3

Siyin Association for Christian Communication

Pathian a bulphu Minam. Ps.33:12

Lom.3, Hawm 3

October, November, December 2012

MERRY CHRISTMAS & HAPPY NEW YEAR Lungdam vawt ci sia leitung bup atu ni thupi mama khat hi. Lundam vawt mua tu sia Tapidaw ngawlte in lawpzaw thei ci zong ii heak tek sa hi. Lungdam vawt ni Kum 1500 hun lai in lungdam vawt ni sia nam 135 in kiciamtee hi. Sonteena Deceber 25, January 6, March 28, April 19 le 20 , November 17 ci bang in eima omna mun taw kizui in a ni sia a tuamtek in kizangh hi. AD 361 kum ciang Pope Julius in lungdam vawt ni sia Deceber 25 ni a kibang in zangh tek tawng ci in thu thangsak kakoai hi. AD 500 hun pan kipan Tapidawte in hong lungkim tek mama ahikom lungdam vawt ni sia December 25 ni tu ni ciang dong kizangh hi. Christmas kamal khiakna Christmas ci sia Christ le Mass ci kammal nii a kingawm hi. Christ kammal sia Greek lai christos pan hong pai hi a, a khiakna sia anointed (Sathau thi/noi) ci nopna hi. Mass kammal sia Hebrew lai mas pan hong pai hi a, a khiakna sia (mihon /mipi) ci nopna hi a, lungdamna (tribute) cinopna hi. Christmas Decoration December thadet a kipan ii biakinn tek ah a etlawm thathei tu in kizeam tek hi. 1. Paak khau Paak khau ii khai sia a laizaang mun khat ah kingawm tek a, ih vawtna ii khiakna sia eite Jesus sungah pum khat ih hina Jesus sungah ih ki ngawmtuana liim a lakna hihi. 2. Christmas tree 1847 kum pan kipan American te in Christmas thingkung hong zangh hi. Christmas thingkung sia a tee a pul ngawl a hing tawntung (ever green) thingkungte bek kizangh hi. Hing tawntung ci ii deina sia hong suak Jesus ii hong itna tu ni, zingciang a tawntung in kikheal ngeingawl hi ci nopna liim hi. (a) Denmark ngam Denmark ngam ah Christmas tree tungah vacim bu le vacim anneak natu koi sak hi. (b) Sweden ngam Sweden ngam ah Christmas tree sia colour namkim taw zeam hi. A khiakna sia minam kibang ngawl, kampau kibang ngawl ka leang Jesus sungah pum khat ki hi siat a cinopna hi. (c) Norway ngam Noway ngam ah Christmas tree kimkot ah Jesus suak lungdamna lasa in a kimkot ah pai ngeingai uh hi. Christmas tree sia Jesus suanna hang in a kivawt ahikom ii lungdamna hi ci lak nopna hi. (d) Germany ngam Germany ngam ah Christmas tree tungah Tenging, khai in nging valeng tan hi. A khiakna in Tenging in eite ii din mun tu hong lak a, Jesus hong suana hang in lungdam in ih kipaak tawntung hi ci nopna hi. Pawlpi sim ah Christmas tree kisuan tek hi. Pawl khat in biakinn zepna in kizangh a, thingkung tungah mei kikoi in colour namcin tangsak vazai hi. Pawl khat in Christmas bell khai a, pawl khat in Christmas percel khai hi. Pawl khat in Christmas card zong kikhai hi. Eima omna mun taw kizui in a om babang taw Christmas decoration kivawt hi.
Hawm 3 -1 NIKONGHONG - Lom 3

