Professional Documents
Culture Documents
მამარდაშვილი საქართველოზე.
მამარდაშვილი საქართველოზე.
ქართველობა, როგორც ბუნების ელემენტი, როგორც მოცემული ფაქტი, არის ეთნოსი. რაც
შეეხება ერს, იგი შედეგია იმისა, თუ როგორ მუშაობენ ეთნოსში რაღაც სხვა ძალები. ეს ძალა
შეიძლება იყოს მაგალითად, რელიგიური, ჩვენს შემთხვევაში – ქრისტიანობა. ის, რასაც
ქართველის «ეროვნული» თვისება ქვია, შედეგია ამ ძალების მიერ ეთნიკური მასალის
დამუშავებისა. (...) ერი და ეთნოსი ერთმანეთს არ ემთხვევა. ერი ყალიბდება იმის შედეგად, რომ
ინდივიდების გარკვეული, ეთნიკურად მოცემული რიცხვი აღმოჩნდება ერთი ბედისწერის
წინაშე, ე.ი. მათ აერთიანებთ საერთო ისტორიის განცდა, გამარჯვებისა და სიკვდილის
ცნობიერება, საკუთარი თავის რეალიზაციის წესი. (...) ჯერ ბუნებრივად იბადება ქართველობის
ეთნიკური მონაცემები, ეთნიკური ქართველი, შემდეგ კი ყალიბდება ქართველი, რომელიც
ეკუთვნის ქართველ ერს. იბადება, ვიმეორებ, ისეთი ძალების წიაღში, რომლებიც ამუშავებენ
ეთნიკურად მოცემულ სხეულს.
ილია უდიდესი მოაზროვნე იყო არა მარტო ქართული, არამედ ევროპული მასშტაბით. თვითონ
იყო ევროპელი ადამიანი და მას ესმოდა, რომ ჩვენი, ქართული ქრისტიანობა, როგორც
პირველქმნილი, პირველადი წყაროებიდან წამოსული სახარებისეული ქრისტიანობა (რუსებისა
და ყველა სხვა იმ ქვეყნების ქრისტიანობისაგან განსხვავებით, რომლებმაც იგი ბიზანტიის
ხელიდან მიიღეს მზამზარეული და უკვე გაქვავებული სახით) სწორედ ის მოძღვრება იყო,
რომელშიც ძალიან მძლავრად ჟღერდა თავისუფლების მოტივი, ისევე როგორც პიროვნული და
პირადული საწყისების მოტივი. სწორედ ეს მოტივი იყო დანერგილი ქართველი ერის წიაღში,
პირველადი და უშუალო ქრისტიანობის წყალობით. ამას ეფუძნებოდა ქართველთა
მიდრეკილება და ლტოლვა ევროპულისაკენ, რომლის კანონზომიერებაც ასე კარგად ესმოდა
ილიას.
მას შემდეგ, რაც სახარება იქცა დროის ათვლის წერტილად (...) _ არსებობს ერთი მარტივი
კანონზომიერება: ადამიანური კულტურა და სულიერება არ შეიძლება შემოიფარგლოს და
ამოიწუროს იმ ეთნიკური მატერიით, რომელშიც ისინი ხორციელდებიან, – იგი მაინც დარჩება
კერძოობად, ცალკეულად და არასოდეს უნივერსალური არ იქნება. პიროვნული საწყისები კი,
რომლებიც სწორედ უნივერსალურობაზე არიან Uუშუალოდ და არსობრივად «გამობმულნი»,
ნაციონალური ხასიათის ნორმალური არსებობისა და სრულფასოვანი, ცოცხალი
ფუნქციონირების პირობას შეადგენენ. (...) თუ ეს საწყისები გაქრა, მაშინ ერის საუკეთესო
თვისებებსაც გაქრობა ელის. სწორედ ესაა საფუძველი ყოველგვარი სულიერობის, რადგან მისი
დედაარსი იმაშია, რომ ჭეშმარიტება ქრისტიანულ მცნებისამებრ, თვით სამშობლოზე მაღლა
დგას; მხოლოდ პიროვნებას შესწევს ძალა ეძიოს, ჰპოვოს და სრული პირდაპირობით გამოთქვას
იგი. ჭეშმარიტებას მე ჩემს სამშობლოზე მაღლა ვაყენებ და საკუთარ თავს ვეკითხები: განა ბევრია
ჩვენში ისეთი ქართველი, ვისაც შეუძლია ჭეშმარიტების დაყენება სამშობლოს თვალშისაცემ
ინტერესბზე მაღლა? და თუ არა, მაშინ ცუდი ქრისტიანები ვყოფილვართ.
