LANGKAH PERTAMA

MANDATANGAN UNDIANGAN

SILANG SAPANGKA (sutan) :

Kapalo mudo,

Sungguahpun kapalo mudo nan ambo imbau kok jauh nan tampak asok
dakek nan tapak api dakek jolong tasuo, tapi sipaiknyo bana kahadopan
niniak mamak, alim ulama cadiak pandai, urang ssumando sarato anak
nan babako tamasuak sakalian pemuda luhak jo lingkuang umum nyo
sagalo nan duduak sahamparan, nan diateh lapiak nan tabantang,

Tabik undiangan tabukak kato dari ambo, sipaik nyo bana kami nan
baradiak ba kakak, ba mamak kamanakan, ba anak ba minantu sipaik nyo
bana sagalo kami silang nan sapangka karakok nan bajunjuang.

Bunyi kato buah undiangan dek kami, dek karano nan diundang nan alah
datang nan dijapuih alah tibo, lah datang niniak dengan mamak, lah tibo
urang sumandi sarato anak nan babako tamasuak pemuda, tantu dek
kami, kok duduak nan alah lapeh payah baranti nan alah lapeh rangah
ado nan takilan dek mato takana dek hati, nandak mandayuang dayuang
nan bak silindik, insuik-insuik nan bak samuak, nandak manggolongan
bulek ka nan data nandak manyabuik undiangan ciek jo duo e alah kok
buliah, dek kami mak karandak ba agiah pintak bapalakuan, sakian mak.

NINIAK MAMAK (kapalo mudo),

Sampai sutan,

Lah disimak kato didanga undiangan sutan, itu cupak tatagak nan baisi,
jenjang takanak nan batingkek, kayu barakuak nan batabang, bana kato
nan basabuik, lai nan bana kato nan basabuik tantu dek ambo dibaliak-
baliak nan bak mamanggang diulang-ulang nan bak manjaja di sabuik
awa e managko dapek akia e, elok diambiak batang sitawa urek
1
basitumpu dalam ayia, elok disabuik nan di awa supayo dapek nan di
akia,

Dia awanyo tadi sutan nan imbau ambo tapi sungguah pun ambo nan
jauh tampak asok dakek nan tampak api dakek jolong tasuo tapi sarapek
papeknyo sagalo niniak mamak, alim ulama cadiak pandai, urang
ssumando sarato anak nan babako tamasuak sakalian pemuda luhak jo
lingkuang umum nyo sagalo nan duduak sahamparan, nan diateh lapiak
nan tabantang,

Buah parundiangan sutan dek karano nan diundang nan alah datang nan
dijapuih alah tibo, lah datang niniak dengan mamak, lah tibo urang
sumandi sarato anak nan babako tamasuak pemuda, tantu dek kami, kok
duduak nan alah lapeh payah baranti nan alah lapeh rangah ado nan
takilan dek mato takana dek hati, nandak mandayuang dayuang nan bak
silindik, insuik-insuik nan bak samuak, nandak manggolongan bulek ka
nan data nandak manyabuik undiangan ciek jo duo e alah kok buliah, dek
kami mak karandak ba agiah pintak bapalakuan, kan baitu sutan.

Kini nyo lai sutan dek ambo diagiah adih badalia kato nan bamisa, samisa
bajalan sutan, sungguahpun ambo bajalan di nan lapang indak bana
rantiang nan kamanaruang, indak bana duri nan ka mancucuak, tapi
lakek kanji jo pului-puliak mungkin ka manggali, ambo teba an dulu jalo
suto mananti sutan,

SILANG SAPANAGKA (sutan) :

Sampai mak,

Disimak kato didanga undiangan amak, kan iyo angku haji mamakai
jubah, angku datuak mamakai saluak deta talilik nan dikapalo, bajalan ba
molah bakato bakato baiyo mancari undiangan saiyo, dek ambo mak, asa
lai kandak nan kabuliah pintak nan kabalaku, bananti mak.

2
SALANJUIKNYO NINIAK MAMAK MAM PAIYOAN KA BAKE URANG
SUMANDO,

NINIAK MAMAK,

Bagindo,

Sungguah pun bagindo nan ta imbau gala tasabuik namo sipaik nyo bana
sagalo urang sumando kami, tinggi jo randah luak jo lingkuang umumnyo
sagalo nan hadir.

