(Isinalin

lumpati
ng Komisyon
sa Inagurasyon
sa Wikang
ni Pangulong
Filipino) Rodrigo R. Duterte

Talumpati sa Panunumpa
ng Pangulong Rodrigo Roa Duterte
Palasyo ng Malacañang ǀ 30 Hunyo 2016

Pangulong Fidel Ramos, sir, salamat po sa tulong ninyo upang maging Pangulo
ako; Pangulong Joseph Ejercito Estrada, ng Senado Franklin Drillon at mga
miyembro ng Senado; Ispiker Feliciano Belmonte at mga miyembro ng
Kapulungan ng mga Kinatawan; Punòng Mahistrado Maria Lourdes Sereno at mga
Kawaksing Hukom ng Korte Suprema; Kagalang-galang Guiseppe Pinto at mga
miyembro ng Diplomatic Corps; mga bagong hirang na miyembro ng Gabinete;
mga kapuwa manggagawa sa pamahalaan; mga kababayan.

Walang pinunò, gaano man siya kalakas, ang magtatagumpay sa anumang bagay
na mahalaga o makabuluhan sa bansa kung wala siyang suporta at kooperasyon ng
mga mamamayan na tungkulin niyang pamunuan at sinumpaang paglilingkuran.
Sa mamamayan kumukuha ng lakas ang mga pamahalaang demokratiko at isa na
rito ang administrasyong ito. Kayâ kailangan nating pakinggan ang mga hinaing ng
mamamayan, damhin ang kanilang mga pulso, ipagkaloob ang kanilang
pangangailangan, at patibayin ang kanilang paniniwala at pagtitiwala sa atin na
iniluklok nilá sa ating mga katungkulan.

Marami sa atin ang nagsabi na ang mga suliraning sumisira sa ating bansa ngayon
na kailangang matugunan kaagad ay korupsiyon, kapuwa sa matataas at
mabababàng antas sa pamahalaan; kriminalidad sa lansangan, at ang laganap na
bentahan ng ipinagbabawal na gamot sa lahat ng panig ng lipunang Filipino, at ang
kawalan ng paggálang sa batas at kaayusan. Totoo, bagaman hindi ganap na totoo.
Sapagkat para sa akin ang mga suliraning ito ay mga palatandaan lámang ng isang
malubhang sakít ng lipunan na sumisira at dumudurog sa katatagang moral ng
lipunang Filipino. Sa palagay ko, may suliranin na mas malalim at mas mabigat pa
kaysa alinman sa mga nabanggit o kahit pagsama-samahin pa ang lahat ng iyon.
Ngunit mangyari pa, hindi na kailangan pang sabihin na isasantabi natin ang mga
iyon sapagkat kailangang masugpo ang mga iyon sa anumang paraang
ipinahihintulot ng batas.

Ang pagguho ng paniniwala at tiwala sa pamahalaan—iyan ang tunay na suliranin

na dapat nating harapin. Nagbubunga ito ng pagguho ng tiwala ng mamamayan sa
liderato ng bansa; ng pagguho ng tiwala sa sistemang hudisyal; ng pagguho ng
kompiyansa sa kakayahan ng mga lingkod-bayan upang mas maging maayos ang
búhay ng sambayanan, maging mas ligtas silá, at mas malusog.

Totoó, ang problema natin ay problema ding nagpapahinà sa espiritu ng tao.

Subalit hindi pa hulí ang lahat. Alam ko na may hindi sumasang-ayon sa aking
mga paraan sa pagsugpo ng kriminalidad, sa pagbebenta at paggamit ng
ipinagbabawal na gamot, at sa korupsiyon. Sabi nilá ang ganitong pamamaraan ay
lihis sa karaniwan at nása bingit ng pagiging ilegal. Nais kong sabihin ito bilang
tugon: Nakita ko kung paano sairin ng korupsiyon ang pondo ng bayan, na inilaan
upang iahon ang mahihirap mula sa lusak na kanilang kinasadlakan.

Nakita ko kung paano wasakin ng mga ipinagbabawal na gamot ang mga

indibidwal at durugin ang mga relasyong pampamilya.

Nakita ko kung paanong ang kriminalidad, sa lahat ng paraang magdaraya, ay

hinahablot sa mga inosente at di-mapaghinala ang maraming taon ng pagtitipid
para makaipon. Mga taon ng pagsisikap upang, bigla, bumalik silá kung saan nag-
umpisa.