ჩვენ, ქართველები, ვართ ჰაერი და არა მიწა. და სანაცვლოსაც ვღებულობთ. როცა 1988 წელს
პირველად ჩავედი ამერიკაში, Nორმან კაზექსმა ერთ-ერთ მრგვალ მაგიდაზე მკითხა: “კარგი,
მერაბ და ერთი ეს მითხარი, რანაირად დარჩი ცოცხალი მთელი ეს ხანი, როგორ გადარჩი?”
რაზეც ვუპასუხე: “გადავრჩი იმიტომ, რომ ქართველი ვარ”.
•
ჩემი გამოცდილებით, გარდა მონური ჩვევებისა, რაც რუსებს ახასიათებთ, მათში ნამდვილად
მოქმედებს კიდევ ერთი თვისება, რომელიც შეიძლება პარადოქსულად ან გაუგებრად
მოგეჩვენოთ. მე ვიტყოდი, რომ რუს ხალხს რაღაცნაირად დარღვეული აქვს ის ფენომენი, რასაც
ქვია სიცოცხლის სიყვარული ან სიცოცხლის გემო. მათგან განსხვავებით ქართველებს – და ეს
არის ჩვენთვის მომავლის იმედი - შერყეული და დარღვეული არ გვაქვს ფუნდამენტური
ურთიერთობა სიცოცხლესთან, როგორც ფენომენთან. ის ოდნავ შელახული კია, მაგრამ მისი
საძირკველი ფუნდამენტში საღია.
რატომ მოხდა რუსეთში აპოკალიფსი? როზანოვმა იპოვა ძაფი: ეს შედეგი, მისი აზრით, მოიტანა
საწყისმა, რომელიც მოქმედებდა რუსულ კულტურაში, რუსულ მენტალიტეტში – რუსი
ადამიანი ყოველთვის გარედან, რაღაც კოსმიური თუ მეტაფიზიკური ძალისაგან ელოდა შველას.
…(...) რუსულად ეს უფრო კარგად გამოითქმის (ალბათ იმიტომ, რომ ეს ფენომენი უფრო
რუსულია), иждивенчество. ეს ნიშნავს იმედის დამყარებას გარეშე ძალაზე (...). იმის მაგივრად,
რომ ჩემი სისცოცხლის დრო და სივრცე შევავსო ჩემი ძალისხმევით და შევქმნა ჩემს თავში ისეთი
რამ, რის გამოც მე შემეძლება ჩემს თავს პატივი ვცე. აქედან როზანოვს გამოყავს რუსი ადამიანის
ის თვისება, რომ იგი არ სცემს პატივს საკუთარ თავს. ეს კი, ამბობს იგი მკრეხელობაა. თუ
ნამდვილი ქრისტიანი ხარ, (...) რაკი ღმერთის ხატად ხარ შექმნილი, პატივი უნდა სცე ამ ხატს
საკუთარ თავში.
…--- ჰყავს, ეს არის კომუნისტური საბჭოთა სისტემა. რა თქმა უნდა, მთავარი სიმძიმე ამ მტრული
ძალისა არის რუსეთში, მოსკოვში. ეს იმავე საგნის, იმავე მტრის სხვა განსაზღვრაა, მაგრამ იმასაც
მნიშვნელობა აქვს, რას როგორ განსაზღვრავ. თუ ასე განსაზღვრავ, მაშინ ჩემს ბრძოლაში
მოკავშირეა ყველა ის ძალა ან ადამიანი, რომელიც რუსეთში, ესტონეთში თუ სხვაგან ანგრევს ამ
სისტემას. მაშინ ის ჩემი მოკავშირეა და მე აღარ მჭირდება ბოლომდე გავიგო მისი მენტალიტეტი.
(...)
•
ქრისტიანული რწმენა დევს თვით საწყისში თანამედროვე ევროპული საზოგადოების და
სახელმწიფოებრიობისა იმ გაგებით, რომ თვით ეს ინსტიტუტები გამსჭვალულნი არიან
ქრისტიანული სულით. რატომ? იმიტომ რომ ქრისტიანული რწმენა, რელიგია, იყო და არის (...)