Buah parundiangan bagindo, elok diambiak batang sitawa urek

basitumpu dalam ayia, elok disabuik nan di awa supayo dapek nan di
akia, di awanyo tadi, silang nan sapangka mandatangan undiangan ka
mangke ambo, tapi sungguah pun ambo nan jauh tampak asok dakek nan
tampak api dakek jolong tasuo tapi sarapek papeknyo sagalo niniak
mamak, alim ulama cadiak pandai, urang ssumando sarato anak nan
babako tamasuak sakalian pemuda luhak jo lingkuang umum nyo sagalo
nan duduak sahamparan, nan diateh lapiak nan tabantang,

Buah parundiangan nyo bagindo, dek karano nan diundang nan alah
datang nan dijapuih alah tibo, lah datang niniak dengan mamak, lah tibo
urang sumandi sarato anak nan babako tamasuak pemuda, tantu dek
kami, kok duduak nan alah lapeh payah baranti nan alah lapeh rangah
ado nan takilan dek mato takana dek hati, nandak mandayuang dayuang
nan bak silindik, insuik-insuik nan bak samuak, nandak manggolongan
bulek ka nan data nandak manyabuik undiangan ciek jo duo e alah kok
buliah, dek ambo kato nan alah bajawek undiangan nan alah
bakumbalian tapi karadak alun ba agiah pintak nan alun balakuaan, dek
karano mangguntiang nan bapaco makan nan barimah, baundiang nan
baiyo bakato nan bamolah, itu pulo nan ambo paiyoan ka mangke
bagindo tapi sungguah pun bagindo sagalo urang sumando kami, sakian
bagindo.

3
JAWEK URANG SUMANDO

Sampai mak kapalo mudo,

Dek ambo mak lah disimak kato didanga undiangan, iyo cupak tatagak
nan baisi jalan nan pasa nan batampuah kato nan bana nan basabuik, ba
a bana kato nan basabuik , disabuik dimulo di awa nyo tadi silang nan
sapangka mandatangan undiangan ka mangke amak kapalo mudo tapi
sungguah pun amak tatapek undiangan tata tumpu kato arati nyo bana
nan dakek jolong tasuo nan jauh jolong tampak tapi sarapek papeknyo
sagalo niniak mamak, alim ulama cadiak pandai, urang sumando sarato
anak nan babako tamasuak sakalian pemuda luhak jo lingkuang umum
nyo sagalo nan duduak sahamparan, nan diateh lapiak nan tabantang,
satatantang buah parundiangan, sunaik kato diulang diulang kato nan
kini pa ambiak ibah kato nan tadi, disabuik di awa nyo tadi dek dunsanak
kito silang nan sapangka, dek karano nan diundang nan alah datang nan
dijapuih alah tibo, lah datang niniak dengan mamak, lah tibo urang
sumando sarato anak nan babako tamasuak pemuda, kok duduak nan
alah lapeh payah baranti nan alah lapeh rangah tantu ado nan takilan dek
mato takana dek hati, nandak mandayuang dayuang nan bak silindik,
insuik-insuik nan bak samuik, nandak manggolongan bulek ka nan data
nandak manyabuik undiangan ciek jo duo e alah kok buliah, dek mamak
kapalo mudo kato alah bajawek undiangan nan alun bakumbalian kadak
alun ba agiah pintak alun balakuan dek karano mandapek samo balabo
kailangan samo karugian jikok sorang mungkin basampik sampik
basamo balapang-lapang dek karano kito basomo tantu kok kenek nan
kadibagi bacacah nan gadang ka dibagi baumpuak, balayangan pandang
nan jauh batukiakan pandangan ka nan ampia tatukiak pandangan
manke ambo, tapi, sungguah pun ambo sipaik nyo bana sagalo kami
urang sumando gadang ketek tuo jo mudo umum sagalo nan hadir, kan
baitu mak,

Dek ambo amak dapek surang mungkin dibulek i dapek basamo mungkin
dibagi basamo, tapi dek karano tasabuik sagalo urang sumando tantu dek
ambo sasuai jo undiangan amak karano mandapek samo balabo
kailangan samo karugian dapek surang babulek i dapek basamo ditariak
jo mufakaik mufakaik ambo dulu mananti amak sabanta, sakian.

