durung puput Sang Arjuna ngaturang sembah gelis kacawis
antuk Ida Sang Hyang Siwa, "Uduh Dewa Sang Arjuna, suba tatas Bapa tetujon I Dewane. Jani Bapa
nganugrahin I Dewa panah madan Pasupati. Nah lautang terima Dewa". Sapunika pangandikan Ida Sang
Hyang Siwa. Mawastu medal geni murub saking tangan Ida Sang Hyang Siwa tur marupa raksasa makta
panah ngendih. Kaenjuhang panahe punika di gelis katerima antuk Sang Arjuna. Ri sampun panah
katerima mawastu api murube punika masikian ring panahe. Sampun puput Sang Arjuna nunas
panugrahan tumuli ngaturang bhakti. Lianan ring panah taler kaicen pamentangannya miwah
kaicen gelungan. Mangda jangkep paicane, Sang Arjuna taler kaicen pawisik tata cara indik
mayuda antuk Ida Sang Hyang Siwa.