Graphic by Charlotte Job Despuez and photo by Chantal Eco.

Malaki ang hamon para sa makabayan at progresibong artista, manunulat,

aktibista at manggagawang pangkultura sa matalinong paggamit sa internet at
social media bilang daluyan ng bagong kulturang pambansa, siyentipiko at
makamasa.
Ni KERIMA LORENA TARIMAN
Bulatlat
I
.
Isang serye ng mga tweet mula sa ABS CBN News ang naging balita nitong
nakaraang linggo. Sinisipi ng mga tweet na ito ang mga salita ni Wilma
Austria-Tiamzon, bagong-layang bilanggong pulitikal, sa isang panayam sa
midya noong Agosto 19:
“Para sa mga kabataang Pilipino at sa iba pang kababayan na sa ngayon ay
nahuhumaling sa paghuli ng mga monster sa Pokemon Go,”
“Alam po ninyo napakaraming tunay na monster sa ating bayan.”
“Dapat po sanang pagtuunan din natin ng pansin na kilalanin at labanan ang
mga monster na ito.”
“Sa halip na Pokemon Go, mas maganda po sana ang Revolution Go!”
Kasama ang mag-asawang Wilma at Benito Tiamzon sa mga ipiniit na
konsultant ng Pambansa Demokratikong Prente ng Pilipinas o National
Democratic Front of the Philippines (NDF). Pansamantala silang pinalaya ng
administrasyong Duterte upang lumahok sa usapang pangkapayapaan na
muling binuksan nitong Agosto 22 sa Oslo, Norway.
Mahigit dalawang taong ibinilanggo ang mag-asawang Tiamzon sa Kampo
Crame, sa bisa ng mga gawa-gawang kasong kriminal na isinampa ng
nakaraang rehimen ni Benigno Aquino III. Sa midya, ipinarada sila ni Aquino
at ng Armed Forces of the Philippines (AFP) bilang “malalaking isda” dahil
sila diumano ang pinakamatataas na pinuno ng Partido Komunista ng
Pilipinas at Bagong Hukbong Bayan o CPP-NPA (Communist Party of the
Philippines – New People’s Army) na sa ngayon ay halos limang dekada
nang nagsusulong ng bagong demokratikong rebolusyon sa ating bayan.
Ito ang “Revolution Go!” na tinutukoy ni Ka Wilma sa naturang mga tweet.
Ang armadong pakikibaka ng Bagong Hukbong Bayan sa ating mga
kanayunan ngayon, anila, ay isang bagong tipo ng pambansa-demokratikong
rebolusyon. Ang rebolusyong ito ay karugtong ng Rebolusyong Pilipino ng
1896 – ang armadong pagbangon na sinimulan nina Andres Bonifacio at ng
Katipunan laban sa kolonyalismong Espanyol. Mahalaga ang pagkakataong
ito upang itampok ang kadakilaan at kabuluhan nito, lalo na ngayon at
ginugunita rin natin ang ika-120 taon ng Unang Sigaw na naging hudyat ng
Rebolusyong Pilipino noong Agosto 1896.
Ang paksa natin ngayong araw – ang makabayang panitikan – sa katunayan,
ay walang ibang paghuhugutan sa ating kasaysayan kundi ang pakikibaka ng
sambayanang Pilipino laban sa kolonyalismo. Makabayan ang akdang
naglalantad sa arogansya at kabuhungan ng mananakop at tumutuligsa sa
dominasyon at pang-aapi ng dayuhang kapangyarihan. Makabayan ang
panulat na nagbubuklod sa saklaw ng gutay-gutay nating kapuluan, at sa iba’t
ibang pangkat etno-linggwistiko upang maging malay sa ating kakanyahan
bilang isang bansa.
Ito ang kabuluhan ng Kilusang Propaganda at ng makabayang akda nina Jose
Rizal, Graciano Lopez Jaena, Marcelo H. del Pilar, at nina Bonifacio mismo,
Emilio Jacinto, Antonio Luna at Apolinario Mabini. Ang kanilang panulat ay
naging bahagi ng “rebolusyong pangkultura ” na naghanda sa mga dakilang
anak ng bayan sa pag-aarmas at pagkalas sa yapos ng “Inang Espanya.” Bago
ang Rebolusyong 1896, di-kukulangin sa 200 pag-aalsa ang inilunsad sa iba’t
ibang dako ng kapuluan batay sa kalat-kalat na simulain at adhika ng masa,
gaya ng pagtutol sa polo o sapilitang paggawa, mga dahilang relihiyoso,