4
JAWEK KAPALO MUDO

Sampai bagindo,

Kok kato bagindo kan iyo kato sabana e cupak tatagak nan baisi, jalan
nan pasa nan batampuah kato bana nan basabuik, kok dapek surang ka
dibulek i dapek basamo ditariak jo mufakaik, mufakaik bagindo mananti
ambo kan baitu, dek ambo bagindo yo baitu, rancak buni gandang dek
tingkah manih kato dek baiyo, baiyo bagindo mananti ambo, balapangan
sutan.

SALANJUIK NYO URANG SUMANDO MAM PA IYOAN KA URANG

SUMANDO NAN LAIN,

Sutan pamenan,

Sutan nan ambo imbau, kok bisiak sutan mungkin lah salamo tadanga
sorak mungkin lah bakalampauan, tapi dibaliak-baliak bak mamanggang
sutan, diulang-ulang bak manjaja, disabuik awa e mangko dapek akie, di
awanyo tadi, mamak kapalo mudo ma imbau ambo tapi sungguah pun
ambo nan taimbau aratinyo bana sagalo kito urang sumando nan duduak
sahamparan,

Buah parundiangan nyo sutan, diawanyo tadi silang nan sapangka

mandatangan undiangan ka mannke mamak kapalo mudo, tapi
sungguahpun mamak kapalo mudo nan taimbau arati nyo bana sagalo
niniak maka, alim ulama, cadiak pandai, urang sumando sarato jo
pemuda umum sagalo nan hadir, buah parundiangan nyo sutan , dek
karano nan diundang nan alah datang nan dijapuih alah tibo, lah datang
niniak dengan mamak, lah tibo urang sumandi sarato anak nan babako
tamasuak pemuda, tantu dek kami, kok duduak nan alah lapeh payah
baranti nan alah lapeh rangah ado nan takilan dek mato takana dek hati,
nandak mandayuang dayuang nan bak silindik, insuik-insuik nan bak
samuik, nandak manggolongan bulek ka nan data nandak manyabuik
undiangan ciek jo duo e alah kok buliah, dek mamak kapalo mudo sutan
kato nan alah bajawek undiangan nan alah bakumbalian, karadak alun
5
ba agiah pintak nan alun balakuaan, dek karano mangguntiang nan
bapaco makan nan barimah, baundiang nan baiyo bakato nan bamolah,
itu pulo nan di paiyoan ka mangke ambo tapi sungguah pun ambo sipaik
nyo sagalo urang sumando,

Dek ambo sutan kok kato nan alah bajawek undiangan nan alun
bakumbalian karano dek kito urang samundo surang jo baduo tapi lah
samo tampak, tantu ambo paiyoan kini tatapek mangke sutan, dek ambo
pulangan lah dek sutan undiangan mamak kalapo mudo nan ambo, ba a
pulang sutan lah sasuai, kok pakirim indak baturuik an doh sutan pitaruh
indak ka baunyian doh sutan, sakian,

JAWEK SUTAN PAMENAN,

Sampai da ,

Disimak kato didangan undiangan, kok kato uda kan iyo kato sabana e
cupak tatagak nan baisi jenjang takanak nan batingkek jalan nan pasan
nan batampuah bana kato nan basabuik, mam bana kato nan basabuik
elok diambiak batang sitawa urek basitumpu dalam ayia, elok disabuik
nan di awak mangko dapek nan diakia, diawa nyo tadi dek silang nan
sapangka mandataangan undiang an ka mamak kapalo mudo tapi
sungguahpun mamak kapalo mudo nan taimbau arati nyo bana sagalo
niniak maka, alim ulama, cadiak pandai, urang sumando sarato jo
pemuda umum sagalo nan hadir, apo bana kolah undiangan nan di
datangan dek karano nan diundang nan alah datang nan dijapuih alah
tibo, lah datang niniak dengan mamak, lah tibo urang sumandi sarato
anak nan babako tamasuak pemuda, tantu dek kami, kok duduak nan
alah lapeh payah baranti nan alah lapeh rangah ado nan takilan dek mato
takana dek hati, nandak mandayuang dayuang nan bak silindik, insuik-
insuik nan bak samuik, nandak manggolongan bulek ka nan data nandak
manyabuik undiangan ciek jo duo e alah kok bulia, dek mamak kapalo
mudo kok kato nan alah bajawek undiangan nan lun bapulangan kandak
nan alun bagiah pintak nan alun balakuan, dek karano mangguntiang
nan bapaco, makan barimah barundiang baiyo bakato bamolah, baiyo
bamolah mangke uda, tapi sungguahpun uda sipaik e bana sagalo kito

