Panatang Makabata,

Iniibig namin ang mga mag-aaral

na aming kapiling sa loob ng sampung buwan
kada taon sa hamak naming silid-aralan
na nagsisilbing tahanan namin sa maghapong pagpapanday ng karunungan.
Sila ay aming kinukupkop at tinuturuan
Na maging maka-Diyos, makabansa at makabayan.

Bilang ganti, marami ang sa amin ay ipinupukol na mga pagkukulang,

Mali-maling modyul na iniinsulto at ginagawang katatawanan,
Lantarang panghahamak sa aming propesyon ang ipinangangalandakan,
Kami raw ay walang ginagawa ngunit patuloy na sinasahuran.
Kaya hiling namin at nawa ay inyong pagbigyan,
Subukin kaya ninyong sa ami'y makipagpalit ng katauhan,
Upang kahit saglit ay inyong maranasan,
Ang araw-araw na buhay na aming binabata at nang kayo ay matauhan.

Kami raw mga guro ay may malaking suweldo,

At saan kayang memo o pahayagan naman nabalita ito?
Ang totoo, ang mga guro'y naglalako ng kung ano-ano,
Madagdagan lamang ang inuuwing sinsilyo,
Ni wala ngang gurong sa pagtuturo ay naging milyonaryo,
Mayaman sa loan, iyan ang sigurado.

Kami raw mga guro ay walang ginagawa,

Sa pandemyang ito kami ay nakatunganga,
Salamat na lang muli sa inyong maling akala,
Ngunit kami ay tapat sa tungkulin at sa aming propesyon kami ay sumumpa.

Paglilingkuran namin ang ating bansa at ang mga mag-aaral nang buong katapatan,
Iaalay namin ang aming oras, maghapon at magdamag sa mga gawaing pampaaralan,
Dahil mahal namin ang aming tungkuling sinumpaan
Na itaas ang kalidad ng edukasyon sa ikatututo at ikatatagumpay ng mga kabataang pag-asa
ng ating bayan.