usapin sa lupa, o pagpapatalsik sa malulupit na prayle. Sa Rebolusyong 1896,
naging buo ang konsepto ng kasarinlan o patriyotismo na pinanday sa
dakilang anti-kolonyal na pakikibaka ng sambayanan.
Ngunit hindi pa tapos ang rebolusyon ni Bonifacio, ayon sa Partido
Komunista ng Pilipinas (PKP). Ang ihip ng nasyunalismo mula dekada ’60
hanggang ’70 – mahigit kalahating siglo makalipas ang Unang Sigaw – ay
itinuring bilang “Ikalawang Kilusang Propaganda ” na nakahagip sa
maraming kabataan at mamamayan. Sumibol ang bagong dugo ng mga
proletaryong rebolusyonaryo na noon din ay nagpasya na sumuong sa
masalimuot na landas ng pagrerebolusyon.
Gaya na rin ng mag-asawang Tiamzon – na bago nasangkot sa aktibismo ay
ordinaryong magkababata, at kapwa mamamahayag pangkampus sa isang
pampublikong sekondaryong paaralan sa Pasig. Si Benito ay naging
manunulat at editor ng Philippine Collegian nang sila’y pumasok dito sa
Unibersidad ng Pilipinas (UP) Diliman bilang mga iskolar. Ang kanilang
panulat, at tuluyang pakikisangkot sa aktibismo at rebolusyon ay napanday sa
tinaguriang Sigwa ng Unang Kwarto o First Quarter Storm (FQS) noong
1970. Bago ito, itinatag na muli ang Partido Komunista ng Pilipinas sa
pundasyon ng proletaryong teorya ng Marxismo-Leninismo at Kaisipang
Mao Zedong noong Disyembre 26, 1968.
Ang muling pagtatatag ng PKP ang hudyat ng pagpapatuloy ng pambansa-
demokratikong rebolusyon na anila’y hindi nalubos ng Katipunan, pagkat ang
abot-kamay na tagumpay ng sambayanan ay inagaw at ipinagkait ng bagong
mananakop – ang imperyalistang US o Estados Unidos. Sa mga sulatin ni
Amado Guerrero (Jose Maria Sison) at mga dokumento at publikasyon ng
muling-tatag na PKP, matalas na sinipat ang ating kasaysayan gamit ang
proletaryong metodo na siyentipiko at may diin sa moda ng produksyon at
tunggalian ng mga uri. Sa suri ng PKP, ang lipunang Pilipino ay mala-pyudal
at mala-kolonyal. Ang magiting na pakikibaka ng mamamayan laban sa
diktadurang US-Marcos at Batas Militar ay isang tampok na katangian ng
panahong ito ngunit ika nga’y hindi lang si Marcos ang nag-iisang monster sa
lipunang Pilipino, bagamat siya, noong mga panahong iyon ang pangunahing
ahente o kinatawan ng mga ito. Ang mga batayang suliranin ng lipunang
Pilipino ay ang tatlong salot o mga tunay na monster sa ating bansa – ang
imperyalismo, burukrata kapitalismo at pyudalismo.
Mahalagang mabigyang-diin na inilatag ng PKP ang simulain at direksyon ng
Rebolusyong Pilipino sa punto de bista at malinaw na makauring pamumuno
ng manggagawa o proletaryado. Ang Rebolusyong 1896 ay luma – hindi
dahil sa mga lumang itak at bolo – kundi dahil sa lumang ideolohiyang
liberal-burges at pag-agaw ng pamunuan ng mga ilustrado. Ang pundasyon
ng makauring pananaw, panininidigan, pamamaraan at pamumuno ng
proletaryado ang siyang nagtatakda ng pagiging “bago” ng demokratikong
rebolusyon sa Pilipinas ngayon.
“Bago” ang Demokratikong Rebolusyong Bayan sapagkat tinatanaw o
perspektiba nitong tumungo sa sosyalismo, isang bagong epoka sa
kasaysayan ng sangkatauhan, sa pamamagitan ng sosyalistang rebolusyon sa
pamumuno pa rin ng proletaryado. Bago ang pagsisikap ng sangkatauhan na
itatag ang isang sistemang sosyalista, kapalit ng lubhang mapangwasak,
parasitiko at naghihingalong yugto ng pandaigdigang sistemang kapitalista na
ilang daantaon na ring nakapamayagpag sa buong daigdig mula noong
Rebolusyong Industriyal ng 1700s. Ito rin ang dahilan kung bakit hanggang
sa kasalukuyan, o halos limang dekada na mula nang ito’y itatag – ang
