SIMEIKHU KARTIN CHHUAK THINGSULTHLIAH

Dt. 26 May 2012 (INRINNI) PHEK- 2

KAN SUB-TOWN MAMAWH - Ramngaizuala, Correspondent Kan Sub-town hian hma sawn zel turin mamawh tam tak kan nei a, a vai chuan sawi zawh sen a ni lovang, a langsar zual tlem chauh han tarlang ila. - P&E Mamawh Motor: Thingsulthliah-ah SubStation dah a ni a, heta tang hian Chhim lamah Phulmawi thleng Eng pek a ni a, Hmar lamah Darlawn tlangdung, Hmar tawp thlengin, Line enkawl niin, Chhingchhip Transfomer bul thlengin hnathawktuten an enkawl bawk. Hetiang khawpa pawimawh a nih laiin tunhnai maiah pawh harsatna kan tawk a. Kan Eng lakluhna kawng ber a han chhia a, Line siam tura kalna Motor kan nei lova, motor hmanna tur sum a awm lo tih avangin tunhnai lawkah kan buai hrep a, Power awm loh vanga mipuiin harsatna kan tawh nasat dan han ngaihtuah hian a lungchhiatthlak hle a ni. Hetiang khawpa Bial zau leh hmun pawimawhah Hnathawktuten Emergency a hman tur tak ngial pawh Lirthei an kawl miah lo hi a mak hle mai. Thil therhlo leh mahni tanghma hai nan chuan thil kan tih theih hlawm vei nen, Khawtlang mipui harsatna phuhruk tur hian kan theihna te pen chhuahpui ve tawh ila, A dik tak chuan hnathawktuten Lirthei mamawh thu an sawiin, E.E. in Saitual motor te dil turin min ti mai mai a. Home Minister Bial mai bakah, MLA pahnih pathum Bial a lo thlawn a Power neih loh leh ringngawt mai thin hi au chhuahpui a hun viau awm e. Fur kan tuar dawn chauh a, hetiang ringawt hi chuan hmalam hun chu huphurhawm tak a ni. - CHC mamawh Doctor: Hei hi chu Khawtlang hruaitute pawhin nasa takin an nawr tawh a, tih ngaihna a awm vak lo ni tur a ni. Amaherawhchu, kan neih chhunte hi tun aia regular hian awm thei se. Baktawng atanga Mualmam thleng (Bial zau tak bawk a ni). Bial a zauh ang bawkin Emergency pawh a thleng tam ve khawp mai. Mamawh hunah Doctor a awm lo tih te, khawsik hlawk hlawk chunga nghah an nih mek laia Dar 11:00 hnu lama rawn theih chauh thin te hi a va hrehawm zo zai em. Thawktu dang, Nurse senior leh Compounder (Kawmpawndar) te hi thiam ve hle mahse, Doctor ngeiin min han en hi chuan, damdawi ei hma pawh hian kan na a chhawk hrim hrim tih te hi hria sela a tha awm mange, min uap lum deuh teh se. - Tlangnuam-ah Rickshaw Stand: Hmun laili leh mipui tam tak mamawh State Bank awmna hmunah Rickshaw Stand awm miah lo hi a inhmeh lo khawp mai. Thingsulthliah leh Seling atang chuan a kal mai theih, innghahtirin sum chawi a tam, innghahtir loh chuan haw lehna mai tur a vang tlat a, sum neilo deuh tan phei chuan Office dawr tura kal pawh a chakawm loh phah tlat a ni. A khawdung a sei a, a remlo deuh mai thei, mahse khawdangah pawh Stand hlat tak taka awm an awm ve tho a nia. V/C leh Lirthei neitu fel tak tak te tangkawpin rem han ruat se, Stand chu an siam thei em em ang. Stand nei lova khawtlang awm hi a mualpho thlak a, Khawdang hmuhah phei chuan mawi lo tak a ni.
Heng kan mamawh tlem han sawi atang mai pawh hian mi hawi zau deuh chuan sawi belh tur in hre teuhin ka ring. Thahnemngaihna a ni tih hria ila, heng point thum lek pawh hi han ti phuisui ila chu hmasawnna langsar tak a ni thei ngei ang.

