Uhu : Duo Miambalut om Songinan Bohuang.

Punti amas akanon do kara,

Akanon do kara hilo id kopuruan,
Poingkakat oku hiti do tadau baino,
Manangon tangon oku kumaa dokoyu.

Kopisanangan om Tabi Malaysia Madani kumaa toinsanan. Tadau baino orohian oku
popolombus do iso tangon i kiuhu do “Duo Miambalut om Songinan Bohuang”.

Di pogulu po, kiwaa duo tulun miambalut. Ngaran nopo diolo nga’ i Gopud om i Giluk.
Ogirot o piombolutan diolo.

Insan tadau, miniupakat yolo do sumuang hilo id talun mongoi pogihum tua’ua’. Timpu
nopo kaka di nga timpu mongua’ ngawi o tua’ua id talun dii. Minibatos yolo do miuhup
tumoguang nunu nopo kobolingkangan di abantalan.“Obulun oku sumuang hilo id talun nung
kiwaa tambalut,” ka di Giluk pinoposunud di Gopud pogulu po do sumuang yolo di talun.

Piipiro linaid mimpanau, tigog ka do korubaai diolo o songinan bohuang.

Nakagagang om norosian yolo do nokokito di bohuang. Opurongod om orongit
kokitanan. Osiau no yolo minanangkus do minogidu.

Indakod i Gopud id iso’ puun kayu. I Giluk nopo nga au nokokosup mindakod.
Natagakan i Giluk do pomusarahan. Au isio nokoilo nunu maan. Tigog ka do kosorou disio o
iso’ po ralan. “Au mangakan o bohuang nung rata,” ka do id pomusarahan disio.

Latan kaka i Giluk minimpatai-patai. Kodoso’ disio do momuhobo. Pamanau no kaka ii

bohuang dii minongoi id di Giluk. Pinsingudai di bohuang i Giluk mantad gakod gisom id
tolingo om ibok no.

Koibok i bohuang, lintuhun i Gopud mantad puun kayu. Ongoi isio id di Giluk.
“Nokuro tu pinsingudan di bohuang o tolingo nu?” ka di Gopud.

“Haro pinosunud di bohuang doho. Ka di bohuang, kada kolunggui ginawo om kada

ambalut do tulun di mongiduan do tambalut id kobolingkangan,” ka di Giluk. Nolunggui
ginawo di Gopud nokorongou do boros di Giluk. Pokiampun nodi isio. “Ompunon ku ia’,”
ka di Giluk. Ounsikou o ginawo di Gopud. Ponongkotoluod isio om pamatos do au nodi
kopio mongiduan di Giluk nung kobontol do kobolingkangan.

Ponontudukan nopo mantad tangon-tangon ku diti nga, maai no dati igitai o batos dati.
Ompunon nogi ngawi dati o kasalaan tulun suai om kada no kopio maai tolikudai tambalut id
kobolingkangan.

Iri-iri no tangonku. Pounsikou.

Kaamatan ramayon tokou,

Popogirot do pisompuruan,

Pibabasan om piombolutan ,

Koruba kawagu do suai tadau.