Bagong Hukbong Bayan o NPA ay “bago” pa rin, at ika na rin ni Ka Wilma,
ay hindi matalo-talo, bagkus patuloy pang lumalakas at lumalawak.
Ang makabayang panitikan sa kasalukuyan, kung gayon o kung mulat sa
ganitong makauring pagsusuri sa kasaysayan at lipunan, ay nararapat lang na
maging anti-imperyalista. Ayon dito, ang ating bansa ay hindi pa ganap na
malaya – ang malawak na masa ng sambayanan ay inaapi at pinaghaharian sa
isang neokolonyal na estado na sunud-sunuran sa dikta at interes ng
imperyalismo at ng mga kasapakat nitong mga (tunay na monster din na)
lokal na burukrata kapitalista, malalaking panginoong maylupa at burgesya
kumprador.
Itinatanghal ng makabayang panitikan ang dakilang pakikibaka ng
sambayanan – mula sa panahon nina Bonifacio hanggang sa kasalukuyan – sa
gitna ng isang buháy at nagpapatuloy na adhikain para makamit ang tunay na
kalayaan at demokrasya sa ating bansa. Ang pambansa-demokratikong
pakikibaka o mga rebolusyon sa mga kolonya at mala-kolonya gaya ng
Pilipinas ay itinuturing nitong ambag sa pagpapahina sa pandaigdigang
sistemang kapitalista at pananalasa ng imperyalismo sa buong mundo.
Paano naman ang “nasyunalismo” na alam natin at ipinamamarali sa madla?
Mainam itong pag-isipan kaugnay ng ating paksa. Ang nasyunalismo ba ay
katumbas ng bulag na pagsuporta sa gobyerno ng Pilipinas? Tungkol ba ito sa
promosyon ng mga katutubong tradisyon gaya ng mga pyesta na madalas sa
hindi ay para lang sa pagdayo ng mga turista at konsumerismo? Tungkol ba
ito sa “Pinoy Pride,” na nadarama natin sa tuwing natatampok sa
internasyunal na larangan ang mga pambihirang indibidwal gaya ng ating
mahuhusay na atleta at artista, mga beauty queen, at iba pa? Tungkol ba ito sa
sobinismo, sa pagtangging matuto sa karunungan na mula sa ibang bansa at
sukdulang pagtatakwil sa lahat ng impluwensyang dayuhan?
Ang usaping pambansa kung nais nating unawain sa punto de bista ng
proletaryado ay mas malalim na tinatalakay ng mga gurong komunista na
sina Lenin at Stalin, kaugnay ng kongkretong mga suliranin sa pagsusulong
ng Rebolusyong Bolshevik. Ngunit kung ang makabayang panitikan para sa
atin ay anti-imperyalista, mahalagang pagkakataon na rin ito upang itampok
ang kabuluhan ng akdang Imperyalismo: Ang Pinakamataas na Yugto ng
Kapitalismo (1916) ni Lenin sa pagsulong ng anti-imperyalistang pakikibaka
ng sambayanang Pilipino at iba pang inaapi at pinagsasamantalahang
mamamayan ng mundo. Isandaang taon na ang nakalipas mula nang ilatlahala
ang Imperyalismo ni Lenin, ngunit ang mga puntong inilatag nito ay araw-
araw na pinatototohanan ng mahahalagang pangyayari sa pandaigdigang
ekonomiya, pulitika, kultura at larangan ng digma. Sa susunod na taon,
gugunitain naman ang ika-100 taon ng Rebolusyong Oktubre ng 1917 at
pagtindig ng Rusya at USSR bilang unang sosyalistang estado sa daigdig.
Ano ngayon ang kabuluhan ng mga ito sa panahon ng Twitter, Facebook at
Instagram kung kailan ang Komunismo – o ang mga “komonesta” ika nga ng
naglipanang mga troll – ay mistulang tampulan na lang ng panlilibak at
pangungutya? Totoo nga bang lipas na ang mga ideyang ito, at wala nang
puwang sa kasalukuyang panahon kung kailan ang sangkatauhan ay malaya
at mapayapa na diumanong pinag-uugnay sa social media sa pamamagitan ng
mataas na teknolohiya sa komunikasyon at impormasyon o haytek na
information and communications technology (ICT)? Nang dahil sa internet,
ay naglaho na nga ba ang batayan para sa proletaryong rebolusyon, anti-
imperyalistang paglaban at mga kilusan para sa pambansang pagpapalaya?
II.