6
urang sumando ketek gadang tuo jo mudo baru jo nan usang sarato luhak
jo lingkuang,

Dek uda kok kato nan alah bajawek un diangan nan alun bapulangan
kandak alun ba agiah pintak alun bapalakuan, dek uda mandapek nan
samo balabo kahilangan nan samo karugian, kok sakenek dibagi bacacah
nan gadang di bagi ba umpuak, ma engong kiri jo kanan, ba iyo suwok jo
kida, bamolah ka mangke ambo,

Dek ambo da, di awa nyo tadi kok jauh nan tampak api, dakek nan
tampak asok, jauh nan jolong tacaliak dakek nan jolong tasuo ka iyo uda
kini nyo lai dek ambo manyarahan ka mangke uda untuang mamulangan
undiangan mamak kapalo mudo ba a pulang uda nan ambo lah sasuai,
sakian,

JAWEK BAGINDO (URANG SUMANDO)

Sampai sutan,

Kok disamak kato didanga bunyi dek sutan kan iyo, kok jauh nan tampak
api, dakek nan tampak asok, jauh nan jolong tacaliak dakek nan jolong
tasuo ka iyo ambo, kini basarahan mangke ambo manjawek kato
mamulangan undiangan mamak kapalo mudo ba a jawek ambo nan sutan
alah sasuai,

Kini ba iko sutan dek ambo tantangan mamulangan undiangan jo magiah

karandak iyo tagamang nan marusuah, tacameh nan taraso maklum lah
mambaco kaji dihadapan guru mambaco adaik dihadapon mamak
tagamang ambo kajatuah takuik ambo nan kahanyuik, iyo setia dek ambo
nan manjalani sutan,

JAWEK SUTAN PAMENAN,

Sampai da,

Ruponyo dek uda setia nan manjalani tagamang nan kajatuah, takuik nan
kahanyuik, dek ambo da karano kito samo urang sumando senteang

7
samo mabilai da lamah nan samo manahua, kok hanyuik uda nan
kacameh, kok jatuah dek uda nan ka manggamang, hanyuik lai ka ambo
pinteh da jatuah lai ka ambo sambuik sakian,

JAWEK BAGINDO

Sampai sutan,

Mandanga kato sutan lah sanang dalam hati lah sajuak dalam kiro-kiro,
moh dek sutan senteang lai ka mambilai lamah nan lai kamanahua
kurang nan lai kabatukuak, tapi sutan, dek ambo setia nan idak kunjuang
abih, diagiah adih badalia kato bamisa sutan, samisa kato dinamokan apo
misa e, ibaraik urang baladang laweh, batang rimbun aka manjulai
gantiang jo dahan manjulang-julang dek ambo beko kok takarek nan
dipucuak sutan taguntiang nan dipangka santano sapuluah undiangan
hanyo ciek jo duo tapulang an dek ambo ba a beko sutan,

JAWEK SUTAN PAMENAN

Sampai da,

Ruponyo dek uda, setia nan indak kunjuang abih, tagamang nan indak
kunjuang hilang, dek uda di adih badalia kato bamisa, samisa kato
dinamokan apo misa e, ibaraik urang baladang laweh, batang rimbun aka
manjulai gantiang jo dahan manjulang-julang dek uda beko kok takarek
nan dipucuak taguntiang nan dipangka santano sapuluah undiangan
hanyo ciek jo duo tapulang an dek uda kan baitu, kini baitu da dek ambo
pulangan undiang mamak kapalo mudo tu dek uda kok santano sapuluah
nan undiangan nan datang da ciek jo duo nan tajawek dek uda, dek ambo
da dek karano kito urang sumando lai ado surang jo baduo e kok
sapuluah mungkin ndak cukuik balimo lai balabiah, kami tukuak tambah
duo surang alun kasanang hati uda lai,

8
JAWEK BAGINDO,

Sampai sutan,

Mandanga undiangan sutan dek ambo sanang dalam hati sajuak dalam
pikiran tantangan nan kurang lai ka batukuak lamah nan lai ka batahua,
kini ambo pulangan undaiangan ko sutan,

