Teṣṣuni; ffɣen-d warrac seg uɣerbaz, gar-asen Ɛumar d Yeḥya.
ƐUMAR: Ɣiwel, ɣiwel, uqbel ad aɣ-yernu ssaɛa uselmad.
YEḤYA: (Yettazzal) Aql-i ttazzaleɣ d ayen i d iḍarren-iw, kkawent tgecrar-iw. ƐUMAR: Leɛnaya n Rebbi ma ur d-tenniḍ i wacu-tt leqraya-ayi ? D aḍegger kan n lweqt. D acu i nessen, yal ass d lmerqa-nni kan i d-yettuɣalen, ɛyiɣ deg-s. YEḤYA: Awaaah nekk teffeɣ fell-i, yeɛǧeb-iyi lḥal. ƐUMAR: Leɛnaya n Rebbi ma ur d-tenniḍ d acu i tḥemleḍ deg uɣerbaz-a ? YEḤYA: Ḥemleɣ mi ara iyi-d-yesker uselmad ɣer tfelwit, ḥemleɣ mi ara iyi-d-yini igerrez, rennuɣ-as s ɣur-i nezzeh. I kečč d acu i tḥemleḍ? ƐUMAR: Ḥemleɣ mi ara d-yini jemɛet dduzan-nwen, ḥemleɣ mi ara d-yini ur teqqarem ara azekka, azekka d asunded (Yettaḍsa). (Asunded= la grève) YEḤYA: Ala a Ɛumar nekk yenna-iyi baba leqraya d tafat n uderɣal, d nettat i d tacemmaɛt n ddunit. ƐUMAR: Leɛnaya n Rebbi ma ur d-tenniḍ amek ara teɣreḍ ? Ilaq ad teɣreḍ iwakken ad txeḍmeḍ, akken ad tesɛuḍ idrimen, nekk baba yesɛa idrimen ur qqareɣ, ur xeddmeɣ. Lḥasun fkiɣ-ak aqrab-a, ccix-nni dɣa tikkelt ad ak-yejbed imeẓẓuɣen-ik ; tikkelt d anzaren-ik, tikkelt ad yeccencew acebbub-ik yesserwa-aɣ lemṛaṛ. YEḤYA: Nniɣ-ak a Ɛumar axir-ak ad teɣreḍ, ulac i yifen leqraya. Yerna, ur ttkal ara ɣef baba- k. ƐUMAR: Nniɣ-ak a Yeḥya axir-ak ruḥ tixxer-d. YEḤYA: Bru i wawal-a, leqraya d tasarut n ddunit-ik, d nettat ara ak-yeldin akk iberdan n uzekka; tamussni d tafat. D acu i yeḥwaǧ uɛebbuḍ-ik; d aman akked wučči; akken ula d allaɣ- ik, i yeḥwaǧ d tamussni. Ihi xemmem, ḥebber i uzekka. Nniɣ-ak: “Tamussni d tafat”(…).
Sɛidun yugurten, Agellil d umerkanti,
Asqamu unnig n timmuzɣa, 2011.
I) Tigzi n uḍris (6/6):
1- D acu-t wanaw n uḍris-a? (1) 2- Ekkes-d seg uḍris asizwer. (1) 3- Ekkes-d seg uḍris snat tsegza. (1) 4- D acu-t usentel amatu n uḍris-a? (1) 5- D acu n temsirt i nezmer ad d-nekkes seg umeslay n yeḥya i ɛumar? (1) 6- sufeɣ-d iwudam yellan deg uḍris. (1) Iferdisen n tutlayt: (6/6) 1- Err tanfalit-a ɣer yinaw arusrid: (1) Yanna-as ɛumar: “Nniɣ-ak a Yeḥya, axir-ak ruḥ tixxer-d” 2- Sleḍ ilmend n talɣa d twuri tafyirt-a: (3) -Yeqqar deg tesnawit. 3- Err tafyirt-a ɣer tibawt: “ilaq ad teɣreḍ”. (1) 4- sufeɣ-d seg uḍris amyag deg wanaḍ aḥerfi. Err-it ɣer wanaḍ ussid. (1) II) Asenfali stira (8/8): Tamurt-a ur terri ara azal i umezgun, drus anida ara d-tafeḍ axxam n umezgun. Yerna, wid yellan qnen ɣef teɣzi n useggas. Ahat tuget seg yemdanen ur t-ssinen ara. Deg kra n yijerriden, aru-d aḍris imesfukel (yiwet n turda) i deg ara d-temleḍ d acu-t umezgun, d acu-tt temlilt-is deg tmetti, d acu-ten yibuɣar-is (lfayda deg-s). Ger tamawt: ilaq ad teddud ilmend n tɣessa n uḍris imesfukel. Afud igerzen