პიროვნული რელიგია. იგი, როგორც სიტყვა, _ ხმა ღმრთისა, _ მიმართულიაპიროვნულ საწყისზე
ადამიანში, ანუ ადამიანის თავისუფლებაზე. ჩვენს რწმენას ორი მომენტი, ორი მცნება უდევს
საფუძვლად: თავისუფლება და მარადიული სიცოცხლე. (...) ყოველივე იმას, რაც ჩვენ დღეს
ცხოვრების ბუნებრივ წყობად და დინებად მიგვაჩნია, - საფუძვლად ქრისტიანული რელიგიის
სიმბოლოები უდევს. (...)
ამ გაგებით, მე შემიძლია ვთქვა, რომ ის რაც მოგვივიდა არის რწმენის (...) დაკარგვა. თუ
ამას გავითვალისწინებთ, მაშინ მივხვდებით, რომ (...) ტოტალიტარიზმის ანუ საბჭოიზმის
განვითარება (განსაკუთრებით, რუსეთში) შესაძლებელი გახდა მხოლოდ იმიტომ, რომ
გაუცნობიერებელმა რელიგიურმა ენერგიებმა დაკარგეს საკუთარი ობიექტი – ღმერთი – და
გადაერთვნენ (...) სხვა ობიექტებზე. ე. წ. ტოტალიტარიზმი არის უტოპიის განხორციელების
შედეგი. უტოპია შეიძლება ნებისმიერი იყოს: კლასობრივ, რასობრივი, სოციალური, ეთნიკური.
ყველა შემთხვევაში ერთი და იგივე რამ ხდება: რაღაც უტოპიური ხატის მიხედვით “წმინდანთა”
ჯგუფის თვითგამოყოფა და დანარჩენებისთვის დაპირისპირება. მე გარწმუნებთ, რომ სწორედ
ამგვარ ხატზე გადაირთო – განსაკუთრებით რუსეთში – რელიგიური ხასიათის უმძლავრესი
ენერგიები. (...) რელიგიური ენერგია გადაბრუნდა, როგორც სარკეში, და მოგროვდა
ანტირელიგიური ნიშნის ქვეშ. და ამან მისცა საოცარი ძალა იმ ანტიქრისტიანულ მოვლენას, (...)
რომელიც არის ტოტალიტარული, ანუ კოლექტივისტური საზოგადოება. ამრიგად, სახარება და
კრიტერიუმი ამ ახალი რელიგიისა არის გაყოფის, დაპირისპირებულად ანუ კლასებად
გათიშვისა და კლასობრივი ბრძოლის თეორია.
ჩვენ დავკარგეთ ის, რაც დაკარგა ყველა იმ ერმა, რომელიც საბჭოთა პრინციპების
ბატონობის ქვეშ მოექცა... დავკარგეთ იმდენად, რამდენადაც ჩვენში, ქართველ ადამიანებში,
აღმოცენდა საბჭოთა ადამიანის თვისებები. (...) გამოყვანილ იქნა ახალი ტიპის ადამიანი,
რომელსაც შეიძლება “ჰომო სოვეტიკუსი” (...) ეწოდოს, და ამან ბევრი რამ ამორეცხა იმ
არქეტიპიდან, რომელსაც ქართველი ჰქვია. მანამდეც მოხდა რაღაც პროცესები. ჯერ ერთი,
ქართულმა ხასიათმა, ქართულმა გენოტიპმა დაკარგა თავისი გარკვეულობა და რელიეფურობა.