Tingnan natin ito mula sa ganitong pananaw at sabihin ninyo sa akin kung ako ay
mali.
Sa labang ito, hinahámon ko ang Kongreso at ang Komisyon sa Karapatang Pantao
at ang ibá pa na mayroong kahalintulad na gawain upang pahintulutan kami sa
isang uri ng pamamahala na umaalinsunod sa itinatadhana ng batas. Magiging
malupit ang labang ito at kailangang tuloy-tuloy.

Bilang abogado at dating tagausig, batid ko ang hanggahan ng kapangyarihan at

awtoridad ng pangulo. Alam ko kung ano ang legal at kung ano ang hindi.

Ang katápatan ko sa wastong proseso at pananaig ng batas ay hindi matitinag.

Gawin ninyo ang inyong trabaho at gagawin ko ang trabaho ko. “Malasakit. Tunay
na Pagbabago. Tinud-anay nga Kausaban”– ang mga salitâng ito ang naghatid sa
akin sa pagkapangulo. Ang mga islogang ito ang nása aking isip hindi lámang para
sa tanging layuning makuha ang boto ng mga botante. “Tinud-anay nga kabag-
uhan. Mao kana ang tumong sa atong panggobyerno (Tunay na pagbabago. Dito
patungo ang ating gobyerno).”

Higit pa kaysa pagkuha ng boto. Ito ang mga sigaw ko sa pakikipaglaban sa ngalan
ng mga táong uhaw na uhaw sa tunay at makabuluhang pagbabago. Subalit ang
pagbabago, kung nais na maging permanente at makabuluhan, ay dapat na
magsimula sa atin at sa ating mga sarili.

Sa salita ni F. Sionil Jose, naging pinakamalupit na kaaway natin ang ating sarili.
Dahil dito, dapat na may tapang táyo at pagkukusang baguhin ang ating mga sarili.

Ang pag-ibig sa bayan, pagpigil sa mga personal na interes alang-alang sa

kabutihan ng lahat, malasakit sa mahihinà at maralita—kasáma ang mga ito sa mga
hálagáhang naglaho na at nagmaliw, at nais nating maibalik at mapalakas muli sa
pagsisimula ng ating paglalakbay túngo sa mas mabuting Filipinas. Magiging
mahirap ang paglalakbay na ito. Subalit halina’t samáhan pa rin ninyo ako.
Magkakasáma, magkakabalikat, nating isagawa ang unang mabubuway na
hakbang sa hangaring ito.

May dalawang kasabihan mula sa mga pinagpipitaganang tao na magsisilbing

pundasyon ng administrasyong ito.
“Ang pagsúkat sa gobyerno ay hindi kung nakapag-ambag táyo sa kasaganaan ng
mga mayaman; ang sukatan ay kung natulungan natin ang mga naghihikahos.” –
Franklin Delano Roosevelt.

Mula naman kay (Abraham) Lincoln, nais kong hugutin ang pahayag na ito: “
Hindi mo mapalalakas ang mahinà sa pamamagitan ng pagpapahinà sa malalakas;
Hindi mo matutulungan ang mahirap sa pamamagitan ng pagsira sa kalooban ng
mayayaman; Hindi mo matutulungan ang sumasahod sa pamamagitan ng paghila
pababâ sa nagpapasahod; Hindi mo maitataguyod ang kapatiran sa pamamagitan
ng pagpukaw ng pagkamuhi sa mga uri sa lipunan .”

Ang aking mga patakarang ekonomiko, pinansiyal, at politikal ay nakapaloob sa

mga pahayag na iyon, kahit pa isinalin sa malawakang paraan. Matuto kayong
magbasá. Hindi ko na kailangang magtungo sa mga detalye. Ibibigay ang mga ito
sa inyo sa takdang panahon.

Kayâ, inaatas ko sa lahat ng mga kalihim ng kagawaran at punò ng ahensiya na

bawasan ang mga rekisito at panahon sa pagproseso ng mga aplikasyon, mula sa
pagsusumite hanggang pagpapalabas. Inaatas ko sa lahat ng mga kalihim ng
kagawaran at punò ng ahensiya na alisin ang mga nag-uulit na rekisito at ang
pagtalima sa isang kagawaran o ahensiya ay sapat na para sa lahat.