JAWEK SUTAN PAMENAN

Basarahan da,

SALANJUIK NYO BAGINDO MAMAULANGAN UNDIANGAN KA

MANGKE KAPALO MUDO

Mamak kapalo mudo,

Tadi ambo banjanji kini batapeti, buah pajanjian mancari kato nan sa
incek undiangan nan sabuku, tapi mak kapalo mudo talalai wakatu dek
abang talalai kumbang dek bungo lah talaik mamulangan undiangan mak
kapalo mudo,

JAWEK KAPALO MUDO,

Sampai bagindo,

Diawa nyo tadi bagindo bajanji kini batapekti buah pajanjian mancari
kato nan sa incek undiangan nan sabuku, tapi dek bagindo talalai wakatu
dek abang talalai kumbang dek bungo lah talaik mamulangan undiangan
ambo kan baitu,

Dek ambo bagindo sajak tadi sampai kini asa lai kato nan kabajwek
undiangan nan bakumbalian talaik jo lambek lah bananti bagindo, pauh
kamba balai satu, makin patang makin rami, asa lai dapek nan ka tuju
kariang lauik tan banati bagindo sakian,

9
JAWEK BAGINDO,

Sampai mak kapalo mudo,

Ruponyo dek amak baalauik laweh bapadang lapang asa lai kandak
kabuliah pintak lai kabalaku lamo jo lambek bananti kan baitu,

Dek ambo nyo lai mak kapalo mudo, tantangan undiangan amak tadi,
diagiah adih badalia kato ba misa samisa kato dinamokan apo misa e,
ibaraik urang baladang laweh, batang rimbun aka manjulai gantiang jo
dahan manjulang-julang dek ambo kok takarek nan dipucuak taguntiang
nan dipangka aka sato tabubuik, aratinyo bana dek ambo nan dulu
takudiyanan nan dibalakang takamuko an, nan disampiang tabaok
katangah atau sapuluah undiangan amak ciek jo dou tapulangan dek
ambo ba a beko tua,

JAWEK KAPALO MUDO

Sampai bagindo,

Ruponyo dek bagindo setia manjalani tagamang nan kajatuah takuik nan
kahanyuik, dek bagindo diagiah adih badalia kato ba misa samisa kato
dinamokan apo misa e, ibaraik urang baladang laweh, batang rimbun aka
manjulai gantiang jo dahan manjulang-julang dek bagindo kok takarek
nan dipucuak taguntiang nan dipangka aka sato tabubuik, aratinyo bana
dek bagindo nan dulu takudiyanan nan dibalakang takamuko an, nan
disampiang tabaok katangah atau sapuluah undiangan dek ambo ciek jo
dou tapulangan dek sutan kan baitu sutan,

Kini sutan, tantang setia dek sutan nan manjalani tagamang nan kajatuah
takuik nan kahanyuik kok ado dek sutan takarek nan dipucuak
taguntiang nan dipangka aka sato tabubuik, aratinyo bana nan dulu
takudiyanan nan dibalakang takamuko an, nan disampiang tabaok
katangah atau sapuluah undiangan dek ambo ciek jo dou tapulangan dek
sutan dek ambo sutan indak dicari bana tanjuang nan balilik padang nan
baliku doh sutan kok ado takarek nan dipucuak taguntiang nan dipangka

10
aka sato tabubuik jan cameh sutan tinaman ndak katumbuah siram dek
sutan ambo mamupuak, kamudian kok ado nan dulu takudiyanan nan
dibalakang takamuko an, nan disampiang tabaok katangah jan tagamang
sutan tantangan tu asa lai kapa tanang dalam balayia sutan nan kodo
aman pacik kamudi dima jo latak pasisia jadi nyoh sutan sudah tu
undiangan nan sapuluah dek ambo ciek jo duo tapulangan dek sutan, kok
santano ciek jo duo tu dapek dibagi duo sapaduo jadinyoh sutan asa lai
karandak ka ba agiah,

JAWEK BAGINDO

Sampai mak kapalo mudo,

Ruponyo dek amak balauik laweh nan bapadang lapang tantangan setia
nan dek ambo tadi tantu dek ambo kini nyo lai lah sanang dalam hati lah
lapang dalam pangana,