Ilugar natin ang talakayan ng makabayang panitikan sa anti-imperyalistang
pakikibaka ng sambayanan. Sa ating bansa, ang paglikha ng makabayang
mga akda ay nagpatuloy hanggang sa panahon ng madugong Digmaang
Pilipino-Amerikano, at sa direktang pananakop ng imperyalistang US mula
1899. Sa panahong ito, ang diwang makabayan ay marahas na sinupil.
Ipinagbawal maging ang paglaladlad ng watawat ng Pilipinas – ang
makabayang mga dula ay tinaguriang “sedisyoso” at maraming makabayang
artista at manunulat gaya nina Juan Abad at Aurelio Tolentino ang ipiniit
kasama ng magigiting na “tulisan” na nag-armas laban sa mananakop.
Ipinakilala ang sistema ng edukasyong publiko, ginawang wikang opsiyal
ang Ingles, at ipinalaganap ang Kanluraning mga pagpapahalaga upang
linangin ang kolonyal na mentalidad sa hanay ng sambayanang naghahangad
ng kasarinlan.
Ngayon ay sukdulan pa ring binubura sa ating kamalayan ang pagiging anti-
imperyalista. Nabura na nga rin diumano ang hanggahan ng mga bansa,
kultura, relihiyon, kasarian at lahi, mayaman at mahirap – at mismong
tunggalian ng mga uri – nang dahil sa “demokratisasyon sa impormasyon at
komunikasyon” na dulot ng haytek na ICT. Laganap din ang ideya na ang
internet at ICT ay hindi na raw nasasaklaw ng moda sa produksyon o ng
mismong pandaigdigang sistemang kapitalista, sapagkat ang mahalaga na
lang daw ngayon ay ang “moda ng impormasyon.”
Ngunit sa loob ng nakaraang 25 taon ng pag-iral ng pampublikong internet,
ano nga ba ang nagawa nito upang wakasan at burahin ang marahas na
tunggalian sa pagitan ng imperyalismo at ng aping mamamayan ng daigdig?
Hindi nakapagtataka na halos kaalinsabay ng panahong ito ang marahas na
pananalasa ng neoliberalismo at imperyalistang globalisasyon sa ekonomiya,
pulitika at kultura ng mga atrasadong bayan na gaya ng sa atin.
Una, ang sinasabing “malayang akses sa impormasyon” na ipinapangako ng
haytek na ICT ay hindi naman makakamtan kung wala ang aktwal na mga
kalakal (consumer good) – gaya ng kompyuter. Hindi tayo makapapasok sa
internet o sa sinasabing “malayang daluyan ng kaalaman at impormasyon”
kung wala ang mga kalakal na gaya nito. Ang napakabilis at walang
kapararakang kumpetisyon at akumulasyon sa pagitan ng mga dambuhalang
monopolyo na siyang lumilikha ng sandamakmak na modelo ng kompyuter,
laptop, tablet, teleponong mobile at iba pang periperal na gaheto at produkto
para sa akses sa internet at social media ay nagpapatunay na ang haytek na
ICT ay hindi hiwalay o hindi ligtas sa sistemang kapitalista at sa likas nitong
krisis ng labis na produksyon.
Mangyari pa, ang haytek na ICT bilang mahalagang kasangkapan sa
produksyon (capital good) ang nagpapatotoo na ito’y bahagi ng kapitalistang
moda sa produksyon. Upang suportahan ang konektibidad na hatid ng
internet, kinakailangang itayo ang imprastraktura gaya ng mga tore ng
komunikasyon, satelayt, mga dambuhalang server, at iba pa. Walang duda na
ang ICT ay nakapagpaunlad sa mga pwersa sa produksyon – makailang ulit
nitong pinabibilis at pinahuhusay ang linya ng produksyon at paglikha ng
mga kalakal sa pamamagitan ng bagong teknolohiyang gaya na rin ng
robotiks o mga presisong instrumento. Gayunman, ang mga ito ay walang
binabago sa pangkahalatang moda ng kapitalistang sistema – pribado pa rin
ang pagmamay-ari o apropriyasyon ng mga kasangkapan at ganansya, habang
ang produksyon ay sosyalisado o nililikha na ng buong lipunan.
Gaya ng nagaganap sa tuwing ipinakikilala sa produksyong kapitalista ang
bagong makinarya at teknolohiya, ang paggamit ng haytek na ICT ay