Inuutos ko sa lahat ng mga kalihim ng kagawaran at punò ng ahensiya na umiwas

sa pagbago at pagbaluktot ng tuntunin sa mga kontrata, transaksiyon, at proyekto
ng pamahalaang pinagtibay na at naghihintay ng pagpapatupad. Ang pagbabago ng
mga tuntunin hábang nangyayari ang laro ay malî.
Kinamumuhian ko ang paglilihim at sa halip ay isinusúlong ang transparensi sa
lahat ng mga kontrata, proyekto, at transaksiyon sa negosyo mulang pagsusumite
ng mga panukala hanggang negosasyon tungo sa perpeksiyon, at sa wakas, sa
pagpapatupad.
Gawin ninyo ito at magtatrabaho táyo nang magkasáma. Huwag ninyong gawin, at
maghihiwalay táyo nang mas maaga sa inaasahan.
Hinggil sa gawaing internasyonal at sa komunidad ng mga nasyon, hayaan ninyong
ulitin ko na igagálang ng Republika ng Filipinas ang mga kasunduan at
internasyonal na obligasyon.
Sa gawaing domestiko, nangangako ang aking administrasyon na ipatutupad ang
lahat ng pinirmahang kasunduang pangkapayapaang umaalinsunod sa mga
repormang konstitusyonal at legal. Nagagalak ako sa pahayag ng pakikiisa ng ating
mga kapatid na Muslim at mga pinunò nilá, at sa tugon ng lahat sa aking
panawagan para sa kapayapaan.

Umaasa ako sa pakikilahok ng ibá pang stakeholder, lalo na ang ating mga lumad,
upang matiyak ang pakikibahagi ng lahat sa prosesong pangkapayapaan.

Sa pagtatapos ng aking talumpati ay hayaan ninyong ipaalala ko sa inyo na inihalal

ako sa pagkapangulo upang pagsilbihan ang buong bansa. Hindi ako iniluklok
upang pagsilbihan ang interes ng kahit sinong tao, o anumang pangkat, o anumang
uri. Pagsisilbihan ko ang bawat isa at hindi ang isa lang.

Kung kayâ’t hinango ko bilang gabay sa sarili ang sumusunod na pangungusap na

isinulat ng táong hindi ko na maalala ang pangalan. Sinabi niya: “Wala akong
kaibigang pagsisilbihan, wala akong kaaway na sasaktan.”

Mula roon, hinihiling ko sa bawat isa, at ang tinutukoy ko ay ang lahat, na

samáhan ako sa pagsisimula ng krusada para sa mas mabuti at maliwanag na
kinabukasan.

Ngunit bago ako magtapos, hayaan ninyong ipahayag ko, sa ngalan ng mga
Filipino, ang pakikiramay sa Republika ng Turkey dahil sa nangyari sa kanilang
lugar. Ipinaaabot namin ang aming mataos na pakikiramay.

Bakit ako narito? Narito ako dahil mahal ko ang aking bansa at mahal ko ang mga
mamamayan ng Filipinas. Narito ako. Bakit? Dahil handa na akong simulan ang
paglilingkod sa bansa.

Maraming salamat at magandang umaga sa inyo.

Facebook

Ana Lee

Home
20+

Friend Requests

1Messages

1Notifications

Talumpati ni Benigno S. Aquino III Pangulo ng Pilipinas sa Pagpapalit

ng Pamunuan ng Hukbong Katihan ng Pilipinas
January 4, 2011 at 11:32am

January 4, 2011Talumpati ni
BENIGNO S. AQUINO III
Pangulo ng Republika ng Pilipinas

PAGPAPALIT NG PAMUNUAN NG HUKBONG KATIHAN NG PILIPINAS

[Pangkalahatang Tanggapan ng Hukbong Katihan ng Pilipinas, ika-4 ng
Enero 2011]

[Sumangguni sa pagkabigkas]

Isang malugod na pagbati sa magigiting na kalalakihan at kababaihan na

nagsisilbing lakas ng Hukbong Dagat ng Pilipinas. Isang karangalan na
makasama ang lahat ng bumubuo ng Philippine Navy, mula sa hanay ng
Philippine Fleet at ng Philippine Marine Corps. Sa ating pagdiriwang, sabay
tayong nagpapaalam at nagbibigay-pugay sa isang tapat na pinuno. Narito
rin tayo upang bigyan ng mainit na pagsalubong sa bagong pinuno ng ating
hukbong-dagat. Hudyat po ito ng isang bagong pag-asa sa inyong hanay,
isang panibagong pagbubukas para sa mas maunlad na pagbabago.