ეკლესიის დონეზე ეს ჯერ კიდევ მე-19 საუკუნეში მოხდა: იმდენი ვერ გვავნო ვერც
მუსულმანურმა სამყარომ, ვერც მონღოლებმა, ვერც არაბებმა, სპარსელებმა თუ თურქებმა,
რამდენიც “ნათესაობრივმა”, ერთმორწმუნეობრივმა კავშირმა რუსულ კულტურასა და
ეკლესიასთან. ჩვენი რწმენა მყარიც იყო და მტკიცეც, როცა ქრისტეს რჯულის მოწინააღმდეგე
სახელმწიფოების პირისპირ ვიდექით. (...) მაგრამ საგულისხმოა აგრეთვე მეორე ფაქტიც:
საკუთარი ეკლესიები თვითონვე რომ ვანგრიეთ (1921 წლიდან დაწყებული), ეს უკვე იმის ნიშანი
იყო, რომ ჩვენ შინაგანადაც მოგვივიდა რაღაც. იმდენი ერთად აღებულმა ყველა მტერმა ვერ
დაგვიშავა, რამდენიც თვითონ დავუშავეთ საკუთარ თავს. (...) არ შეიძლება ყველაფერი გარეშე
ძალას (ამ შემთხვევაში რუსებს და საბჭოიზმს) დავაბრალოთ, რადგან ჩვენივე ისტორიის
მაგალითი კმარა იმის დასტურად, რომ წინათ, როცა შინაგანად მყარნი ვიყავით, გარეშე ძალა
ვერას გვაკლებდა. ახლა სხვა რაღაც მოხდა. მოხდა მენტალიტეტის, ხასიათის, თვითონ
ყოველდღიური ცხოვრების ყაიდის გასაბჭოება, რამაც შიგნიდან დაგვანგრია. (...) რამდენადაც
დღევანდელობას მოვერგეთ, დავკარგეთ ქართული თვისებები. ჩვენს რაინდულ ხატში ვაჭრობა
არ შედის, როგორც თვისება; ვაჭრობა არ გვეხერხება. აი, ვართ ასეთი უცნაური ხალხი
ქართველები. სამაგიეროდ, ვისწავლეთ ეფექტურობა, მოვირგეთ საბჭოთა ეკონომიკა და უფრო
კარგადაც ვცხოვრობთ. ხოლო ქართველს უყვარს სიცოცხლე და უყვარს ღირსეული ცხოვრება,
თუნდაც იმ აზრით, რომ სახლი ჰქონდეს ისე მოწყობილი, რომ საკუთარი თავი არ
ეზიზღებოდეს. ჩვენ, ქართველები, ხომ ამპარტავნები ვართ! ეს არ არის ურიგო თვისება
რაინდული ხატისა და მხოლოდ სხვა ხატის კონტექსტში შეიძლება შეიქნეს ვნების მომტანი.
კეთილშობილურია მოტივი, პატივი ვცე საკუთარ თავს და ადამიანურად მოვაწყო ჩემს გარშემო
რაღაც საზრისისეული ფიზიკური სამყარო, ჩემი ოთახი, ჩემი ოჯახის სამყოფელი. იდიოტი უნდა
ვიყო ან უქნარა, რომ არ გამოვიყენო ჩემს სასარგებლოდ ამ აბსოლუტურად იდიოტური
ეკონომიკის ხარვეზები. და აი, გამოვიყენე. გამოვიყენე რამდენიმე ათეული წლის განმავლობაში,
მივიხედ-მოვიხედე და რას ვხედავ, ვინა ვარ? – წაილეკა ბევრი ქართული თვისება ჩვენი
ხასიათიდან და ცხოვრებიდან, გაქრა მრავალი კრიტერიუმი ქართული კეთილშობილებისა. რამ
წაიღო? ეფექტურობამ. ჰოდა, ახლა ვინა ვართ? – ჩვენი თავი დავკარგეთ. ვერ დავინახეთ მტერი
სოციალიზმის სახით ჯერ კიდევ ილიას დროს, სადღაც 1905-07 წლებში. (...) ილიას მკვლელობა
იყო სიმბოლო იმ ფაქტისა, იმ შინაგანი, სულიერი პროცესისა, რომელიც ხდებოდა ქართველებში
და იმით გამოვლინდა, რომ ქართველი ერი განუდგა ილიას მიერ შემოთავაზებულ გზას.
შეიძლება ასეც ითქვას (...). რამდენადაც საბჭოიზმი არის გაბატონებული, იმდენად თვით
სიცოცლეს ერთმევა ფუნქცია. (...) საბჭოთა სიცოცხლე – ანტისიცოცხლეა. საბჭოურობისთვის
დამახასიათებელ ვერც ერთ სიტყვაში, წინადადებაში, პოზაში თუ საქციელში მე ვერა ვცნობ
საკუთარ თავს, როგორც ცოცხალს. ვერ შევიგრძნობ სიცოცხლეს. (...) სადაც საბჭოიზმია, იქ
სიცოცხლე არ არის. ხოლო ჩემი, როგორც ქართველის, უფუნქციობა კიდევ უფრო ღრმა
პრობლემაა.
ჩვენ მთელ სიმართლეს არ ვამბობთ, როცა ვამბობთ, რომ ოკუპირებული ვართ იმპერიის მიერ.
