IH KONDU NAKAANU TATABA

Haro-haro nakakari, tangon di gulu-gulu poh kopio monusuyan dot iso paganakan dit kitanak do iso pungaranan do ih Kondu. Paganakan nopo diti nga poingion do id kampung di poingindai-indai dot nuluhon om kopuruan poh kaagu posorili. Ponibaan kaka sorita, koposian nopo do paganakan diti nga asampit no tomod tu sontob tatanom diolo nga kosohon nopo do suang talun om ih mongingintana miagal do Tikus , Tubou , Kuruak om suai-suai poh. Ih molohing di Kondu pungaranan do ih Tiidi om ih molohing do kusai pungaranan do ih Puluan Sigar. Ih Puluan Sigar nopo diti nga tuluh di wowoyoon do id kampung dino. Om insan nokaka sodop, ponodo no kaka ih Kondu dot Tangau do titiu om ongoi noh ih Kondu ponongkiboros di tapa dau, " mongoi oku daa podtiti do totuong baino diti apa , rondom do baino om ogumu noh kanto Bonong Ranau do hilod kobuturan " kaka di Kondu. Miampai do sonsod di olinuhud , id suang ginawo di Puluan Sigar tah ! tah ! agayo nopama dii ih Kondu diti tu kipomusarahan noh do mongintorus montok paganakan diti. Hopod dom duo bogia toun dau dilo ka kawagu ginawo di Puluan Sigar miampai monorou-sorou do sontob toun pinongotidangan dau do paantakan do piroh umur di tanak dau ih Kondu. Oh ! bah Kondu obuli ko ih do mongoi potitih nga ingat- ingaton mah ! ka di Puluan sigar do pinopotumboyo di tanak dau do songulun nooh. Bah, om sandango noh moti di kondu ih kakayaba om angkapo noi dangol miampai minibok poinggantai do tititiu. Osonong tomod oh nasip di Kondu tu saru tabpo nopo ih palad dau dot Bonong Ranau. Haro no matudi do soginumu sabatu oh kinosoduo do pintabpaan di Kondu dii om koponu nodii ih Kakaba dau. Om kosorou nodii ih isio do muli walai, kawagu nga louson tomod nodii kaka ih Kondu. Do maso di Kondu id tindalanon katalib no yau do iso guas do Nunuk Ragang ih agayo noh kopio guas miagal pod' Tangkob. Sigog nopo kaka om lahapai noh ih Kondu do Salau Huluh ( Kondogu ). Kun gkubai noh dii kaka di Kondogu ih Kondu moi amu kopuhoboh miampai giak di kororosih no kopio he ! he ! he ! he akanon tia do baino !akanon !akanon.!akanon ! kadi Kondogu dot miagal poh dot tingoron oh boros om miagal dot mamalatik ( tongus di topuhod ) oh gongus dau. Kotias om koidu dii ngawi ih Bonong di tinitihan di Kondu. Totopot nopo nga id suang ginawo di Kondu norikot noh do oundoso do orosian di amu gina-gina. Amu di yau kokurios nga giak noh ih Kondu, " kada ! kada ! Kada!...oku gogolo!!!.. kada ! oku patayo om kada !

