I YANAK-ANAK OM I ONGKOR-ONGKOR

Haro-haro no kaka, di pogulu po, id iso o kinoyonon dii, do iso paganakan i poingion
tama, tapa om tanak. I tapa nopo dii nga pinungaranan do i Kaki-Kaki, i nopo tama
nga i Kodu-Kodu om i nopo tanak diolo nga pinungaranan do i Yanak-Anak.

Yolo nopo kaka ti do sanganak-anak nga monidong, mongulam om mananon nanom

do kokotuan om taakanon do suai. Aparu tomod kaka yolo ti. I Yanak-Anak nopo
nga tanak wagu di awantang tomod o kokitanan om aparu, osonong o kowoyo-
woyoon.

Insan tadau, pimpanau no i Yanak-Anak id tidong diolo. Id tawayaan nopo di

Yanak-Anak di nga walai di Ligot Liou. I Ligot Liou nopo ti nga molohing no om
oligot tomod o liou, milo ngawi do pinturugan i liou dau. I Ligot Liou nopo nga
arahi tomod posilang do parai, mutok-tutok pondo i Ligot Liou id siriba di
bunahau do magandad di parai dau do oromuk.

"Talib oku po inan...." ka di Yanak-anak tumalib.

"Aiii , Yanak-Anak ko i mala di. Mumbaya po boh, inggutuan oku po.." ka d Ligot
Liou suminimbar.

Umbaya nodi kaka Yanak-Anak do moginggutu di Ligot Liou. Soira sinoriuk di

Yanak-Anak i tokobuk di Ligot Liou, nouru tomod i Yanak-Anak do nokotigog tu
mogisusuai po id tokobuk di Ligot Liou. Haro ngawi gangak, lontugi, tangkalamai
om giuk. Osikap no kaka di Yanak-Anak do manabpo di tangkalamai, giuk, lontugi
om gangak om pokuon no id palad di Ligot Liou. Soira do minsosodop nodi, ugad
nodi Yanak-Anak.

"Yanak-Anak, tumakad ko nopo hilo id nuluhon om umbayaan no i tawadak, onuon i

tawadak di omulok po nga kada po ukabo id tanga do ralan. Korikot po id walai om
ukabon nogi.” Ka di Ligot Liou minomboros.

"Pounsikou no inan," ka nogi di Yanak-Anak.

Soira do tuminakad i Yanak-Anak do nulu, kokito no di Yanak-Anak di tawadak om
onuo no di Yanak-Anak i tawadak di omulok po miagal di pinonuhuan di Ligot Liou.
Pitonggoi-tonggoi no di Yanak-Anak i tawadak dii do minongoi id tidong om soira
podi do nokouli Yanak-Anak id walai di sosodopon no, ukabai no kaka di Yanak-
Anak i tawadak di.

Soira do nukaban, soliwan nodi o songulun sumandak di olumis tomod. Siliho nodi
kaka di Yanak-Anak i sumandak dii do sawo dau. Aparu tomod kaka i sumandak di
om norikot no i Kaki-Kaki om i Kodu-Kodu do noondos. I nopo kaka sumandak dii
nga osundu koulunon. Nakakaya nodi kaka i Yanak-Anak. Walai nopo di nga
osonong, binuru-buru di nga ogumu, parai di ngawi nga ogumu.

Soira nokorongou i Ongkor do boros ngawi do tulun, ongoi nodi kaka i Ongkor
ruba di Yanak-Anak om pongudio nodi nung poingkuro-kuro kopio do nakakaya.
Yanak-Anak nopo ti tu osonong koulunon nga posunudo nodi dau ngawi
poingkuukuro.

Ongoi nodi moti kaka i Ongkor di pintalib-talib id walai di Ligot Liou. Soira do
tuminalib, lohowo nodi di Ligot Liou i Ongkor di do minoki'inggutu. Soira do
sinoriuk di Ongkor i tokobuk di Ligot Liou, umbal po kaka i Ongkor di pingiak tu
nokokito do gangak, lontugi, tangkalamai om i giuk. Onuo no kaka di Ongkor i
mumuhau om imuhawai no i tokobuk di Ligot Liou gisom do sontompul-tompul po di
i tongogiuk. Pinturugai ngawi kaka di Ongor i tulu di Ligot Liou om norikot no i
Ligot Liou do rinualan do tulu.

Soira do minibok i Ongkor, suhuo nodi di Ligot Liou do maganu do tuwa do

tawadak di omulok po om sinunudan do au mongukab id tanga do ralan. Soira do
naanu di Ongkor i tua dii, au di yalo nakaandad do minongukab. Irikau nopo kaka i
Ongkor id disan do tawadak dii om ukabai no i tua. Soira noukaban, soliwan nodi o
todu-odu no om aiso ngawi o nipon. Umbal di pomogiak i Ongkor nga poingkuro po,
gusaan i kaka di todu-odu dii. I Yanak-Anak nopo di do sanganak-anak nga
osonong di tomod o koposi-posion diolo, i Ongkor nopo di nga tadau-tadau nopo di
do miuhod di todu-odu.
PONONTUDUKAN di aanu mantad tangon diti nopo nga pantangon no tulun suai
lolobi po komolohingan tokou.