Talino o diskarte: Replektibong Sanaysay sa Pelikulang Bad Genius
Ang Bad Genius ay isang pelikula na galing sa Thailand kung saan umiikot ang isyu ng pangonopya o pandaraya sa eskwelahan. Natural lang sating mga studyante ang mangopya, ngunit may mga panahon na nagiging abusado tayo dahil narin sa hangarin na makapasa at magkaroon ng mataas na grado. Ang sabi nga ng iba na “daig ng madiskarte ang matalino.” Kay ba’t nangongopya tayo para malamangan o mapantayan ang mga matatalino? Isa ngang sikat na diskarte ng mga studyante ang panggongopya, may mga ilan nga na nakakagraduate dahil lang sa pangongopya yung iba may honor pa. Hindi naman natin sila masisisi kung bakit sila ganun may iba na gusto lang makapagtapos, yung iba gusto lang na maabot yung inaasahan ng mga magulang nila, may iba na ayaw malamangan, at may iba na natukso lang. Ngunit sapat nga ba iyon na rason para mangopya na lang at umasa sa kaklase o sa kodigo? Hindi ba’t mas masarap sa pakiramdam ang makakuha ng mataas ng grado dahil sa pagsisikap. Sabi nga ng mga guro na ang pangongopya o pandaraya ay madadala mo hanggang sa paglaki, darating sa punto na hindi mo na makokontrol ang sarili mo sa pangongopya dahil ang nais mo’y maging lamang, maging una, at hindi madismaya ang iyong mga magulang. Ganoon ang nangyari sa pelikula, gumawa pa sila ng mga komplikadong kodigo para lamang di mahalata, ngunit lahat ng sikreto ay nabubunyag at lahat ng kasalanan ay may kaakibat na kaparusahan. Ipinapakita ng pelikula kung paano nakakasilaw ang pera at kung pano lumalala ang kopyahan. Maaring sa una ay isa lamang simpleng kopyahan lang ngunit patagal na patagal dahil na rin sa kasakiman ay nagiging sakit na ito. Tandaan na lahat tayo ay may hangad na maging matagumpay sa buhay, bagamat mahirap ito makamit hindi parin sapat na rason ang mandaya. Mas masarap pa rin isipin na napagtagumpayan mo ang isang bagay dahil tapat at totoo ka.