HUMINODUN

I nopo timpuun i nga Libabou om pomogunan nopo nga olumis om aiso kinasansalaon. I
Kinoingan om i Suminundu nopo nga kitanak kusai di pinungaranan do Ponompulan om tanak
tondu di pinungaranan do Ponompuan. Insan tadau, tanak kusai di Kinorohingan i Ponompulan
rinumaat o ginawo. Rinumaat ginawo di Ponompulan om numangan disio gunoo ngawi nunu i
winangun di Kinorohingan montok dau sondii di tangaraat. Kotogod nodi i Kinorohingan om
pataamo do disio i Ponompulan hilo id saralom do pomogunan di roitan do Kolungkud. Mantad
dii noonuan di Kinorohingan iti tulun do kooturan id nombo isai nopo i momidouso nga ukumon
do turu taang kasansaraan. Taang di nopo nga pinogitigurasan, rapit, minoguralas,
minonombilalang, guminompus om podiagod, minabpagadau o mi kotohurionon nopo nga
pudsoh om lous. Mantad do kinaraatan di nowonsoi, korutum nodi ngawi o kopoposion id
pomogunan dii. Osianan tomod i Ponompuan kumaa di tongotulun tu norutum om monlous do
aiso taakanon. Pokianu no i Ponompuan do kasagaan kumaa di Kinorohingan do momolubuk
do tinan dau sondii sabaagi tanda do lisih kumaa toinsanan. Polubuko’ no di Kinorohingan i
Ponompuan mooi do kaanu i tongotulun do taakanon. Tinan dau nosiliu do linsou toonomon om
nosiliu sabaagi do koonuan taakanon id pomogunan. Sunduan di Ponompuan nosiliu do parai
om roitan do Bambarayon sunduan do parai. Ponompuan di linumubuk nopo nga Huminodun i
roitan do sunduan parai. Huminodun nopo nga kirati do ‘yang dikorbankan’ maya do
kinopomolubukan di Ponompuan di minanahak do kasanangan kumaa tongotulun.