TU MAWH NGE??? LR Ralte, H/A Lunglei Road Kei val lungmawl ve mai hi ka nun danah entawn tur engmah a awm lo tih ka hria, mahse, kan inenfiahna tur ni a ka hriat han sawi ve ka duh a. Thupui pahnih lek kan chhawp chhuak ang a. 1. TAWNGKAMAH: Kan Mizo thufing chuan, Tawngkam thain Sial a man a lo ti a, a thu awmzia erawh hrilhfiah ngaiin ka hre lo, kan hrethiam mai awm e. Kan tawngkam avangin mi duhsakna kan dawn tur ang pawh kan dawn loh phah fo thinin a rinawm. Entirnan, Nu pakhat chuan a fapa chu an thenawm te hnenah thil dil turin a tir a, a fapa chuan, Ka pi/ka pu emaw ka nu/ka pa Zual emaw ti lovin IH MAW, IH emaw ENGLO a va ti ta a, a thil dil chu engpawh nise, lungsi tak chuan an inpek a rinawm loh Nu fing/pa fing tan chuan inmawl biak chu a lungawi thlak loh viau ngei ang. Kan Mizo hla thu pakhatah chuan, Aia Upa i biak dawnin, Koh dan awmin kamtha hmang rawh, Ka pi, ka pu, ka u tiin, Ka nu, ka pa, ka ni emaw tih kan hmu si a. 2. CHHIATNI THATNI : Chhiatni thatni a inlawm tawn leh intawrhpui hi kan tihphung leh chin than ni satliah mai lovin kan culture a bet tlat a ni. Khawvel hmasawn zelah kan ram leh khawtlang leh kan nun dan, kan incheina thlengin a thangin a danglam a, chumi a nih rual rual chuan kan hnam zia a kan chhuan leh kan uanpui ber Tlawmngaihna erawh vawng nung zel lovin kan thlah thlam hret hret niin a lang. Lawmte inlawmpui lamah chuan kan duai lo, mahse, thihna avanga kan intawiawm danah erawh hmasawn lam aiin hnungtawlh kan ang ta e. Mitthi lumen/Thingpui lum/khawhar in kal, hetiangah te hian thalai aia kum upa lam hmuh tur an tam zawk ni a lang hi kan inenfiah a ngaiin ka hria. Awle, ka that bik vang leh ka fel bik vanga rawn ziak ka ni lova. Kei leh ka thalai puite leh kan nu leh pate ngei pawhin kan inenfiahna tur atan a tha ni a ka hriat ka rawn ziak ve a ni e. Kan hriatsa niin lang mahse, kan hriatsa ngei pawh ti lovin kan awm fo thin si a. Heng inzirtirna kawngah hian kan nu leh pate em ni thiam lo le? Tu mawh nge ni ta ang? TUI SEMTU TUR LA THAR Thingsulthliah VC & Tui Committee chuan Tui semtu tur mi pali an la thar a, chungte chu hengte hi an ni: 1. R. Lalthanfela H/o TC Lalhlimpuii D/A 2. Zaithanmawia S/o KT Roliana D/A 3. R. Laltlanzova H/o Lalremruati H/A 4. Zohmangaiha S/o F. Lalnghinglova H/A Heng tui semtu tur lak tharte hi ni 29.5.2012 zanah VC Office-ah ko khawmin hnathawh dan tur chungchang te an inhrilhfiah ang. Lak tharte hi June ni 1, 2012 atanga thawk tan tur an ni dawn a, an term hun chhung chu June December 2012 a ni phawt ang.
S.A. DIVISION COUNCIL-AH KAL Salvation Army Division huapa Rorelna sang ber, Central South Division Council(Rorelna) chu nimin khan Kulikawn, Aizawl-ah neih a ni a. Hetah hian Thingsulthliah Bikaltu CO Capt. Lalsangzuala bakah Tst Corps atangin Pu Ramngaizuala, CS leh Pu K.Lalruala, RS te an kal a; Tlangnuam Corps atangin Pu Ramfangzauva, CSM a kal a, Seling Corps atangin
Pu R.Pachhunga, CSM te an kal. Corps member puitling 150 aiawhin Rorel palai hi pakhat zel intirh thin a ni.