ჩვენ ოკუპირებული ვართ ახალი ადამიანის მიერაც. საოკუპაციო ჯარი მხოლოდ იმპერიული
ჯარი არ არის. ეს არის ადამიანის გარკვეული ტიპი, სოციალური, მენტალური, ყოფითი
სტრუქტურები. ყველაფერი, რაც ჩვენს გარშემო ხდება, ამ სტრუქტურებითაა განპირობებული.
ისინი, რა თქმა უნდა, არ გამომდინარეობენ ჩვენი ისტორიიდან და ჩვენი საზოგადოების
ტრადიციებიდან და, ამ გაგებით, გარედან, ოკუპაციის გზითაა შემოტანილი, მაგრამ ჩვენ,
ქართველ ერსაც, შეგვეხო პროცესი ამ ახალი ანთროპოლოგიური ტიპის აღმოცენებისა, რომელიც
იმგვარად აზროვნებს, რეაგირებს და ა. შ., რომ ინტუიტიურად ვხვდებით: ჩვენს წინაშე საბჭოთა
ადამიანია.
ყოველი ქართველი საკუთარი თავის მეუფე, ე. ი. თავის უფალი, იყო! ამიტომაა, რომ ჩვენში,
ფანტასტიური მრავალფეროვნებისა და განსხვავებულობის მიუხედავად, მაინც მთელი
ისტორიის მანძილზე იქნა შენარჩუნებული ერთიანობის სიმბოლო... ამჟამინდელი
მოთხოვნილება კერპის ყოლისა საბჭოთა სისტემის მსახვრალი გავლენის შედეგია. ეს ერის
გადაგვარებას მოასწავებს, თუ გადაგვარებად იმ ფაქტს მივიჩნევთ, რომ ერში ფაქტიურად
მოუკიდებია ფეხი და ტიპიურიც კი გამხდარა რაღაც იმგვარი, რაც მისი ისტორიული
ტრადიციიდან არ მომდინარეობს და მას არ შეჰფერის.
(Жизнь шпиона).
(Жизнь шпиона).
ამ რუსულ სივრცეში (სიტყვა @რუსულს@ მე ვხმარობ არა ეთნიკური აზრით, არამედ აღვნიშნავ
გარკვეულ სოციალურ-კულტურულ ფენომეს, რომელიც ეთნოსზე ფართოა და არ ემთხვევა მას)
ჩვენ შეიძლება ყველა “რუსეთუმე” ვიყოთ; “რუსეთუმეები” სულ სხვაგან არიან საძებნი და არა
იქ, სადაც მათ ჩვენი “პატრიოტები” ხედავენ. კერძოდ, თვით ამ “პატრიოტების” თავსა და სულში.
მათ დემარშში მე ვხედავ ტოტალიტარულ ჩვევებს, რომლებიც თითქოს სრულიად ბუნებრივია;
წამდაუწუმ ხმარება გამოთქმისა “ერის მოღალატე”, ჩემთვის სრულიად აშკარა “რუსეთუმეობაა”,
ე. ი. ის არის აზროვნება ისეთი ჩვევის მიხედვით, რომელიც შემოტანილია ჩვენში და სრულებით
არ ახასიათებს ტრადიციულ ქართულ ისტორიულ კულტურას.
●
ქართულ ცნობიერებაზე რუსული მენტალიტეტის გავლენის მაგალითია გამოთქმა “ხალხის
მტერი”. ადრე რუსულ-საბჭოთა ხელისუფლება მახრჩობდა ყველა სფეროში: თუ ნორმალურ
ეკონომიკურ აქტს შევასრულებდი – სპეკულანტს მეძახდა, თუ ვიაზროვნებდი – დისიდენტს.
ახლა “ხალხის” ცნება “ერით” შეცვალეს და იგივე თამაში მიდის. მე რომ მკითხოთ, ეს რუსული
ტერმინებია, ასეთი რამ ქართულმა ტრადიციამ, ქართულმა მენტალიტეტმა არ იცოდა. (...) ეს
ტიპიური მოსკოვური, ლენინგრადული სტერეოტიპია. საიდან უნდა იყოს ის ხალხში, რომელიც
ებრძვის რუსეთს? აი რას ნიშნავს, რომ სოციალურ ყოფასაც შინაგანი სტრუქტურა და შეუვალი
კანონები აქვს. (...) სხვა თუ არაფერი, მარტო ზრდილობას ან ჭკუას უნდა დაეშალა
თბილისელებისთვის, იოლად ეკადრებინათ ერთმანეთისთვის “ხალხის მტრის” ეპითეტი.