nangangahulugan din ng ibayong paglaki ng tantos ng pagsasamantala sa
mga manggagawa – habang pumapaimbulog ang panghuhuthot ng supertubo
ng mga monopolyo kapitalista, patuloy na nakapako sa napakababang antas
ang sahod ng mga manggagawa. Higit nitong sinusuhayan ang kanilang
pagkatiwalag o alienasyon. Sa isang sweatshop ng Apple sa Tsina, naibalita
ang paglalagay ng “suicide nets” upang pigilan ang mga manggagawang
gustong magpakamatay dahil sa napakababang sahod at masahol na
kondisyon sa paggawa.
Ang ganid na kalikasan ng sistemang kapitalista ang siyang nagtutulak sa
mismong pagkawasak ng mga produktibong pwersa. Ang hayok na
paghahabol sa supertubo at ganansya ang siyang pumipigil sa lubusang
pagbwelo ng mga pwersa sa produksyon para sana sa makabuluhang
pakinabang ng sangkatauhan.
Sa ating bansa, halimbawa, wala pa rin tayong sariling industriya at patuloy
tayong nakaasa sa mga yaring produkto na imported o may tatak ng mga
multinasyunal na korporasyon. Patok sa bawat internetan sa kanto ang
network gaming – halos lahat ng tao na narito ngayon sa palagay ko ay online
at may teleponong touch screen – ngunit sa ating mga kanayunan, lubha pa
ring atrasado ang agrikultura. Kung hindi kinakawit ang buwig gamit ang
karit na ikinabit sa pinagdugtung-dugtong o mahabang kawayan, inaakyat pa
rin ng ating mga magsasaka ang mga puno ng niyog tuwing panahon ng
pagkokopra. Kahit nakarating na sa ating bansa ang haytek na ICT, salat pa
rin ang mahuhusay na produkto na para sa pangangailangan ng tao, habang
walang tigil ang pagbaha ng samu’t saring dayuhang kalakal para sa luho at
konsumerismo.
Bukod sa ginagawang tambakan ng imported na yaring produkto ang
Pilipinas bilang isang neokolonya, patuloy na pinipiga ng mga imperyalista
ang ating bansa sa pamamagitan ng ating murang lakas-paggawa at likas na
yaman. Ang ating mga minahan, lalo na sa lupaing ninuno ng ating mga
pambansang minorya, ay walang tigil na dinarambong ng mga dayuhang
korporasyon dahil sa yamang mineral at hilaw na materyal na para sa
mabibigat na industriya, at para rin sa industriya ng ICT.
Ikalawa at kaugnay pa rin ng una, ang moda ng distribusyon ng mga kalakal
ay makailang ulit na ring pinabilis at ginawang higit na sopistikado nang
dahil sa haytek na ICT. Makikita ito sa direktang pagbebenta ng mga
produkto sa laganap na online shopping at walang puknat na ads sa internet.
Sumulpot na ring parang kabute sa ating bansa ang tinatawag na business
process outsourcing (BPO) o mga call center para sa serbisyong
pangkonsumer ng mga korporasyong dayuhan. Ang kabataang petiburgis sa
ating mga sentrong lungsod ay maramihan nang nahihigop nitong tinaguriang
sunshine industry na sagot diumano sa malawakang kawalan at kakulangan
ng empleyo sa ating bansa. Ngunit ang ating mga “propesyunal” ay
pumapasok sa BPO hindi upang ilapat ang kanilang pinag-aralan o piniling
karera, kundi upang magsilbi bilang mumurahing mga manggagawa sa
serbisyo na nagmamantini ng merkado para sa partikular na mga kalakal ng
dayuhan.
Mangyari pa, dahil na rin sa pagkahaling ng marami sa social media, tayo
mismo ay namomobilisa ng mga dambuhalang korporasyon bilang mga
“endorser” na hindi na nila kailangang sahuran. Tayo pa mismo ang natutuwa
na ipamarali ang mga produkto na kaya nating bilhin at tangkilikin sa bawat
post o litrato ng pagkain, OOTD, at pagkukuwento ng personal nating
karanasan sa kunsaang engklabo ng konsumerismo.
Naging sopistikado na nga ang moda ng distribusyon ng mga kalakal nang
dahil sa haytek na ICT, sapagkat ang pagsukat sa trend, pagkokondisyon sa