Subok na ang kasanayan sa pamumuno at galing sa pamamalakad ni Rear

Admiral Danilo Cortez bago pa niya tanggapin ang katungkulang kanyang
huling ginampanan. Sa loob lamang ng walong buwan, buong-
pagpupursiging inilapit ni Rear Admiral Cortez ang Navy sa katuparan ng
inyong tunguhin: ang maging isang hukbong matatag, may paninindigan, at
tinitingala ng lipunan. Tapat sa kanyang panata, itinuon ni Admiral Cortez
ang kanyang pamumuno sa pagsusulong ng mga angkop na programa sa
ilalim ng inyong roadmap—ang Navy Strategic Sail Plan 2020. Isa po dito
ang pagpapabuti sa Coast Watch South Initiative. Gamit ang estratehiyang
ito, mababantayan at mapoprotektahan po natin ang Sulu at Celebes Sea
na pumapalibot sa Malaysia at Indonesia. Sa inisyatibang ito, haharangin
natin ang masasamang elemento sa paglabas-masok sa ating teritoryo.

Sa pakikiisa rin ng inyong hanay sa Department of National Defense,

napaigting natin ang mga hakbangin tungo sa implementasyon ng Coast
Watch System na bahagi ng modernisasyon ng Armed Forces of the
Philippines. Kaugnay nito, mayroon na tayong labing-apat na Coast Watch
Stations na buo ang kapasidad na mangalap ng mahahalaga at
napapanahong datos upang mas mahusay na mabantayan ng Philippine
Navy ang ating teritoryong pandagat.

Kinikilala din po natin ang mahahalagang kontribusyon ng Navy sa

pagpapatatag sa ating lipunan sa pamamagitan ng inyong disaster
response at humanitarian relief efforts. Sa panahong nabalot ang ating
bansa sa kadilimang dulot ng kalamidad, kayo ang nagsilbing liwanag sa
maraming Pilipino. Kapuri-puri rin po ang naging tagumpay ng Navy Task
Group Amianan Recovery para makabalik sa normal na buhay ang mga
apektadong residente ng Isabela matapos humagupit ang bagyong Juan
nitong Oktubre. Maraming salamat sa inyong di-matatawarang dedikasyon
na bigyan ng proteksyon ang ating mga kababayan sa oras ng
pangangailangan.

Kasabay nito, nais ko ring bigyan ng karampatang pagkilala ang maigting

na pagpapatibay ni Rear Admiral Cortez sa ugnayan ng Navy sa iba pang
maritime authorities, lalo na sa iba pang bansang nangangalaga sa
kaligtasan ng Asya-Pasipiko. Dahil dito, napabuti ang pagkakaisa ng iba’t
ibang bansa upang labanan ang mga maritime threats sa karagatan. Dahil
sa mga pinangunahan niyang reporma, tulad ng pagdadaos ng mga
pagsasanay at talakayan, naisabuhay ninyo ang diwa ng demokrasya sa
inyong ahensya—ang pagkakaroon ng malinaw na hangarin at patakaran
ng nasa katungkulan at ang paglilingkod nang tapat sa sinumpaang
tungkulin.

Sa pagsasara ng tatlumpung taon ng mayamang panunungkulan ni Rear

Admiral Cortez sa hukbong dagat, kanya namang ipapamana ang ehemplo
ng mabuting pamamahala sa kahalili niya sa posisyon na si Rear Admiral
Alexander Pama. Isang beterano sa mga kampanyang tumutugis sa Abu
Sayyaf, napatibay niya ang pagdepensa ng pwersang pandagat sa
kanlurang bahagi ng Mindanao. Tapat at buong tapang rin siyang
nanilbihan mula 2008 hanggang 2010 bilang commander ng ating Naval
Forces sa Western Mindanao at kasabay nito, ng Joint Task Force Trillium,
na siya ring tumutugis sa Abu Sayyaf sa Basilan at Zamboanga. Dahil nga
dito, kinilala natin ang kanyang di-matatawarang serbisyo-publiko sa
pagpaparangal ng Distinguished Service Star Award noong ikapitumpu’t
limang anibersaryo ng AFP nitong Disyembre. Pinatunayan ni Rear Admiral
Palma ang kanyang kakayahang pangunahan ang ating hukbong-dagat, at
ikinalulugod kong matiwasay na maipapasa ang pinakamataas na
katungkulan ng inyong hanay sa isang mapagkakatiwalaan at maaasahang
pinuno.

