Kawilujengan, katentreman saha nugrahanipun Gusti Ingkang Mahakwasa, mugi tansah
kapitedhakna dhumateng kula sedaya wonten ing pahargyan punika.
Pidhato Atur Pambagya
Ngaturaken pambagya wilujeng saha matur nuwun sanget, awit kepareng panjenengan sampun kersa rawuh wonten ing papan pahargyan punika. Matur nuwun sanget sedaya peparing tali asih tanda tresna ingkang awujud punapa kemawon. Ugi matur nuwun katur para tangga tepalih, sanak kadang, mitra tresna ingkang paring pambiyantu, saengga lancar, regeng kaleksanaipun pahargyan punika. Keperluan ing dinten punika kaleksanaan ijab, panggih, saha tata cara adat kejawen, saking Bapa Sudarmanto ingkang kagungan kersa hangemah-emahaken putra pawestrinipun ingkang anama Rr. Agnes Raras Guspita kadhaup Bg. Sapto Nugroho putranipun Bapak/Ibu Suparlan ing Ngayogyakarta. Salajengipun nyuwun tambahing pangestu paratamu mugi-mugi penganten kekalih tansah rukun, tansah runtut atut. Wasana cekap semanten atur kula ewa dene wonten kekirangan, wiwit atur sedhahan ingkang boten trep, asma sesebatan, saha sanes-sanesipun, kasuwun halapang jaja hangluberaken agunging samodra pangaksama.
Pidhato Pasrah Paningset
Atur ingkang kapisan, kula ngaturaken salam wilujeng Bapa Suparlan kekalih, mugi katur Bapa Sudarmanto sekalian, sinartan pamuji mugi Bapa Sudarmanto sakulawarga tansah hamanggya suka basuki. Ingkang kaping kalih, kadhawuhan hangatepaken rembug ingkang sampun gumalong hanggenipun Bapa Suparlan kekalih,badhe mundhut mantu putra estri panjenengan Rr. Agnes Raras Guspita badhe kajodhohaken kalian Bg. Sapto Nugraha, putra jaleripun Bapa Suparlan Kekalih, ingkang punika kula kadhawuhan haningset rembag sesambetanipun menika. Kula ugi kasaroya hangaturaken abon-abon sawatawis, mugi Bapa Sudarmanto kepareng hanampi. Dene minangka pungkasaning atur kula, kula nyuwun pangapunten sedaya kekirangan kula nalika kula matur saha sowan.
Pidhato Pasrah Penganten Kakung
Wondene kalampahnipun makaten, kala wau wanci tabuh 09.00 panganten kakung kula pendhet saking dalem jalan Ahmad Yani 4, Solo, kanthi kairing para sepuh, kulawarga, sanak kadang, kula bekta sowan dumugi ing dalem jalan Gunung wilis 5, Semarang ngriki,kalayan gangsar saha gancar. Pramila ngembun saha ngemban dhawuh wigatosing sedya, keparenga ing samangke panganten kakung kula pasrahaken saha kula sumanggaaken katur ibu saha Bapa Sudarmanto cundhuk lampahing upacara.
Wasana kula nyuwun pangaksami, bok bilih anggenipun kula nindaaken ayahan punika wonten ingkang kirang ndadosaken pirenaning penggali.