Kapistahan ng Kristong Hari. Ang isang hari sa ating pagkakaunawa ay makapangyarihan, mayaman, at may aliping sa kanya ay nagsisilbi. Ngunit sa ating ebanghelyo, ang Haring tinutukoy ay walang makamundong kapangyarihan, walang pag aari, walang alipin. Sapagkat si Hesus na ating Hari ay higit na makapangyarihan sa lahat, ngunit may pusong bukas upang magmahal, may awa at handang magpatawad. Siya ay Hari na nagbibigay ng pag asa, kapahingahan at katotohanan. Hinahamon tayo ng Mabuting Balita, masasabi mo bang may pananalig ka na si Hesus ang Kinikilala mong Hari? Na si Hesus ang naghahari sa iyong buhay? Handa ka ba na ibahagi ang mensahe ni Kristong Hari sa iyong kapwa? Kapag nadama ng ating kapwa ang pagmamahal ni Kristo sa pamamagitan ng ating mga gawa, tunay nga na si Kristo ay naghahari sa ating buhay at puso. Magnilay po tayo.
Panginoong Hesus, ikaw ang Hari ng Katotohanan at
Buhay. Patawarin mo nawa ang aming isipan, salita, o gawa na nakasakit sa aming kapwa. Panginoon, kaawaan mo kami! Panginoong Hesus, ikaw ang Hari ng Kabanalan at Biyaya. Patawarin mo ang aming mga kasalanang materiyalismo, kasakiman, at kapalaluan. Kristo, kaawaan mo kami! Panginoong Hesus, ikaw ang Hari ng Katarungan, Pag- ibig, at Kapayapaan. Patawarin mo ang aming mga pagiging dimakatarungan, pagkamuhi, at kapusukan. Panginoon, kaawaan mo kami! Kristo, aming Banal na pastol, tipunin mo sa iisang kawan ng Simbahang iyong itinatag, ang iyong mga tagasunod buhat sa bawat bayan. Manalangin tayo! Kristo, aming Tagapagligtas, gabayan mo ang Santo Papa sa kanyang misyong pagalingin ang mga maysakit, hanapin ang mga naliligaw at palakasin ang mga nanghihina. Manalangin tayo! Kristo, hukom ng lahat ng tao, ilagay mo nawa kami sa iyong kanan, upang manahin namin ang Kahariang inihanda na para sa amin sa pagsisimula pa man ng mundo. Manalangin tayo! Kristo, Prinsipe ng Kapayapaan, lipulin ang mga sandata ng digmaan, at turuan ang mga taong mamuhay nang maayos, at nang may pag-galang at pakikipagtulungan sa isa’t isa. Manalangin tayo! Kristo, na una sa mga yumao, ihatid mo nawa ang lahat ng namatay na nananalig sa iyong awa sa kaluwalhatian ng muling pagkabuhay. Manalangin tayo! Dakilang Hari, lubos at taos puso po ang aming pasasalamat sa walang pagmaliw mong paghahari sa aming buhay. Sa pagbibigay mo sa aming ng mga biyaya, kabuhayan at buhay na may pag asa. Parang ilog na patuloy na umaagos at dumadaloy ang iyong pag ibig sa lahat ng iyong mga nilikha. Salamat sapagkat ipinapadama mo sa amin ang lakas ng iyong kapangyarihan na di kami matitinag basta kami ay nakakapit sa iyo at ikaw ang naghahari sa lahat ng aming mga gawa at salita. Salamat sa katawan at dugo ni Hesus, ang Hari na nag alay ng sarili para sa amin, sa pagtanggap namin ng kanyang katawan nawa ay manatili siya at di lumisan kalian man upang ang aming katauhan ay si Hesus ang masilayan. Salamat sa aming butihing Pari Fr. Sunny ang ehemplo ng isang tunay na paglilingkod. Sa lahat po ng mga taong aming kasama ngayon. Salamat po Ama. Amen.