“uso” at sa “panlasa” ng mga konsumer ay hindi na lamang idinadaan sa
manu-manong sarbey at pag-aaral sa sikolohiya at sosyolohiya, kundi sa
mismong personal na impormasyon, lokasyon, mga hilig, interes, damdamin
at gawain na araw-araw ay “boluntaryong ibinibigay” ng milyun-milyong
katao sa shopping sites at social media sites na gaya na nga ng Facebook,
Twitter at Instagram.
Saan pa kaya gagamitin ang istadistika na napakabilis na natitipon at
napoproseso sa pamamagitan ng mga algoritmo ng ICT, kundi na rin sa
otomatikong pagtutumbas ng suggested ads o panibagong produkto na
madalas sa hindi ay walang malisya nating kiniklik at agad-agad na
tinatangkilik?
Ikatlo, makailang ulit din na pinabibilis ng haytek na ICT ang oligarkiyang
kontrol sa kapital sa pinansya – sa online banking, galaw ng stock market at
walang kapararakang ispekulasyon sa pinansya. Sa isang iglap,
makapagpapabagsak ito sa ekonomiya ng buu-buong mga rehiyon at bansa.
Sa maagang bahagi ng pag-unlad ng ICT, halimbawa, ang mismong pagputok
ng tinatawag na bula ng dotcom (dotcom bubble) ay nag-ambag sa walang
sagkang paglaki ng kapital sa pinansya na pinalobo lamang ng ispekulasyon
na lubha tagibang o hindi tugma sa aktwal nitong salalayang produktibo.
Ikaapat ay nalantad na rin, ayon na mismo sa mga eksperto sa ICT na gaya
nina Assange at Snowden, na ang teknolohiyang ito ay tusong ginagamit
hindi lamang para sa mga nabanggit nang halimbawa sa kalakalan at
negosyo, kundi sa para sa layuning pulitiko-militar ng imperyalismo. Ang
social media ay ginagamit sa paniktik o pang-eespiya sa tinaguriang mga
terorista, ekstremista’t mga kaaway ng estado – at kahit sa pagmomonitor ng
“kahina-hinalang kilos” ng mga sibilyan at ordinaryong mamamayan.
Ang internet, na nagsimula bilang isang proyektong militar, ay hindi
nakapagtataka kung tahasang ginagamit ng imperyalismo para sa
pagpapaunlad ng kanilang military-industrial complex, sa drone warfare, at
mga digmang agresyon na araw-araw ay pumapatay o pumipinsala sa buhay
ng libu-libong mamamayan sa iba’t ibang bayan sa ngalan ng kanilang
buhong na “gera kontra terorismo.” Malaki ang papel ng ICT sa mga
proyektong politiko-militar ng imperyalismo, gaya ng mga konspiratoryal na
pakana sa regime change o pagpapatalsik sa mga pinuno at pagluluklok ng
bagong rehimen na suportado ng US, at sa mabangis na pagsupil sa anti-
imperyalistang paglaban, at mga kilusan para sa pambansang pagpapalaya sa
iba’t ibang panig ng daigdig.
III.
Kung kaya, bilang huling punto – may puwang nga ba ang bagong kultura, at
ang panulat ng mga makabayang gaya ni Bonifacio, mga anti-imperyalistang
gaya nina Luna at Tolentino, at mga radikal na gaya nina Sison at mga
Tiamzon sa panahong ito ng Facebook, Twitter at Instagram?
Pagdapo pa lang ng pambihirang tweet tungkol sa “Revolution Go!,” pwede
na nating sabihing oo. Gaya ng tradisyunal na masmidya at iba pang
institusyon, ang internet ay di-maikakailang daluyan ng imperyalismo sa
kultura, at kasalukuyang pagpapabango at pagbibigay-katwiran sa kasamaan
ng neoliberalismo. Sa sarili nating mga sirkulo, o sa mga tambayan at
luklukan ng mga Pilipino sa internet at social media, hindi naman maikakaila
ang dominasyon ng mga ideya na nagpapanatili at nagpapalakas sa bulok na
kulturang burges, kolonyal at pyudal. Ang internet at social media ay
larangan din ng tunggalian.
Sapagkat buhay ang nasyunalismo at nagpapatuloy ang rebolusyon,
halimbawa, sa bersong likha ni BLKD, isang rapper at “kawal ng kultura” na