ხანდახან, თუ ჭკუა არ გადაგვარჩენს, ურთიერთობის იმ თბილისურმა კრიტერიუმებმა მაინც
უნდა გვიშველოს, ტერორს რომ გაუძლო, 50-იან წლებამდე შემორჩა და 60-იან წლებში ჩაკვდა.
რამ ჩაკლა? იმან, რომ ყველანი ცალ-ცალკე ვზრუნავდით ინდივიდუალურ გადარჩენაზე და
მოვშალეთ სამოქალაქო სივრცე, - რასაც ინგლისელები ეძახიან ჩივიც შპაცე, ამ მოშლის
ფიზიკური მეტაფორაა, ვთქვათ თბილისური სადარბაზოები, სადაც ვირთაგვები დარბიან,
გარშემო კი მილიონად ღირებული, მოვლილი ბინებია.
მტრის ხატი (...) – ესაა დამანგრეველი ფსიქიკური ძალა, იმიტომ რომ მტერი კი არ იწვევს ეჭვს,
ეჭვი შობს მტერს. ეჭვი ჯერ უსაგნოდ არსებობს. ეჭვი ჩემი უძლურებაა – მე მეშინია ყველაფრის,
როცა უძლური ვარ. მტერი არის განსხეულება იმისა, რაც ჩემშივეა ფესვგადგმული, როგორც
უძლურება.
(Жизнь шпиона).
ძალიან დიდი ხნის განმავლობაში წინ უსინათლონი მიგვიძღოდნენ. ისინი არა მხოლოდ თავად
იყვნენ ბრმები, არამედ იმათაც აბრმავებდნენ, ვინც ცდილობდა, თვალხილული ყოფილიყო.
სამწუხაროდ, დღეს ჩვენ არა გვყავს განვითარებული ინტელიგენცია, თავისი მყარი იდეალებით,
კრისტალურად წმინდად განვლილი გზით, არაშემთანხმებლური პოლიტიკური ინტერესებით,
იმგვარი აზროვნებით, რომ რამდენიმე სვლით მაინც წინ უსწრებდეს მოვლენებს. (...).
მაგრამ ამისთვისაც საჭიროა არა დატუქსვა, არა ზევიდან ბრძანება, არამედ – მოთმინება.
ადამიანებს უნდა მიეცეთ საშუალება თავად გაირბინონ აზრის დასაწყისსა და დასასრულს
შორისარსებული შინაგანი მანძილი. გრძნობები უნდა დაკრისტალდეს ზოგადკაცობრიულამდე.
(...) არ შეიძლება ადამიანს გარედან მიენიჭოს ღირსების, სინდისის და პატიოსნების გრძნობა.
დღეს ძალიან ძნელია გაიგო რა უნდა ხალხს, მის ძირითად ნაწილს, _ იმათ ვინც სტალინის
ეპოქის შემდეგ დაიბადა. სამწუხაროდ, საზოგადოებრივი ტემპერატურის ზუსტი აღრიცხვის
საშუალება არ გაგვაჩნია. დღეს საქართველოში ეროვნული მოძრაობის ზოგიერთი
წარმომადგენელი ცენზორის როლს იჩემებს, ართმევს რა დანარჩენთ საკუთარი აზრის გამოთმის
უფლებას. მე არ მესმის როგორ შეუძლიათ ადამინის უფლებათა დამცველი მოძრაობის
მონაწილეებს მოქალაქეობრივი უფლების დარღვევა აიყვანონ წესისა და სისტემის რანგში.
რანაირად შეიძლება, ადამიანს, რომელიც თავს ჰელსინკის პროცესის მონაწილედ თვლის,
წარმოდგენა არ ქონდეს ადამიანის უფელებათა შესახებ? აქ ჩვენს წინაშე უვიცობა და სრული
ზნეობრივი დალტონიზმია. თუ ეს არ იქნება თქმული ხმამაღლა, საქართველოს ძალიან მალე
მოადგება კარზე განსაცდელი. სოციოლოგიური კვლევების მიხედვით, ქართველი ხალხის
უმრავლესობას პრეზიდენტად ზვიად გამსახურდიას არჩევა სურს. თუ ეს მოხდება, მე
იძულებული ვიქნები ჩემი ხალხის წინააღმდეგ წავიდე. არ მინდა დავიჯერო, რომ ეს შეიძლება
მოხდეს.