Kini nyo lai mak elok diambiak batang sitawa urek basitumpu dalam ayia
elok disabuik nan di awak mangko dapek nan diakia, diawa nyo tadi dek
silang nan sapangka mandataangan undiang an ka mamak kapalo mudo
tapi sungguahpun mamak kapalo mudo nan taimbau arati nyo bana
sagalo niniak maka, alim ulama, cadiak pandai, urang sumando sarato jo
pemuda umum sagalo nan hadir, apo bana kolah undiangan nan di
datangan dek karano nan diundang nan alah datang nan dijapuih alah
tibo, lah datang niniak dengan mamak, lah tibo urang sumandi sarato
anak nan babako tamasuak pemuda, tantu dek kami, kok duduak nan
alah lapeh payah baranti nan alah lapeh rangah ado nan takilan dek mato
takana dek hati, nandak mandayuang dayuang nan bak silindik, insuik-
insuik nan bak samuik, nandak manggolongan bulek ka nan data nandak
manyabuik undiangan ciek jo duo e alah kok bulia, dek mamak kapalo
mudo kok kato nan alah bajawek undiangan nan lun bapulangan kandak
nan alun bagiah pintak nan alun balakuan, dek karano mangguntiang
nan bapaco, makan barimah barundiang baiyo bakato bamolah, baiyo
bamolah mangke ambo, tapi sungguahpun ambo sipaik e bana sagalo

11
kami urang sumando ketek gadang tuo jo mudo baru jo nan usang sarato
luhak jo lingkuang,

Dek ambo mak lah baiyo kiri jokanan bamolah suok jo kida lah dapek
undiangan nan sabuku kato nan sa iyo, kok bolek lah dapek digolongan
picak nan lah dapek dilayangan lah bulek kato jo mufakaik lah supakai
kami sagalo urang sumando manyarahan undiangan mangke mamak
kapalo mudo untuak manjawek undiangan, jo magiah karandak sakian
mak.

JAWEK KAPALO MUDO

Sampai bagindo,

Kok kato bagindo iyo kato sabana e, nan babaraih makan pahek nan lah
luruih dek baghantangan banang, dek bagindo baiyo kiri jokanan
bamolah suok jo kida lah dapek undiangan nan sabuku kato nan sa iyo,
kok bolek lah dapek digolongan picak nan lah dapek dilayangan lah bulek
kato jo mufakaik lah supakai sagalo urang sumando manyarahan
undiangan mangke ambo untuak manjawek undiangan, jo magiah
karandak bapulangan mangke ambo kan baitu,

Kininyo lai bagindo manyimak ambo tantangan undiangan bagindo

mandanga ambo tantangan kato iyo setia dek ambo nan manjalani
bagindo tagamang ambo mamulangan undiangan maklumlah beko
santano undiangan nan datang sapuluah tapulangan dek ambo ciek jo
duo lai ka ba a beko,

JAWEK BAGINDO

Sampai mak

Ruponyo dek amak setia manjalani ntagamang nan kajatuah takuik nan
kahanyuik, kok nyampang undiangan nan kapapuloangan kato nan
kabakumbalian sapuluah undiangan nan datang ciek jo duo dek amak
takumbalian kan baitu, dek kami mak urang sumando nan duduak
sahamparan di nateh lapiak nantabantang lah sapakaik kok sapuluah
12
undiangan nan datang ciek jo duo takumbalian dek amak basamo kami
mancukuik nan ciek tu supayo boneh mak, kini nyo lai pulangan lah dek
amak undiangan silang sapangka tu nan kami kok ado nan senteang lai
ka babilai mak lamah lah ka tahua nan kurang lai ka batukuak,

JAWEK KAPALO MUDO

Sampai bagindo,

Mandanga kato bagindo sanang dalam hati sajuak dalam pikiran ibaraik
tateleang lai kadapek tupang ibarang ka guyah lai ka bapasak, kini
bagindo dek ambo ibaraik nan kodo mambaok kapa balayia, angin
kancang ombak basaua, tali saua putuih ditangah lai ka ba a beko,

JAWEK BAGINDO

Sampai mak

Dek amak setia nan idak kunjuang habih tagamang nan indak kunjuang
hilang, moh dek amak ibaraik nan kodo mambaok kapa balayia, angin
kancang ombak basaua, tali saua putuih ditangah lai ka ba a beko, dek
kami mak, tantangan tu, kok nyampang oleang kapa ka kida mak kasuok
kami bapijak, kok nyampang manukiak kamungko kabulakang kami
balari, kok nyampang ayia masuak kapa tabanam jo sikoci amak kami
anta an katapi. Sakian.