Khui an kuang Topa Jesus a sua zawkciang puan taw tun a, khui ankuang sungah sial hi. (Lk.2:6-7) Khui an kuang sung ah a kisialna sia kiniamkhiakna liim a lakna hi. Jesus nungzui thumte zong kiniamkhiak a kulna hong phawk sakna hi. Mipil thumte letsong pia Mipil a khatna pa ii ken vanh sia Kham (Gold) Mipil masa pa in kham taw Jesus a biakna sia tua hun lai Kham sia kumpi innsung bek ah a om/ a kizangh ahikom Kumpi suak tu liim a lakna in kham taw bia hi. Mipil nina pa ii vanh ken sia thing namtui (Frankincense) Mipil nina pa in thingnamtui taw Jesus a biakna sia Topa biakna mun ah Pathian thiampite ii a zak thingnamtui hi. Hong suak Jesus Pathian thiampi a suak natu lim lakna ahihi. Mipil a thumna pa ii vanh ken sia paknamtui (Myrrh) Mipil thumna pa in paknamtui taw Jesus a biakna sia tua hun lai hi bang paknamtui nam sia mithi om ciang a kizangh paknamtui nam khat hi. Hong suak Jesus sia nang le kei atu thina hong thuak tu a mu kholna taw paknamtui taw na bia hi. Mipil thumte in Kham, Thing namtui le Paknamtui taw hong suak nausen bia uh hi. Tu ni nang le kei in bang taw biak na sawm ziam? Akisi pui Jesus suakna mun bia tu a, a pai mipil thumte aksi pui lamlakna zuiphot hi. A hizong amate mipil a hi bangma a pilna suang a, hong suaktu nausen sia Kumpi suaktu a hiciang ci in hong ngaisun a, Aksi en nawnngawl in amate pilna taw kumpipa kung hong zuan hi. A pilna suang in hong ngamtat ciang thu tam mama piang hi. Kum 2 nuai sia patang teng thattu ci thu hong piang a, patang tam mama in thi law hi. Ih mu ngeingawl 2012 kum sungah ih kalsuanna ah mipil thumte lamlak ahi aksi pui bangma Lai Thiangtho nisim ih nuntakna lam ih laksak tu thupi mama tu hi. Lai Thiangtho in lam lak sak ngawl in eima pilna ih suang tha le mipil thumte kumpi Herod taw a kimuna hang in haksatna thu tam mama a pian bang hong piantu lauhuai hi. Jesus sua thinnuam tak in a muak kimtu le kum thak hun sung ngaisutna thak upna man taw hun zangh tek tawng. Merry Christmas & Happy New Year by; Rev.Esther Cingh Niang, Siyin Baptsit Church THUKLAI SECTION NEWS A (13) veina Thuklai Section Bible Conference, 21-24 November 2012 hun sung teng ... Na thu in lam hong laktu meivak... Ps.119:105 bulphu in Rev.Timothy Suak Khua Hau (Christian Life), Rev. Thang Khan Pau (Church Planting), Rev. Thawng Za Khai(The Lasting) & Rev.Tual Khan Nang (Worship & Purify life) ci bang teng thusinna Mualpi AG Pawlpi ah nei thei uh a, mi (40) kiim pai thei ci thu kiza hi. Thangana le kipuaphatna tam mama SECTION sungah om ci thu kiza hi. THUKLAI SECTION ANNUAL MEETING A (13) veina Thuklai Section Annual Meeting sia 2013 February nipi thumna hun sung Theizaang El-Bethel ah vawttu ci thu kiza hi. Tua hun sung Rev.Dr.Dam Suan Mung Speaker tu ahikom thungetna ah phawk tek tawng.
Hawm 3

SIZAANG LAI IH NEI NATHU LA (a) Zaangsii thiam thil mim bang piang sak F.M Captain Rundall hi ze (b) Lumta phual ngo Rundall mang pa,n, Zaangsi thiamthil ciantel sak ze (a) Zaangsi thiamthil, nau bang ih saan kum za le kul cing ta ze. (b) Thianmang tongdam, saan theina ze, Lam bang paak thei na hi ze. (a) Thiam thil neal zun, nau bang saan ciang, ngual lai a, ki toai hing nge. (b) Va bang pilna, Van si nuai a, ngual taw tan bang, kim thei hing nge Haleluijah, Praise the Lord ka ci hi ze. Upa E. Cin Khua Lian (Pumva) DC 7 ANNUAL MEETING A (3) veina DC7 kikhoppi 15-18 March 2013 hun sung teng Tedim, Tonzang le Thuklai Section DC 7 teng Thuklai ah Annual Meeting neitu ci thu kiza ahikom thungetna ah phawk tek tawng.
-2 NIKONGHONG - Lom 3