(Евангелье по грузински).
არა, მე არ მქონია აზრად “იქ” დარჩენა. ალბათ ფილოსოფიის წყალობით, და მერე _ ეს კი, ალბათ,
მთავარია _ არსებობს სიამაყე, არსებობს ადგილის გრძნობა. მე აქ ვცხოვრობ მრავალი საუკუნის
მანძილზე. რატომ უნდა წავიდე? წავიდეს ის, ვინც ხელს უშლის ჩვენს აქ ცხოვრებას.
(გაზ.”მამული” 1991, 22-23 დეკ. _ ინტერვიუ აღებულია 1990 წლის ნოემბრის პირველ რიცხვებში).
(სიკვდილით მოხიბლულნი).
•
ნაციონალური უმცირესობები ჩვენი ქართული ბედის შემადგენელი ელემენტია. მუსულმანური
სარწმუნოების მატარებელი ხალხის გარეშე არ არსებობს ქართველი ერი. თუკი ჩვენ
თანამედროვე სამყაროს ცოცხალი ნაწილი ვართ, და არა უქმი და პაისური, პროვინციულ
ბაქიობას და ფანტაზიებს თავი უნდა დავანებოთ. მაშინ (...) დაწყნარდებიან ოსებიც და
აფხაზებიც, იპოვიან რა (...) კანონებში თავიანთი ნამდვილი და (არა ფალსიფიცირებული)
ინტერესების გამოხატულებას, _ იმ ინტერესებისა, რომლებსაც თვითონვე აქციეს ზურგი
მითიური აფხაზური რესპუბლიკის დევნაში. (...) იცავ რა აფხაზის, სომხის, ოსის ღირსებას _ ამით
შენს საკუთარ ღირსებასაც იცავ. ამის გარეშე ჩემთვის არ არსებობს “ქართველის” მაღალი ცნება.
(Жизнь шпиона).
ხშირად სვამენ ხოლმე ასეთ კითხვას: დავუჯეროთ თუ არა გორბაჩოვს? საჭიროა გავარკვიოთ –
ემტერება ის საქართველოს, თუ არ ემტერება? უყვარს საქართველო თუ არა? (...) ეს ტიპიური
რუსული აზროვნებაა, ქართულად გამოთქმული და ჩემთვის სამარცხვინო. როგორ უნდა
მოვთხოვო ვინმეს მე, ქართველმა, რომ აუცილებლად უყვარდეს საქართველო და აუცილებლად
ვუყვარდე მე, როგორც ქართველი? ანდა რატომ უნდა გამოვიცნო რა ტრიალებს გორბაჩოვის
თავში? პოლიტიკის სფეროში თუ გადავედი, ჩემთვის, მიუხედავად იმისა, თუ რას ფიქრობს ეს
კაცი, ისიც საკმარისია, რომ მან თავისი მოქმედებით შექმნა ფიზიკური სიტუაცია, რომელიც მე
საშუალებას მაძლევს, რაღაც გავაკეთო (...), კერძოდ, საშუალება მეძლევა, გავყო მტერი,
დავუპირისპირო გორბაჩოვი ვიღაც სხვას, ჩემს უკვე აღიარებულ მტერს. ეს ელემენტარული
პოლიტიკური საქციელია ადამიანისა, რომელსაც ისტერიკა არ ახასიათებს. ხოლო თუ ჩვენ
ეროვნულ ისტერიკაში ჩავვარდით, გამოდის, დაგვიკარგავს ძველი საქართველოსთვის
დამახასიათებელი სიბრძნე: პოლიტიკური ხერხები, რომლებიც ჩვენმა მეფეებმა კარგად
იცოდნენ. ისინი თავს კი არ იმტვრევდნენ – შაჰ–აბასს რა სურს, რა უტრიალებს თავშიო. მათ
ობიექტური სიტუაციისთვის ალღოს აღებისა და მის შიგნით თამაშის უნარი ჰქონდათ. მარტო
ხმალი, სხვათა შორის, ყოველთვის ვერ გამოადგებოდათ, იმიტომ რომ საქართველო პატარა იყო
და არის. პოლიტიკა, სიბრძნე, დიპლომატია – ეს ყველაფერი არსებობს, არავის გაუუქმებია და
ჩვენც უნდა გამოვიყენოთ.