oku akano. kada ! oku nogi dia kukuroyo oi Salau Huluh ! ". Yoho diti tulun di tosian- sian no om osusa oh koposion,.. nung patayon oku di dika nga isai no dii monumad di molohing ku it osompitan tomod oh koposion, kaka wagu di Kondu. Tah ! om norikot noh do nosudu oh ginawo di Kondogu do nokorongou, jadi langkab noh dii yau. Bah ! nga ingkaa boh, nokorongou oku noh di boros nu om otumbayaan oku ,nga kada nodii korosiai doho om au okui monguro-nguro dia tu apandai tomod kod monomboros!!!!. Kanau poh mitorungak om miboros-boros kito poh. Ka di Kondogu. Om pitorungak noh kaka di yolo idih. Tanak koi pamah do tosisian oh koposion nga inkaa boh, amu oku nodii monguro-nguro dia om onuan tia' nogi do Tataba mongoi do osimbanan nodi kopoposion nuh. Onunu nopo ih pokionuon nu, nga ongotuluk ngawi do soira do posopukon nu ti' Tataba. Nga soira aanu nu iti Tataba kada noh kopio mai popimboroso do kumaa do suai tulun toi ih molohing nu do au otopot oh kopogunaan. Om potunuiyo no di Salau Huluh ih Tataba kumaa di Kondu. Tataba nopo idi nga miagal kakah do Sosopuk kirinaru do sontudukon noh om miagal do nanakis do tunturu oh ginayo. Romito noh kaka di Kondu iri miampai minonongkounsikou om minamatos do monumboyo sontob di kinomoi di Salau Huluh di tiinu. Hodiah..hoi! uli noh dii tu tanga tuong noh diti om moruk - goruk no dii matuu oh molohing nu do koodop kaka di Kondogu do modkoringau. Pamanau noh dii minuli ih Kondu. Korikot kaka ih kondu id walai dau. Ukabai totobon nga otuong noh id suang do walai di tu nongoko odop no ngawi ih molohing dau do moruk-goruk pooh. Kongingis nopo kaka ih Kondu om suang noh yau id dompuran. Ukabai kaka di Kondu ih Lanjang nga aiso boh kaka suang. Kokogo noh di Kondu ih Tataba dau id suang di kakaba om posopuko no dau id Lanjang. Sigog no poh kaka om kopudsuai nod takano do miagal poh do kambang do Gapas id suang di Lanjang. Tah ! kad ginawo di Kondu ounsikou. Ukabai Kawagu di Kondu iri poriuk do kawah om osisingoo ih kaka do aiso suang. Miagal nogi di tiinu, posopuko kawagu di kondu ih Tataba dau do id poriuk idi nga kopudsuai nopo kaka do linasu do Bakas ih poriuk. Om poopio noh di Kondu ih tataba dau om ongoi noh odop tu siodopon tomod ih kaka ih mato dau. Doung korimpunon nodii, posik om tungag noh ih tina di Kondu ih Tiidi. Ponotok poh kaka do potinduk do manuk yau. Kopongoh karaja dau, kosorou nodi ih Tiidi do mogonsok. Ngoyo noh dau ukabai ih Lanjang. Nga tata! tata!..... nasambalik kaka mato di Tiidi do nokokito di Takano do poinpud'su id suang do Lanjang.giloso kaka dau mato, nga miagal kasari idi tu okito ih takano do miagal po do kambang do Gapas. Ngoyo kawagu
2

dau ukabai ih Poriuk nga norikot noh tomod yau do nokotigog nokokito do linasu Bakas do poinpud's id suang di kawa. Amu oku ih pama moginipi ditikaka di Tiidi. Tah !..Tah !..Tah !..Tah ! ..Hodih ! mah ti' baino !tu ukaban ku lanjang nga poinponu do takano miagal poh do kambang do Gapas !.. om ukaban oh poriuk nga poinponu linasu Bakas !mogot daa do irad noh kasari -sari daa itih !Kaka di Tiidi do nounsikou. Hodih.!!! Tungag kou kanou makan diti takano di au noilaan nongo oh tadon. Om nunu po gia ngapogitotorungakai tokou iti do mangakan kaka di Tiidi. Om pogitotorungakai noh boh kaka dii diolo ih takano om linasu Bakas idi. Tihoiiiii..!!!!.... om nangayahan noh dii tomod yolo gisom nakaganang ngawi oh tian. Ih Kondu ih nakaanu di Tataba amuih pinopoilo do isai-isai pasal di Tataba dau nga monikid tanga sodop om tumungag yau mongoi ponopuk di Lanjang om Poriuk diolo nga opiponu-ponu nopo kaka do takanon ri Lanjang om Poriuk.Nung moginum kaka yolo do kinomol toi Lihing minomorian nga sopukon nopo kaka di Kondu iri Bongoo do poring nga oponu nopo kaka do Lihing di opotoh no koinuman. Id kopupuson, poopio om gompio nopo tomod kaka dii Kondu Iri Tataba idi. Om iti no dii tompus do tangon diti. Inkakakaa noh.
** Susuyan nopo diti nga sinusui di Odu Tandiam Kinamat di poinpasi poh yau om kakal kasari do poinsuat id ginawo dahai oh Tangon diti . Ih yoho ih minokinongou do Tangon diti di pointanganak oku poh. ** Sinusun di Nicholas Gilai 30 - 9 - 1999 ( Jumaat )