Mahabbet dâgı yak sînende ferr-i devlet isterseñ
Bilürsin olmaz ey Bâkî sa’âdet-bahş her kevkeb
Dehri enfâsuñ mu’attar kıldı ey Bâkî yine
Tîb-i hâtır virdi beñzer ol hıtâb-ı müstetâb
Şöyle olmış câm-ı ‘aşk-ı yârdan mest ü harâb
Kendüsin dîvârdan dîvâra urmış âfitâb
La’lüñle câm yok yire eyler müdâm bahs
İzhâr-ı hak degülse garaz hod harâm bahs
Nahl-i zîbâ ile nâzük tenidür meyle sebeb
Ne kad-i serv ne sîmâ-yı semendür bâ’is
Mecnûnı gör ki komadı ‘aşkını Leylînüñ
Nâmûs u nengi kodı vü terk itdi taht u tâc
Eşkâl-i vefâ resmi kabûl itmede kalbüñ
Âyînedür ammâ begüm âyîne-i pûlâd
Kâmetüñ kullugına düşmeyicek
Olmadı serv-i hırâmân âzâd
Eylesün la’lini dermân dil-i bîmâra meded
Dûstlar işte ben öldüm baña bir çâre meded
Gazellerüñde lebi vasfın eyle ey Bâkî
Şekerle olsa bilürsin olur hoş-âb lezîz
Dâg-ı siyehler ile cism-i nizâr u zerdi
Bir bâl ü perri yanmış pervânedür sanurlar
Şâhâ murassa’ câmdur sâkî-i sîm-endâmdur
‘Ayş-ı mey-i gül-fâmdur râhat-resân-ı rûh-ı Cem
Cânâne giden nâmedeki mühr degüldür
Ardınca kalur reşk ile çeşm-i nigerânum
İçelüm la’l-i müzâbı saçalum cür’aları
Hâk-i gülzârı bu gün kân-ı Bedahşân idelüm
La’lüñe teslîm ider cân borcın inkâr itmezin
Kılmasun gamzeñ tekâzî çekmesün medyûnlugum
Şemşîr-i tâbnâk u ziyâ-bahşı gûyiyâ
Âhendür oldı Hazret-i Dâvûd elinde mûm
Güli çemende serîr-i zümürridîn üzre
Selîm Hân-ı sipihr-âsitâna beñzetdüm
İrdüm figân u zâr ile ol âstâne ben
Çıkdum kemend-i nâle ile âsmâne ben
Bilmezin n’eyleye derd ü gam-ı cânâne baña
Ne müdârâya meded var ne müdâvâ bilürin