naunang nakilala sa internet at youtube dahil sa popular na ligang Fliptop.
Ang “pagmulat ay pagkasa,” ayon nga sa isang trak sa album niyang Gatilyo,
na inilabas kamakailan alay kay Bonifacio at kay Marlon Caacbay, isang
musikero na namartir bilang mandirigma ng BHB noong nakaraang taon.
Samantala, ang mga sanaysay at tula ni Ericson Acosta na isinulat sa
kulungan at kagyat na pinadaloy ng kanyang mga kaibigan sa Facebook
at blog ay umabot sa signipikanteng bilang ng netizen sa loob at labas ng
bansa, bagay na nakapagpalapad sa hanay ng mga sumuporta sa kampanya sa
pagpapalaya sa dating detenidong makata at aktibista.
Ngunit sa katunayan, ang mga publikasyon mismo ng PKP gaya ng opisyal
nitong pahayagang “Ang Bayan,” na mula noong Dekada ’70 ay pinararami
gamit ang makinang mimeo at manu-manong imprentang V-type ay isa sa
mga unang makabayang babasahin na naging online mga 18 taon na ang
nakararaan, sa unang website ng NDF. Mula noo’y makikita ang tuluy-tuloy,
masinop at sistematikong pagsisikap ng PKP sa pagmamaksimisa sa puwang
na ito sa internet para sa pagpapalaganap ng makabayan at rebolusyonaryong
panitikan.
Sa kasalukuyan, nasa Facebook, Twitter at Instagram na rin ang Philippine
Revolution Web Central o PRWC , at nagpapalaganap di lamang ng mga
akda mula sa iba’t ibang publikasyong pampanitikan na maaakses sa internet
gaya ng Ulos na inilalathala ng Artista at Manunulat ng Sambayanan
(ARMAS), at mga panrehiyong dyornal pangkultura na gaya ng Ramut at
Rissik ng Hilagang Luzon, Inang Larangan ng Gitnang Luzon, Dagitab ng
Timog Katagalugan, Punla ng Bikol, Sublak ng Panay at iba pang
rebolusyonaryong pahayagan, magasin at dyornal. Nasa PRWC na rin ang
pinakahuling balita, bidyo, at mga meme kaugnay ng demokratikong
rebolusyong bayan.
Ang makata at kritiko na si Gelacio Guillermo ang isa sa mga unang nagsikap
na mag-upload ng makabayan at rebolusyonaryong akda noong maagang
bahagi ng 2000s, sa pamamagitan ng independyenteng website ng Instityut sa
Panitikan at Sining ng Sambayanan (IPASA) . Nauna nang inihanda ni
Guillermo sa pamamagitan ng IPASA ang makapal na antolohiyang Muog:
Ang Naratibo ng Kanayunan sa Matagalang Digmang Bayan sa Pilipinas na
inilathala ng UP Press noong 1998. Tinipon sa Muog ang mayamang prosa na
likha sa mga sonang gerilya na kinikilusan ng BHB mula 1972 hanggang
1997.
Sa Facebook, isa sa matitisod na mga rebolusyonaryong makata ang isang
“Maya Daniel” na tumutula sa tatlong wika: Ingles, Hiligaynon at Filipino.
Bagamat karamihan sa mga tula ay nasa Ingles, matining niyang
naipapahayag ang damdamin at hangarin para sa pambansang pagpapalaya sa
larawan ng kalikasan at pakikidigmang gerilya. Ang mga tula sa kanyang
Facebook wall ay nakatipon rin sa isang blog.
Malaki ang hamon para sa makabayan at progresibong artista, manunulat,
aktibista at manggagawang pangkultura sa matalinong paggamit sa internet at
social media bilang daluyan ng bagong kulturang pambansa, siyentipiko at
makamasa. Ang potensyal nito sa pagpapalaganap ay hindi na maaaring
maliitin, bagamat sa kabilang banda ay hindi rin dapat pabayaan ang
sistematikong paglalathala at popularisasyon ng mga babasahin, pahayagan,
komiks at iba pang epektibong anyo upang tiyak na makakarating ang
makabayang panitikan sa masang mambabasa o sa mamamayang wala
namang akses sa internet.
Sa katuus-tuusan, ang pagkupkop sa makauring paninindigan ng mga
manggagawa, o pagpapanibagong-hubog at matatag na pagtindig para sa
kagalingan at interes ng masang anakpawis, ang siyang pinakamahalagang