CIDAMNA Be-panauh Be-panauh sia, pumpi cidam na apiangsak mama khat hi. Kuama in hengawl thong hial hi. Be-panauh sungah, Kawdat (Carbonhydrate) Sadat, Sathau dat, Vitamin le dat nanamte om hi. Sadat sia, 40% kihel zen a, Omega-3 zong om hi. Pumpi sung a, dat phangawlte bosak hi. A sungah (Phyto-estrogen) om ahikom, niin tawpsa te atu zong pha hi. Innkuan sung ih kilem nuam le Be-panauh lei hamtang tek tawng. Noai Cancer, Naubu Cancer, Cilbul Cancer te zong khaam thei hi. Niin tawp natna kiamsak a, Lungtang chivui zim natna, Pumzaw natna le Ngunip natnate zong daal theihi. Be-panauh sia, a nanam in kivawt a Vitamin tam mama khat hi. Tua ahikom Be-panauh sia midangte ii a phatna a sason ciang bek hingawl Nangma mama in lei in neak sin le te a phatna na hetu hi. MIHING TE IN HONG SIM MAWKCIANG Thingkung khat papo a ngate bek ki deang nuam se hi. Ih mai a pai ciang bek hong kison sia hi. Ih khua sungah mi bang ngawlte ki sonsia ngawl hi. Ui in a kitakte bek nak hi. Ih sonsiatna mun zawhiatte sia na khat papo ii batngawlte hi. Bawlung sui a ente in a kimaite thiam a sak omngawl hi. Na a seam mite a khut buan uh hi. Mihingte ii hong sim maw hang in cina ci in kuama om ngei ngawl hi. Mihingte ii hong sim maw hang in ih sum le paai bo tuan ngawl hi. Mihingte ii hong sim maw hang in supna baaina om ngawl hi. Mihingte ii hong sim maw na thuak la le nang hong sim mawte taw a ki bang suak zaw ni hi. Lungsim limlangh page (62-63) A (12) VEINA SACC-EC MEETING 30 October 2012 ni A (12) veina SACC-EC Meeting, Leipui Siyin Baptist Church ah kivawt thei a, liimci tatak in leangna hong do ahikom lungdamna lianpi kinei hi. THUK KIM VILLA Pu Thuk Kim (Thatmun) kum (64) a phak ciang leitung hong nusia hi. SDA Church Thingunau ah Taik inn pha mama khat Pawlpi ii zak theitu in sa a, ning kum ama ii nusiat kum khat cin phawkna kawm in 18 November 2012 ni in honna nei ci thu kiza hi.
Hawm 3

KAMMAL PHA MAMA PAWL KHAT ~Na tu ngawlna mun ah, a nga law sawm keak in ~Eima lungdam natu, a vawt sia eima ki hi hi ~Lungdam kipatoaina in, thinsung thiangtho pan hong kipan hi ~Ngasa in ngasa dang tam mama thipui a, mihing in midang tam mama thipui hi ~Ih tup ih ngimna ii thet dek ciang, haksatna a thupi kiphul tha vangiat hi ~Pathian a neingawl minam in, kongkha kung ah siatna le buaina in ngak nginge hi ~Upate zaktak in a, khangnote lamlak in, mipite thu dong in ~Lampui ih sep hun laitak, bangma kihe ngawl a, ih sep nawnngawl hun ciang septu heak san ~Leitung mihingte in ih kithol cil in nuam tu bang ahi hang ol tengtong ngawl ~Nganhingte nuntak zia sia, huang khat pan ih khiak ciang kilem ngawl hi ka le a ettee huai mama suak GP FUND (General Provident Fund) Kumpi sungah naseamte pan kipan Company tuatuam ah naseamte ii kalsuan zia taw kizui in biakna lampui masate in bangbang po ahizong ih Pawlpi sungah Sya/mate atu dei sakna taw na a sepnate kimu thei hi. Lai Thiangtho sungah mun tam mama ah hi Sumpi taw kisai tam mama kimu thei hi. Sawm ah khat (Tithe) taw kisai zong ih heaksa vive hi. Tua hi a, Simleitung le a sung a om theampo sia TOPA neisa ahi hi; leitung le a tung a teang theamposia ama aa ahi hi. Late 24:1 Tua hi a, pawl khatte in Pawlpi sungah Sya/ mate atu hazatna nei ahikom Kumpi naseamte le biakna naseamte kisai bo ci thathong thei hi. Hi ngawl het a, Pathian neisa hi napi ki haza thathong thei hi. GP Fund {General Provident Fund (tkdempm &HyaiG) sia hun sim in biakna lampuite in hong son Hk tawntung hikale anuai a bang in kipia hi ci thu kong phawk sak kik nuam hi. Basic pay (Tha sum) x 10% (1/10) Kum khat atu: Tha sum x 10% x12 Sontee ngatna Pawlpi in tha sum Ks.30,000/Piak dantu: 30000 x 10% = 3000/30000 x 10/100 = 3000/Kum khat atu 30000 x 10% x 12 = 36000/Budget pan zong piatu, Sya/ma te zong in ih piakza ma a koi tu hi. Ih heak tek sa le ih sak sa vive hikale khat le khat ki SATSUA kik tawng. A zangh thiam thei paitu in Topa in Pawlpi lampuite thupha hong pia tahen. Amen
-3 NIKONGHONG - Lom 3