Kasama ang sambayanang Pilipino, umaasa akong maipagpapatuloy mo

ang kahusayan at sipag na ipinamalas ng iyong sinundang pinuno.
Makakaasa ka sa suporta ng aking administrasyon, nasa harap niyo ako,
sinusuong din ang mga hamong dapat pa nating lampasan. Sa ating
bayanihan at sama-samang pagkilos nang may iisang layunin at
direksyong tinutungo, balewala ang banta ng terorismo, mabilis tayong
makakabangon sa hagupit ng kalamidad, at madali nating magagapi ang
mga kalaban nating ayaw makiisa sa ating pagsisikap na matupad ang
pagbabago.

At para sa buong puwersa ng ating hukbong dagat: saludo ako sa

pagtupad ninyo sa inyong tungkuling protektahan ang ating teritoryo,
nariyan man ang mga balakid tulad ng mga pinaglumaang barko at
kakulangan sa ilang mahahalagang kagamitan. Asahan po ninyong doble-
kayod din ang inyong gobyerno upang makahanap pa ng maiinam na
paraan upang mapabuti ang mga ito at maipagpatuloy ang integridad ng
ating hukbong-dagat.

Malaki ang aking kumpiyansa na habang pinapalakas natin ang inyong

hanay at isinasaayos ang inyong mga kagamitan, patuloy ninyong
mapapangalagaan ang kaligtasan ng ating karagatan, lalo na sa mga
isinasagawang petroleum exploration sa Kalayaan Island Group,
Malampaya, Palawan, Mapun at Sulu. Patunay ito sa malaking ambag ng
inyong hukbo, hindi lamang sa aspektong pangkaligtasan ng ating bansa,
kundi maging sa pagpapalakas sa potensyal ng ating pambansang
ekonomiya.

Hindi kailanman masusuklian ng anumang halaga ang inyong

pagsusumikap na ipagtanggol ang ating bayan. Kaya naman pinipilit nating
makabawi sa inyong sakripisyo, sa abot ng ating makakaya. Kaya naman
po hindi lamang bagong taon ang ipinagdiwang ng mga sundalong
rumeresponde sa mga lugar na balot pa rin ng tensyon. Sumalubong din
po sa kanila ang karagdagang combat allowance na nagkakahalaga ng
260 pesos. Sa madaling sabi, kapag ipinatong ito sa kasalukuyang 240
pesos na combat pay, limandaang piso na po ang matatanggap na
kabuuang sustento ng ating magigiting na sundalong nagtataya ng
kanilang buhay sa pagsabak sa mga combat operations. Muli, kakarampot
lamang po ito kung itutumbas sa inyong mga sakripisyo. Pero kung may
paraan naman po tayong dagdagan ang inyong benepisyo, bakit naman po
namin ito ipagdadamot sa inyo, hindi po ba? At tuloy-tuloy na po ito. Mula
sa armas, hanggang sa mga barko; mula sa mga benepisyong
pangkalusugan, hanggang sa mga pabahay, titiyakin nating
makakatanggap ng sapat na pabuya at sustento ang ating hukbong-dagat.
Sa ating panunungkulan, sinisikap nating muling buhayin sa lahat ng
kawani ng gobyerno ang ating panata para sa mabuting pamamahala. Sa
pagharap natin sa panibagong taon at panibagong pamumuno sa inyong
hanay, manatili sanang maging gabay natin ang nasilayan nating liwanag
ng pag-asa buhat nang tahakin natin ang tuwid na daan. Sa
pagpapaningas pa ng liwanag na ito, unti-unti nating nahahawi ang
kadiliman kung saan namayani ang panganib dulot ng katiwalian at
kahirapan. Nasa katayuan na tayo upang mangarap muli, nasa atin na ang
epektibong sandata upang magwagi: ang tuluyang maibalik ang nawalang
tiwala ng publiko sa ating kakayahang paunlarin ang bayan. Nawa’y huwag
nating bibiguin muli ang mga Pilipino. Sa gabay ng liwanag, sama-sama
nating muling ibangon ang dangal ng ating hukbong pandagat, ng
sandatahang lakas at ng sambayanang Pilipino.

Maraming salamat at mabuhay po tayong lahat.

...

Department of National Defense - Philippines