Sermon Jamita tu Partangiangan

Tu Minggu VII dung Trinitatis

Turpuk Parjamita 2 : 18 - 23

MANGOLU JALA MANGULA DI BAGASAN HABISUHON NI DEBATA

Huria na hinaholongan ni Tuhanta Jesus Kristus, Sipalua i! Angka ulaon manang hasonangan na
dijalahi di duru ni Debata, tangkas do i holan parsatongkinan, sisoada jala haotoon hombar tu buku
Parjamita. Ise do panurat ni buku parjamita on? Di bindu 1 didok do ia parjamita, i ma anak ni si
Daud, raja na maringan di Jerusalem. Marojahan tu angka tradisi Gerejawi, parjamita na nidokna
dison ima Raja Salomo. Ibana do tarbarita sahalak raja na bisuk jala pistar. Tema pokok ni buku
parjamita on, i ma taringot tu “na laho salpu do luhutna, jala alogo sambing molo di duru ni
Debata, alani ringkot ngolu biar mida Jahowa.” Godang do pandohan ‘alogo sambing’ (segala
sesuatu adalah siasia), sai hira na pesimis situtu jala songon na so adong be panghirimon ni
parjamita i. Alai, diujungna tutu, didapot, diongkuhon jala dipeop ibana do, paboa na so marlapatan
do ngolu ni jolma molo disoadahon Debata.
Dipaandar parjamita paboa na marbiasbias do rohana mida saluhut ulaon angka na
nihangaluthonna di hasiangan on. Didok, ala ingkon tadinghononna do i di jolma na ro sian pudina
muse. Satongkin do ngoluna salpu, dung i nunga pintor soluk muse na mangihut. Ia dibasabasahon
Debata pe hapistaran, parbinotoan dohot las ni roha tu jolma hasudungan ni rohaNa, ipe tong do na
laho salpu sogot. Tung pe dipapungu angka jolma i artana sahat tu 7 (pitu) generasi, hape halak na
asing do na marbagi saluhutna i, nang i ndang marguna hape, jala pangeahion di alogo sambing do i.
Marhitehite sungkunsungkun retoris di ayat 19a, didok parjamita do: Ise pabotoboto manang halak
na pistar ibana manang halak na oto? Nang pe songon i, marhuaso do ‘hapistaran’ i di saluhut
angka ulaon na nihangaluthonna di hasiangan on. Alai tutu, salpu do hapistaran i, salpu do nang
haotoon.
Saluhut na adong di toru ni langit na laho salpu do. Ala so adong nanggo sada pe na
manongtong di portibi on, ingkon luluanta dia do na manongtong jala hot na so mubauba. Alusna, i
ma Debata di bagasan hataNa i, na manongtong jala na so mubauba ro di salelenglelengna (pat. Her.
13:8). Jesus Kristus do hata ni Debata na gabe daging jala saor tu tongatonganta. Ibana ma taihuthon
jala mian ma hita di hataNa i, asa unang songon alogo sambing ngolunta. Manang aha pe sangkap ni
rohanta nang ulaonta, ingkon ma hombar tu hata dohot lomo ni roha ni Debata. Asa ndada
sangkapta na saut, alai sangkap ni Debata ma tutu. Ai ndada na mandok gabe paholangonta manang
pasisionta dirinta sian portibi on, ai denggan do nasa na tinompa ni Debata. Nang pe ndang
manontong saluhutna i, tajalo ma di bagasan roha mauliate jala tapangke hombar tu lomo ni rohaNa
i. Alai, ndada tarpangasahon hita nanggo sada pe sian saluhutna. Debata do mual ni nasa
silehonlehon di bagasan ngolunta. Ibana do sipangasahononta di sandok parngoluanta on.
Mansai relevan do turpuk jamita on di tonga ni ngolu zaman modern si nuaeng on. Di
tongatonga ni hamajuon Ilmu pengetahuan dohot teknologi, godang angka haimbaruon na idaonta
boi patoguhon haporseaon ni ruas huria, manang baliksa gabe mambahen tarlalap jala lilu
haporseaon nasida. Adong do jolma na tarlalap jala tarpodom haporseaon nasida, mangolu nasida di
bagasan hagiot ni dosa manang marroha portibi, gabe dao nasida sian dalan ni Debata. Alani,
marhite turpuk on, tarjou do hita asa unang mangolu di bagasan roha portibi, ai alogo sambing do i
jala haotoon. Alani, ingkon margogo jala marbisuk hita di bagasan sondang hata ni Debata.
Tapangido ma pangurupion na sian Tondi Parbadia laho mangajari hita mangantusi jala mangulahon
hataNa i. Unang ma tahaposi angka na olo salpu, alai tahaposi jala tahangoluhon ma na manongtong
ro di salelenglelengna, i ma hata ni Debata. Habiari ma Debata, jala radoti angka tonana, ai i do
inana siingoton ni ganup jolma (bindu 12:13), asa unang marisuang ngolunta saleleng di portibi on.
Songon tarsurat di 1 Korint 15 : 58 “Onpe, hamu angka donganku na hinaholongan, marsihohot jala
so mubauba ma hamu, jala lam sumurung ma tongtong di bagasan ulaon ni Tuhan i, ai diboto hamu
do: Ndang magopo halojaonmuna di bagasan Tuhan i”(Karena itu, saudara-saudaraku yang
kekasih, berdirilah teguh, jangan goyang dan giatlah selalu dalam pekerjaan Tuhan! Sebab kamu
tahu, bahwa dalam persekutuan dengan Tuhan jerih payahmu tidak sia-sia)! Antong, mangolu jala
mangula ma hita di bagasan habisuhon ni Debata. Amen