JAWEK KAPALO MUDO,

Sampai bagindo,

Kini baitu lah bagindo ibaraik babuai jo tali aka sabalun aka gantiang tali
paganti lah basadio an, dek ambo hilang nan manggamang habih nan
marusuah kini ambo pulangan undiangan ko,

13
SALANJUIKNYO KAPALO MUDO MAMULANGAN UNDIANGAN SILANG
SAPANGKA.

Sutan,

Sanjo hari di kurai taji, pagi hari di pasa jati tadi ambo bajanji kini baru
batapeti, tapi lah talalai wakatu dek abang talalai kumbang dek bungo
talaik mamulangan undiangan sutan, ba a tu a.

JAWEK SILANG SAPANGKA,

Sampai mak,

Dek ambo urang pauh mamasang lampu, pai manembak katalao, tapijak
rantiang sikaduduak, bapatahan rantiang dalam palak asa lai dapek nan
katuju inggo ndak baurak selo, indak ba asak duduak, dek mananti
undaingan amak.

JAWEK KAPALO MUDO,

Sampai sutan,

Dek sutan pauh kamba balai satu makin patang makin rami asa lai dapek
nan katuju kariang lauiktan bananti, kini nyo lai sutan, di awa e tadi kok
jauh nan jolong tasobok dakek nan jolong tasuo kan ambo, ibaraik
pantun sutan juo, bolak baliak oto di padang, suruik e ka kampuang jao
juo, acok bana undiangan nan datang suruuik e ka badan diri ambo juo
mamulangan undiangan sutan, ba a dek sutan tua,

JAWEK SILANG SAPANGKA,

Sampai mak,

kini baitu lah mak ba awa ba akia bamulai bakasudah diawa e tadi dek
ambo kan iyo kok dakek nan jolong tasuo jauh nan jolong tampak kan
amak kini dek amak bolak baliak oto di padang, suruik e ka kampuang jao

14
juo, acok bana undiangan nan datang suruik e ka badan diri amak juo
mamulangan undiangan ambo kan baitu, dek ambo amak, iyo ba itu dek e
mak, nan manyamai nan mancubuik mak, iyo nan maghantang nan
mambaok kalumbuang mak supayo salamaik padi di paluang,

JAWEK KAPALO MUDO,

Sampai sutan,

Ruponyo dek sutan asa salamaik padi dipaluang nan manghantang

mambaok kalumbuang kan baitu, dek ambo nyo lai sutan ado nan
manggamang nan marusuah kok ndak panuah paluang taisi padi
disenggan lai ka batarimo,

JAWEK SILANG SAPANGKA

Balapangan mak, asa lai cukuik tanak satahun,

JAWEK KAPALO MADO,

Kini baitu lah sutan,

dek ambo padi mudo basabik hampa padi masak baja ghajauan masak
sabatang lah di gitia masak sa umpun lah basabik lah diteba an ayia
ditangah sawah lah dibuleka an ayia ka pambulauh lah bulek kato jo
mufakaik, lah sapakaik kami sagalo niniak mamak, urang sumando sarato
anak nan babako tamasuak pemuda luhak jo lingkuang ma agiah
karandak sutan kok ado undiangan nan kadi baco kato ka basabuik niak
jo mukasuik ka basam paian, jalan balapangan jenjang bakanaan sakian,

JAWEK SILANG SAPANGKA,

Sampai mak kapalo mudo,

15
Ruponyo dek amak padi mudo basabik hampa padi masak baja ghajauan
masak sabatang lah di gitia masak sa umpun lah basabik lah diteba an
ayia ditangah sawah lah dibuleka an ayia ka pambulauh lah bulek kato jo
mufakaik, lah sapakaik sagalo niniak mamak, urang sumando sarato anak
nan babako tamasuak pemuda luhak jo lingkuang ma agiah karandak
kami kok ado undiangan nan ka kami baco kato ka basabuik niak jo
mukasuik ka basam paian, jalan balapangan jenjang bakanaan kan ba itu
mak,

Dek ambo mak dek karano jalan balapangan belegho lah basingkoan
tantu ado undiangan nan kadibaco kato nan kadisabuik mukasuik ka
disampaian, tapi istirahat kito ba undiangan dulu mak,

SELANJUIK NYO MANYAMPAIAN TARATIK SAMBAH

Bersambung

16