hakbang upang magkaroon ng matibay na gulugod ang ating panulat para sa
bayan. 
Footnotes
Karugtong ng sipi sa bidyo ng ABS CBN: “Hindi naman po siguro magagalit
si Presidente Duterte dahil galit din sya sa mga monster, at saka kaapelyido ni
Bong Go.”
https://www.facebook.com/abscbnNEWS/videos/10154273444775168/
‘Asked if the President was referring to the Tiamzons, Gazmin said: “I don’t
know. I guess so. They are a big fish.”’ “CPP chief, 6 other communist execs
nabbed” Nikko Dizon, March 22, 2014, inquirer.net,
http://newsinfo.inquirer.net/588110/high-ranking-communist-leader-
captured-in-cebu
“The Need for a Cultural Revolution,” Jose Maria Sison, sa librong Struggle
for National Democracy, 1967. Unang binigkas ni Sison bilang talumpati sa
UP Baguio College, Baguio City, September 30, 1966
“The Tasks of the Second Propaganda Movement,” Jose Maria Sison, sa
Struggle for National Democracy, 1967. Unang binigkas ni Sison bilang
talumpati sa St. Louis University, Baguio City, noong October 12, 1966.
Unang itinatag ang PKP noong Nobyembre 7, 1930 sa pangunguna ni
Crisanto Evangelista.
Philippine Society and Revolution, Amado Guerrero, 1971
“Tanikala at Talinhaga, Ang Manunulat Bilang Bilanggong Politikal,” Dr.
Rommel Rodriguez, 2015
http://journals.upd.edu.ph/index.php/humanitiesdiliman/article/download/464
4/4191
“’Mass suicide’ protest at Apple manufacturer Foxconn factory,” Enero 11,
2012, Telegraph.co.uk
http://www.telegraph.co.uk/news/worldnews/asia/china/9006988/Mass-
suicide-protest-at-Apple-manufacturer-Foxconn-factory.html
“Revolutionary Literature and Art in the Philippines, from the 1960s to the
Present,” Jose Maria Sison, 2015 http://josemariasison.org/revolutionary-
literature-and-art-in-the-philippines-from-the-1960s-to-the-present/
http://freeericsonacosta.blogspot.com at
http://acostaprisondiary.blogspot.com
“People’s War, People’s Press: History and Evolution of Ang Bayan (The
People), the News Organ of the Communist Party of the Philippines (CPP)”,
Lucia Palpal-latoc Tangi, 2015 http://josemariasison.org/wp-
content/uploads/2015/12/2015-02-Tangi.pdf
http://www.philippinerevolution.net/ at http://www.cpp.ph/
http://www.geocities.ws/ipasa_pagkabasa
Maya Daniel (of poetry and resistance) facebook profile
https://www.facebook.com/people/Maya-Daniel/100008394881918
https://mayadanielblog.wordpress.com/
* Binigkas nitong Setyembre 1, 2016, sa Balay Kalinaw, Unibersidad ng
Pilipinas, Diliman, sa porum na “Pagmulat ang Pagsulat: Makabayang
Panitikan sa Panahon ng Facebook, Twitter at Instagram” na bahagi ng
serye ng panayam na TALASALITAAN ng UP Sentro ng Wikang Filipino
(SWF).
Sa alaala nina Propesor Leoncio Co at Monico Atienza, mga makabayang
guro ng UP na kabilang sa bagong dugo ng mga proletaryong
rebolusyonaryo na nagtatag ng Partido Komunista ng Pilipinas (PKP-MLM)
noong 1968.
Share This Post






You might also like:


Grand send-off for petitioners vs Terror Law set January 29


COVID-19 filmmakers’ diaries get candid on death, despair,
coffee and chaos
 
Guards beat up 6 farmers in Hacienda Yulo in Laguna


Drop charges against Bulacan farmers, land developer told

 Search

 
 14200Followers
 28000Fans

MARTIN'S PURRSPECTIVE MORE

2021, we’re coming in

JANUARY 4, 2021 0 COMMENT
By DEE AYROSO
Read the rest of this entry

PHOTO OF THE WEEK MORE

 

The aftermath
NOVEMBER 20, 2020
A farmer, Nida Davao in barangay San Jose, Montalban, Rizal checking her crops
after the…
Read the rest of this entry

SUBSCRIBE
Email address: 
Sign up

BULATLAT TWEETS

My Tweets