AN PAGLALANG

ni Rosario Bonto
Salin sa BIkol ni Alicia A. Asaytuno, Ph.D

Kan an mundo aki pa, an tubig sana buda an langit an nasa sa kinaban. Si Langit an
naghahade kan kalangitan, si Tubigan man an naghahade sa katubigan. An aki ni Langit
na si Dagat buda an aki ni Tubigan na si Paros, naging mag-agom.

Apat an naging aki nara Dagat buda Paros. Tolong lalaki buda sarong babae. An mga
aki iyo sara : Daga, sarong makusog na lalaki na an lawas gapo; Bulan, sarong
maluyang lalaki na an lawas gibo sa bronseng amarilyo ; Aldaw, sarong maogmang
lalaki na bulawan an lawas. An solong babae na si Bituon gibo sa purong pirak.

Kan nagadan na sara Dagat asin Paros, sara Langit asin Tubigan an nag-ataman kan
saindang mga makuapo. Naging arogante si Daga. Naging ambisyoso ini sa
kapangyarihan kaya sinulsulan niya an saiyang mga tugang na rusuun ang kahadean
kan saindang lolo na si Langit.

Binuhian ni Daga sa gabos na direksyon an paros ngani mabukasan an mga agihan pero
sinabat sinda kan dagit na si Langit. Dai nya nungka tutugutan an siring na pagpahiling
ki kadaing ugali na arog kan gibo ni Daga. Tolong boltaheng kikilat an saiyang
iwinagas na naging kawsa kan pagkatunaw kan mga lawas kan saiyang mga makuapo.
Naging bola su lawas nara Bulan asin Aldao. An lawas ni Daga nahulog sa dagat. Sa
paghanap ni Bituon kan saiyang mga tugang, inabot man siya kan kikilat Nagkapiridaso
an saiyang lawas.

Nagbaba si Langit. Inatrakar niya si Tubigan manungod sa pagruso na nangyari.

Madaling natapos an saindang pasimbagan. Pareho sindang napahibi sa pagkawara kan
saindang mga makuapo.Nagkauyon sinda na tawan ki liwanag an kada lawas kan mga
ini. Si Aldao iyo an naging aldaw. Si Bulan an bulan. Si bituon an naging mga bituon sa
kalangitan. An lawas ni Daga naghalangkaw, Iyo na ini an daga sa mundo.

Nagtanom ki sarong pisog si Tubigan. Tuminubo ini asin pig-apod na kawayan. Sa

sarong biyas kaining kawayan hale an enot na babae asin lalaki, an enot na mga
magurang kan mga tawo. Tolo an naging aki ninda.

Saro sa mga aki ninda iyo si Maisog, , an nakaimbento nin pandakop ki sira. Sarong
aldaw, nakadakop ki dakulaon na balyena si Maisog. Paghuna niya, Diyos an saiyang
nadakop, kaya, sa saiyang pagboot, pinalibutan asin sinamba kan mga tawo an balyena.
Manlaen-laen na pagrukyaw an saindang ginibo sa balyena kaya an mga diyos sa langit
nagpahiling kay Maisog. Sinugo siyang itapok sa dagat an balyena asin sinabihan an
mga tawo na magsamba sana sa mga diyos. Dai nagsunod an mga tawo. Dahil sa dagit
ni Hadeng Langit, pinatamaan nya nin kikilat si Maisog buda iwinagas niya an mga
tawo sa ibabaw kan mundo bilang kapadusahan. Iyo ini an dahilan kan paglakop kan
tawo sa mundo.