TAYTANPA ÑAKAYNIN

(Willakuy)

Huk punchawsi chinniq urqupi taytakucha ayllunpiwan tiyasqa, churinsi

hatunyarquspa huk pasñata warminpaq karu llaqtamanta suwarqamusqa,
chaysi iskay aylluña tiyasqaku, ichaqa karunka. Churinqa achkatas
wakata mirarqachisqa, taytanmantaqa aswan achkata. Huk punchawsi
wawanpaqa wakan wacharqusqa, allin ñuñusapa kaq, chaysi
taytakuchaqa hina mallichinakusqanku rayku munarirquspa puqun
mañakuq churinpata risqa.

Wayquman chinkaykuptillanraqsi warminqa rikurqusqa hinaspas qusanta

nisqa:
- Waktaña taytaku puqunman hamuykuchkan, lliwtacha upirqatamunqa,
allquykunapaqpas puchunmanchu, manam hamunqachu nirqankitaq-
nispa.

Hinaptinsi qusanqa kutichisqa:

- Pichá hamuchkan taytayri kaqchus - nispa.

Hinallas warminqa rimaykusqa.

- Pipas michiysiwarqachu, sapa punchawmi yanqa wasinpi puñun,
imapas mañakunanpaqñataq kallpamun, wakin aylluykikunapapim ichaqa
llamkanpas, puriysinpas, yanapanpas.

Qusanta nispas awqaykusqa; hinaptinsi manaña astawan

piñanakunankupaq qusanqa nisqa.
- Ñuqari imanispaytaq taytaymanri mana malliykachiymanchu, paypas
sapakutitaq mallichiwanchik, ama piñakunanpaqyá uñata wakapa
mikunan qachuwan pakarqusun hinaspa nisun wakapapas uñanmi
wañurqun manam chawachikuyta munanchu ni malliykunallapaqpas -
nispa.

Ñuqapas waqaqtukusaq uñamanta, nispas rimanakunku. Warmiqa

utqayllamanñas qachuwan uña pakayta qallaykun, ichaqa ñas
 taytakuchaqa uñatapas rikurqusqaña, pakasqantapas rikusqas.
Chayaykuptinsi llunchuyninqa nisqa.
- Uña qanrapas wañurqunmi wacharqusqan hawalla, ñam allqupas
tukunña - nispa.

Churinpas yapapansi.
- Manam puqun malliykunallapaqpas chawachikunchu, manam
puqunpas kanchu taytay - nispa.

Taytakuchaqa chayhinata uyarispas, kutichisqa:

- Ñuqaqa puqunta munarirquspaytaq malliparakamusaq nispa
hamuchkarqani, manachu kimsanchikmanta chawaruchwan – nispas
nisqa.

- Manam atichwanchu nispas churinqa nillasqataq.

Taytakuchaqa chaysi nisqa:

- Chaynaqa qamkunallañayá chawarqunkichik chupuruptintaq -
nispas kutikapusqa.

- Maypiraq tarirquyman puqunta, wakay wacharquptinqa

mallisaqpunim imahinata ruwaspaypas - chayhinata rimapakuspas
ripusqa.

Ripukuptinsi warmiqa qachuwan pakasqanta urquyta qallarisqa chaysi

qawaykunanpaqqa uñan chiqappaq wañurqusqa, warmiqa uñanmanta
istawtas waqaykusqa, ichaqa manañas kawsarisqachu.

Lliw llaqtas chayta yachasqa, hinaspas yuyaymanasqaku, mana puqun

quykuanan raykum uñanta wañuchin, chayna kaptinqa lliwmi wakan
tukunqa nispanku.