Capt. K.A. Khup Za Thang ii Zo Suanh Khang simna laibu vawt Patoaina Khamtung Zomite sungah hi bangin laibu kuama in vawt ngawl ahikom a kuama theampo in ki lungdam tek mama hi. Rev.Esther Cingh Niang SACC Assistant Secretary II in hun hong uk sak a, Biaksapna Ps.117 hong sim zawkciang Rev.Dongh Cin SACC President II in hun aap thungetna hong nei hi. Thu tomno sonna Rev.P.Suangh Cin Pau SACC President in nei hi. Rev.Hang Khan Nang SACC Vice President III in thungetpi hong ngetsak hi. Patoai piakna hun sungah (a) SACC min taw Lapi sia Upa Khup Za Lian SACC President I in hong piaksak zawkciang SACC min taw Ks.100000/- sia Rev.D.Cin Za Dal SRBA-GS piakna kinei sak hi. (b) SRBA pan Laipi, (c) LSCC, Leipui Laipi le Ks.50,000/- (d) Siyin Baptist Church Laipi le Ks.70,000/- (e) Samte be bupi luang in Pu Hang Za Nang Iwa, Tedim Laipi, (f) Pu Pau Suan Foundation Ks.100000/ - (g) Buanman Ks.10,000/- (h) Voklaak, Laipi (i) Pu Ngin Khua Hau (j) Rev.P.Suang Cin Pau Van leangbeal khap12khat (k) Rev.Esther Cingh Niang te u nau (l) CSM Vum Pum & Family Voklaak ci bang in patoaina kipia thei hi. Ngeina La hong phuaksak Pu Vungh Ko Khai tung lungdam kona Pa Mang Za Khai, SACC Treasurer in private hong piaksak hi. Pa Awn Khan Khai in lungdam ko thusonna hong nei zawk ciang Rev.James Nang Khai Ex.Secretary lungdam ko thusonna hong nei hi. Hun man natu Upa Khup Za Lian SACC President I in thu hong nget zawkciang La Nun nuam Zaangsi vangkhua kisa in Rev.D.Cin Za Dal SRBA-GS ii Benediction hong piak zawkciang Amen thuap thum taw hun theampo kiman hi ci thu kiza hi. SACC Laihawm NIKONGHONG Panmun neite
Rev. James Nang Khai Rev.P.Suangh Cin Pau Rev. Esther Cingh Niang Pr. Hang Do Pau

Capt.K.A.Khup Za Thang, Khamtung Zo ngeina La a kiphuakte (a) Miza pian ngui khau bang sut thiam, muantui bang ciim, Zaangsii zua pa aw ci ung nge. (b) Zaangsi zua pa tuu bang ciin na, Zaangsi kuam ngual in pak bangh toai a, na min thei bang lo ung ngee. by; Pu Vungh Ko Khai, KSBC (a) Mim bang pianna Zotui tateng, khau bang suut nan, thiamthil naathel leang bang ze. (b) Khau bang suut thiam, Zaangsi zuapa Captain Khup Za Thang hi zee. (a) Zaangsi zuapa tuu bang ciin nan, Zaangsi taan laam bang paak ze. (b) Zotui ta teng khangngui suut nan, Zaangsi lia nu maa bang zom e, khan kum suang sawn lai hen aw. by; Rev.Dongh Cin, Lophei (a) Bo Khup khang sut thiamthil neal, hanlung ciamna laizom ciantel ngawlte ciantel sak ze. (b) SACC zing vai hawm tui bang tung ak Bo Khup min thei bang lawna etlawm sang nge. by; Pu Hang Za Nang (Iwa) Tedim MINAM PUAN & LUKHU TAW KISAI (a) Minam puan taw kisai: Pasalte atu ih zak sia kuamapo in kidei tek mama a, tu laitak ih zak sia BAN bul dawn ah mek sia thualai tu thukimna kinei hi. (b) Minam lukhu taw kisai: khat vawttu OB pan thu hong puaktona bang thukimna kinei a, Sample hong vawttu in Pa Mang Za Khai, LSBC le Pu Vungh Ko Khai, KSBC vaipuak kipia a, Annual Meeting ah Sample hong lak a, tua zawkciang kipsakna neitu thukimna kinei hi. HESUAK NGETNA Minam atu dei sakna taw heaktu kilawm thu le la pan kipan Pathian thu taw kisai Article hong puak tek tavun.
SACC SEP TU A KINGEAL PAWLKHAT - Sizaang lai ih neizawk kum 120 cinpoai Khansuang mun (2) phuna DVD vawttu - Nikonghong a hunzui in suak saktu - SACC Annual Magazine suak saktu - A hun zui in Sizaang Lai kikupna vawttu - Sizaang taangh Lakamte kaikhawmtu - Sizaang Paunakte kaikhawmtu - A hun zui in Sizaang La sak Poai vawttu - Sizaang tangthu laibu vawttu - Sizaang khang tangthu a kicing in vawttu - Sizaang minam puan a hunzui vawttu - SACC Inn mun khat leitu - Sizaang minambup kipawlna ahikom, ngam sung, ngampua kipawl khawmtu
-4 NIKONGHONG - Lom 3

Treasurer
Pa Mang Za Khai Accountant Rev.Kam Khen Pau
NIKONGHONG sungah lai at nuamte le suasak nop a neite in nuai a bangin hong kizom tavun.

Email: <nangkhai@gmail.com>
Hawm 3