SIMEIKHU KARTIN CHHUAK THINGSULTHLIAH

Dt. 20 July 2013 (INRINNI) PHEK- 2

editorial :

KAN SUB -TOWN LEH SUAL DO

- Lalromawia, Joint Editor Tunlai hian kan Sub-town-ah Khawtlang tihthianghlimna atana Sual dona langsar tak ni turin, a bik takin Zu lamah hma lak a ni a. Zu pawh a tawm phahin ualau taka hmuh tur a tlem phah hle. Zu hi eng vanga hua a khap a nih chhan chu buaina thlentu a kan puh vang a ni ngei ang. Zu vanga buaina, harsatna siamtu chu dim hauh lova, Dan in a sawi anga hrem ngei ngei hi tih ngei nise a tha hle reng a ni. Chutih rualin, heng sualna langsar kan do rual hian, kan thahnem ngaih luat tukna lamah Dan kan pal peh em tih inenfiah reng ila. Mahni awmna ram Dan zawm thiam hi khua leh tui ten kan tih tur a ni tih hre reng ila. Chutianga rilru fim tak pu a kan kal chuan tunlaia an sawi fo, Mob Rule te hi a thleng lovin a rinawm. Dan bawhchhia te vanga Dan bawh pelh ve kher hi a tha ber lem lo a ni. PASS THAR PC. Lallianmawia S/o PC Lengzuala, Tlangnuam Vety Veng chuan Diploma in Computer Science & Engineering, II Division-ah Lunglei Polytechnic atangin a pass. TC Lalrinchhani D/o D/o TC Khualluna, Tlangnuam chuan Lab. Technician Distinction-ah a pass thar bawk. B.A. PASS LEH TIH DIKNA PC Lallawmzuali D/o PC Lalbiakchama D/A chuan B.A.(Eng) PUC atangin a pass tih kan lo hre thar a; hetih laiin kar hmasa issue a Gaduate thar kan rawn tarlan te zing ami, Lalremruati D/o R.Roliana Seling B.A.(Eng) tih chu C. Lalremruati D/o C. Roliana tih tur a ni a, K.Laldinpuii D/o K.Lalchhanhima, B.A.(Eng) tih chu K.Laldinmawii tih zawk tur a ni bawk e. B.Sc(Agri) TRAINING DAWN Tv C. Lalhmingmawia S/o Lalmuani, H/A Venghnuai chu tun hnaia STEE & NET in State quota a course hrang hrang zir tur thlanna exam a buatsaihah tlingin B.Sc(Agri) a Training dawn a, ni 29.7.2013-ah an Training neihna hmun tur Lovely Proffesional University, Jalandhar(Punjab)-ah a kal ang. ELECTORAL ROLL HEARING NEI Tunkar Thawhlehni khan kan sub-town khaw hrang hrangah E/Roll a dilna hrang hrang lut te enfiahna Electoral Roll Hearing neih a ni a, Hearing hi AERO Pu Zothanmawia Khiangte, BDO hova neih a ni. Kan Sub-town chhunga dilna luh dan leh pawm tura recommend zat chu hetiang hi a ni: Khaw hming Tuikhurhlu Seling - I Seling-II Tlangnuam Thingsulthliah-I Thingsulthliah-II Thingsulthliah-III Total : Thun thar zat 6 13 17 25 18 22 3 104 Hming paih zat 6 4 9 5 7 7 12 50

POLLUTION NGAI PAWIMAWH ILA Pollution tih hi kan hre lar hle tawh mai a. Mizoramah pawh Pollution Control Board pawh a ding tih kan hria ang. Kan Sub-town-ah hian helam sawi hi a tam lovin, kan chanchinbu-ah pawh kan tarlang tam lo hle. Tunlai khawvelin a buaipui he Pollution hi kan Sub-town pawhin kan vei a, kan ngaih pawimawh a tul ta hle. Pollution chu, Bawlhhlawh ti tawp mai ila, a chiang mai awm e. Mithiam te chuan Pollution hi chi hrang hrangin an then a. Kan Sub-town a kan tih theih nghal mai tur leh kan ban phak zual tarlang dawn ila a tha awm e. Dust Pollution: Mihring tena kan duh tawh loh, bawlhhlawh langsar chu kan hria. Sanitation Committee te kan din a, Khawlai-ah bawlhhlawh bawm kan hung bawk a. Kan tan lak zarah kan tuallai vel pawh a faiin hmuh a nuam tawh hle a, a lawmawm. Chutih rualin, heng bawlhhlawh langsar phiahfai ngawt hi a tawk lo. Vantlang kawnga tuichhia paih reng te, a dah lohna tura lirthei leh thing leh mau, bungrua chi hrang hrang dah te sim a ngai a, thuneitute pawhin khap ngam a tha hle. Water Pollution: Tui tih bawlhhlawh hi thil pawi tak a ni. Mihringin kan ei leh in a kan hman, kan tui lak leh tuikhur chauh hi kan huap tir tur a ni lova. Kan Lui tui tih thianghlim dan tur kan ngaihtuah tel a tul hle. Luisa ei duh deuh vek kan ni a. Tur hmanga lui sa man te, kan bawlhhlawh lui a kal ngei tura paih te hi sim a ngai. Mi tam tak hi ram lama eizawng kan ni a. Tunah chuan kan dai vel kawrte a tui luang, tunhma a ram kal chhawl hal tan pawh Zotui thiang vawt thap kak kan tih thin pawh kan bawlhhlawh paih leh tute emaw Septic Tank tih that loh vangin tui in a phurawm ta lo. Hengte hi mipuiten kan sim a, a tilui te pawh thuneitu ten hrem ngam a, a nachang hriat a hun hle. Noise Pollution: Helam phei hi chu kan la harh lo hle in a hriat. Bengchheng hi bawlhhlawh chi khat a ni. Tul lo taka lirthei tihrik vak vak te, tawng rinna hmanga thu puan ngai puan fo te, Sakhuana emaw Khawvel thil emaw a kan kalkhawm a nih pawhin, a kal khawmte hriat kim theih tawka tawngrinna thunun te hi a tha hle. Air Pollution : Mi ram changkang angin Factory leh Industry lian tham, boruak tibawlhhlawh thei kan la nei lo a ni mai thei. Nimahsela, heti lam pawh hi tun atanga kan inzirtir tan a ngai. Kan khawlai, Black-top leh lung phah na hang kan hria hian lirthei tan chauh ni lo, boruak ti thianghlim lotu, vaivut khu tur tam tak a tibo, tin, tul lo taka mei chhem khuk fo te, lirthei a ring thei ang ber leh a khu nasa thei ang bera kan tiri ring vak vak te hi sim a ngai hle. Tum khatah chuan sawi vek sen a harsa, kan tarlan chinah ngawt pawh hian kan sub-town-ah Pollution Control Board te hi kan din chiah lo a nih pawhin, mimal, V/C, NGO, Kohhran ang pawhin tan lak thar a ngai tih hria ila a tha hle mai. C/A HALL SA KAL ZEL Tst Camp Area Branch YMA Hall chu tunlai hian an sa ngawrh hle a, a bang remin an plaster a, kawngkhar pawh an vuah kim tawh. Branch YMA member te an tang hle a, Hun rei loteah an sak zawh thuai a beisei awm thu kan lo dawng.