საქმე პირველ რიგში იმას ეხება, რომ ცივილიზებულ ერად ვიქცეთ. იყო თავისუფალი – ეს
ნიშნავს, რომ გქონდეს ძალა და უნარი თავისუფლად ყოფნისა. აგურის აგურზე თანდათანობითი
დაწყობით ჯერ ისევ საბჭოთა კავშირის შემადგენლობის შიგნითვე უნდა შევიძლოთ
თავისუფლების შენება. და ყველა, ვისთანაც ერთად ჩვენ საბჭოთა კავშირში ყოფნა გვიწევს, ასევე
უნდა მოიქცეს. ამას საკუთარი თავის ზნეობრივ–გონებრივი გარდაქმნისა და სრულქმნის მთელი
პერიოდი დასჭირდება. როცა შენ კონკრეტული საქმეების თავისუფალ შესრულებას შეძლებ, –
თავისუფალი მაშინ იქნები.
(Жизнь шпиона).
ჩვენ საკუთარ თავში უნდა ჩავიხედოთ და საკუთარი განსაცდელისთვის პასუხი, პირველ რიგში,
საკუთარ თავს მოვთხოვოთ.
რა თქმა უნდა, შეუძლია. მართალია, მისი ეკონომიკა დანგრეულია, მაგრამ ის ხომ მაშინაც
დანგრეული იყო (საბჭოთა კავშირში – რედ.) ერთად რომ ვიყავით. და საკითხის ისე დასმა,
თითქოს ჩვენს ეკონომიკას ამ მიზეზით არ შეეძლოს დამოუკიდებლად და სუვერენულად
განვითარება, სწორი არ არის. (...) სინამდვილეში პრობლემა ისაა, რომ საქმესა და შრომაში
საკუთარი თავის თავისუფლად მართვა შეგვეძლოს. ისე რომ, ილიას ნათქვამი – „ჩვენ ჩვენი თავი
ჩვენადვე უნდა გვეყუდნოდესო“ – შესანიშნავია და ზუსტი, ეგ არის მხოლოდ ,რომ ჩვენ
დავივიწყეთ იგი. ილია კი ევროპული ორიენტაციის ადამიანი იყო და რუსეთის
შემადგენლობაში ჩვენი ყოფნის –ოღონდ ავტონომიური ყოფნის – ერთადერთ გამართლებადაც
ევროპასთან ჩვენი დაახლოება მიაჩნდა. ის თვლიდა, რომ ევროპასთან შეერთებით
აღსრულდებოდა საქართველოს ისტორიული დანიშნულება, რომელიც ევროპულია ჩვენი
გაქრისტიანებიდანვე. ეს წინასწარ არის განსაზღვრული და ბედის ამ განჩინებას ვერსად
წავუვალთ. ეს ისევე გვაქვს გამჯდარი ძვალსა და რბილში, როგორც ყოველ ქართველს – სწრაფვა
თავისუფლებისა და სახელმწიფოებრივი დამოუკიდებლობისაკენ. ჩვენ შეიძლება დავიღუპოთ
კიდეც , მაგრამ თუკი დავრჩით ამქვეყნად , ეს ჩვენი ვალი უნდა აღვასრულოთ. ასეთია ჩვენი
დანიშნულება. სხვათა შორის, ეს ჩვენი ხალხის ეროვნულ ხასიათშიც არის ჩადებული იმდენად ,
რამდენადაც მასში ჯერაც ცოცხლობენ ჩვენი კულტურის ქრისტიანულ–პიროვნული საწყისები.
(Философия действительности).
მე ასე ვიტყოდი: ჩვენს წინ დგას ამოცანა, დავუბრუნდეთ სიცოცხლეს, ისტორიასა და დროს.
აქამდე ჩვენ არ ვცხოვრობდით, ეს არ იყო სიცოცხლე და ის, რასაც ვაკეთებდით და რასაც ვითომ
სიცოცხლე ერქვა, ხდებოდა ისტორიისა და დროის მიღმა. მკვდრების სამყაროდან უნდა
დავუბრუნდეთ ცოცხლების სამყაროს.
რანი ვიქნებით? ჩვენი ბედის აქტიური შემოქმედნი? მაშინ ჩვენი ბედი მსოფლიო ჩარჩოში
გადაწყდება; თუ დავრჩებით პასიურ სუბიექტად, რომელსაც ბედი ისე დაეცემა, როგორც აგური
ეცემა თავში ადამიანს?